BUKU YI NZAIKUSU

1 Bimona mesu bi Yesu Klistu bio Nzambi kanzabikisa, muingi kumonisa bisadi biandi mambu mambelama kumonika. Nandi wufila mbasi’andi ayi mu nzila mbasi beni, wumonisa bimona mesu beni mu bidimbu kuidi kisadi kiandi Yoane, 2 no wuvana kimbangi ki mambu Nzambi katuba, ayi mvandi kimbangi ki mambu Yesu Klistu katuba, ngete ki mambu moso nandi kamona. 3 Mayangi kuidi mutu wuntanga mu mbembu yinangama ayi wunkuwa mambu madi mu mbikudulu ayiyi, ayi wuntumukina mawu, kibila thangu basikika yima fuana.

4 Minu Yoane, yinsonikina kuidi sambuadi di bimvuka bidi ku divula di Azia:

Bika mamboti malutidi ayi ndembama yi “Mutu no widi, no wuba, ayi no wunkuiza” ayi yi sambuadi di ziphevi* zidi vantuala kikundu kiandi ki kimfumu, 5 ayi yi Yesu Klistu “Mbangi Yikuikama,” “mutu wutheti mu bafua” ayi widi “Mfumu wu minyadi mioso va ntoto” yiba yinu.

Mutu no wutuzolanga ayi no wutukula mu masumu, mu nzila menga mandi veka, 6 no wutuvana kiyeku ki kuba mintinu ayi zinganga nzambi kuidi Tat’andi Nzambi, ngete, bika katambula nkembu ayi mangolo ma mvu ka mvu. Amem.

7 Talanu! Nandi wala kuizila mu matuti, ayi batu boso bala kummona, kubunda mvandi batu bantobula mu kusadila dionga, ayi mimvila mioso va ntoto, bala ba mu kiunda mu kibila kiandi. Amem.

8 “Minu yidi Alfa ayi Ômega”* butubidi Yave Nzambi, “mutu widi, no wuba ayi no wunkuiza, Nkua Ngolo Zioso.”

9 Minu khomb’inu Yoane yimviokila yinu mu ziphasi, ayi yala ba yinu mu kintinu va kimueka na Yesu, yiba mu buvika ku kiseki ki Patamu mu kibila ki kulonga matedi Nzambi, ayi matedi Yesu. 10 Mu thuadusulu yi phevi yinlongo, minu yiba mu kilumbu ki Mfumu, ayi yiyuwa kumbus’ama mbembu yinangama yiba buka biyoko bi tulumbeta, 11 ayi mbembu beni yaba tuba: “Sonika mu buku mambu moso widi mu kumona, ayi fila mawu kuidi sambuadi di bimvuka abibi: Efeso, Esmirna, Pelegamu, Tiatila, Sardes, Filadelfia ayi Laodiseia.”

12 Minu yibalula thalu muingi yimona nani waba koluka yami, ayi bo yibaluka, yimona sambuadi di biuma bantetikanga minda bivangulu mu wola, 13 ayi va khati biuma beni bantetikanga minda, vaba mutu wumueka widi buka muana mutu, wuvuata dizuela diaba tuka nati mu bitambi, ayi wuzinga phonda yivangulu mu wola va ntima. 14 Minlengi mioso ku ntu’andi miba miphembi buka minsinga miphembi,* mvandi miba buka dibungi* ayi mesu mandi maba buka nlaki wu mbazu, 15 bitambi biandi biba buka cobre yiviokila ku mbazu, ayi mbembu’andi yiba buka lusuku lu nlangu wunkumba. 16 Ayi nandi wuba sambuadi di zimbuetila va koko ku lubakala, va munu’andi vaba mbedi yikula balengula mu zikhonzu zia ziwadi, ayi kizizi kiandi kiaba lezama buka muinya wungolo. 17 Ayi bo yimmona, minu yibua vantual’andi buka mutu wufua.

Bosi nandi wutsimba mu koko kuandi ku lubakala ayi wukhamba: “Bika kumona boma. Minu yidi Mutu Wutheti ayi Mutu Wutsuka, 18 no widi wumonyo. Minu yibedi wufua vayi bubu yeka wumonyo muingi kuzinga mvu ka mvu, ayi zitsabi zi lufua ayi zi dibumbi zidi yami. 19 Diawu, sonika mambu ngie bemona, madi mu kumonika bubu, ayi mambu moso mala monika bo mambu amomo mala vioka. 20 Ayiyi yawu tsundu yi masuama manlongo matedi sambuadi di zimbuetila bemona mu koko kuami ku lubakala, ayi matedi sambuadi di biuma bantetikanga minda bivangulu mu wola: sambuadi di zimbuetila zinsundula, zimbasi zi sambuadi di bimvuka, ayi sambuadi di biuma bantetikanga minda binsundula, sambuadi di bimvuka.

2 “Sonikina mambu amama kuidi mbasi yi kimvuka ki Efeso. Mutu no widi sambuadi di zimbuetila va koko ku lubakala, ayi widi va khati sambuadi di biuma bantetikanga minda bivangulu mu wola, nandi widi mu kutuba mambu amama: 2 ‘Yizebi mavanga maku, kisalu kiaku kingolo ayi kukindama kuaku, mvandi yizebi ti ngie wukikininanga ko batu bamvanganga mambu mambi baba va khati’aku, ayi wumfionguninanga batu bantubanga ti badi bapostolo, vayi basiawu ko mu bukiedika, ayi wumueni ti bawu badi bankua luvunu. 3 Ngie widi mu kukindama kheti mu mambu mawombo maphasi wumviokila mu kibila ki dizina diama, ayi wisimvonga ko. 4 Vayi, yeku sembila mu diambu adidi: ngie wubika kubue monisa luzolo waba monisanga va thonono.

5 “‘Diawu, yindula mu phila mabuila, balula mavanga maku ayi vutuka kubue vanga mambu waba vanganga va thonono. Kibila ngie kukhambu vanga mawu, yala kuiza kuidi ngie ayi yala botula kiuma kiaku bantetikanga minda. 6 Vayi adidi diawu diambu dimboti widi mu kuvanga: ngie wunlendanga malongi ma dingumba di Nikolau, no minu mvama yinlendanga. 7 Woso widi matu, bika kayuwa mambu phevi yinkamba kuidi bimvuka: Woso wala nunga, yala kumvana luaku lu kudia makundi ma nti wu luzingu, wo widi ku paladizu yi Nzambi.’

8 “Sonikina mambu amama kuidi mbasi yi kimvuka ki Esmirna. ‘Mutu wutheti ayi wutsuka,’ no wufua ayi wuvutuka kubue zinga, nandi widi mu kutuba mambu amama: 9 ‘Yizebi ziphasi widi mu kuviokila, ayi kukhambu kuaku ku mbakulu, vayi kheti bobo ngie widi kimvuama mu kiminu. Yizebi mvandi ti ba kufinganga kuidi batu bantubanga ti badi basi Yuda, vayi basiawu ko mu bukiedika: bawu badi dingumba di Satana. 10 Bika kumona boma mambu wembelama kuviokila. Kibila Nkadi’ampemba wala tatamana kutula bawombo mu benu mu buloku, muingi ku luthota mu ziphila zioso, ayi benu luala viokila mu ziphasi mu kumi di bilumbu. Vayi banu bakuikama nati ku lufua, ayi minu yala kuluvana kolowa yi luzingu. 11 Woso widi matu, bika kayuwa mambu phevi yinkamba kuidi bimvuka: Woso wala nunga, kalendi bue viokila ko mu lufua lummuadi.’*

12 “Sonikina mambu amama kuidi mbasi yi kimvuka ki Pelegamu. Mutu no widi mbedi yikula yilengulu mu zikhonzu zia ziwadi, nandi widi mu kutuba mambu amama: 13 ‘Minu yizebi kuidi ngie wunkalanga, mawu mansundula, kibuangu kidi kikundu ki Satana. Vayi ngie wuntatamana wukuikama mu minu, ayi wusa manisa ko kiminu kiaku mu minu, kheti mu bilumbu bi Antipa mbangi’ama wukuikama, no bavondila ku divula dinu, kibuangu kio Satana kankalanga.

14 “‘Vayi, yeku sembila mu diambu adidi: ngie wunlundanga batu bankikininanga malongi ma Balaão, no wulongisa Balaki kuvukumuna basi Isaeli, muingi badia biuma bavana banga minkhailu kuidi bitumba ayi babua mu mambu ma butsuza. 15 Mvandi, ngie wumvitikanga batu va khati’aku, bankikininanga malongi ma dingumba di Nikolau. 16 Diawu, balula mavanga maku. Kibila ngie kukhambu vanga mawu, yala kuiza kuidi ngie mu nsualu, ayi kuba nuanisa mu kusadila mbedi yidi va munu’ama.

17 “‘Woso widi matu, bika kayuwa mambu phevi yinkamba kuidi bimvuka: Woso wala nunga, yala kumvana maná masuama, ayi yala kumvana mua dimanya diphembi, didi disonama dizina dimona, dio ni mutu kakhambu zaba, kubotula kuandi to no wala tambula diawu.’

18 “Sonikina mambu amama kuidi mbasi yi kimvuka ki Tiatila. Muana Nzambi no widi mesu buka minlaki mi mbazu, ayi no widi bitambi buka cobre yiviokila ku mbazu, nandi widi mu kutuba mambu amama: 19 ‘Yizebi mavanga maku, luzolo luaku, kiminu kiaku, kisalu kiaku ayi kukindama kuaku. Mvandi yizebi ti mavanga mamboti widi mu kumonisa bubu, malutidi kena mo wumonisa va thonono.

20 “‘Vayi, yeku sembila mu diambu adidi: ngie wuntalanga kuaku nkietu wunani Yezabeli, no wuntubanga ti widi ḿbikudi, nandi wunlonganga ayi wumvukumunanga bisadi biama, mu kuba vanga babua mu mambu ma butsuza, ayi kudia biuma bavana buka minkhailu kuidi bitumba. 21 Minu yimvana thangu muingi kabalula mavanga mandi, vayi nandi mengi kubalula mavanga mandi ma butsuza. 22 Diawu, yembelama kumbuisa va kika ki kimbevu, ayi batu boso bamvanganga yandi kiphinga, ba kukhambu balula mavanga mawu, yala kuba tuadisa ziphasi zingolo. 23 Ayi yala vonda bana bandi mu kuba tuadisa kimbevu kingolo. Mu phila ayoyo, bimvuka bioso biala zaba ti, minu yimfionguninanga mabanza ayi mayindu ma tsi ntima, ayi yala fundisa kadika mutu mu kutadila mavanga mandi.

24 “‘Vayi, yinkamba kuidi bankaka mu benu muidi mu kimvuka ki Tiatila, benu mukhambu landakananga malongi ma Yezabeli, ayi “malongi* ma luvunu ma Satana,” ti: Yisintomba ko ku lukuika luvanga mambu mankaka. 25 Vayi, tatamananu kusimbidila biuma bimboti muidi, nati minu yala kuiza. 26 Ayi woso wala tatamana kudiatila mu zinzila ziama, ayi wala nunga nati ku tsuka, yala kumvana kimfumu ki kuyala mimvila, 27 dedi bo minu yitambudila kimfumu kuidi Tat’ama. Nandi wala tuadisa batu beni mu lusuadi lu kisengu, dedi bo nsungi kantuadisilanga mamemi. Ayi wala kuba tulula dedi bo buntulukilanga bibasa. 28 Ayi minu yala kumvana mbuetila yimmonikanga ava thangu kubasika. 29 Woso widi matu, bika kayuwa mambu phevi yinkamba kuidi bimvuka.’

