MALONGI 14

Ndongusulu mbi Baḿvananga Miǹtwami Ǹtwala mi Kisalu?

Full-time ministers in the public ministry — Tsi yi Estados Unidos

Students attending the Watchtower Bible School of Gilead

Students preparing for missionary service — Kikola ki Ngiladi, Patterson, Nova York

Ba misyoni bakwela baǹsamuna ku ǹtoto yi Panamá — Nsi yi Panamá

Tona mu thama, kikola ki malongi ma Kibibila, phila yimboti Zimbangi zi Yave baǹlongukilanga. Ndongusulu beni yiḿvanwanga kwidi baboso ba kivana mu kisalu ki thangu ka thangu mu kusamuna tsangu zi Kiǹtinu, mwingi ba phisuka mu kuvanga ‘kisalu kiawu mboti.’—2 Timoteo 4:5.

Kikola ki Miǹtwami Ǹtwala mi Kisalu. Bo ǹtwami ǹtwala kisalu kadukisidi ḿvu mu kisalu ki thangu ka thangu, ba kuǹtumisanga mwingi ka baka ndongusulu yi kikola ki miǹtwami ǹtwala mi kisalu mu bilumbu bi 6. Kibila ki ḿfunu ki kikola beni, mu dyambu kusadisa ǹtwami ǹtwala ka bwela fikama Yave, bwela phisuka mu kisalu ki kusamuna ayi kubwela ba lufyatu mu tatamana mu kisalu beni.

Kikola ki Miǹsamuni mi Kiǹtinu. Kikola beni kiḿvangamanga mu ngonda wadi, kiǹkubikanga miǹtwami ǹtwala mi kisalu mi phisuka ayi ba kivana, mwingi ba filwa ku lutidi kisalu. Kulandakana kifwani ki Yesu Klisto ǹlongisi wu filwa va ǹtoto, bawu ḿvawu baǹtubanga, ‘minuk’awu mfila.’ (Yesaya 6:8; Yoane 7:29) Kusadila kinanu kuǹtombila kolama nzingulu yimona; Buka ndiwulu, kikhulu, ǹlangu wu kunwa voti biǹkaka bilenda ba diswasana na nzingulu wuba. Malenda tombila kulonguka mbembo yiǹkaka. Kikola beni kiǹsadisanga bakwela ayi ba khambu kwela badi 23 ti 65 di miḿvu, mwingi babaka zikhadulu zimboti zi kiphevi zilenda kuba sadisa vanga mboti kisalu ki Yave mu ǹkangu’andi wululama.

Kikola ki Kibibila ki Ngiladi. Mu Kiebelewo, “Ngiladi” yiǹsundula “Zimbangi Ziwombo.” Tona mu ḿvu 1943, ku vyoka 8.000 di batu ba ma baka ndongusulu beni ayi bafilwa buka bamisyoni mu dyambu kuvana kimbangi mu nza yoso yiḿvimba. (Mavanga 13:47) Bo ba misyoni ba tuka ku ǹtoto wu Peru, basa denga ko kimvuka. Vayi mu thangu ayiyi kweka 1.000 di bimvuka. Bo ba tuka ku tsi yi Japão, basa denga ko ni kumi di Zimbangi zi Yave. Angi mu thangu ayiyi ba mavyoka 200.000. Mu zingonda zi tanu baḿbakilanga ndongusulu yi Ngiladi, baǹlongukanga mambu maphinda ma Kibibila. Baǹtumisanga miǹtwami ǹtwala mi kisalu mi filwa, bamisyoni, zibetelita voti Miǹsungi mi divula mwingi babaka ndongusulu beni, mu dyambu kuvana mangolo kisalu ki kusamuna mu nza yimvimba.

Ǹkinza mbi kidi Kikola ki Miǹtwami Ǹtwala?
Nani wulenda landakana Kikola ki Miǹsamuni mi Kiǹtinu?