DILONGI 30
Tatamana Kudiatila mu Kiedika
‘Ndisi ko kibila kilutidi kuphana mayangi buka akiki: kukuwa ti bana bami bantatamana kudiatila mu kiedika’.—3 YOANE 4.
NKUNGA 54 ‘Ya yiyi Nzila’
MAMBU TUANLONGUKAa
1. Dedi bummonisina 3 Yoane 3, 4, mambu mbi malenda ku tutuadisa mayangi?
MVUALA Yoane wusadisa batu bawombo kuzaba kiedika. Ayi nandi waba kuba tadilanga banga bana bandi. Ayi kheti baviokila mu ziphasi ziwombo bawu basa bika ko kusadila Yave. Mvuala Yoane wuyangalala beni mu kumona lukuikumunu luawu. Befu mvitu bubu tunkuangalalanga beni bo tummona bana tubuta ayi minlonguku mitu mi Kibibila ku kivana ayi kutatamana kusadila Yave.—Tanga 3 Yoane 3, 4.
2. Kibila mbi mvuala Yoane kasonikina minkanda mitatu minnata dizina diandi?
2 Mu mvu 98 T.K., bo Yoane kabasika mu buloku ku divula di Patimosi, ḿba buawu kayendila kuezinga ku divula di Efeso voti divula dinkaka diba di fikama. Mu thangu beni, phevi yinlongo yi Yave yituadisa mvuala Yoane kusonika minkanda mitatu, muingi kusadisa baklisto bakuikama batatamana kukindisa kiminu kiawu mu Yesu ayi kudiatila mu kiedika.
3. Biuvu mbi tuembaka mimvutu mu dilongi adidi?
3 Mvuala Yoane nandi wutsuka wufua mu mimvuala mioso mi Yesu. Diawu kaba tatubukilanga beni bo zikhomba zinkaka batona kutuadisa malongi ma luvunu mu kimvuka.b (1 Yoane 2:18, 19, 26) Zikhomba aziozio baba tubanga ti, bazaba Nzambi vayi babasa tumamananga ko minsiku miandi. Buabu tuentubila malongi mo Yave katuadisa mvuala Yoane kusonika. Mvandi mu dilongi adidi, tuentubila mimvutu mi biuvu bitatu: Mbi binsundula kudiatila mu kiedika? Mambu mbi malenda ku tutula nkaku muingi kudiatila mu kiedika? Buidi befu boso tulenda ku yibuelasana mioko muingi tutatamana bakuikama?
MBI BINSUNDULA KUDIATILA MU KIEDIKA?
4. Dedi bummonisina 1 Yoane 2:3-6 ayi 2 Yoane 4, 6, mbi tufueti vanga boti tutidi kudiatila mu kiedika?
4 Boti tuntomba kudiatila mu kiedika, tufueti zaba kiedika kidi mu Kibibila ayi kutumukina minsiku midi muawu. (Tanga 1 Yoane 2:3-6; 2 Yoane 4, 6.) Yesu widi kifuani kimboti mu matedi kutumukina Yave. Diawu boti tutidi kutumukina Yave, tufueti landakana kifuani ki Yesu.—Yoane 8:29; 1 Petelo 2:21.
5. Mu mambu mbi tufueti bela lufiatu?
5 Muingi tutatamana kudiatila mu kiedika, tufueti ba lufiatu ti Yave widi Nzambi yi kiedika. Ayi kukikinina mvandi ti mambu moso kantubanga mu Kibibila madi makiedika. Mvandi tufueti ba lufiatu ti Yesu nandi Mesiya kakanikisa. Bawombo bubu, bakikininanga ko ti Yesu nandi Yave kasola muingi kuba Ntinu wu Kintinu kiandi. Mvuala Yoane wutu lubula ti vaba minlongisi miwombo mi luvunu baba tomba kuvukumuna batu bakhambu ba bakubama muingi kutedimina kimbangi kiedika kitedi Yave ayi Yesu. (2 Yoane 7-11) Mvuala Yoane wusonika: ‘Nani nkua luvunu? Woso mutu wukhambu kikininanga ti Yesu nandi Klisto.’ (1 Yoane 2:22) Muingi tubika vukumuka mu malongi ma luvunu, tufueti ba minlonguki mimboti mi Kibibila. Kibila mu phila ayoyi to tuala zabila buboti Yave ayi Yesu. (Yoane 17:3) Ayi buawu to tuala bela lufiatu ti tuma bakula kiedika.
