MALONGI 17

Bwidi Miǹsungi mi Divula ba Tusadisilanga?

Nsungi wu divula ayi nkazi’andi — Tsi yi Malawi

Nsungi wu divula wuntwadisa lutukukunu lu khubimini kisalu ki kusamuna — Lukutukunu lu nkubimini kisalu

Nsungi wu divula wumvana kimbangi ki baboso — Baǹsamuna

Nsungi wu divula wuntwadisa lukutukunu ayi bakulutu ba kimvuka — Lukutukunu na bankulutu

Mu Ngwizani Yimona yi Kibibila, dizina di Balanabasi ayi ḿvwala Polo ma tanguka beni. Bawu ba ba Miǹsungi mi Divula, baba bilanga bimvuka mu thangu’awu. Mu kibila mbi? Mu kyedika bawu, baǹtomba kukindisa kiphevi ki zikhomba ziawu. Diawu Polo ka tubila ti bika ‘tuavutuka ye tala zikhombaʼ bo badidi. Nandi wu ba wukubama mu kudyata kinanu mwingi kukindisa zikhomba. (Mavanga 15:36) Mawu makani Miǹsungi mi Divula badi mu thangu’itu.

Bawu ba tu kindisanga. Kadika ǹsungi wu divula widi kiyeku mu 20 ma bimvuka, ka fweti bela kinzenza kadika lumingu ayi mu khumbu wadi kafweti vutikila mu ḿvu. Tulenda baka khindusulu yiwombo kwidi zikhomba beni ayi bakazi bawu, enati wu kwela kadi. Bawu baḿvanganga mangolo ma kuzaba batende, bakhulutu mu kimvuka, ayi baǹzolanga ku tulandakana bo tuǹkwenda ka longisa baǹlongukanga yitu Kibibila. Baǹkwendanga na bakhulutu ba kimvuka, kusunga mamemi ma Yave ayi baḿvananga malongi maǹyinkunanga miǹtima mitu mu zikhutukunu zi kimvuka ayi zikhutukunu ziǹneni mwingi kutukindisa.—Mavanga 15:35.

Bawu baḿmonisanga ǹkinza mu baboso. Miǹsungi mi Divula baḿvwilanga beni ǹkinza mu kinzambi ki baboso mu kimvuka. Bawu baǹkutakananga na bakhulutu ba kimvuka ayi miǹsadisi miawu, mwingi kufyongunina ndyonzukulu yi kimvuka ayi kuba vana malongi, bo balenda kyebila buboti kiyeku kiawu. Baǹsadisanga miǹtwami ǹtwala mi kisalu mu kubwela phisuka mu kusamuna, ayi baǹtyanga kuzaba batu bamona mu kimvuka ayi ndyonzukul’awu yi kiphevi. Zinkomba beni badi banga bakundi ba kisalu ba kivananga mu kibila kitu. (2 Kolinto 8:23) Tufweti landakana kiminu kiawu ayi phila yi ba kivena mu sadila Nzambi.—Ebeleo 13:7.

Kibila mbi Miǹsungi mi Divula baǹtadilanga bimvuka?
Bwidi wulenda bakila ndandu mu kinzenza kiawu?