3 “Sonikina mambu amama kuidi mbasi yidi ku kimvuka ki Sardes. Mutu widi sambuadi di ziphevi zi Nzambi ayi sambuadi di zimbuetila, nandi widi mu kutuba mambu amama: ‘Yizebi buboti mavanga maku ayi ngie widi wuzabakana buka mutu widi wumonyo, vayi widi kuaku wufua. 2 Ba wukotuka ayi kindisa batu* bakhidi yaku ayi baba belama kufua, kibila minu yimueni ti ngie wusa vanga ko buboti kisalu kiaku va ntuala Nzambi. 3 Diawu, tatamana kutebukilanga moyo biuma wutambula ayi mambu wuyuwa, lunda biawu ayi balula mavanga maku. Kibila ngie kukhambu vanga mawu, yala kuiza buka muivi ayi ngie walasa zaba ko thangu yala kuizila.

4 “‘Vayi bankaka ku Sardes basa bifisa ko mazuela mawu, ayi bawu bala diata yama na mazuela maphembi, kibila badi bafuana. 5 Woso wala nunga, mvandi wala vuata mazuela maphembi, ayi minu yalasa kubula ko dizina diandi mu buku yi luzingu, vayi yala tebukila moyo dizina diandi va ntuala Tat’ama ayi va ntuala zimbasi ziandi. 6 Woso widi matu, bika kayuwa mambu phevi yinkamba kuidi bimvuka.’

7 “Sonikina mambu amama kuidi mbasi yidi ku kimvuka ki Filadelfia. Mutu widi wunlongo ayi wukiedika, no widi tsabi yi Davidi ayi no wunzibulanga muelu muingi ni mutu wunkaka kabika kuzibika, ayi no wunzibikanga muelu muingi ni mutu wunkaka kabika kuzibula, nandi widi mu kutuba mambu amama: 8 ‘Yizebi buboti mavanga maku—tala, yibe kuzibudila muelu wo ni mutu kalendi zibika ko. Yizebi ti ngie wutumukini mambu mami, ayi wumonisini lukuikumunu mu dizina diama kheti wisi ko beni mangolo. 9 Tala, minu yala vanga muingi batu badi mu dingumba di Satana—bo bantubanga ti badi basi yuda vayi basi ko basi yuda ayi bantubanga luvunu,—biza ayi bafukama va ntual’inu ayi yala kuba monisa ti minu yiluzolanga. 10 Mu kumona ti benu luidi mu kulandakana kifuani kiama mu matedi kukindama, minu mvama yala ku lutebukila moyo mu ziphasi ziala monika va ntoto wumvimba, ziala thota batu boso banzinganga va ntoto. 11 Yidi mu kukuiza mu nsualu. Diawu tatamana kusimbidila biuma bidi yaku, muingi ni mutu kabika bonga kolow’aku.

12 “‘Woso wala nunga, yala kunkitula dikunzi di tempelu yi Nzambi’ama ayi nandi kalasa botuka ko vana. Yala sonika dizina di Nzambi’ama ayi dizina di divula di Nzambi’ama, Yelusalemi Yimona yimfumina ku diyilu kuidi Nzambi’ama ayi mvandi yala sonika dizina diama dimona va mbulu’andi. 13 Woso widi matu, bika kayuwa mambu phevi yinkamba kuidi bimvuka.’

14 “Sonikina mambu amama kuidi mbasi yidi ku kimvuka ki Laodiseia. Amem, mbangi yikuikama ayi yikiedika, kivangu kitheti ki Nzambi, nandi widi mu kutuba mambu amama: 15 ‘Minu yizebi buboti mavanga maku, ayi yizebi ti ngie wisi ko wukiozi ayi wisi ko wumbazu. Vayi minu yintomba wuba wukiozi voti wumbazu. 16 Mu kumona ti ngie wisi ko wukiozi ayi wisi ko wumbazu, diawu yinkuiza kulukila. 17 Mu kuzaba ti ngie wuntubanga mambu amama: “Minu yidi kimvuama, yibakizi busina buwombo yisi bue tomba ko ni kiuma,” vayi ngie wusa zaba ko ti widi mutu wuphamba, wulebakana, wisi ko mbakulu, widi phovo ayi widi pheni nkua. 18 Vayi yiku kindisa wusumba kuidi minu wola yiviokila ku mbazu muingi wuba busina. Sumba bikhutu biphembi muingi wuvuata, ayi wubika fua tsoni yi pheni nkua ayi sumba bilongo bi kudakisa mu mesu, muingi wumona buboti.

19 “‘Minu yinsembanga ayi yimvananga malongi kuidi baboso yinzolanga. Diawu ba kifuza ayi balula mavanga maku. 20 Yuwanu! Minu yidi va muelu ayi yidi mu kukokuta wawu. Woso wunkuwa mbembu’ama ayi wunzibula muelu, minu yala kota ku nzo’andi ayi yala dia yandi va kimueka va builu. 21 Woso wunnunga, yala kumvana luaku lu kukala yama va kimueka va kikundu kiama ki kimfumu, dedi bo minu yinungina ayi yikadila na Tat’ama va kikundu kiandi ki kimfumu. 22 Woso widi matu, bika kayuwa mambu phevi yinkamba kuidi bimvuka.’”

4 Bo mambu amomo mavioka, minu yimona diyilu kuzibuka ayi yiyuwa mbembu yi mutu wutheti, yiba buka biyoko bi tulumbeta, waba koluka yama ayi wukhamba: “Maka akuku, ayi minu ye kumonisa mambu mambelama kumonika.” 2 Bosi, mu thinu yiyiza ba mu thuadusulu yi phevi yinlongo ayi yimona kikundu ki kimfumu ku diyilu, ayi mutu no wuba wukala vana. 3 Mutu no wuba wukala va kikundu beni, kizizi kiandi kiba buka jaspe ayi sárdio. Ayi va khonzu kikundu beni vaba nkiami waba lezama buka esmeralda.*

4 Ayi va ndeku kikundu beni vaba 24 di bikundu, ayi mu bikundu beni, yimona 24 di bakulutu baba bakala muawu, bawu bavuata mazuela maphembi ayi zikolowa ziwola. 5 Va kikundu beni ki kimfumu vaba basikila zitsiemu, zimbembu ayi bidumu. Vaba mvandi sambuadi di minda mi mbazu mitatama va ntuala kikundu. Minda beni minsundula sambuadi di ziphevi zi Nzambi. 6 Va ntuala kikundu beni vaba kiuma kiaba monikina buka ḿbu, kiaba lezama buka cristal.*

Va khati tsika ayi mu ndambu kikundu beni, vaba bivangu binna biba mesu mawombo, kuntuala ayi kumbusa. 7 Kivangu kitheti kiba buka khosi, kimmuadi kiba buka muana ngombi, kivangu kintatu kizizi kiandi kiba buka ki mutu, ayi kivangu kinna kiba buka mbemba.* 8 Kadika kivangu kiba mavavi ma sambanu, ayi mu zikhonzu zioso, muba mesu. Builu ayi muinya biaba tatamana kutuba: “Wanlongo, wanlongo, wanlongo Yave Nzambi, Nkua Ngolo Zioso, no wuba, no widi ayi no wunkuiza.”

9 Kadika khumbu bivangu abiobio bimvana nkembu, nzitusu ayi bintonda No widi wukala va kikundu ki kimfumu, ayi No wunzinganga mvu ka mvu, 10 24 di bakulutu, bamfukamanga va ntuala Mutu no widi wukala va kikundu ki kimfumu, bambuongiminanga No wunzinganga mvu ka mvu, ayi bantulanga zikolowa ziawu va ntuala kikundu beni, ayi bantubanga: 11 “Yave Nzamb’itu, ngie widi wufuana mu kutambula nkembu, nzitusu ayi mangolo, kibila ngie wuvanga biuma bioso, ayi mu luzolo luaku muawu biawu bivangulu ayi biyizila.”

5 Minu yimona mu koko ku lubakala ku Mutu wukala va kikundu ki kimfumu, nkanda widi wusonama mu zikhonzu zia ziwadi, wuba wuzibama mu tsambuadi di makolo.* 2 Yimona mvandi mbasi widi beni mangolo ayi nandi wutuba mu mbembu yinangama: “Nani widi wufuana muingi kuzibula nkanda ayi kukutula makolo madi muawu?” 3 Vayi ni mutu ku diyilu, va ntoto, ni ku tsi ntoto wuba wufuana muingi kuzibula nkanda beni ayi kumona mambu maba muna. 4 Minu yitona kudila, kibila vasa ba ko ni mutu wuba wufuana muingi kuzibula nkanda beni ayi kumona mambu maba muna. 5 Vayi wumueka mu bakulutu wukhamba: “Bika kudila. Tala! Khosi yidi mu nkuna wu Yuda, lunganzi lu Davidi benunga, ayi nandi widi wufuana muingi kuzibula nkanda ayi kukutula sambuadi di makolo.”

6 Ayi minu yimona va khati tsika kikundu ki kimfumu bivangu binna ayi va khati tsika bakulutu, muana dimemi wuba wutelama waba monikina buka ti wuba wufua, ayi nandi wuba sambuadi di ziphoka ayi sambuadi di mesu. Mesu beni mansundula sambuadi di ziphevi zi Nzambi, zio bafila mu ntoto wumvimba. 7 Mu nsualu muana dimemi beni wufikama ayi wubonga nkanda wuba va koko ku lubakala ku Mutu wuba wukala va kikundu ki kimfumu. 8 Bo nandi kabonga nkanda beni, bivangu binna ayi 24 di bakulutu, bafukama va ntuala Muana Dimemi. Kadika mutu wuba na harpa ayi kibobola ki wola kiba kiwala malasi. (Malasi beni mansundula minsambu mi banlongo.) 9 Ayi bawu baba yola nkunga wumona: “Mfumu widi wufuana, muingi kuzibula nkanda beni ayi kukutula makolo madi muawu, kibila ngiewu wuba wufua ayi mu menga maku, wusumba batu ba mimvila mioso, zimbembu zioso ayi makanda moso muingi baba ba Nzambi, 10 ayi nandi wubavana kiyeku ki kuba mintinu ayi zinganga nzambi zi Nzamb’itu, ayi bawu bala yala ntoto woso.”

11 Bo minu yitala, yiyuwa zimbembu zi zimbasi ziwombo, bazungidila kikundu ki kimfumu, bivangu ayi bakulutu. Thalu mu bawu yiba bivevi na bivevi ayi khama di bivevi ayi khama di bivevi, 12 ayi bawu baba tuba mu mbembu yinangama: “Muana Dimemi no bavonda nandi widi wufuana mu kutambula lulendu, kimvuama, nduenga, mangolo, nzitusu, nkembu ayi lusakumunu.”

13 Ayi minu yiyuwa bivangu bioso ku diyilu, va ntoto, ku tsi ntoto ayi mu ḿbu, ngete, biabioso biaba tuba: “Bika mutu widi wukala va kikundu ki kimfumu ayi Muana Dimemi batambula lusakumunu, nzitusu, nkembu ayi mangolo mvu ka mvu.” 14 Bivangu beni binna biaba tubanga: “Amem!” ayi bakulutu bafukama ayi ba buongimina.

6 Minu yimona bo Muana Dimemi kakutula dikolo ditheti, ayi yiyuwa mbembu yi kivangu kitheti kiaba tuba mu mbembu yinangama buka kidumu: “Yiza!” 2 Yimona mvalu wuphembi. Ayi mutu wuba va mbata mvalu beni, wuba na ḿbasa. Mvandi bamvana kolowa, ayi wuyenda muingi kununga zimbeni ziandi ayi kudukisa mvita.

3 Bo kakutula dikolo dimmuadi, yiyuwa kivangu kimmuadi kutuba: “Yiza!” 4 Ayi vamonika mvalu widi ndimba yi mbazu. Ayi mutu wuba va mbata mvalu beni, bamvana nsua wu kumanisa ndembama va ntoto, muingi batu bavondasana bawu na bawu, ayi bamvana mbedi yikula.

