Kisalu Kimfunu Muingi Kutona Ndongukulu yi Kibibila mu Ngonda Yivua

Mu Ngonda Yivua, tunkuiza vanga mangolo mawombo muingi kutona ndongukulu yi Kibibila mu kusadila mua buku Baka Mayangi ma Mvu ka Mvu! Minsamuni badi luaku lu kusola kuba minsadisi mi mintuami ntuala ayi kuvana 30 di bilokula mu ngonda beni. Buidi tunkuiza vangila kisalu akiokio?

• Mu Kimbangi Kitheti: Sadila tsielu yitsuka yi mua buku muingi kusadisa batu bavua nkinza ayi monisa buidi bumvangiminanga ndongukulu yi Kibibila. Bika kuzimbakana batu bavua nkinza ayi batu bakikinina muingi wuba vutukila. Kheti bawu bamanga theti ndongukulu yi Kibibila, vayi ḿba bawu balenda zola phila yimona yi kulongila ayi mua buku yimona. Tulendi bika ko mua buku beni mu zinzo zikhambulu batu voti kufila yawu kuidi batu bakhambu vua nkinza zitsangu zimboti. Dingumba di Bakulutu ba Kimvuka Dintadilagna Matedi Kisalu balenda vanga thuadusulu muingi kubuela zikhutukunu zinkaka zi kubasikila mu kisalu ki kusamuna.

• Kusadila luaku lunkaka: Boti mu kimvuka widi bansadilanga makalu ma bilongulu buna tula muna mua buku Baka Mayangi ma Mvu ka Mvu! Zabikisa kuidi batu bamvua nkinza ti mvandi badi luaku lu kutambula ndongukulu yi Kibibila mu khambu futa. Wulenda bamoninsa buidi bumvangiminanga ndongukulu yi Kibibila voti wulenda vangila mawu kilumbu kinkaka. Nkulutu wuntadilanga matedi kisalu kalenda sola minsamuni mipisuka muingi batona ndongukulu yi Kibibila na batu bamvanganga lungosu va kizunga. Mvandi, wulenda tona ndongukulu yi Kibibila na batu bansalanga yaku ayi bo wundengana mu thangu wumvana kimbangi mu khambu kubama.

Yesu wu tutuma, ‘Yendandu, lukitula batu milonguki’ ayi ‘luba longa’. (Matai 28:19, 20) Tuntomba muingi kisalu akiokio kimfunu ki tusadisa kudukisa makani amomo mu kusadila mua buku Baka Mayangi ma Mvu ka Mvu!