MAMBU MBI MALENDA KU TUTULA NKAKU MUINGI TUDIATILA MU KIEDIKA?
6. Mu mambu mbi maphasi matoko bamviokilanga?
6 Baklisto boso bafueti ba keba keba muingi babika vunuka mu malongi ma batu. (1 Yoane 2:26) Vayi matoko bawu bafueti luta ba keba keba muingi babika bua mu ntambu awowo. Alexia,c wunkalanga ku França widi 25 di mimvu, wutuba: “Bo yiba muana ditoko minu yaba banga beni divuda mu mambu yaba longukanga mu kikola. Kibila mawombo mu mambu beni, mabe bonguluanga mu zibuku zisonimina mu diela di batu ayi baba tubanga ti biuma bioso biyizila mu kinzimbukulu. Khumbu zinkaka minu yaba zolanga malongi amomo. Vayi yizaba ti disa ba ko diambu dimboti kukikinina mambu yaba longuka mu kikola mu khambu theti kuzaba mayindu ma Yave mu matedi mambu beni.” Alexia wulonguka mua buku—Luzingu mu Kinzimbukulu Luyizila Voti Vangu lu Vangu (lc)? Mua sabala to zivioka, divuda dioso kaba dimana, Alexia wutuba: “Minu yiyiza baka bivisa bimmonisa ti mu Kibibila, muawu muidi kiedika. Ayi mvandi yiyiza visa ti kuzingila mu minsua mi Kibibila mi tutuadisanga mayangi ayi ndembama.”
7. Mangolo mbi baklisto boso bafueti vanga, ayi kibila mbi?
7 Baklisto boso bafueti vanga mangolo muingi kubika kuvanga mambu mambi bo bansadila Yave. Mvuala Yoane wutuba ti tulendi diatila ko mu kiedika ayi kunata luzingu lu kitsuza. (1 Yoane 1:6) Boti tuntomba kubaka lunungu va meso ma Yave bubu ayi mu bilumbu binkuiza kuntuala, tufueti tebukanga moyo ti nandi wummonanga mambu moso tumvanganga. Vasi ko masumu masuama va meso ma Yave, kibila nandi wummonanga mamoso tumvanganga kheti ku kisueki.—Ebeleo 4:13.
8. Buidi batu va nza bantadilanga masumu?
8 Tufueti bika kutadilanga masumu mu phila batu mu nza bantadilanga mawu. Mvuala Yoane wusonika: ‘Befu kutuba ti tuisi ko masumu, buna tuidi mu kukivuna befu veka.’ (1 Yoane 1:8) Mu bilumbu bi mvuala Yoane, zikhomba zinkaka mu kimvuka batona kulonga malongi ma luvunu. Bawu baba tubanga ti mutu kalenda vola disumu mu luzolo luandi ayi kheti bobo kutatamana kuba kikundi na Nzambi. Bubu batu bawombo mvandi banyindudilanga abobo. Bawu bantubanga ti badi kiminu mu Nzambi, vayi bakikininanga ko mu mambu nandi kantuba mu matedi disumu. Dedi mambu matedi kubundana nyitu na mutu wukhambu kuelana yaku, bawu bantubanga ti madi makani kadika mutu kafueti baka.
