Mu Kuba Ntuami Ntuala

Tulenda sadila buboti mangolo mitu mu kutsikika makani muingi tubuela kukivana mu kisalu ki Yave. (1 Kolinto 9:26) Makani ma kiphevi malenda tusadisa kusadila buboti thangu ava tsukulu nza ayiyi. (Efeso 5:15, 16) Buboti beni kubotula thangu mu mbuongimini yi dikanda muingi kutubila makani mulenda dukisa mu mvu wunkuiza wu kisalu. Muingi kukusadisa, mu thuadusulu ayiyi yi lukutukunu muidi makani mawombo ngie wulenda fiongunina mu nzila nsambu.—Yakobi 1:5.

Mu lusalusu lu dikanda dioso, fiongunina boti kheti mutu wumueka kalenda ba ntuami ntuala. Ngie kuyindula ti wulendi nunga ko kudukisa thalu yi bilokula bintombulu, buna yoluka na mintuami ntuala badi mvandi mambu mawombo ma kuvanga. (Zingana 15:22) Boti kuba, mulenda tumisa ntuami ntuala mu mbuongimin’inu yi dikanda muingi kumvana biuvu. Bosi sonika thuadusulu wunkuiza landakana. Boti ngie wuba ntuami ntuala, fiongunina boti wulenda nunga kubue vutuka mu kisalu akiokio.

Bukiedika ti vasi ko ni mutu va dikanda dinu wulenda ba nsadisi wu mintuami ntuala mu ngonda yimueka voti ziwombo? Boti ngie wisi ko buvinya bumboti, buna wulenda vanga mawu mu kubotulanga nkadu thangu kadika kilumbu muingi kusamuna. Boti wisi ko beni thangu muingi kusamuna va khati sabala kibila wunsalanga kilumbu kioso voti wunkotanga kikola, buna wulenda sola kuba nsadisi wu mintuami ntuala mu ngonda yidi bilumbu bi feriado voti mu ngonda yela ba zisabala zitanu. Sonika thangu tidi kutona kusala banga nsadisi wu mintuami ntuala ayi vanga thuadusulu muingi kudukisa bilokula bintumbulu.—Zingana 21:5.

TALANU VIDEO BA KIBAKALA . . . NGIE NTUAMI NTUALA, BOSI VANANU MVUTU WU KIUVU KINLANDA:

• Mbi kifuani ki yaya Amanda ki tulonga matedi phila Yave kankiebilanga batu bamvanganga mangolo muingi kuba mintuami ntuala?