5 Bo kamana kukutula dikolo dintatu, yiyuwa kivangu kintatu kutuba: “Yiza!” Ayi yimona mvalu wunomba. Ayi mutu wuba va mbata mvalu beni, wuba na kizongulu va koko. 6 Yiyuwa mbembu yi mutu yibasikila va khati tsika bivangu binna, waba tuba: “Litro yimueka yi trigu mu denario yimueka, ayi zilitro zitatu zi cevada, mu denario yimueka. Vayi bika kubunga nzeta ayi vinu.”

7 Bo kakutula dikolo dinna, yiyuwa mbembu yi kivangu kinna kutuba: “Yiza!” 8 Ayi yimona mvalu wunkaka wukhambu ndimba. Mutu wuba wukala va mbata mvalu beni, dizina diandi diba Lufua, ayi Dibumbi diaba kunlandakana. Baba vana nsua wu kuvonda ndambu yimueka mu zikhonzu zinna zi ntoto, mu kusadila mbedi, nzala, bimbevu, ayi bibulu bi nganzi bi ntoto.

9 Bo nandi kakutula dikolo dintanu, yimona ku tsi kikumu, menga ma batu bo bavonda mu kibila ki diambu di Nzambi, ayi mu kibila ki kimbangi bavana. 10 Bawu batenduka: “A Mfumu Wulutidi, wunlongo ayi wukiedika, thangu mbi wala fundisila batu banzinganga va ntoto, mu kibila ki menga mitu bawu batengula?” 11 Ayi bavana kadika mutu mu bawu, dizuela diphembi, ayi baba kamba muingi babue vunda mua nkadu, nati bankuiza dukisa thalu yi bisadi yawu, ayi yi zikhomba baba belama kuvondu, dedi bo bawu baba vondila.

12 Minu yimona bo nandi kakutula dikolo di sambanu. Vamonika ndikununu yi ntoto, ayi thangu yiyiza ba kitombi buka nledi wunomba, ngonda yiba buka menga, 13 ayi zimbuetila zibua va ntoto, dedi bo bumbuilanga zifigu zinkuiti,* bo phemu kantukumuna mfigu. 14 Diyilu ba dizinga dedi bo banzingilanga nkanda, miongo mioso ayi biseki bioso, ba bibotula va bibuangu biawu. 15 Bosi mintinu mi ntoto, zimfumu zi masodi, bisina, batu badi mangolo, bisadi bioso, ayi batu boso badi kiphuanza, basuamina mu minsuku mi mamanya, ayi mu mamanya madi mu miongo. 16 Ayi baba kamba miongo ayi mamanya: “Wutu builanu ayi wutu suekanu, muingi Mutu widi wukala va kikundu ki kimfumu ayi Muana Dimemi, babika ku tumona. 17 Kibila kilumbu ki kumonisa nganzi’awu, kima fuana, ayi nani kalenda vuka?”

7 Bosi yimona zimbasi zinna ziba zitelama mu zikhonzu zinna zi ntoto, bawu basimba buboti ziphemu zinna zi ntoto, muingi zibika tulula ntoto, ḿbu ayi ni nti wumueka. 2 Ayi yibue mona mbasi yinkaka yifumina ku khonzu yimbasikilanga muinya, nandi wuba na dikolo dinkaka katambula kuidi Nzambi yimonyo, ayi wutenduka kuidi zimbasi zinna zio bavana nsua wu kutulula ntoto ayi ḿbu: 3 “Bikanu kutulula ntoto, ḿbu, ni minti nati mu thangu bala tula kidimbu ki lunungu va mbulu bisadi bi Nzamb’itu.”

4 Bosi yiyuwa thalu yi batu boso basolu: 144.000, di batu basolu mu minkuna mioso mi bana ba Isaeli:

9 Bosi yimona nkangu wunneni wu batu wo ni mutu kalendi nunga ko kutanga wufumina mu mimvila mioso, minkuna mioso, makanda moso ayi zimbembu zioso, wuba wutelama va ntuala kikundu ki kimfumu ayi va ntuala Muana Dimemi, bawu bavuata mazuela maphembi ayi baba na zingiemvu mu mioko. 10 Ayi baba tenduka: “Phulusu’itu yiyizila kuidi Nzamb’itu, widi wukala va kikundu ki kimfumu ayi kuidi Muana Dimemi.”

11 Zimbasi zioso ziba zitelama ayi ziaba zungidila kikundu ki kimfumu, bakulutu ayi bivangu binna. Bawu bafukama ayi bayinika bizizi biawu va tsi va ntuala kikundu ki kimfumu ayi babuongimina Nzambi, 12 mu kutuba: “Amem! Bika Nzamb’itu wunzinganga mvu ka mvu katambula matondo, nzitusu, nkembu, nzailu, lukinzu, mangolo ayi lulendu. Amem.”

13 Bosi wumueka mu bakulutu wundiuvula: “Abobo banani babe vuata mazuela maphembi, ayi kuidi bama fumina?” 14 Vayi muna thangu beni minu yimvutudila: “A mfumu, ngie wuzebi.” Nandi wukhamba: “Abobo, bawu bama vuka mu ziphasi zingolo. Bawu basukula mazuela mawu, ayi bama diodisa mu menga ma Muana Dimemi. 15 Diawu bawu badidi va ntuala kikundu ki kimfumu ki Nzambi, ayi bamvanganga kisalu kinlongo builu ayi muinya ku tempelu’andi. No widi wukala va kikundu ki kimfumu wala yalumuna tend’andi kuidi bawu. 16 Balasa bue mona ko nzala ni phuila; mvandi muinya wungolo ayi nyufi, bialasa kuba vanga ko bubi, 17 kibila Muana Dimemi no widi va khati kikundu ki kimfumu, wala kuba kengidila ayi wala kuba nata mu zitho zi nlangu wu luzingu. Ayi Nzambi wala fiona matsuela moso mu mesu mawu.”

8 Bo nandi kakutula dikolo di sambuadi, baboso ku diyilu bayiza ba sui, mu makuma tatu di minutu. 2 Bosi yimona sambuadi di zimbasi baba batelama va ntuala Nzambi, ayi baba vana sambuadi di zitulumbeta.

3 Vamonika mbasi yinkaka wusimba kiuma bamvikilanga malasi kivangulu mu wola, bamvana malasi mawombo va kimueka na minsambu mi banlongo, muingi kavika va kikumu kivangulu mu wola, kiba va ntuala kikundu ki kimfumu. 4 Muisi wu malasi mo mbasi kaba vika, va kimueka na minsambu mi banlongo, waba tombuka va ntuala Nzambi. 5 Vayi mu nsualu mbasi beni, wubonga kiuma bamvikilanga malasi, wuwesa kiawu mbazu yiba va kikumu, ayi wukuba yawu va ntoto. Bosi vayiza monika bidumu, zitsiemu, ndikununu yi ntoto ayi vayuwakana zimbembu. 6 Ayi sambuadi di zimbasi beni baba na sambuadi di zitulumbeta ayi baba bakubama muingi kusika ziawu.

7 Mbasi yitheti wusika tulumbet’andi. Vanoka mvula wu mamanya ma gelo ayi bakuba va ntoto mbazu yisobakana na menga; ayi kitini kimueka mu bitini bitatu bi ntoto kivia, kitini kimueka mu bitini bitatu bi minti kivia ayi bititi bioso mvandi bivia.

8 Mbasi yimmuadi wusika tulumbet’andi. Ayi kiuma kidi buka mongo waba lema mbazu, ba kikuba mu ḿbu. Kitini kimueka mu bitini bitatu bi ḿbu kikituka menga. 9 Kitini kimueka mu bitini bitatu bi bivangu bidi mu ḿbu bifua, ayi kitini kimueka mu bitini bitatu bi makumbi kituluka.

10 Mbasi yintatu wusika tulumbet’andi. Ayi vabua mbuetila yinneni yifumina ku diyilu, ayi yaba vika biuma buka mbazu. Yawu yibuila mu kitini kimueka mu bitini bitatu bi mila bidi va ntoto, ayi mu zitho zinlangu. 11 Dizina di mbuetila beni didi Absinto.* Kitini kimueka mu bitini bitatu bi nlangu widi va ntoto kiyiza kituka absinto, ayi batu bawombo bafua mu kibila ki nlangu beni, kibila wawoso wuyiza ba ndudi.

12 Mbasi yinna wusika tulumbet’andi. Ayi kitini kimueka ki thangu, ki ngonda ayi ki zimbuetila kibivusu, muingi kitini kimueka mu biawu kiba kitombi, ayi kitini kimueka mu bitini bitatu bi kilumbu, kiba mvandi kitombi ayi mawu mamonikina builu.

13 Minu yimona mbemba kudumuka ayi yiyuwa yawu kutuba mu mbembu yinangama: “Kiadi, kiadi, kiadi kuidi batu banzinganga va ntoto, mu kibila ki bisiku bi tulumbeta binkhambu, bio zimbasi zitatu bambelama kusika.”

9 Mbasi yintanu wusika tulumbet’andi. Ayi yimona mbuetila yifumina ku diyilu yibua va ntoto, ayi bamvana tsabi yi dibulu di diyenga. 2 Mbuetila beni yizibula dibulu di diyenga, ayi ku dibulu beni kuaba basika muisi, buka muisi wumbasikanga ku fulu yi mbazu. Thangu ayi phemu biyiza ba binomba, mu kibila ki muisi waba fumina ku dibulu beni. 3 Ayi mu muisi beni muaba basika mindedeka* mitembakana va ntoto. Mindedeka beni baba vana wowawu nsua zikhutu zidi va ntoto badi. 4 Ayi baba kamba babika vanga bubi bivatu bidi va ntoto, kuba kuandi bititi, voti minti. Vayi bafueti vanga to bubi kuidi batu bakhambulu kidimbu ki Nzambi va mbulu.

5 Basa vana ko mindedeka beni nsua wu kuvonda batu, vayi wu kuba tovula mu zingonda zitanu. Ayi ziphasi bawu baba tuadisa, ziba buka ziphasi khutu kantuadisanga bo kantebila mutu. 6 Mu bilumbu beni, batu bala tomba lufua, vayi balasa baka ko lufua beni, ayi bawu bala mona tsatu yi kufua, vayi lufua luala kuba tina.

7 Mindedeka beni miaba monikina buka mimvalu mikubama muingi kukuenda mu mvita. Miawu miba zikolowa zivangulu mu wola mu mintu, ayi bizizi biawu biba buka bi batu, 8 vayi minlengi miawu miba buka mi bakietu. Menu mawu maba buka ma zikhosi. 9 Ayi baba nkaku buka nkaku wu kisengu. Lusuku lu mavavi mawu, luba buka lusuku lu makalu bantitika kuidi mimvalu muingi kukuenda mu mvita. 10 Mvandi, minkila miawu midi mua bisengu, buka minkila mi zikhutu. Ayi mangolo ma kuvanga bubi batu mu zingonda zitanu, madi mu minkila miawu. 11 Mbasi yi diyenga, nandi wu kuba tuadisa. Ayi dizina diandi mu kiebeleo didi Abadon, vayi mu kingeleko didi Apolion.

12 Ziphasi zitheti zima vioka. Vayi banu bakotuka! Kibila mambu muadi mankaka ma kiadi, madi mu kukuiza.

13 Mbasi yinsambanu, yisika tulumbet’andi. Ayi yiyuwa mbembu yi mutu yifumina va khati ziphoka zi kikumu ki wola kidi va ntuala Nzambi, 14 yaba kamba kuidi mbasi yinsambanu, no wuba tulumbeta: “Kutula zimbasi zinna zidi zikangama va khonzu muila wunneni wu Eufrates.” 15 Ayi zimbasi zinna zio bakubika mu kibila ki kilokula, kilumbu, ngonda ayi mvu, ba zikutula muingi kuvonda kitini kimueka mu bitini bitatu bi batu.

