Yave Wusola Yosua

Mu mimvu miwombo Mose katwadisila dikabu di bana ba Isaeli, vayi kilumbu kyandi ki kufwa kyaba fikama. Diawu Yave kankambila: ‘Minu yinkwiza bikila ngye wumona Ntoto yi Kanikisa bana ba Isaeli, vayi bakana ko ngyewu wala kuba twadisa ti ku Kanani.’ Mose wudinda Yave kasola nkhulutu wunkaka mwingi katwadisa dikabu di Yave. Yave wunkamba: ‘Yenda kwidi Yosua ayi nkamba ti nandi minu yibe sola.’

Mose wukamba bana ba Isaeli ti kilumbu kyandi ki kufwa kyambelama, wubwe tuba ti Yave wusola Yosua mwingi kanata bana ba Isaeli ku ntoto kaba kanikisa. Mose wukamba Yosua: ‘Bika kuba boma. Kibila Yave wala kusadisa.’ Mu thangu beni, Mose wutona kumaka ayi wuyenda telama mu Mongo Nebo. Vawu Yave kammonisina ku kinanu ntoto kakanikisa Abalami, Isaki ayi Yakobi. Mose 120 di mimvu kaba bo kafwa.

Yave wukamba Yosua: ‘Sabuka mwila wu Yolidani, ayi kota ku Kanani. Minu yinkwiza kusadisa dedi bo yisadisila Mose. Tanganga Zithumu zyama ayi zingilanga ziawu mu kadika kilumbu. Bika kumona boma, vayi ba kibakala. Yenda ayi sadila mambu moso yima kukamba wuvanga.’

Bosi Yosua wufila milenga myodi mi mambu ku divula di Yeliko. Mu kinongo kinlandakana tunkwiza bwela kuzaba mambu mbi mamonika kuna. Vayi bo bavutuka, bawu batuba ti yiba thangu yimboti yi kukotila ku tsi Kanani. Kilumbu kilanda, Yosua wukamba bana boso ba Isaeli basokula mavwala mawu ayi bakubama. Bosi wiza tula va ntwala Zinganga zi Nzambi baba nata kasu yi luwawunu. Mu thangu bavitila mu mwila wu Yolidani, bamona ti wuba wuwala beni. Vayi bo batibula bitambi byawu mu nlangu, mwila wiza lembu kukumba ayi nlangu wiza yuma! Zinganga zi Nzambi badyata fyoti ti va khati mwila biza telama. Bana ba Isaeli batona kuvyoka ti bamana kusabuka ku disimu dinkaka mu ntoto wuyuma, bosi bawu mvawu biza vyoka. Wisimmona ko ti mangitukulu amomo, maba phila bawu batebukila moyo bo Yave kakabula Ḿbu Wubenga mu thangu yi Mose?

Mimvu miwombo mivyoka, bosi bana ba Isaeli batuka ku ntoto Yave kaba kanikisa. Bawu batunga zinzo ayi mavula mawombo. Ntoto wuba beni wumboti mwingi kuvata zitsola, kuvata vinu ayi minti minkaka mimbutanga makundi bandyanga. Kuba mvandi leite ayi wika.