Yesu Wuliata va Mbata Nlangu

Yesu kasa ba ko to mangolo ma kuvulubusila batu bafwa, vayi nandi mvandi wuba mangolo ma kukanga ziphemu zingolo ayi zimvula. Bo kamana kusambila ku mongo, Yesu wutala ku ḿbu wu Ngalili ayi wumona kivuka voti ḿvusuku wungolo wuba tona. Bo katala mangolo bapostolo baba vanga mwingi kutsikika dikumbi, nandi wukuluka mu thinu ayi wuba dyatila va mbata nlangu ti kafikama dikumbi. Bapostolo bo bamona mutu wuba dyatila va mbata nlangu, batona kumona boma. Angi Yesu wuba kamba: ‘Minu, bikanu kumona boma.’

Petelo wutuba: ‘A Mfumu! Enati bukyedika ngeyo kwandi, buna wukhamba ndiza kwidi ngeyo va mbata nlangu. Yesu wunkamba: ‘Yiza!’ Petelo wubotuka mu dikumbi ayi wutona kudyatila va mbata nlangu. Angi ava kavitila vaba Yesu, nandi wutala ku ndambu ayi wutona kumona boma. Nandi wutona dyama mu nlangu! Diawu kalindila kwidi Yesu: ‘A Mfumu tsadisa!’ Yesu wumbwila mu koko ayi wunkamba: ‘Mutu wu minu kifyoti, kibila mbi mamwena boma?’

Yesu ayi Petelo bo bamaka mu dikumbi, mu thangu beni kivuka voti ḿvusuku beni wumana. Wulenda yindula mayangi bapostolo bamona! Bawu batuba: ‘Bukyedika, ngye widi mwana Nzambi.’

Yawu yisa ba ko khumbu yitheti Yesu kakanga kivuka kingolo. Khumbu yinkaka, bo Yesu ayi bapostolo bandi baba sabuka ku disimu dinkaka di ḿbu, kivuka kingolo kitona mu thangu Yesu kaba lala mu dikumbi beni. Dikumbi ditona kukota nlangu mu kibila ki mayo manneni kaba tula. Diawu bapostolo bakotudila Yesu ayi bankamba mu mbembo yinangama: ‘A Mfumu, wutuvukisa khanu ma tufwa!’ Yesu wukotuka mu thinu ayi wukamba ḿbu: ‘Lembama!’ Mu thangu beni, phemu ayi mbu bilembama. Bosi Yesu wuyuvula bapostolo: ‘Benu lwisi ko kiminu?’ Bawu bakambasana baveka: ‘Talanu kwenu, na phemu ayi ḿbu bi kuntumukina.’ Bapostolo balonguka ti ba kuba kiminu kingolo mu Yesu, balendi mona ko boma ni dyambu dimvela.