Boti Minu Bantya Kutula Boma mu Kikola?

MBI WULENDA VANGA?

Yindula kifwani akiki: Tomás mengi kwenda mu kikola bubu, yono, ayi ni kilumbu kinkaka. Ngonda tatu zima vyoka tona bankotanga yandi bamvunina mambu. Boso batona kumbyeka mazina. Khumbu zinkaka ba kubwisa zibuku zyandi va tsi, bo Tomás kankwana, bawu kutunukanga ti lwisi ko lutya luawu. Wumweka mu dingumba di bana beni, na kubula Tomás kumbusa, mwana phesi kalendi kuvula ko mutu bembula kumbusa. Tomás wulutidi mona boma, bo kibedi yono bana beni bansonikini mu internet makani badi ma kumbula . . .

Boti ngyewu Tomás, khanu mbi wuvanga?

YINDULA!

Bika kukimona banga wisi ko mangolo! Angi ngyewu wulenda kindama mu bisombulu biawu mu kukhambu nwana. Bwidi?

• BIKA KUNWANA. Kibibila kintuba: ‘Mutu khambulu ndwenga wufika nwananga, vayi mutu widi ndwenga wunzabanga kukiyala.’ (Zingana 29:11) Ngye kuvwena swi mu thangu ba kusombusa banga mutu wunkhambu kuwa mawu, bawu bala vonga mu kusombusa.

• BIKA KUVUTUDILA MAMBI. Kibibila kintuba: “Lubika vutulanga mambi mu mambi.” (Loma 12:17) Kuvutudila mbi mu mambi, kumanisanga ko mambu.

• TINANGA MAMBU. Kibibila kintuba: ‘Nkwa ndwenga na kumona mambu mambi wumvutukanga mbusa ayi wunswamanga, vayi wukhambulu ndwenga wunkwendanga ntwala mu mawu.’ (Zingana 22:3) Diawu bika kudyata na batu bantwadisanga bisombulu ayi tina vama badi.

• NATINA MAWU MU KUSAKANA. Kibibila kintuba: ‘Mvutu wumalembi wumvumbikanga nganzi.’ (Zingana 15:1) Ngye wulenda natina mawu mu kuseva. Dedi bo ti mutu wukusaka, na kukamba ti ngye wulutidi zinyitu zinneni, ngye wulenda vutudila, “Minu yifweti vanga mangolo mwingi yibuba nkadu.”

• YENDA KWAKU BIKA KUTUBA NI DYAMBU. Norina widi 19 di mimvu wutuba: “Kuvwena swi mbonosono ti widi mayindu ma bukhulutu dedi kuzaba kukiyala. Phila yimonisina mvandi ti ngye lutidi ‘zaba kukiyala’ ke na mutu beni wukusakinina.”​—2 Timoteo 2:24.

• BWELA KUBA LUFYATU MU NGYE FEKA. Khumbu zinkaka badi kifu ki kusakininanga bankaka, banzabanga batu bakiyindudilanga baveka bubi ayi bakhambulu lufyatu mu bafeka. Vayi ba kumona ti widi lufyatu mu ngye feka balenda bika kusakinina.

• ZABIKISA WOSOKWA MUTU: Nlongisi wumweka wunkyeto wutuba: “Boti, mwana kikola bansakininanga beni, minu yikunkambanga kakamba bakhulutu bankaka kibila malenda kunsadisa ayi kusadisa bana bankaka.”