Yesu Wulongisa Minlandikini Myandi Phila Bafweti Sambidila

Bafalisi baba tyanga kuvanga mamboti mwingi kuyimonisa kwidi bankaka, buka kusambila va meso ma batu boso. Bawu mvawu baba kanganga va ntu minsambu mikula ayi baba ku mivutukilanga mu mbembo yinangama bo bandyata mu zinzila mwingi batu boso bayuwa. Angi batu bayituka beni bo Yesu kaba kamba: ‘Lubika sambidilanga buka Bafalisi. Bawu bamwenanga ti ba kuvanga minsambu mikula, Yave wela kuba kuwila. Angi bwisi ko buawu. Kibila lusambu phila yi kukolukila na Yave. Dyawu bwisa fwana ko vutukila mambu mo mawu. Yave kantombanga tunkamba mabanza mitu ma tsi ntima.’

Dyawu tala phila lufweti sambidila: Tat’itu ku diyilu, bika dizina dyaku diba dinlongu. Bika Kintinu kyaku kiza. Bika luzolo lwaku lu vangama va ntoto, dedi bu lumvangimina ku diyilu.’ Yesu mvandi wubakamba balindanga dipha di kadika kilumbu, balindanga nlemvo wu masumu mawu ayi mambu moso ma luzingu.

Yesu wuba kamba dyaka: ‘Lutatamana kusambila. Lutatamana kulinda byuma bimbote kwidi Yave Kibila nandi Tat’itu. Yoso kwa tata, wumvananga bima bimbote kwidi bana bandi. Enati mwana bedinda dipha kwidi tat’andi, nandi kalenda mvana dimanya? Ayi mwana na kudinda tat’andi mfu, bukyedika kwandi ti kalenda kumvana nyoka?’

Yesu bosi wubakamba: ‘Boti benu muzebi kuvana bima bimboti kwidi bana binu, buna Yave kalendi ko kuluvana phevi’andi yinlongo?. Lutatamana to kundinda.’ Ngye mamona malongi mamboti kaba vana? Mambu mbi ngye wundindanga kwidi Yave bo wunsambila?