Matoko kindisanu kiminu kinu mu Kibibila, mu kukuikama mu zithumu zi Yave mu matedi mamboti ayi mambi. Mu phila ayoyi beno munkuiza nunga kutedimina kimbangi mambu munkikininanga (Tala lutangu 9)f
9. Ndandu mbi matoko bambakanga ba kukuikama mu mambu Kibibila kinlonga?
9 Matoko balenda vukumuka mu kutadila masumu mu phila batu bankotanga yawu kikola voti bansalanga yawu bama tadilanga. Mawu mamonikina Aleksandar. Nandi wutuba: “Mu kikola kiama, bikhupa bimueka baba kukhuikanga yibundana yawu nyitu. Bo yaba manganga, bawu baba kumvuezanga mu kutuba ti boti yisi ko kimasi buna babakala yami to bambundananga yami nyitu.” Mawu mvaku widi mu kuviokila? Boti buawu, tebuka moyo ti kukuikama mu mambu Kibibila kinlonga, mankuiza kutuadisa beni ndandu. Dedi wala baka buvinya bumboti, luzolo widi mu ngie veka luala buelama ayi wala ba kikundi kifikama na Yave. Kadika khumbu wunkindama mu zithotolo, ngie wala ba wukubama muingi kununga zithotolo zinkaka zinkuiza kuntuala. Mvandi bika kuzimbakana ti Satana nandi wuntuadisanga mayindu ma nza mu matedi kubundana nyitu. Diawu kadika khumbu wunnunga zithotolo, ngie widi mu ‘kununga Nkadi’ampemba.’—1 Yoane 2:14.
10. Buidi 1 Yoane 1:9, wulenda ku tusadisila kusadila Yave na kilunzi kisama?
10 Befu tunkikininanga ti Yave nandi to widi nsua wu kutsikika mambu mamboti ayi mambi. Ayi befu tumvanganga mamoso muingi kubika vola masumu. Vayi befu kuvola disumu, tufueti zabikisa diawu kuidi Yave mu nzila nsambu. (Tanga 1 Yoane 1:9.) Mvandi tuntombanga lusalusu lu bakulutu ba kimvuka kibila Yave wuba vana kiyeku ki kutukieba. (Yakobi 5:14-16) Tufueti ba keba keba muingi tubika kukivana beni fotu mu mambu Yave ka tulemvukila mu nzila khudulu yi muan’andi Yesu Klisto. Kibila bo Yave kanlemvukilanga masumu mitu, nandi wunzimbakananga mawu. Mu phila ayoyi befu tulenda kunsadila na kilunzi kisama.—1 Yoane 2:1, 2, 12; 3:19, 20.
11. Buidi tulenda kiebila kilunzi kitu, mu malongi malenda dekula kiminu kitu?
11 Tubika kuwanga malongi ma batu babika ayi babalukila kimvuka ki Yave. Tona va thonono yi kimvuka ki baklisto, Satana wumvanganga mamoso muingi kutula divuda mu kilunzi ki bisadi bikuikama bi Nzambi. Diawu tufueti zaba kusuasisa kiedika ayi luvunu.d Zimbeni zitu balenda sadila internet muingi kudekula kiminu kitu mu Yave ayi luzolo tuidi mu zikhomba. Diawu bika kikinina mu mambu amomo ma luvunu kibila Satana nandi wuntuadisanga mawu!—1 Yoane 4:1, 6; Nzaikusu 12:9.
