“Polo Wutonda Nzambi ayi Wumonisa Kibakala”

Mu thangu kimvuka ku Loma bayuwa ti Polo waba kwiza, dingumba dimweka di zikhomba badyata 64 di Kilometro mwingi kwendengana. Bwidi Polo kamwena mu mambu zikhomba bavanga? ‘Polo bo kabamona wutonda Nzambi ayi wumonisa kibakala.’ (Mavanga 28:15) Kheti Polo wuba wuzabakana banga mutu wuba kindisanga bimvuka kaba kengidilanga, vayi mu thangu ayiyi kaba mu buloku nandi waba tomba kutambula khindusulu.—2 Kolinto 13:10.

Bubu mvandi minsungi mi mavula, bankengidilanga ayi bankindisanga zikhomba mu bimvuka. Buka dikabu dyoso di Nzambi, bawu mvawu zithangu zinkaka bambanga bavonga, mu boma ayi mu kyunda. Mbi wulenda vanga mwingi kukindisa Nsungi wu divula ayi nkazi’andi mu thangu bala kwiza bwe kindisa kimvuka kinu? Dyosokwa dyambu wala vanga, yala ba phila yi ‘kubombasana va kimweka’.—Loma 1:11, 12.

• 

  Kukwenda mu zikhutukunu zi kubasikila mu kisalu ki kusamuna. Minsungi mi Mavula bambakanga beni khindusulu mu thangu minsamuni bamvanga mangolo moso mwingi kubaka ndandu mu sabala yi kinzenza. (1 Tesalonika 1:2, 3; 2:20) Yindula boti wulenda sala buka nsadisi wu mintwami ntwala mu ngonda beni yi kinzenza. Voti kubasika yandi ove na nkazi’andi mu kisalu ki kusamuna ayi kuba nata kwidi minlonguki myaku mi Kibibila? Bawu banzolanga kusamuna na minsamuni mivyakana, kubunda minsamuni mimona voti minsamuni bakhambulu beni bapisuka.

• 

  Kuba yamba ku nzo’aku. Wulenda bavana vama va kulala voti bidya? Ngye kuvanga mawu, widi mu kumonisa ti wunzolanga Nsungi wu divula ayi nkazi’andi. Bawu basintomba ko luba kubikila byuma biwombo voti bithalu.—Luka 10:38-42.

• 

  Yuwa ayi landakana malongi mawu voti zithwadusulu ziawu. Nsungi wu divula wutusadisanga mu luzolo tubakula phila tulenda bwela kuvangila buboti kisalu ki Yave. Ayi zikhumbu zinkaka, nandi kalenda kutusemba. (1 Kolinto 5:1-5) Nandi wumonanga beni mayangi mu thangu befu tuntumukina zithwadusulu katuvana ayi tukuzisadila.—Ebeleo 13:17.

• 

  Monisa ti wukumvwa nkinza. Kamba nsungi wu divula ayi nkazi’andi bwidi mangolo mawu ma kutwadisila ndandu. Ngye wulenda vangila mawu mu kuba kamba ngye veka voti mu kuba sonikina nkanda.—Kolosai 3:15.