16 Thalu yi nkangu wu masodi bansadilanga mimvalu, yiba khumbu wadi bivevi na bivevi. Minu yiyuwa thalu beni. 17 Tala phila yimuena mimvalu ayi batu baba bakala mu mimvalu beni: Bawu baba minkaku mibenga buka mbazu, miba mvandi ndimba yi azul buka jacinto, ayi ndimba yi amarela buka mamanya ma mbazu. Mintu miawu miba buka mi zikhosi, ayi mu miunu miawu muaba basika mbazu, muisi ayi mamanya ma mbazu. 18 Kitini kimueka mu bitini bitatu bi batu va ntoto, bafuila mu biuma abibi bitatu: mbazu, muisi, ayi mamanya ma mbazu maba basikila mu munu wu mimvalu beni. 19 Mangolo ma mimvalu beni madi mu munu ayi mu minkila miawu, kibila minkila beni midi buka nyoka, ayi muidi mintu, ayi miawu bansadilanga muingi kuvanga phasi.

20 Vayi, batu bankaka kheti mu kumona ti bankaka bafuila mu biuma abiobio bitatu, kheti bobo bawu basa balula ko mavanga mawu. Basa bika ko kubuongimina ziphevi zimbi, bitumba bi wola, bi palata, bi cobre, bi mamanya, ayi bi mabaya, bio bikhambu monanga, ni kukuwa ayi kudiata. 21 Bawu basa balula ko mavanga mawu, matedi kuvonda, kindoki, butsuza ayi kukuiba.

10 Minu yimona mbasi yinkaka yifumina ku diyilu, ayi wuba wuvuata matuti, ku ntu’andi kuba nkiami ayi kizizi kiandi kiba buka thangu, malu mandi maba buka makunzi ma mbazu, 2 ayi nandi wusimba va koko kuandi mua nkanda wo ba zibula. Nandi wukusula kulu kuandi ku lubakala mu ḿbu, vayi kulu kuandi ku lukietu kuba va disimu, 3 ayi wutenduka buka khosi yimvuma. Bo nandi katenduka, sambuadi di zimbembu zidi buka bidumu, zi yuwakana.

4 Bo sambuadi beni di bidumu biyoluka, minu yaba tomba kusonika mambu yiyuwa, vayi yiyuwa mbembu yinkaka yifumina ku diyilu yaba tuba: “Sueka mambu sambuadi di bidumu bama koluka, ayi bika kusonika mawu.” 5 Mbasi beni no wuba wutelama mu ḿbu ayi va disimu, wuvumuna koko kuandi kulubakala ku diyilu, 6 ayi wuleva phesi mu dizina di Mutu wunzinganga mvu ka mvu, no wuvanga diyilu ayi biuma bidi muawu, ntoto ayi biuma bidi muawu, ḿbu ayi biuma bidi muawu, mu kutuba: “Vasi nkuiza vioka ko beni thangu. 7 Vayi mu kilumbu kio mbasi yi sambuadi kala sika tulumbet’andi, masuama manlongo mo Nzambi kazabikisa buka zitsangu zimboti kuidi mimbikudi miandi, mala salama.”

8 Ayi yiyuwa mbembu yifumina ku diyilu ayi wuyoluka yama khumbu yinkaka, mu kutuba: “Yenda bonga nkanda wo widi va koko ku mbasi no widi wutelama mu ḿbu ayi ku disimu.” 9 Minu yiyenda kuidi mbasi beni ayi yinkamba muingi kaphana mua nkanda beni. Nandi wukhamba: “Bonga ayi dia wawu, wawu wunkuiza ba ndudi mu masasaka maku, vayi mu munu’aku, wunkuiza ba lueki buka wika.”* 10 Minu yibonga mua nkanda beni wuba va koko ku mbasi ayi yidia wawu, mu munu’ami wawu wuba lueki buka wika, vayi bo yimana kudia, masasaka mami mayiza wala ndudi. 11 Bakhamba: “Ngie fueti bue bikula matedi makanda, mimvila, zimbembu ayi matedi mintinu miwombo.”

11 Ayi baphana nkawu wuba buka lusuadi ayi mutu wuphana wawu waba tuba: “Telama muingi wuzonga kibuangu kinlongo kidi ku tempelu yi Nzambi ayi kikumu. Zonga mvandi batu boso badi mu kubuongimina kuna. 2 Vayi, mu matedi kibuangu kidi ku nganda tempelu, bika kuzonga kiawu, kibila bavana kiawu kuidi mimvila ayi bawu bala diatila divula dinlongo mu 42 di zingonda. 3 Yala vanga zimbangi ziama ziwadi bavuata zitsaku, ayi babikula mu 1.260 di bilumbu.” 4 Bawu baku bafuanikisa buka minti miodi mi olive ayi biuma biodi bantetikanga minda, ayi badi batelama va ntuala Mfumu yi ntoto.

5 Woso mutu wummeka kuba vanga bubi, bawu bala basisa mbazu mu miunu miawu, muingi kutulula zimbeni ziawu. Ayoyo, yawu phila yala fuila woso mutu wummeka kuba vanga bubi. 6 Bawu badi nsua wu kuzibika diyilu muingi mvula wubika kubue noka bilumbu bioso bambikula, mvandi badi nsua wu kukitula nlangu menga ayi badi nsua wu kutuadisa va ntoto mintindu mioso mi bimbevu, mu zikhumbu zioso batidi.

7 Bo bala mana kuvana kimbangi, kibulu kinganzi kiala basikila ku diyenga kiala kuba nuanisa, kiala kuba nunga ayi kiala kuba vonda. 8 Bala tula zinyitu ziawu mu nzila yinneni yi divula, dio mu kiphevi bantedilanga Sodoma ayi Ngipiti, kibuangu bavondila Mfumu’awu va dikunzi. 9 Makanda, minkuna ayi mimvila, bala talanga zinyitu beni mu bilumbu bitatu ayi ndambu, ayi balasa vana ko nsua muingi bazika zinyitu beni mu mabumbi. 10 Ayi batu bankalanga va ntoto, bala kuangalala mu kibila kiawu, bala vanga minkungi ayi bala kuyivanasana minkhailu, kibila mimbikudi mia mimiodi amiomio, miaba kuamisanga batu va ntoto mu mambu baba longanga.

11 Bo vavioka bilumbu bitatu ayi ndambu, Nzambi wuba vana phevi muingi babue zinga. Ayi bawu batelama ayi baboso baba mona, baba beni boma. 12 Mimbikudi beni mia mimiodi, bayuwa mbembu yifumina ku diyilu yaba kuba kamba: “Makanu akuku.” Bosi bawu bamaka ku diyilu mu dituti, ayi zimbeni ziawu baba mona. 13 Muna thangu beni, vamonika ndikununu yingolo yi ntoto; ayi kitini kimueka mu kumi di bitini bi divula kituluka, 7.000 di batu bafua mu kibila ki ndikununu yi ntoto beni, ayi bankaka bayiza ba mu boma ayi bazitisa Nzambi yi diyilu.

14 Ziphasi zimmuadi zima vioka. Vayi banu bakotuka, kibila ziphasi zintatu, zidi mu kukuiza mu nsualu.

15 Mbasi yisambuadi yisika tulumbet’andi. Ayi vayuwakana zimbembu ku diyilu ziaba tuba: “Kintinu ki nza kieka Kintinu ki Mfumu’itu ayi ki Klistu, ayi Nandi wala yala mvu ka mvu.”

16 Ayi 24 di bakulutu bo baba bakala va bikundu biawu bi kimfumu va ntuala Nzambi, bafukama bayinika bizizi biawu va tsi ayi batona kubuongimina Nzambi, 17 mu kutuba: “Tuntonda kuidi Yave Nzambi, Nkua Ngolo Zioso, no wuba ayi no widi, kibila matambula kimfumu kiaku ayi matona kuyala. 18 Bo batu ba mimvila bafuema, ngie wumonisa nganzi’aku, ayi thangu yi kufundisila bafua ayi yi kusakumunina bisadi biaku, mimbikudi, banlongo, ayi bo bankinzikanga dizina diaku, kuba kuandi batu baphamba voti batu ba luvalu, ayi thangu yi kutulula batu bambivisanga ntoto, yima fuana.”

19 Bosi kibuangu kinlongo ki tempelu yi Nzambi ku diyilu kizibuka, ayi kasu yi luwawanu yimonika ku kibuangu kinlongo ki tempelu’andi. Ayi vayiza monika zitsiemu, ndikununu yi ntoto ayi mvula yi mamanya ma gelo, mvandi vayuwakana zimbembu ayi bidumu.

12 Bosi vamonika kidimbu kinneni ku diyilu: vamonika nkietu mueka wuba wuvuata thangu, ngonda yiba ku tsi bitambi biandi, ayi nandi wuba kolowa yidi 12 di zimbuetila ku ntu. 2 Nandi wuba buemba, ayi bo kaba belama kubuta, waba tenduka mu kibila ki mianga.

3 Vamonika kidimbu kinkaka ku diyilu: vamonika dalago yinneni yiba ndimba yi mbazu, dalago beni yiba sambuadi di mintu, ayi kumi di ziphoka. Ayi mu mintu miandi, muba sambuadi di zikolowa. 4 Nkil’andi wukulumuna kitini kimueka mu bitini bitatu bi zimbuetila zidi ku diyilu, ayi wukuba ziawu ku wanda. Dalago beni wuyiza telama va ntuala nkietu no waba belama kubuta, muingi bo nandi kambuta, kabaka bu kundila muana.

5 Ayi nkietu beni wubuta muana wu dibakala, no wala tuadisa mimvila mioso mu kusadila lusuadi lu kisengu. Ayi mu kinzimbukulu, banata muana beni mu thinu va kikundu ki kimfumu ki Nzambi. 6 Ayi nkietu beni wutina ku thandu, ko kuidi kibuangu bankubikila kuidi Nzambi, ayi ko bankuiza mvanina bidia mu 1.260 di bilumbu.

7 Ayi vayiza monika mvita wunneni ku diyilu: Misiela ayi zimbasi ziandi, baba nuanisa dalago, ayi dalago na zimbasi ziandi, mvandi baba nuana. 8 Vayi, dalago ayi zimbasi ziandi basa nunga ko, ayi vasa bue ba ko kibuangu ku diyilu muingi bawu kukala. 9 Mu phila ayoyo, bakuba dalago yinneni, nyoka yikhulu, no bantedilanga Nkadi’ampemba ayi Satana, no widi mu kuvukumuna ntoto woso. Nandi bankuba va ntoto va kimueka na zimbasi ziandi. 10 Bosi yiyuwa mbembu yinangama yifumina ku diyilu yaba tuba:

“Talanu, Nzambi matuala phulusu. Mangolo mandi, mame nunga. Matsikika Kintinu kiandi, ayi kimfumu ki Klistu, kima tona. Kibila mutu no wumvuninanga mambu zikhomba zitu, ba mankuba va ntoto, no wu kuba vuninanga mambu builu ayi muinya va ntuala Nzamb’itu! 11 Bawu banunga Satana mu kibila ki menga ma Muana Dimemi, ayi mu kibila ki kimbangi ki mambu bansamunanga. Ayi basa luta zola ko luzingu luawu veka, kheti bo baviokila mu mambu maba tombulu lufua. 12 Mu kibila akiokio, diyilu yangalala, ayi benu boso munkalanga kuawu! Vayi kiadi kuidi ntoto ayi kuidi ḿbu, kibila Nkadi’ampemba makuluka kuidi benu, ayi nandi widi beni nganzi, kibila zebi ti mua thangu to yi kunkhambu.”

