Yave Wunwanina Yozafati

Yozafati wuba ntinu wu basi Yuda, wumanisa mbwongimini yi Bali nzambi yi luvunu. Yozafati kaba tomba batu boso batumamana zithumu zi Yave. Diawu kasodila babakala bazebi buboti zithumu zi Yave mwingi balonga batu boso.

Zi tsi zinkaka ziba zifikama, boma baba monanga kunwanisa tsi Yuda kibila bazaba ti Yave naveka waba ku yikyebanga. Bawu baba natinanga Yozafati mikhayilu mu kibila ki boma. Vayi kilumbu kinkaka basi Moabi, Amoni ayi baba zingilanga ku divula di Seili, bayenda mwingi kanwanisa tsi yi Yuda. Yozafati wuzaba ti mu mangolo ma Yave to kalenda banungina. Diawu kakambila babakala, bakyeto ayi bibabana byoso benda ku Yelusalemi. Va meso ma batu boso nandi wusambila: ‘Yave ngye to tumfyatila, kibila befu veka tulendi nunga ko. Lemvuka wutukamba mbi tulenda vanga.’

Yave wutambudila: ‘Bika kumona boma, minu yinkwiza kusadisa. Mwisi ko benu munkwiza nwana, vayi minu veka yinkwiza mu vukisa. Bwidi Yave kabavukisila?

Va meni kilumbu kinkaka, Yozafati wusola babakala baba kwimbilanga ayi wuba tula va ntwala masodi mwingi kuzitisa Yave. Bawu batonina kukwimbila ku Yelusalemi ti bavitila va kibwangu banwanina mvita beni bantanguninanga Tekoa.

Bo baba kwimbila, Yave waba vanga mangitukulu. Basi Amoni ayi basi Moabi batona kuvondasana bafeka. Angi ku khonzo yi basi Yuda ni mutu kasa fwa ko. Bukyedika Yave wukyeba dikabu dyandi dedi bo kakanikisila. Zi tsi zinkaka ziba zi zifikama, bo bayuwa mambu mamonika, bakikinina ti Yave nandi waba nwanina bana ba Isaeli mwingi kuba vukisa. Ayi mwingi kanunga, kasa tombila ko mata mavangimina mu myoko mi batu!