Yesu Wumonikina Minlobi mi Zimfu

Bo Yesu kamonikina bapostolo, va vyoka mwa thangu Petelo wubaka makani ma kaloba voti kavuba. Toma, Yakobi, Yoane ayi minlandikini minkaka banlandakana. Bawu bavuba bwilu boso, vayi ni mfu yimweka basa baka ko.

Va meni meni bo baba vutuka, bamona mutu wuba wutelama va disimu. Nandi wuyuvula bapostolo mu mbembo yinangama: ‘Lube baka zimfu? Bawu bamvutudila: “Mve” Dibakala beni wuba kamba: ‘Kululanu dikondi ku khonzu’inu yi lubakala.’ Minlonguki bo bakulula dikondi ayi batona kutitika diawu, bayituka phila diwadila zimfu ayi basa nunga ko kutitika dikondi mu bwatu. Yoane wubakula ti dibakala beni wuba Yesu ayi wukamba bankaka: ‘Awowo nandi Yesu!’ Mu thangu beni, Petelo wu yiloza mu nlangu ayi wusyuka ti va disimu, vayi bankaka banlandakana kumbusa mu bwatu.

Bo bavitila va disimu, bamona mapha ayi zimfu ziba kwangana va mbazu. Yesu wubakamba babwela vana zimfu babaka. Bosi wuba tumisa: ‘Yizanu mudya.’

Bo bamana kudya, Yesu wuyuvula Petelo: ‘Ngye wuku nzolanga kuvyoka kisalu kyaku ki kuloba?’ Petelo wutuba: ‘Ngete, Mfumu, ngye zebe ti yikuzolanga.’ Yesu wunkamba: ‘Dikilanga mamemi mami.’ Vayi Yesu wubwe kuvula: ‘Petelo, ngye wuku nzolanga?’ Nandi wuvutula: ‘A Mfumu, ngye zebe ti Minu yikuzolanga beni.’ Yesu wunkamba: ‘Buna sunganga mamemi mami.’ Yesu bo kanyuvula khumbu yintatu, Petelo wumona beni kyunda ayi wutuba: ‘A Mfumu, ngye zebi mambu moso. Ngye zebi ti Minu yikuzolanga.’ Yesu wunkamba: ‘Dikilanga bana bami ba mamemi.’ Bosi wukamba Petelo: ‘Tatamana kundandakana.’