Ngie Widi mu Kubaka Ndandu mu Mua Buku Fiongunina Matangu ma Kibibila Kadika Kilumbu?

Ngie widi kifu ki kutanganga kadika kilumbu matangu mankuizanga mu mua buku Fiongunina Matangu ma Kibibila Kadika Kilumbu? Boti ndamba, ngie wulenda baka makani ma kuvanganga mawu kadika kilumbu. Bawombo bantanganga matangu beni va meni, muingi babaka bu kusadila mawu mu kilumbu kioso. (Yosua 1:8; Minkunga 119:97) Buidi wulenda bakila ndandu mu matangu mankuizilanga mu mua buku beni? Phila yimueka yidi mu kutanga matangu mankaka madi mu kapu yibongulu matangu ma kilumbu beni. Mawu mala kusadisa kuluta visa mambu banlonga. Mvandi wulenda yindula kifuani ki Kibibila kidedikini na matangu ma kilumbu beni. Bosi sadila mambu belonguka mu luzingu luaku. Ngie kusadila mambu Kibibila kintuba bo wumbaka makani, wulenda ba lufiatu ti wala baka ndandu yiwombo.—Minkunga 119:105.

Dikanda di Beteli mu nza yimvimba bamfionguninanga matangu ma Kibibila ma kadika kilumbu va meni. Kutona mu mimvu mima vioka, dingumba dintuadisi dintulanga mu JW Broadcasting^® malongi matedi mbuongimini va meni va kibuangu kintuba ZITHUADUSULU AYI ZIKHUTUKUNU. Kilumbu mbi wusinina kumona zivideo beni zi mbuongimini va meni? Ḿba yimueka mu zivideo beni, yilenda ba mambu ngie wuntomba. Dedi, mbi wulenda longuka mu kifuani ki Loti mu matedi kubaka makani?

TALA VIDEO  LUBIKA ZOLA NZA (1 YOANE 2:15), BOSI VANA MIMVUTU MI BIUVU ABIBI:

• Matangu mbi ma Kibibila mabongulu mbuongimini ayiyi va meni?

• Buidi kinongo ki Loti kimmonisa ntambu widi mu kuzola nza ayi biuma bidi mu nza?— Ngenesi 13:12; 14:12; 19:3, 12, 13, 24-26

• Buidi tulenda monisina ti tunzolanga Yave kubika kuandi biuma bidi mu nza?