13 Bo dalago beni kamona ti banloza ku wanda, va ntoto, diawu wutona kukuamisa nkietu no wubuta muana dibakala. 14 Vayi, bavana kuidi nkietu beni mavavi muadi ma mbemba yinneni, muingi kanunga kutina nyoka mu kukuenda ku kibuangu bankubikila, ko bankuiza mvanina bidia mu thangu yimueka, zithangu wadi ayi ndambu yi thangu.

15 Ayi nyoka beni wuluka nlangu wuba buka muila ku mbusa nkietu, muingi nandi kadiama mu muila beni. 16 Vayi, ntoto wuyiza muingi kusadisa nkietu, ayi ntoto beni wuzibula munu ayi wumina muila wo dalago kaluka. 17 Bosi dalago wuyiza fuemina nkietu beni, ayi wuyenda muingi kue nuanisa ndambu yinkaka yi nkuna wu nkietu, bo bantumukinanga zithumu zi Nzambi, ayi badi kiyeku ki kuvana kimbangi matedi Yesu.

13 Dalago beni yiba yitelama va nsengeseni wu ḿbu.

Bosi yimona kibulu kimueka kinganzi kibasikila mu ḿbu, kiba kumi di ziphoka, sambuadi di mintu, ayi mu ziphoka ziandi muba kumi di zikolowa. Vayi mu mintu miandi, muba musonama mazina mamvueza Nzambi. 2 Kibulu beni kinganzi yimona kiba buka ngo, vayi bitambi biandi biba buka bi wulusu, munu’andi wuba buka wu khosi. Ayi dalago wuvana kuidi kibulu ki nganzi mangolo ma kuyala ayi kikundu kiandi ki kimfumu.

3 Ayi yimona ti wumueka mu mintu miandi wuba buka ti wuluala mbeza yibina kumvonda, vayi mbeza beni yiyiza beluka. Ayi ntoto woso, waba landakana kibulu beni mu kukuituka. 4 Baba buongimina dalago, kibila nandi wuvana kimfumu kuidi kibulu kinganzi, ayi mvandi baba buongimina kibulu beni mu kutuba mambu amama: “Nani widi buka kibulu akiokio ki nganzi ayi nani kalenda nuana yandi mvita?” 5 Bamvana munu wo kaba tubila mambu ma lunyemu ayi mamvueza Nzambi, mvandi bamvana kimfumu muingi kayala mu 42 di zingonda. 6 Ayi nandi wuzibula munu muingi kuvueza dizina di Nzambi ayi kuvueza baboso bankalanga ku diyilu. 7 Bamvana nsua wu kunuana mvita na banlongo ayi kuba nunga. Mvandi, bamvana kimfumu ki kuyala minkuna mioso, makanda moso, zimbembu zioso ayi mimvila mioso. 8 Baboso banzinganga va ntoto bo bakhambulu mazina masonama tona vana thonono nza, mu buku yi luzingu yi Muana Dimemi, no bavonda, bala buongimina kibulu beni.

9 Woso widi matu, bika kayuwa. 10 Woso mutu bannata mu buloku, buna mu buloku kala kuenda. Woso mutu wumvondila mu mbedi, buna mu mbedi bala kumvondila. Diawu, vala tombulu banlongo kukindama ayi kumonisa kiminu.

11 Bosi, yimona kibulu kinkaka kinganzi, kibasikila ku tsi ntoto. Kiawu kiba ziphoka ziwadi zidi buka zi muana dimemi, vayi nandi wutona kutuba buka dalago. 12 Nandi wumonisa va ntuala kibulu kitheti kinganzi ti badi kio kiawu kimfumu. Mvandi wumvanga ntoto ayi batu bankalanga muawu, kubuongimina kibulu kitheti ki nganzi, kio kiba mbeza yibina kumvonda, vayi yibeluka. 13 Ayi wumvanga bidimbu biwombo, mvandi wumvanga mbazu yimfumina ku diyilu kudoduka va ntoto, va ntuala batu boso.

14 Nandi wumvunanga batu bankalanga va ntoto, mu kibila ki bidimbu bio bamvana nsua wu kuvanga va ntuala kibulu kinganzi kitheti. Mvandi wukamba batu bankalanga va ntoto, muingi bavanga fikula yi kibulu ki nganzi, kio balueka mbeza yibina kumvonda, vayi kheti bobo, kibue zinga. 15 Bamvana nsua wu kuvana luzingu kuidi fikula yi kibulu kinganzi, muingi fikula yi kibulu beni ki nganzi, yiyoluka ayi yituadisa lufua kuidi baboso bammanganga kubuongimina fikula yi kibulu ki nganzi.

16 Nandi wunkuika batu boso, kuba kuandi batu baphamba ayi bankinza, bisina ayi bakhambulu mbakulu, badi kiphuanza ayi mimvika, muingi batambula kidimbu mu koko ku lubakala voti va mbulu, 17 muingi ni mutu kabika kusumba, voti kusumbisa, kubotula kuandi to bo badi kidimbu, mawu mansundula dizina di kibulu kinganzi voti thalu yi dizina diandi. 18 Woso widi nduenga, bika kabakula thalu yi kibulu kinganzi, kibila yidi thalu yi batu. Yawu yidi 666.

14 Bosi yimona Muana Dimemi va mongo Sioni, nandi wuba na 144.000 di batu badi dizina diandi ayi di Tat’andi disonama mu zimbulu ziawu. 2 Yiyuwa biyoko bifumina ku diyilu biba buka biyoko bi nlangu wunkumba, buka kidumu kinneni ayi mvandi biba buka biyoko bi minyimbidi bansadila zi harpa bo banyola. 3 Nkunga baba yola wuba nkunga wumona, baba yodila wawu va ntuala kikundu ki kimfumu, va ntuala bivangu binna ayi va ntuala bakulutu. Vasi ko mutu wunkaka wulonguka kuyola nkunga beni, kubotula to 144.000 di batu bo Nzambi kasumba va ntoto. 4 Bawu basa bundana ko nyitu na bakietu. Bukiedika badi badiodila, ayi badi batu banlandakananga Muana Dimemi voso vama kankuenda. Baba sumba va ntoto buka mimbutu mitheti kuidi Nzambi ayi kuidi Muana Dimemi. 5 Bawu batubanga ko luvunu ayi badi bavedila.

6 Yimona mbasi yinkaka yifumina ku diyilu ayi wuba zitsangu zimboti zi mvu ka mvu, muingi kuzabikisa kuidi batu bankalanga va ntoto, mimvila mioso, minkuna mioso, zimbembu zioso ayi makanda moso. 7 Nandi waba tuba mu mbembu yinangama: “Kinzikanu Nzambi ayi mvananu nkembu, kibila thangu yi lufundusu luandi yima fuana. Diawu, buongiminanu Mutu wuvanga diyilu, ntoto, ḿbu ayi zitho zi nlangu.”

8 Bosi vamonika mbasi yimmuadi yaba tuba: “Mabua! Mabua Babiloni yinneni, no waba vanganga mimvila kunua vinu yi phuila yi mambu mandi ma butsuza!”

9 Vamonika mvandi mbasi yintatu, yaba tuba mu mbembu yinangama: “Woso mutu wumbuongimina kibulu kinganzi, fikul’andi ayi kutambula kidimbu va mbulu voti mu koko, 10 mvandi wala nua vinu yi Nzambi, yinsundula nganzi’andi, yo yikhambulu yisobakana yo Nzambi kala dukula mu mbungu yi nganzi’andi. Ayi yawu yala kuntuadisa ziphasi buka mbazu ayi mamanya ma mbazu va ntuala zimbasi zinlongo, ayi va ntuala Muana Dimemi. 11 Muisi wu ziphasi ziawu, wala tatamana mvu ka mvu. Baboso bambuongiminanga kibulu kinganzi ayi fikul’andi, ayi bo batambula kidimbu ki dizina diandi, bala tatamana kutovuka builu ayi muinya. 12 Diawu vantombulu banlongo bantumukinanga Nzambi, ayi badi kiminu mu Yesu, kukindama.”

13 Ayi yiyuwa mbembu yi mutu yifumina ku diyilu yaba tuba: “Sonika: Mayangi kuidi batu badi mu kufua mu kithuadi na Mfumu, kutonina bubu nati mu bilumbu binkuiza. Ngete, phevi yintuba, bika bawu bavunda mu bisalu biawu bingolo, kibila mambu bavanga ma kuba landakana.”

14 Bosi yimona dituti dimueka diphembi ayi va mbata dituti beni vaba mutu mueka wukala widi buka muana mutu, wuvuata kolowa yi wola ayi wuba na mbedi yikondalala va koko.

15 Mbasi yinkaka yibasikila va kibuangu kinlongo ki tempelu, ayi wukamba no wuba va dituti mu mbembu yinangama: “Vela mbongu mu kusadila mbedi’aku yikondalala, kibila thangu yi kuvela mbongu yima fuana ayi mbongu yoso yidi va ntoto, yima kuela.” 16 Ayi mbasi yiba yikala va dituti, wutula mbedi’andi va ntoto ayi wukongula mbongu yi ntoto.

17 Vamonika mbasi yibasikila va kibuangu kinlongo ki tempelu yidi ku diyilu, ayi nandi mvandi wuba na mbedi yikondalala va koko.

18 Va basika mbasi yinkaka va kikumu, ayi nandi wuba mangolo mu mbazu. Nandi wukamba kuidi mbasi yo yiba na mbedi yikondalala va koko mu mbembu yinangama, mu kutuba: “Sadila mbedi’aku yikondalala ayi zenga minko mi makundi ma vinu, kibila mawu meka mayela.” 19 Mbasi beni yitula mbedi’andi yikondalala va ntoto ayi wuvela makundi ma vinu va ntoto, ayi wukuba mawu va kibuangu bankaminanga vinu, kinsundula nganzi yi Nzambi. 20 Badiatila makundi ma vinu va kibuangu bankaminanga vinu ku nganda divula, bosi vabasika menga va kibuangu beni, menga beni mavitila nati mu miunu mi mimvalu, mavita mu kinanu ki 1.600 di estádio.*

15 Yimona kidimbu kinkaka kinneni ayi ki kukuitukila ku diyilu: sambuadi di zimbasi baba na sambuadi di zitsingulu. Zitsingulu azizi ziawu zitsuka, kibila Nzambi wala manisina nganzi’andi mu zitsingulu beni.

2 Mvandi yimona ḿbu waba monikina buka lumuenu basobikisa na mbazu, ayi baboso banunga kibulu kinganzi, fikul’andi ayi thalu yi dizina diandi, baba batelama va ndambu ḿbu, ayi basimba zi harpa zi Nzambi. 3 Bawu baba yola nkunga wu Mose kisadi ki Nzambi, ayi nkunga wu Muana Dimemi, mu kutuba:

“Biuma bioso Yave Nzambi, Nkua Ngolo Zioso kamvanganga, bidi bi kukuitukila. Nandi widi Ntinu mu zithangu zioso, ayi zinzila ziandi zioso, zidi zisonga ayi zikiedika. 4 A Yave, nani wala khambu kukinzika ayi nani wala khambu zitisa dizina diaku? Kibila ngiewu to widi wukuikama. Mimvila mioso bala kuiza kuidi ngie muingi ku kubuongimina, kibila zithumu ziaku zisonga zieka zizabakana kuidi bawu.”

