Zithuadusulu Muingi Kutuadisa Lukutukunu lu Kubasika mu Kisalu ki Kusamuna

Zikhutukunu zi kubasikila mu kisalu ki kusamuna, dedi zikhutukunu zinkaka zidi minkhayilu mi Yave zitu vananga luaku lu kukikindasana mu luzolo ayi mavanga mamboti. (Ebeleo 10:24, 25) Lukutukunu beni lulenda vangimina mu minutu mitanu voti sambuadi kubunda mvandi kukabula mangumba ma minsamuni, bibuangu bi kusamunina ayi nsambu. Boti mu lukutukunu lunkaka mubedi ava luawu, buna bikanu kukala nkulu. Khomba wuntuadisa lukutukunu beni kalenda vanga mua dilongi muingi kusadisa zikhomba bankuiza basika mu kisalu ki kusamuna. Dedi mu kisabala bawombo bambasikanga mu kisalu ki kusamuna ayi bawombo mu bawu basa ba ko luaku lu kusamuna va khati sabala. Diawu dilenda ba diambu dimboti kutubila buidi bu kutonina masolo. Mambu mbi mankaka tulenda tubila mu lukutukunu beni?

• Mbonosono yi masolo babongila mu thuadusulu Nzingulu ayi Kisalu Kitu ki Buklisto

• Wulenda sadila mambu mammonika va kizunga muingi kutonina masolo

• Buidi bu kunungina bikaku minsamuni bamviokilanga beni

• Buidi wulenda tambudila mutu wukhambu kikininanga mu Nzambi, ti biuma vangu bivangu, wuntubanga mbembu yinkaka ayi widi mu kinganga kikhambulu kizabakana va kizunga kinu

• Buidi wulenda sadila khod’itu mayo, ayi jw library muingi kumonisa matangu masueku mu fono

• Buidi bu kusadila bilongulu tunsadilanga muingi kulonga

• Buidi bu kupisukila mu kusamunina mu telefone, minkanda, kuvana kimbangi ki baboso, kuvutukila mutu, ayi kuvana ndongukulu yi Kibibila

• Kutebula moyo nkinza wu kumonisa mamboti, lukinzu, mayangi voti mambu mankaka

• Dilongi voti video babongila mu mua buku buela pisuka mu kulonga ayi kutanga

• Buidi bu kukindisila ayi kusadisila khomba wunsamuna yaku

• Matangu mantubila kisalu ki kusamuna voti kinongo ki khindusulu mu kisalu ki kusamuna