Mboti zi Nsangu a Zizi, Bu Kyedika ti zi Fumini Kwidi Nzambi’e?

1. Nani beki Kibibil’e?

Mu kibibila mu sonama nsangu yi mbote yi monisa ti bantu bala zinga ḿvu ka ḿvu va ǹtoto. (Minkunga 37:29) Yave Nzambi wu twadisa nanga 40 ma bantu mo ba sonika mayindu mandi mu buku yi ǹlongo ayi ba sonika 66 ki zi buku zi lwelu. Zi buku zi tanu zi nteti Mose wu sonika zyawu mu 3500 mi ḿvu ku mbusa. Angi buku yi tsuka yi sonama kwidi ḿvuala Yoane mu ntangu’itu buka 1900 mi ḿvu mivyoka. Mayindu ma nani masonama mu Kibibil’e? Mu ǹzila mpeve yi ǹlongo Nzambi wu twadisa bantu ba sonika kikibila. (2 Samueli 23:2) Dyawu bawu ba sonika mayindu ma Nzambi, masiko mawu. Buawu Kibibila ki Yave.​— Tanga 2 Timoteo 3:16; 2 Petelo 1:20, 21.

2. Bwidi tu fweni ku kikinina ti Kibibila ki Nzambi’ e?

Tu zabidi ti Kibibila ki Nzambi, kibila kyawu ki tu monisa mambu ma nkwiza ku ńtwala mu bu kyedika. Vasiko muntu wu lenda zaba mawu. (Yosua 23:14) Dyawu Nzambi to wu lendi ku tu kamba mu bu kyedika ma nkwiza ku ǹtwala.​—Tanga Yesaya 42:9; 46:10.

Vasiko buku yi lutidi na Kibibila. Mafunda na mafunda ma biveve bi Zibibila zi ma kabulu mu zimbembu ziwombo. Tu zebi ti kyawu ki ba mu ntangu yi nkulu angi kidi mu kintwadi na luzabu lu Ǹzo ǹkanda. Ayi 40 li minsoniki beni basa vyakasana ko mayindu.a Mu Kibibila tu mona luzolo ayi mangolo ma Nzambi mu ku sadisa bantu ba ba luzingu lu mbote. Momo, ma ḿvanganga bantu bawombo ku kikinina ti Kibibila dyambu di Nzambi.​—Tanga 1 Tesalonika 2:13.

Tala video Bwidi Tulenda Bela Lufyatu ti Kibibila Buku Yikyedika yi Nzambi?

3. Muna mambu mbi Kibibila ka tu kamb’e?

Kibibila ki tu kamba nsangu zimbote zitedi zinkanu zi luzolo, Nzambi kadi mu bantu. Masonukwa Manlongo ma tu sudikisa bwidi Paladizu yi zimbidila va ntonono ǹza ayi bwidi Yave Nzambi kala be vutudila yawu.​—Tanga Nzaikusu 21:4, 5.

Mu ǹkanda Nzambi mwidi minsiku, minswa ayi malongi. Mwidi mvandi binongo bi kintwadi ki Nzambi na bantu​—kyawu kimonisa zi nkadulu zi Nzambi. Buawu Kibibila ki lenda kusadisa mu kuzaba Nzambi ayi ki lenda kutwadisa kuvanga ki kundi na Nzambi.​—Tanga Minkunga 19:7, 11; Yakobi 2:23; 4:8.

4. Bwidi wu lenda visikisa mambu ma Kibibil’e?

Mwa buku ayiyi yi lenda kusadisa ngyewu wu visikisa Kibibila. Ǹdongusulu yi Yesu yawu ba landudila muawu. Nandi wu sudikisa mu kadi lutangu nsundu yi “masonukwa”.​—Tanga Luka 24:27, 45.

Vasiko mambu ma lutidi ḿfunu ayi zi nsangu zimbote Nzambi kadi kwidi befu. Bo buawu, bawombo ba nkambo vwilanga ǹkinza ayi ba ḿvwezanga mawu. Angi bika ba kyunda, kibila dyana di kubaka luzingu lu ḿvu-ka-ḿvu, lu ǹtombila mangolo maku to mu kuzaba Nzambi ayi kunsadila.​—Tanga Yoane 17:3.