5 Bosi, yimona kibuangu kinlongo ku diyilu, kuzibuka, ko kuidi mambu Nzambi katuba, 6 ayi sambuadi di zimbasi bo badi sambuadi di zitsingulu babasikila ku kibuangu kinlongo, ayi baba bavuata bikhutu bavangila mu linho biaba lezama, ayi baba ziphonda zi wola zizingama va ntima. 7 Wumueka mu bivangu binna, wuvana kuidi sambuadi di zimbasi sambuadi di bibobola bi wola biba biwala nganzi yi Nzambi, no wunzinganga mvu ka mvu. 8 Ayi kibuangu kinlongo, kiyiza wala muisi mu kibila ki nkembu wu Nzambi, ayi mu kibila ki mangolo mandi. Ni mutu kasa ba ko nsua wu kukota ku kibuangu beni nati sambuadi di zitsingulu zi sambuadi di zimbasi ziala mana.

16 Bosi, yiyuwa mbembu yibasikila ku kibuangu kinlongo yikamba sambuadi di zimbasi mu mbembu yinangama: “Yendanu ayi dukulanu va ntoto sambuadi di bibobola bi nganzi yi Nzambi.”

2 Mbasi yitheti wuyenda ayi wudukula va ntoto kibobola kiba yandi. Batu boso baba kidimbu ki kibulu kinganzi, ayi bo baba buongiminanga fikul’andi babasika zimbeza.

3 Mbasi yimmuadi wudukula kibobola kiandi mu ḿbu. Ayi ḿbu beni wukituka menga, buka menga ma mutu bama vonda, ayi bivangu bioso bidi mu ḿbu bifua.

4 Mbasi yintatu wudukula kibobola kiandi mu nlangu ayi mu zitho zinlangu. Ayi nlangu beni wukituka menga. 5 Minu yiyuwa mbasi widi kiyeku ki kukieba minlangu kutuba: “Ngiewu widi mutu wusonga, Mutu widi, wuba, ayi wukuikama, diawu wutubila ti mambu amama mafueti monika, 6 kibila bawu batengula menga ma banlongo ayi ma mimbikudi, ayi ngiewu ma bavana menga muingi banua. Awowo, wawu mfutu bafueti tambula.” 7 Ayi minu yiyuwa mbembu yibasikila va kikumu kutuba: “Ngete, a Yave Nzambi, Nkua Ngolo Zioso, zimfundusu ziaku zidi zisonga ayi zikiedika.”

8 Mbasi yinna wudukula kibobola kiandi mu thangu. Ayi bavana nsua kuidi thangu, muingi kuvika batu mu mbazu. 9 Batu bavia mu kibila ki mbazu yi muinya, kheti bobo batatamana kuvueza dizina di Nzambi, no wutuadisa zitsingulu beni, ayi bawu basa balula ko mavanga mawu ayi basa mvana ko nkembu.

10 Mbasi yintanu wudukula kibobola kiandi va kikundu ki kimfumu ki kibulu kinganzi. Ayi luyalu luandi luyiza ba kitombi ayi batu batona kukueta menu mu kibila ki ziphasi, 11 vayi bawu bavueza Nzambi no wuvanga diyilu, mu kibila ki ziphasi ayi mu kibila ki zimbeza zio babasika, vayi kheti bobo basa balula ko mavanga mawu.

12 Mbasi yisambanu wudukula kibobola kiandi mu muila wunneni wu Eufrates. Nlangu wu muila beni wuyuma, muingi kukubika nzila yo mintinu midi ku khonzu yimbasikilanga thangu baviokila.

13 Ayi yimona ziphevi zitatu zimbi, ziba buka bisioto kubasikila mu munu wu dalago, mu munu kibulu kinganzi ayi mu munu ḿbikudi wu luvunu. 14 Bukiedika, ziphevi aziozio zimbi bamvanganga bidimbu mu kukuenda kuidi mintinu mi nza yoso, muingi ku bakutikisa mu mvita wu kilumbu ki Nzambi, Nkua Ngolo Zioso.

15 “Yuwa: Minu yidi mu kukuiza buka muivi. Mayangi kuidi mutu widi wukotuka ayi widi mu kulunda buboti bikhutu biandi, muingi kabika kudiata pheni nkua, ayi babika kunseva kuidi batu ayi kufua tsoni.”

16 Ziphevi beni zimbi, zikutikisa mintinu mioso mi nza va kibuangu bantedilanga mu kiebeleo Alimangedoni.

17 Mbasi yisambuadi wudukula kibobola kiandi mu phemu. Bosi vayuwakana mbembu va kibuangu kinlongo, va kikundu ki kimfumu, yaba tuba: “Mamoso mama salama.” 18 Ayi vamonika zitsiemu, vayuwakana zimbembu, bidumu, ayi vamonika ndikununu yi ntoto yidi beni disuasana, na zindikununu zioso zi ntoto zima monikanga tona bavanga batu va ntoto. Ndikununu beni yi ntoto yiba yingolo ayi yi phasi. 19 Divula dinneni divasuka mu bitini bitatu, ayi mavula ma mimvila matuluka. Nzambi wutebukila moyo Babiloni yinneni, muingi kumvana mbungu yi vinu yi nganzi’andi. 20 Mvandi biseki bioso ayi miongo mioso bizimbala. 21 Bosi vamonika mvula yingolo yi mamanya ma gelo, kadika dimanya diba kizitu ki talentu* yimueka, ayi mamanya beni mafumina ku diyilu ayi ma buila batu. Batu beni bavueza Nzambi mu kibila ki zitsingulu zi mamanya ma gelo, kibila zitsingulu beni ziba zingolo.

17 Wumueka mu sambuadi di zimbasi baba sambuadi di bibobola, wuyiza ayi wukhamba: “Yiza ayi yinkuiza kumonisa lufundusu nkietu awowo wu kindumba widi wukala va mbata minlangu, kambelama kutambula. 2 Mintinu mi ntoto bavanga yandi kitsuza, ayi batu va ntoto bayiza kolo mu kibila ki vinu yi mambu mandi ma butsuza.”

3 Mu thuadusulu yi phevi, mbasi beni wundata ku thandu. Ayi yimona kuna nkietu wumueka wuba wukala va mbata kibulu kinganzi ki ndimba yibenga, kibulu beni kiba mazina mawombo mamvueza Nzambi. Mvandi kiba sambuadi di mintu ayi kumi di ziphoka. 4 Nkietu beni wuba wuvuata bikhutu bithalu bibenga. Mvandi wuba wuvuata biuma bivangulu mu wola dedi mamanya ayi minsanga mithalu ayi wusimba va koko kuandi, mbungu yi wola yiba yiwala mambu mambi, ayi mamvindu ma mavanga mandi ma butsuza. 5 Va mbulu’andi vaba vasonama dizina di tsisi: “Babiloni Yinneni, ngudi yi bankua kitsuza ayi yi mambu moso mamvindu ma ntoto.” 6 Yimona ti nkietu beni wuba wukolo mu menga ma banlongo ayi mu menga ma batu banlonganga matedi Yesu.

Bo yimmona, yiyituka beni. 7 Mu phila ayoyo, mbasi beni yikhamba: “Kibila mbi ngie makuitukila? Yinkuiza kusudikisa mambu ma tsisi matedi nkietu ayi matedi kibulu ki nganzi kidi sambuadi di mintu, ayi kumi di ziphoka vo nkietu beni kadi wukala: 8 Kibulu ki nganzi ngie bemona kio kiba vayi kisiedi ko, kiawu kiambelama kubasika ku diyenga, vayi kiala kuenda ku mbungulu. Ayi batu va ntoto (bo bakhambu ba mazina masonama mu buku yi luzingu tona va thonono nza) bala kuituka bo bala mona ti kibulu akiokio kinganzi kiba, kisiedi ko vayi kiala bue monika.

9 “Vantombuluanga nduenga muingi kuvisa mambu amama: sambuadi di mintu minsundula sambuadi di miongo, mio nkietu beni kadi wukala. 10 Ayi vadi sambuadi di mintinu: mintinu mitanu mi mabua, wumueka widi mu kuyala ayi wunkaka kavitidiabu ko, vayi bo kala tuka, wala yala mu mua thangu. 11 Ayi kibulu ki nganzi kio kiba vayi kisiedi ko, nandi mvandi widi ntinu wu nana, vayi wuyizila mu sambuadi di mintinu ayi nandi mvandi wala bungu.

12 “Kumi di ziphoka ngie bemona, zinsundula kumi di mintinu mio ka mitambudiabu ko luyalu, vayi bawu bala tambula kimfumu buka mintinu mu kilokula kimueka, va kimueka na kibulu kinganzi. 13 Bawu badi mayindu mamueka to, diawu bamvaninanga mangolo ayi kimfumu kuidi kibulu kinganzi. 14 Bawu bala nuanisa Muana Dimemi, vayi mu kuzaba ti nandi widi Mfumu yi zimfumu ayi Ntinu wu mintinu, Muana Dimemi wala nunga. Baboso badi ku khonzu’andi bantedilanga basolu ayi bakuikama, mvandi bala nunga.”

15 Mbasi beni wukhamba: “Nlangu wo bemona nkietu wu kindumba kadi wukala, wunsundula, makanda, mangumba ma batu, mimvila ayi zimbembu. 16 Kumi di ziphoka zio bemona ayi kibulu kinganzi, bala lenda nkietu wu kindumba, bala kumbika pheni nkua, bala dia nsuni’andi ayi bala kumvika nawoso ku mbazu. 17 Kibila Nzambi wutula mu mintima mi mintinu mi nza, phuila yi kudukisa makani mandi, ngete, phuila yi kudukisa makani mamueka badi ma kuvana kuidi kibulu kinganzi kintinu kiawu, nati kudukisa lukanu lu Nzambi. 18 Nkietu wu kindumba bemona, wunsundula divula dinneni dio didi kimfumu mu mintinu mi nza.”

18 Bosi yibue mona mbasi yinkaka yifumina ku diyilu, yiba kimfumu kiwombo, ayi va ntoto vayiza wala kiezila mu kibila ki nkembu’andi. 2 Nandi wutuba mu mbembu yinangama: “Mabua! Mabua Babiloni Yinneni, ayi nandi weka kibuangu ki ziphevi zimbi, ayi kisuamunu ki ziphevi zioso zimvindu, ayi mvandi kisuamunu ki zinuni zioso zimvindu ayi zio banlendanga! 3 Kibila mimvila mioso mibua mu ntambu wu kunua vinu yi phuil’andi yi mambu ma butsuza. Mintinu mi ntoto bavanga yandi kitsuza, ayi bankua lungosu va ntoto bayiza baka kimvuama, mu kibila ki mangolo ma kimvuama kiandi ki zitsoni.”

4 Yiyuwa mbembu yinkaka yifumina ku diyilu yaba tuba: “Basikanu muawu dikabu diama, muingi lubika ba fotu mu masumu mandi, ayi lubika tambula zitsingulu ziandi. 5 Kibila masumu mandi mame tuka nati ku diyilu, ayi Nzambi matebukila moyo mavanga mandi makhambulu masonga. 6 Mvangilanu momawu mambu kavanga, ngete, mvutudilanu malutidi mu mambu kavanga. Ayi mu mbungu yo nandi kakubikila malavu, ntudilanu muna kitesu kilutidi. 7 Mu kiokiawu kitesu ka yizitisila ayi kazingila mu kimvuama ki zitsoni, kiawu lufueti kunkuamisina ayi kuntuadisila kiadi ki lufua. Kibila nandi wuntubanga mu ntima: ‘Yidi wukala buka ntinu wu nkietu, yisi ko mfuizi ayi yilendi viokila ko mu kiunda ki lufua.’ 8 Diawu zitsingulu ziandi, lufua, kiadi ki lufua ayi nzala, biala kuizila mu kilumbu kimueka to, ayi nandi bala kumvika nawoso ku mbazu, kibila Yave Nzambi no widi mu kumfundisa, widi beni mangolo.

