Yave Wufila Yelemia Mwingi Kasamuna

Yave wusola Yelemia mwingi kaba mbikudi mu dikabu di Yuda. Nandi wunkamba mwingi kasamuna batu babika kuvanga mambu mambi. Yelemia wutuba: ‘Ah Yave, minu yinkidi mwana kilezi ayi yisa zaba kukoluka ko va meso ma batu bawombo.’ Yave wunkamba: ‘Bika mona boma minu feka yala kukamba ma fweti koluka ayi yala kusadisa.’

Yave wukamba Yelemia ka kutikisa bakhulutu boso ba Isaeli, wunkamba mvandi kabula kibasa kiba yandi va meso ma batu boso ayi katuba: ‘Yelusalemi yinkwiza tuluka dedi buma tulukila kibasa akiki.’ Bo kamana tuba mawu, bakhulutu boso badasuka beni. Nganga Nzambi yinkhulutu Pasuli wuba vana, wutuma bambula, bosi wukangisa myoko ayi malu mandi mu kitini ki nti. Yelemia bwilu boso bumvyokila vana mu kukhambu baka bu kunyikukina. Kilumbu kilanda bo bambikila, Yelemia wuba beni mu kyunda bosi wutuba: ‘Yilendi bwe samuna ko.’ Bukyedika kwandi ti nandi wubika kubwe sumuna? Ndamba. Nandi wubwe yindula mboti dyambu beni ayi wutuba: ‘Tsangu Yave kakhembi mwingi yisamuna yidi banga mbazu yinlema mu khati ntim’ami. Yilendi kubwe lunda ko yawu mu khati ntima.’ Bukyedika, Yelemia wubwe tona kulonga batu mambu ma Nzambi.

Mimvu miwombo mivyoka, ayi babyeka ntinu wumona ku Yuda. Vayi zinganga zi Nzambi ayi mimbikudi mi luvunu balenda mambu Yelemia katuba. Diawu bawu bakambila batu ba luzabu ba Yuda mwingi bavonda Yelemia. Vayi nandi wutuba: ‘Benu kuphonda buna mwa mvonda dibakala di khambu kibila. Kibila mambu ma yintuba masi ko mama vayi ma Yave.’ Zimfumu zi tsi yi Yuda bo bayuwa mawu batuba: ‘Dibakala adiodio kasa fwana ko kufwa.’

Yelemia wutatamana kusamuna, vayi ntulu awuwu zimfumu zi tsi bankangila nganzi. Bosi ko bawu baye dinda Ntinu mwingi kavonda Yelemia. Nandi wuba vutudila ti vanganu moso ma lutidi kwidi Yelemia. Bawu bambwila ayi bantibula mu dibulu diwonguka diwala ntapi. Yelemia wutona kusinda mu khati ntapi.

Wumweka mu zimfumu zi luyalu wuba Ebedi-Meleki, wuyenda kwidi ntinu ayi wunkamba: ‘Zimfumu zinkaka zi tsi bama tibula Yelemia mu dibulu, befu kumbika kuna, bukyedika ma kafwa.’ Bosi Ntinu wutuma Ebedi-Meleki ayi 30 ma babakala bankaka mwingi batitika Yelemmia mu dibulu beni. Yelemia wumonikina khama mambu ayi makuma tanu, angi kasa bika ko kusamuna. Bu ngyewu, wala tatamana kusamuna mambu ma Nzambi kheti bo widi mu ziphasi?