Nzambi Wuvanga Diyilu ayi Ntoto

Yave Nzambi nandi Mvangi. Kibila nandi wuvanga byuma byoso bi tummonanga ayi bi tunkhambu monanga dedi mafunda na mafunda ma zimbasi zi kavanga theti. Ngye zebi banani zimbasi? Zimbasi batu ba kiphevi bankalanga ku diyilu ayi tulendi ko kuba mona dedi bo tunkhambu mwenanga Nzambi. Mbasi yi theti Nzambi kavanga, wu yiza ba nsadisi’andi mu kuvanga byuma binkaka dedi zimbwetila, ziplaneta, nza yimvimba ayi byuma byoso binkaka. Vayi mu nza yoso yimvimba, ntoto wawu kaluta kuvangila buboti kibila widi na byabyoso batu balenda kuzingila.

Yave wukubika ntoto mwingi batu ayi bibulu bazingila. Nandi wuvanga thangu yinkyenzulanga ntoto ayi wubwe vanga myongo, miḿbu minneni ayi mila.

Mambu mbi mayiza monika kuntwala? Yave wutuba: ‘Bika ntoto wubuta bititi ayi minti mimbutanga makundi.’ Buawu buyizila mintindu myoso mi makundi, meza ma kudya ayi biteka. Bosi nandi wuvanga bibulu bindyatanga, bindumukanga, binkokubukanga ayi zimfu zinsyukanga mu minlangu. Mu bibulu beni, binkaka biba bilwelu dedi kikweya ayi bibinene dedi nzau. Kibulu mbi ngye wunlutanga kutya?

Bosi Yave wubwe kamba mbasi yi theti: ‘Ndoko tuvanga mutu.’ Batu bafweti ba diswasana na bibulu; bafweti zaba kuvanga byuma binkaka ayi balenda ba lwaku lu kukoluka, kuseva ayi kusambila. Bawu mvandi bafweti kyeba ntoto ayi bibulu. Ngye zebi dizina di mutu wu theti? Twanzaba dizina dyandi.