9 “Ayi mintinu mi ntoto, bo bavanga yandi kitsuza, ayi bo bazingila yandi mu kimvuama ki zitsoni, bala dila ayi bala ba beni mu kiunda mu kibila kiandi, bo bala mona muisi wu mbazu bamvikila kubasika. 10 Bawu bala telimina ku kinanu ayi bala mona boma mu kibila ki mambu kamonikini, ayi bala tuba: ‘Kiadi, kiadi ngie Babiloni divula dinneni ayi dingolo, kibila bama kutulula mu kilokula kimueka to!’

11 “Mvandi, batu ba lungosu va ntoto, bala dila ayi bala nyonga mu kibila kiandi, kibila kualasa bue ba ko mutu wunsumba biuma bansumbisa, 12 kuba kuandi wola, palata, mamanya ma thalu, bilunga, minledi mi linho, bikhutu bi thalu, seda, ayi minledi mibenga. Biuma bioso bivangulu mu mabaya ma mfimbu wumboti, ayi biuma bioso bivangulu mu phungi yi nzau, mu mabaya ma thalu, mu cobre, mu kisengu ayi mu marmore. 13 Mvandi kanela, biuma bi mfimbu bi india, malasi, nzeta yidi mfimbu wumboti, olibanu, vinu, nzeta, falini, trigu, zingombi, mamemi, mimvalu, makalu ma mimvalu, mimvika ayi batu bankaka bamonyo. 14 Ngete, a Babiloni, biuma bimboti waba tombanga, bi kutinizi ayi mintindu mioso mi bidia ayi biuma bi kitoko binlezama, bizimbidi ayi bialasa bue monika ko.

15 “Batu bansumbisanga biuma abiobio, bo bayiza ba busina mu kibila kiandi, bala telimina ku kinanu mu kibila ki boma bu ziphasi ziandi, bala dila ayi bala nyonga beni, 16 mu kutuba: ‘Kiadi, kiadi, divula dinneni didi divuata bikhutu bi thalu bivangulu mu linho, bibenga ayi binlezama, ayi no babuongisa buboti mu minsanga, mamanya ma thalu ayi bilunga. 17 Kibila kimvuama kioso akiokio, ba kituludi mu kilokula kimueka to!’

“Ayi batu boso bannatanga ayi bansadilanga mu makumbi, mvandi baboso bamvanganga lungosu mu ḿbu, bala telimina ku kinanu, 18 ayi bo bala mona muisi wu mbazu bamvikila, bala tuba mu kiunda: ‘Divula mbi didi dedi mueka na divula adiodio dinneni?’ 19 Bawu bala tula dibombi mu mintu, bala nyonga ayi bala dila mu kutuba: ‘Kiadi, kiadi, divula dinneni, dio divanga batu boso badi makumbi mu ḿbu, kuba kimvuama. Diawu dima tuluka mu kilokula kimueka to!’

20 “Yangalalanu benu muidi ku diyilu, ayi mvandi benu banlongo, bapostolo, ayi mimbikudi, kibila Nzambi wunzengila nkanu muingi ku lutuadisa ndandu!”

21 Bosi, mbasi yimueka yinanguna dimanya, diba buka dimanya dinneni dio banyikinanga zitheti, ayi wukuba diawu mu ḿbu, mu kutuba: “Dedi bo bankubilanga dimanya mu thinu, Babiloni, divula dinneni, mvandi bala ku dikuba ku wanda, ayi balasa bue dimona ko. 22 Ayi valasa bue kuwakana ko lusuku lu minyimbidi bansika zi harpa, ni lusuku lu ziflauta ayi zitulumbeta ku Babiloni. Mvandi kualasa bue ba ko mutu wumvanganga kisalu ki kutunga bikhutu, ayi kualasa bue kuwakana ko lusuku lu dimanya di kunyikina zitheti. 23 Kuidi ngie, kualasa bue lezama ko ni muinda wu mueka, ayi kualasa bue kuwakana ko mbembu yi dibakala voti nkietu wunkuela, kibila batu baku ba lungosu, baba batu banzitusu va ntoto, ayi kibila ngie wuvuna mimvila mioso, mu mavanga maku ma kindoki. 24 Ngete, nandi widi fotu mu menga ma mimbikudi, banlongo ayi ma batu boso bavonda va ntoto.”

19 Bosi yiyuwa biyoko biba buka zimbembu zi nkangu wu batu, zifumina ku diyilu ayi ziaba tuba: “Zitisanu Yah!* Luvukusu, nkembu ayi mangolo bidi bi Nzamb’itu, 2 kibila zimfundusu ziandi zidi zisonga ayi zikiedika. Kibila nandi mafundisa nkietu wu kindumba, no waba vukumunanga ntoto mu mambu mandi ma butsuza ayi Nzambi wumfuemina mu kibila ki menga ma bisadi biandi katengula.” 3 Ayi zimbembu beni ziaba bue tuba mu khumbu yimmuadi: “Zitisanu Yah! Muisi bavikila Babiloni wala tatamana kubasika mvu ka mvu.”

4 Ayi 24 di bakulutu va kimueka na bivangu binna, bafukama ayi babuongimina Nzambi no widi wukala va kikundu ki kimfumu, ayi batuba: “Amem! Zitisanu Yah!”

5 Mvandi yiyuwa mbembu yibasikila va kikundu ki kimfumu yaba tuba: “Zitisanu Nzamb’itu benu boso bisadi biandi, nkinzikanu kuba kuandi batu baphamba voti banzitusu.”

6 Bosi yiyuwa biyoko biba buka zimbembu zi batu, mvandi biba buka lusuku lu nlangu wunkumba ayi buka bidumu bingolo, ziaba tuba: “Zitisanu Yah, kibila Yave Nzamb’itu, Nkua Ngolo Zioso, matona kuyala! 7 Tuyangalalanu, tumonanu nyenzi, ayi tumvananu nzitusu, kibila thangu yi dikuela di Muana Dimemi, yima fuana ayi nkazi’andi weka wukubama. 8 Bukiedika, bamvana luaku lu kuvuata bikhutu bavangila mu linho, binlezama ayi bidiodila, kibila bikhutu bivangulu mu nledi wu linho, binsundula mavanga mamboti ma batu basonga.”

9 Ayi nandi wukhamba: “Sonika: Mayangi kuidi batu babe tumisa mu nkungi wu dikuela di Muana Dimemi.” Mvandi wukhamba: “Amomo, mawu mambu makiedika ma Nzambi.” 10 Bosi minu yifukama va ntual’andi muingi kumbuongimina. Vayi nandi wukhamba: “Ba keba keba! Bika kuvanga mambu amomo! Kibila minu yidi kisadi ki Nzambi buka ngiewu, ayi ki zikhomba ziaku, luidi kiyeku ki kulonga matedi Yesu. Vayi buongimina to Nzambi! Kibila kulonga matedi Yesu, mawu mambu ma mfunu madi mu zimbikudulu.”

11 Bosi yimona diyilu kuzibuka ayi vamonika mvalu wuphembi. Mutu wuba va mbata mvalu beni ba kuntedilanga Wukuikama ayi Wukiedika, zimfundusu ziandi zidi zisonga ayi widi mu kunuana mvita wusonga. 12 Mesu mandi madi buka minlaki mi mbazu ayi ku ntu’andi kuidi zikolowa ziwombo. Nandi widi dizina disonama mu nyitu’andi dio ni mutu kakhambu zaba, kubotula kuandi to naveka, 13 ayi widi wuvuata bikhutu biwedi menga; nandi ba kuntedilanga Diambu di Nzambi. 14 Mvandi nkangu wu zimbasi wuba mu mimvalu miphembi waba kunlandakana, ayi bawu bavuata bikhutu bivangulu mu linho, biphembi ayi bidiodila. 15 Va munu’andi vaba mbedi yikula balengula, muingi kutulula mimvila. Nandi wala tuadisa mimvila mu kusadila nkawu wu kisengu. Mvandi wala nyesa kibuangu bankaminanga vinu yi nganzi yi Nzambi, Nkua Ngolo Zioso. 16 Mu bikhutu biandi, ngete, va dibubu di kulu* kuandi vadi vasonama dizina adidi: Ntinu wu mintinu ayi Mfumu wu zimfumu.

17 Yimona mvandi mbasi yiba yitelama va thangu, nandi wutela mu mbembu yinangama zinuni ziaba dumuka, mu kutuba: “Yizanu akuku, kutakananu mu nkungi wunneni wu Nzambi, 18 muingi ludia minsuni mi mintinu, mi zimfumu zi masodi, mi batu badi mangolo, mi mimvalu ayi mi batu badi bakala muawu ayi minsuni mi batu boso, kuba kuandi bo badi kiphuanza voti mimvika, ayi mi batu banzitusu voti batu baphamba.”

19 Mvandi yimona kibulu kinganzi ayi mintinu va ntoto va kimueka na nkangu’awu wu masodi, bakutakana muingi kunuanisa mutu no wuba wukala va mbata mvalu ayi zimbasi ziandi. 20 Babuila kibulu ki nganzi va kimueka na ḿbikudi wu luvunu, no waba vanganga va ntual’andi bidimbu bi kukuitukila, bio kaba vuninanga batu batambula kidimbu ki kibulu kinganzi, ayi bo baba buongiminanga fikul’andi. Buna bakhidi bamonyo, baba buadi baba kuba ku diyenga kuidi mamanya ma mbazu. 21 Vayi bankaka baba vondila mu mbedi yikula yiba va munu wu mutu no wuba va mbata mvalu. Ayi zinuni zioso bayukuta mu kudia minsuni miawu.

20 Bosi yimona mbasi yifumina ku diyilu, nandi wuba na tsabi yi diyenga ayi phanga yinneni va koko. 2 Nandi wubuila dalago nyoka yikhulu, yinsundula Satana Nkadi’ampemba, ayi wunkanga mu 1.000 ki mimvu. 3 Wunkuba ku diyenga ayi wuzibika diyenga beni, muingi kabika bue vukumuna mimvila nati kivevi ki mimvu kiala mana. Bosi bala kunkutula ayi bala kumbasisa mu mua thangu.

4 Yimona mvandi bikundu bi bimfumu ayi batu baba bakala muawu baba vana kimfumu muingi kufundisa. Ngete, yimona batu bo bavonda mu kibila ki kulonga matedi Yesu, ayi mu kutubila matedi Nzambi, mvandi yimona batu boso bamanga kubuongimina kibulu kinganzi ayi fikul’andi, bo bakhambu tambula kidimbu kiawu vambulu voti va koko. Bawu bavutuka kubue zinga ayi bayala na Yesu mu kivevi ki mimvu. 5 Batu abobo, bawu bala ba batheti mu kubue zinga. (Vayi batu bankaka bafua basa vutuka ko kubue zinga, nati kivevi ki mimvu kiala mana.) 6 Mayangi kuidi batu boso badi mu luvulubukusu lutheti, kibila lufua lummuadi lusiedi ko mangolo mu bawu, ayi bawu bala ba zinganga nzambi zi Nzambi ayi zi Klistu, ayi mvandi bala yala yandi mu kivevi ki mimvu.

7 Bo kivevi ki mimvu kiala mana, Satana bala kumbasisa mu buloku, 8 nandi wala basika muingi kuvuna mimvila mu zikhonzu zinna zi ntoto, zinsundula Ngongi ayi Mangongi, muingi kuba kutikisa mu mvita. Thalu yi batu beni kala kutikisa, yidi buka nsengisini wu ḿbu. 9 Ayi bawu batembakana mu ntoto woso ayi bazungidila divula di banlongo, vayi mbazu yifumina ku diyilu, yitulula baboso. 10 Ayi Nkadi’ampemba no waba kuba vunanga, bankuba ku diyenga di mbazu kuidi mamanya ma mbazu, ko kuba kibulu kinganzi ayi ḿbikudi wu luvunu. Bawu bala kuamusu builu ayi muinya, mvu ka mvu.

