DILONGI 12
Mbi Biala Kusadisa Kutatamana Kulonguka Kibibila?
Bukiedika, kulonguka Kibibila diawu diambu dilutidi nkinza mutu kalenda vanga. Vayi thangu zinkaka dilenda ba diambu diphasi kuvanga mawu. Ḿba wulenda kuyikuvusa boti wala nunga kutatamana kulonguka Kibibila. Vayi kibila mbi fueti vangila mawu? Mbi biala kusadisa kutatamana kulonguka Kibibila kheti bo wundengana bikaku?
1 .Kibila mbi didi diambu dinkinza kulongukanga kibibila?
‘Diambu di Nzambi didi moyo ayi dintuadisanga mangolo.’ (Ebeleo 4:12) Kulonguka Kibibila didi diambu dinkinza beni. Kibila kiawu kitusadisanga kuvisa mayindu ma Nzambi ayi buidi Nandi ka tutadilanga. Ngie wala longuka mambu mamona, kuba nduenga ayi kivuvu. Ayi dilutidi nkinza, kiawu kiala kusadisa kuba nkundi wu Yave. Bo wunlonguka Kibibila kiawu kiala vanga luzingu luaku luluta ba lumboti.
2. Kibila mbi fueti vuilanga nkinza mambu Kibibila kinlonga?
Kiedika ki Kibibila kidi buka kiuka. Diawu, kiawu kitukambila “tusumba kiedika ayi tubika bue sumbisa kiawu.” (Zingana 23:23) Befu kuvuanga nkinza mambu Kibibila kinlonga, tuala vanga mangolo muingi tutatamana kulonguka kiawu kheti bo tumviokila mu mambu maphasi.—Tanga Zingana 2:4, 5.
3. Buidi Yave kalenda kusadisila kutatamana kulonguka Kibibila?
Yave widi Mvangi, Nkua Ngolo Zioso ayi nkundi’aku. Vasi ko mutu wunluta kuzaba kena Yave ayi Nandi wuntomba kusadisa muingi ngie wunzaba. Yave kalenda kuvana ‘phuila ayi mangolo.’ (Tanga Filipi 2:13.) Diawu khumbu zinkaka ngie kumona ti wemvonga kulonguka Kibibila, voti wummona phasi kusadila mambu widi mu kulonguka, nandi kalenda kusadisa. Ayi ngie kutomba lusalusu ayi mangolo muingi wununga bikaku wundengana, Yave wala ba va khonzo’aku. Sambila kuidi Yave muingi ka kusadisa wutatamana kulonguka Kibibila.—1 Tesalonika 5:17.
BUELA LONGUKA
Tala buidi wulenda tatamana kulonguka Kibibila kheti batu bankaka ba kubalukila, voti widi mambu mawombo ma kuvanga mu luzingu. Tala mvandi buidi Yave kalenda kusadisila muingi wubika vonga.
4. Monisa ti wumvuanga nkinza ndongukulu yi Kibibila
Thangu zinkaka tumbanga mambu mawombo ma kuvanga ayi tummuenanga ti tuisi ko thangu muingi kulonguka Kibibila. Mbi bilenda kusadisa? Tanga Filipi 1:10, bosi tubilanu biuvu binlanda:
Mu mbuenu’aku, mambu mbi malutidi nkinza mu luzingu?
Buidi wulenda monisina ti ndongukulu yi Kibibila nkinza yidi mu luzingu luaku?
Ngie kuwesa nsengisini mu mpanya, bosi kubue tula muna mamanya, mawu masinkuiza fuana ko muna
Vayi ngie kutula theti mamanya, vala ba phuasa muingi wutula nsengisini. Bobuawu mvandi, ngie kuvanga theti mambu malutidi nkinza, vala sobila thangu yiwombo muingi wuvanga mambu mankaka
Kulonguka Kibibila, kundukisanga tsatu’itu yi kiphevi—voti, phuila tuidi yi kuzaba ayi kubuongimina Nzambi. Tanga Matai 5:3, bosi tubilanu kiuvu kinlanda:
Befu kuvuanga nkinza ndongukulu yi Kibibila, lusakumunu mbi tuala tambula?
5. Kawubika bankaka ba kuvanga wubika kulonguka Kibibila
Bankaka balenda kuedika kuvanga wubika kulonguka Kibibila. Tala kifuani ki Francesco. Tala VIDEO, Bosi tubilanu biuvu binlanda.
Dedi bo tube muena mu video, buidi bakundi ayi basi dikanda di Francesco bamuena bo nandi kaba kamba mambu kaba longuka?
Lusakumunu mbi katambula bo kakhambu vonga?
Tanga 2 Timoteo 2:24, 25, bosi tubilanu biuvu binlanda:
Buidi dikanda diaku ayi bakundi baku bammuenanga mambu ngie widi mu kulonguka?
Dedi bummonisina matangu amomo, mbi fueti vanga boti vadi mutu wuntomba wubika kulonguka Kibibila? Kibila mbi?
6. Ba lufiatu ti Yave wala kusadisa
Bo tumbuela fikama Yave, buawu tuala luta tombila kunkuangidika. Kheti bobo, khumbu zinkaka tuala monanga phasi kubalula luzingu luitu ayi kuvanga mambu nandi katudinda. Ngie kutona kuyindudila abobo, bika kuvonga. Yave wala kusadisa. Tala VIDEO, bosi, tubilanu biuvu binlanda.
Dedi bo tube muena mu video, mambu mbi Jim kabalula muingi kayangidika Yave?
Mbi beluta zola mu kinongu kiandi?
Tanga Ebeleo 11:6, bosi tubilanu biuvu binlanda:
Mbi Yave kamvangilanga batu boso ‘ba kuntombanga mu bukiedika’ —voti baboso bamvanganga mangolo muingi kunzaba ayi kunkuangidika?
Mu mbuenu’aku, buidi Yave kammuenanga mangolo wumvanganga muingi kulonguka Kibibila?
ABU MUTU NA KUKUVULA: “Kibila mbi wunlongukilanga Kibibila?”
Mvutu mbi wunkuiza vana?
MBI NGIE BELONGUKA
Bukiedika, thangu zinkaka wala dengana bikaku bo wunlonguka Kibibila. Vayi kutatamana kulonguka kuala kusadisa wubaka mayangi ma mvu ka mvu. Tatamana kufiatila mu Yave ayi nandi wala kusakumuna.
Vutukila Mambu Mamfunu
Kibila mbi kiedika ki Kibibila kididi buka kiuka kuidi ngie?
Buidi ngie wulenda monisina ti wumvuanga nkiza mambu malutidi luvalu?
Kibila mbi fueti dindila lusalusu lu Yave muingi wutatamana kulonguka Kibibila?
TALA MAMBU MANKAKA
Tala mambu manna masadisa batu bawombo kusadila thangu’awu mu nduenga.
“Como aproveitar bem seu tempo” (Despertai!, Fevereiro 2014)
Nnuni wu Grace, kasa visa ko kibila mbi nandi kabakila makani ma kusadila Nzambi. Vayi tala buidi Yave kasadisila Grace.
Tala ndandu dibakala dimueka kayiza baka, bo nkazi’andi kakhambu vonga kulonguka Kibibila.
Thangu zinkaka, bamvuninanga Zimbangi zi Yave mambu ti bawu bamvasanga makanda. Mawu madi makiedika?
“Zimbangi zi Yave Bamvasanga voti Bantuadisanga Kithuadi va Dikanda?” (Dilongi didi mu jw.org)