Buela Pisuka Mu Kisalu Ki Kusamuna

NKINZA MBI KUVANGA MAWU: Mambu mambi ayi buphunya buidi mu kebuelamanga; diawu batu bawombo bantudilanga zicâmera ayi bisengu bi kukolukila mu mielo mi zinzo. Tulenda mona nkadu boma kusamuna kuidi mutu tukhambu mona, vayi nandi widi mu kutumona. Mambu manlanda mankuiza tusalisa kubuela ba lufiatu bo tunsamuna mu zinzo zidi zicâmera ayi zidi bisengu bi kukolukila va muelo.

MBI WULENDA VANGA:

• Ba mayindu mamboti. Batu bawombo badi zicâmera voti bisengu bi kukolukila va mielo mi zinzo ziawu, banzolanga kukoluka yitu.

• Tebuka moyo ti ava wubunda muelu, ḿba mutu wuvuidi nzo widi mu ku kumona ayi wunkuwa mambu wuntuba.

• Bo mutu wuvuidi nzo ka kutambudila mu kisengu ki kukolukila voti mu câmera, yoluka yandi mu kuseva ayi nyikuna binama bi nyitu buka ngie widi mu kummona. Tuba mambu bekubika buka ngie bendengana va muelu. Boti vadi câmera, bika kufikika beni kizizi kiaku vana. Boti mutu wubeki nzo kasa kutambudila ko, kawubika tsangu.

• Bo lummana kukoluka, tebuka monyo ti mutu wubeki nzo kalenda tatamana ku kumona ayi kukuwa mambu wunkoluka.