11 Bosi yimona kikundu ki kimfumu kinneni kiphembi, mvandi yimona Mutu wuba wukala vana. Ntoto ayi diyilu biaba tina vantual’andi, ayi biawu bisa bue monika ko. 12 Bosi yimona batu bafua, baphamba ayi banzitusu baboso baba batelama va ntuala kikundu ki kimfumu ayi bazibula zibuku. Vayi bazibula buku yinkaka, yawu yiba buku yi luzingu, ayi bafundisila bafua mu kutadila mambu maba masonama mu zibuku, ayi mu kutadila mavanga mawu. 13 Ḿbu wuvutula mimvumbi miba muawu, lufua ayi Dibumbi mvandi bavutula mimvumbi miba muawu, ayi mimvumbi beni baba fundisa wumueka wumueka mu kutadila mavanga mawu. 14 Lufua ayi Dibumbi ba bakuba ku diyenga di mbazu, diyenga beni di mbazu, dinsundula lufua lummuadi. 15 Mvandi, woso mutu wukhambu ba dizina disonama mu buku yi luzingu, bankuba ku diyenga di mbazu.

21 Bosi yimona diyilu ayi ntoto wumona, kibila diyilu ayi ntoto wukhulu, bima vioka, ayi ḿbu wusiedi ko. 2 Yimona mvandi divula dinlongo, Yelusalemi Yimona, diawu diaba fumina ku diyilu, kuidi Nzambi. Diawu diba buka nkietu wu dikuela bakubika, no bakue vana kuidi nnuni’andi. 3 Bosi yiyuwa mbembu yinangama yaba basikila va kikundu ki kimfumu, yaba tuba: “Tala! Tenda yi Nzambi yima fikama kuidi batu, nandi wala kala yawu va kimueka ayi bawu bala ba dikabu diandi. Ayi naveka Nzambi wala ba yawu. 4 Nandi wala fiona matsuela moso mu mesu mawu, ayi lufua lualasa bue ba ko, kiunda ki lufua, kialasa bue ba ko, bidilu ayi ziphasi, bialasa bue ba ko. Kibila mambu maphasi mameni.”

5 Mutu no wuba wukala va kikundu ki kimfumu wutuba: “Tala! Yidi mu kuvanga biuma bioso bimona.” Nandi mvandi wubue tuba: “Sonika, kibila mambu amomo, madi ma lufiatu ayi makiedika.” 6 Nandi wukhamba: “Mawu mame salama! Minu yidi Alfa ayi Ômega, thonono ayi tsukulu. Woso mutu widi phuila yi nlangu, minu yala kumvana tho yi nlangu wu luzingu mukhambu futa. 7 Woso mutu wala nunga, yala kumvana biuma bioso abiobio. Minu yala ba Nzambi’andi, ayi nandi wala ba muan’ama. 8 Vayi batu badi bukhita, bo bakhambulu kiminu, bo badi khenya mu mvindu’awu, mimvondi, bo bamvanganga mambu ma butsuza, bamvanganga kindoki, bambuongiminanga bitumba ayi baboso bantubanga luvunu, bala tambula mfutu’awu ku diyenga kuidi mamanya ma mbazu. Diyenga beni dinsundula, lufua lummuadi.”

9 Bosi, vamonika wumueka mu sambuadi di zimbasi bo baba sambuadi di bibobola, muba muwala sambuadi di zitsingulu ayi wukhamba: “Yiza, muingi yi kumonisa nkietu wu dikuela, nkazi wu Muana Dimemi.” 10 Mu thuadusulu yi phevi, nandi wundata ku mongo wuzangama ayi wumbonisa divula dinlongo, Yelusalemi Yimona, difumina ku diyilu, ko kuidi Nzambi, 11 ayi wumbonisa nkembu wu Nzambi. Divula beni diaba lezama buka dimanya di thalu dinlezama, bantedilanga jaspe. 12 Divula beni diba luphangu luzangama ayi lunneni luba 12 di mielu, ayi va kadika muelu vaba mbasi yimueka wutelama, ayi mielu beni miba misonama, mazina ma 12 di minkuna mi bana ba Isaeli. 13 Ku leste kuba mielu mitatu, ku norte kuba mielu mitatu, ku sul kuba mielu mitatu, ayi ku oeste kuba mvandi mielu mitatu. 14 Luphangu lu divula beni, mvandi muba 12 di mamanya ma lusersu, ayi mu mamanya beni muba mazina ma 12 di bapostolo ba Muana Dimemi.

15 Mbasi beni waba koluka yama, wuba na kizongulu, nkawu bavangila mu wola, muingi kuzonga divula, mielu, ayi luphangu lu divula. 16 Divula beni diba dedi mueka mu zikhonzu zia zinna, kukula kuba dedi mueka na kutola. Mbasi beni wuzonga divula, mu kusadila nkawu wuba yandi, diawu diba: 12.000 di estádio.* Kukula, kutola ayi kuzangama biba bidedakana. 17 Nandi wuzonga mvandi luphangu, luawu luba: 144 di zicovado, mu kutadila nzongulu yi batu, ayi mvandi nzongulu yi zimbasi. 18 Luphangu beni batungila luawu mu jaspe, ayi divula ditungulu mu wola yidiodila, yidi buka lumuenu lunlezama. 19 Lusersu lu luphangu lu divula beni, luvangulu mu ntindu woso wu mamanya ma thalu: lusersu lutheti luvangulu mu jaspe; lummuadi mu safira; luntatu mu calcedônia; lunna mu esmeralda; 20 luntanu luvangulu mu sardônica; lu sambanu mu sárdio; lu sambuadi, mu crisólito; lu nana, mu berilo; lu vua, mu topázio; lu kumi, mu crisópraso; lu kumi mueka, mu jacinto; ayi lu kumi wadi, mu ametista. 21 Mvandi, 12 di mielu mivangulu mu 12 di mamanya ma thalu. Kadika muelu wuvangulu mu dimanya dimueka di thalu. Nzila yinneni yi divula beni, yivangulu mu wola yidiodila, buka lumuenu lunlezama.

22 Yisa mona ko ni tempelu ku divula beni, kibila naveka Yave Nzambi, Nkua Ngolo Zioso, ayi Muana Dimemi, bawu badi tempelu. 23 Diawu, vasintombulu ko thangu ayi ngonda, muingi kuvana kiezila ku divula beni, kibila nkembu wu Nzambi, wawu wumvananga kiezila, ayi Muana Dimemi, nandi muinya wu divula beni. 24 Mimvila mioso, miala diatila mu kiezila kiandi, ayi mintinu mi ntoto, bala nata nkembu’awu ku divula beni. 25 Mielu mi divula beni, mialasa zibama ko va muinya, kibila ku divula beni, buisi bualasa kuilanga ko. 26 Nzitusu ayi nkembu wu mimvila, bala ku binata ku divula beni. 27 Vayi, ni kiuma ki mvindu, voti batu bamvanganga mambu ma mvindu ayi bamvunanga, balasa kota ko kuawu. Batu badi mazina masonama mu buku yi luzingu yi Muana Dimemi, bawu to bala kota kuawu.

22 Mbasi beni wumbonisa muila wu nlangu wu luzingu, waba lezama buka diamante, waba basikila va kikundu ki kimfumu ki Nzambi ayi ki Muana Dimemi. 2 Muila beni, waba kumba va khati tsika nzila yinneni yi divula. Mu zikhonzu zia ziwadi muba minti mi luzingu miaba butanga, 12 di zikhumbu mu kadika mvu, mansundula khumbu mueka mu kadika ngonda. Meza ma minti beni, maba ḿbuku kuidi mimvila mioso.

3 Nzambi kalasa singa ko divula beni, vayi kikundu kiandi ki kimfumu ayi ki Muana Dimemi biala ba ku divula beni. Ayi bisadi biandi bala vanga kisalu kinlongo; 4 bawu bala mona kizizi ki Nzambi, ayi dizina di Nzambi diala ba disonama mu zimbulu ziawu. 5 Ku divula beni buisi bualasa kuilanga ko ayi valasa tombulu ko kiezila ki muinda, ni kiezila ki thangu, kibila Yave Nzambi wala tula kuna kiezila ki muind’andi, ayi bawu bala yala mvu ka mvu.

6 Mbasi beni wubue khamba: “Mambu amama madi ma lufiatu ayi makiedika. Ngete, Yave Nzambi no wutuadisa mimbikudi, wufila mbasi’andi muingi kamonisa kuidi bisadi biandi mambu mambelama kumonika. 7 Yuwa: Minu yidi mu kukuiza mu nsualu. Mayangi kuidi mutu wuntumukina mbikudulu yidi mu nkanda awuwu.”

8 Minu Yoane, minu yiyuwa mambu amama ayi yimona mawu. Bo yimona ayi yiyuwa mawu, yifukama va ntuala mbasi no wumbonisa mambu amomo, muingi kumbuongimina. 9 Vayi mbasi beni wukhamba: “Ba keba keba. Bika kuvanga mambu amomo, kibila minu mvama yidi kisadi ki Nzambi buka ngiewu, kisadi ki zikhomba ziaku, ki mimbikudi ayi ki baboso bantumukina mambu madi mu buku ayiyi. Vayi wufueti buongimina to Nzambi.”

10 Mbasi beni wubue khamba: “Bika kusueka zimbikudulu zidi mu buku ayiyi, kibila thangu basikika yima fikama. 11 Woso mutu wumvanganga mambu mambi, katatamana kuvanga mambu mambi, woso widi wusumuka, katatamana kusumuka, woso widi wusonga, katatamana kuvanga mambu masonga ayi woso widi wunlongo, katatamana kuba wunlongo.

12 “‘Yuwa: Yidi mu kukuiza mu nsualu, ayi yidi na mfutu wo yinkuiza kabula kuidi kadika mutu, mu kutadila mavanga mandi. 13 Minu yidi Alfa ayi Ômega, wutheti ayi wutsuka, thonono ayi tsukulu. 14 Mayangi kuidi batu bansukulanga mazuela mawu, muingi babaka luaku lu kudia makundi ma minti mi luzingu, ayi kukotila ku divula beni va muelu. 15 Vayi kunganda kuawu kuidi zimbua,* batu bamvanganga mambu ma bundoki, ma butsuza, mimvondi, batu bambuongiminanga bitumba, baboso banzolanga ayi bantubanga luvunu.’

16 “‘Minu Yesu, yifila mbasi’ami muingi kavana kimbangi matedi mambu amama, ayi muingi kutuadisa ndandu kuidi bimvuka. Minu yidi lunganzi ayi yiyizila mu nkuna wu Davidi, mvandi minu mbuetila yinlezamanga ava thangu kubasika.’”

17 Phevi yinlongo ayi nkietu wu dikuela badi mu kutuba: “Yiza!” Woso mutu wunyuwa wuntuba: “Yiza!” Woso widi phuila yi nlangu kiza nua, ayi woso wutidi, kiza nua nlangu wu luzingu mu khambu futa.

18 “Yinkamba kuidi baboso bankuwa zimbikudulu zidi mu buku ayiyi: woso mutu wumbuela mambu mandi amumu, Nzambi wala kumbuela zitsingulu zidi zisonama mu buku ayiyi; 19 ayi woso mutu wumbotula mambu madi mu zimbikudulu zidi mu buku ayiyi, Nzambi wala kumbotula luaku lu kudia makundi ma minti mi luzingu, ayi lu kukota ku divula dinlongo bantubila mu buku ayiyi.

20 “Mutu wumvana kimbangi mu mambu amomo, widi mu kutuba: ‘Ngete, yidi mu kukuiza mu nsualu.’”

“Amem! Yiza Mfumu Yesu.”

21 Bika mamboti malutidi ma Mfumu Yesu, maba kuidi banlongo.