Luzolo Kwidi Nzambi ayi Kwidi Wadi Yaku—Bwidi bu Kukunina Luawu

Kheti Baklisto bubu basi ko mu lukwiku lu kutumamana minsiku mi Mose, vayi zithumu ziwadi zilutidi zidi muawu—zitedi kuzola Nzambi ayi kuzola bankaka—zikhidi monisa mu bukufi mbi Yave kantomba mu befu. (Matai 22:37-39) luzolo beni lwisi ko buka kyuka tuntambula. Vayi tufweti kuna luawu. Bwidi? Phila yimweka yilutidi yi kuvangila mawu yitedi mu kutanganga Kibibila kadika kilumbu. Befu kuzaba zikhadulu Yave kammonisanga dedi buntubila Kibibila, tunkwiza zaba ‘mambote ma Yave.’ (Minkunga 27:4) Befu kuvanga mawu, luzolo lwitu mu nandi lunkwiza bwelama ayi mayindu mitu mankwiza ba buka mandi. Mawu mala ku tuvanga tutumamana zithumu zi Yave, kubunda mvandi lutumu lutedi kumonisa luzolo lu kyedika kwidi bankaka. (Yoane 13:34, 35; 1 Yoane 5:3) Landakana mambu matatu amama mankwiza kusadisa wuvanga matangu maku ma Kibibila maluta ba mambote:

• Sadila mayindu maku ayi byuma binkaka. Wukiyindula ti ngye widi vana. Mbi wulenda mona, kukuwa, ayi fuku mbi wunkuwa? Phila mabanza mbi wulenda ba?

  

• Vingisa phila wumvangilanga matangu. Tala mambu wulenda vanga: Tanga mu mbembu yinangama, voti landakana matangu maswekolo mu fono. Tanga matedi mutu bantubila mu Kibibila, voti sola dyambu mu Kibibila kubika kwandi kulandakana bikapu mu phila bisonimina. Buka kifwani, wulenda sadila Apêndice A7 voti B12 mu Tradução do Novo Mundo das Escrituras Sagradas mwingi kutanga matedi Yesu. Tanga kapu kyoso ki Kibibila babongila matangu ma kilumbu. Tanga zibuku zi Kibibila mu kulandakana phila zisonimina.

  

• Tanga mwingi wuvisa. Tanga kheti kikapu kimweka kadika kilumbu, tomba kuvisa ayi kuzaba bu kuzingila ma wunlonguka kubika kwandi to kutanga bikapu biwombo mwingi kulandakana thwadusulu. Yindula matedi kibwangu beni. Fyongunina mamoso matedi ma wuntanga. Sadila zimapa ayi matangu manka mantubila mambu beni. Fyongunina mambu wukhambu visa. Boti kuba sadila thangu beni mwingi wuyindula bubote matedi ma wutidi kutanga.