12. Kibila mbi tufueti kindisila kiminu kitu?
12 Boti tutidi kununga zithotolo zi Satana, tufueti buela kiminu kitu mu Yesu ayi kufiatila mu phila Yave kadi mu kunsadila muingi kudukisa lukanu luandi. Mvandi tufueti ba lufiatu kuidi batu Yave kansadilanga bubu, muingi kutuadisa kimvuka kiandi. (Matai 24:45-47) Tulenda buela kindisa kiminu kitu mu kutanganga Kibibila kadika kilumbu. Befu kuvanga mawu, kiminu kitu kinkuiza ba banga nti widi zingazi zikota buboti mu ntoto. Mawu mvandi mvuala Polo kakamba zikhomba baba ku Koloso: ‘Dedi bo beno lukikinina mu Mfumu, Yesu Klisto, lutatamana kudiata mu kithuadi ayi nandi, lumena zinganzi ayi lukindusu mu nandi.’ (Kolosai 2:6, 7) Befu kuvanga mangolo ma kukindisa kiminu kitu, Satana ayi batu kantuadisanga basinkuiza tutula ko nkaku muingi tutatamana kudiatila mu kiedika.—2 Yoane 8, 9.
13. Mambu mbi befu tuzebi, ayi kibila mbi?
13 Befu tuzabizi ti batu va nza ba tulendanga. (1 Yoane 3:13) Kibila mvuala Yoane wu tutebula moyo ti ‘nza yimvimba yidi mu luyalu lu Nkua Mambi.’ (1 Yoane 5:19) Bo tsukulu yi nza yidi mu kufikama, nganzi Satana kadi mu bisadi bi Yave yidi mu kubuelama. (Nzaikusu 12:12) Satana kasadilanga ko to kitsuza ayi malongi ma luvunu ma batu babika kimvuka ki Yave muingi ku tuvukumuna. Vayi mvandi wunsadilanga zinzomonu muingi ku tuvongisa mu kiphevi. Satana zebi ti thangu yiluelo to yisiedi muingi kabungua. Diawu kansadilanga thangu beni muingi ku tutula nkaku mu kisalu kitu ki kusamuna ayi kudekula kiminu kitu. Diawu tukhambu kuitukilanga mu thangu mintinu bankandimina voti bantula ndilu mu ziphila tufueti samunina. Kheti bobo, zikhomba zitu badi mu bibuangu abiobio, bantatamananga kusadila Yave. Lukuikumunu luawu lummonisa ti befu mvitu tulenda nunga mu mosokua mambu Satana kalenda vanga muingi ku tuvongisa!
TUYIBUELASANA MIOKO MUINGI TUTATAMANA KUDIATILA MU KIEDIKA
14. Mu ziphila mbi tulenda sadisila zikhomba zitu batatamana kudiatila mu kiedika?
14 Muingi tusadisa zikhomba zitu batatamana kudiatila mu kiedika, tufueti kuba monisa kiadi. (1 Yoane 3:10, 11, 16-18) Tufueti monisanga luzolo kuidi zikhomba zitu kubika to mu thangu yi mayangi vayi mvandi bo bamviokila mu ziphasi. Boti ngie zebi khomba befuila mutu kanzolanga, ngie wulenda kummonisa kiadi mu kumbomba ayi mu kunsadisa mu ziphasi kadi mu kuviokila. Ayi boti zikhomba babe monikina kivuka ayi Nzo yi Kintinu voti zinzo ziawu zi betuluka, ngie wulenda kukivana muingi kubuela mioko mu kubue ludika ziawu.
15. Dedi bummonisina 1 Yoane 4:7, 8, mbi tufueti vanga?
15 Bo tummonisa luzolo befu na befu, tuidi mu kulandakana ntungulu wu Yave, Tat’itu yi diyilu. (Tanga 1 Yoane 4:7, 8.) Phila yinkaka yinkinza tulenda monisina luzolo, yidi mu kulemvukilanga zikhomba zitu. Boti khomba benyongisa ntim’itu ayi be tudinda nlemvu, befu tulenda kummonisa luzolo mu kunlemvukila ayi kuzimbakana mambu beni. (Kolosai 3:13) Khomba yimueka bantedilanga Aldo wudasuka mu thangu khomba yinkaka mu kimvuka katubila bubi mvila kabutukila. Aldo wutuba: “Minu yisambila khumbu ziwombo muingi Yave katsadisa yibika tadila khomba beni mu phila yimbi.” Vayi Aldo mvandi wuvanga mambu mankaka. Nandi “wutumisa khomba beni muingi babasika va kimueka mu kisalu ki kusamuna.” Aldo wubue tuba: “Bo khomba beni kazaba ti minu yinyonga mu mambu katuba mu matedi mvila yibutukila, nandi wundinda nlemvu. Ayi mu phila kabe kolukila yama, minu yivisa ti nandi wunyonga mu mambu kavanga. Diawu tudedikisila mambu beni ayi tuma zimbakana.”
