Lahabi Wutela Mana mu Yave

Tukibanzila banga bantu banzingila ku divula di Yeliko, nsi yi Kanani, kuba bantu baba manga kikininanga Yave. Ku divula beni kuba nkyeto wumweka baba tanguninanga Lahabi.

Bo Lahabi kaba mwana kilezi, wuyuwa binongu mu matedi mambu Mose kavanga, dedi bo kakaba nlangu wuḿbu va nkati mwingi bana ba isaeli bavyoka ayi mambu maǹkaka kavanga mwingi kuvukisa bana ba Isaeli ku Ngipiti. Nandi wuyuwa mvandi mpila Yave kasadisila dikabu dyandi kununga mimvita na zimbeni ziawu. Kilumbu kiǹkaka, wuyiza zaba ti bana ba Isaeli baba fikama divula di Yeliko mwingi kutulula diawu!

Kilumbu kimweka va bwilu, bantu bwadi ba basikila mu dikabu di isaeli bayenda ku Yeliko mwingi bazaba matedi nkotolo ayi nkubimini yi basi Yeliko. Bawu bayenda ku nzo yi Lahabi. Nandi wuba bika bakota ayi balala kuna. Va bwilu beni, ǹtinu wu Yeliko wubakula ti bantu bakota mu nsi ayi ba vitila ku nzo yi Lahabi. Diawu ǹtinu beni katumina masodi ma Yeliko mwingi ba bwila babakala beni babwadi. Vayi Lahabi wusweka babakala beni babwadi kuyilu kibanga ki nzo’andi, bosi wukamba masodi: ‘Babakala babwadi ba Isaeli bama ba kuku, angi bosokwa bama basika. Beno kuba kuka, mulenda kuba baka!’ Ngye zebi kibila Lahabi kaswekila babakala beni?— Nandi wuba lufyatu mu Yave ayi wuzaba ti nandi wala vana divula di Yeliko mu myoko mi dikabu di Isaeli.

Bo babakala beni baba kwenda, bawu bakanikisa Lahabi ti nandi ayi dikanda dyandi balasa fwa ko bo Yeliko yiǹtuluka. Ngye zebi mbi baǹkamba mwingi kavanga?— Bawu baǹkamba: ‘Dengidika ǹsinga awuwu wubenga va nela. Ngye kumavanga, baboso badi va dikanda dyaku balasa fwa ko.’ Lahabi wuvanga bobo baǹkambila kwidi babakala beni. Ngye zebi mbi biyiza monika kuǹtwala?—

Vasa bwe vyoka ko bilumbu biwombo, dikabu di Isaeli batona kudyengidila divula di Yeliko mu nkambu tula lusuku. Mu bilumbu bisambunu badyengidila divula beni nkumbu mweka mu kilumbu. Vayi mu kilumbu kisambwadi bawu badyengidila sambwadi di zinkumbu. Bosi ko baboso batenduka mu nkumbu mweka. Ayi Yave wubwisa bibaka bilumpangu bi divula beni. Ngye wummona nzo ayiyi yidi va mfikula?— Lahabi na dikanda dyandi basa fwa ko.

Mbi wulenda longuka mu matedi Lahabi?— Lahabi wutela mana mu Yave mu kibila ki mamboti moso kayuwa mu nandi. Ngyewu wunlongukanga mamboti mu matedi Yave. Ngye weta tela mana mu Yave dedi Lahabi?— Tuzebi ti ngyewu widi mana!