16-17. Makani mbi tufueti tsikika?
16 Mvuala Yoane waba zolanga beni zikhomba mu kimvuka diawu kaba tatubukilanga beni mu kiphevi kiawu. Tulenda mona kivisa ki luzolo luandi, mu minkanda kasonikina zikhomba. Buboti beni kuzaba ti zikhomba ziwombo zi babakala ayi zi bakieto badi luzolo dedi Yoane, basolua va ntoto muingi kuyala na Yesu ku diyilu!—1 Yoane 2:27.
17 Buboti beni kuvanga mangolo muingi kusadila mambu tuma longuka mu dilongi adidi. Diawu baka makani ma kutatamana kudiatila mu kiedika mu kutumukina Yave mu mamoso wumvanga. Longuka Kibibila ayi fiatila mu mambu kiawu kinlonga. Kindisa kiminu kiaku mu Yesu. Bika vukumuka mu malongi mankuizilanga mu diela di batu ayi malongi mankuizilanga kuidi batu babika ayi babalukila kimvuka ki Yave. Bika kubua mu ntambu wu kuvanga mambu mambi bo wunsadila Yave. Ayi bika kuvutukila zioziawu zinzimbala. Ayi zingila mu zithumu zisonga zi Yave. Mvandi sadisa zikhomba batatamana kudiatila mu kiedika, mu kuba lemvukilanga mu thangu ba kunyongisa ntima ayi mu kuba sadisanga mu zitsatu ziawu. Mu phila ayoyi, befu tuala tatamana kudiatila mu kiedika kheti bo tumviokila mu mambu maphasi.
NKUNGA 49 Tuyangidika Ntima wu Yave
a Bo tuidi mu kuzingila mu nza Satana kadi mu kutuadisa, diawu kudiatila mu kiedika didi diambu diphasi. Baklisto mu sekulu yitheti, mvawu baviokila mu mambu amomo. Diawu, muingi kuba sadisa Yave wutuadisa mvuala Yoane muingi kasonika minkanda mitatu. Minkanda amiomio mimmonisa mambu malenda vanga mutu kubika kudiatila mu kiedika. Mvandi mimmonisa mbi kafueti vanga muingi kununga mambu beni.
b Tala mvandi tsielu yintuba “Kibila Mvuala Yoane Kasonikina Minkanda Mitatu.”
c Bavingisa mazina mankaka mu dilongi adidi.
d Tala mvandi tsielu yintuba “Ngie Widi Bivisa Bioso?” Mu Kibanga ki Nsungi ki Ngonda Yinana mvu 2018.
f MAMBU MADI MU ZIFIKULA: Khomba yimueka yinkieto wumviokila mu zithotolo mu kikola zi kukuwa ayi kumona mu zikhonzo zioso, zifoto zibabama mu kibaka zimmonisa ti disi ko diambu dimbi dibakala na dibakala voti nkieto na nkieto kukuelana. (Ayi mu bikhulu binkaka, kidimbu ki nkiama kidi kithuadi na mambu amomo.) Muingi kabuela lufiatu luandi mu mambu kankikininanga, diawu kabakila makani ma kufiongunina mu bilongulu bitu, minsua mi Yave mu matedi mamboti ayi mambi. Mawu masadisa khomba beni kununga zithotolo kayiza viokila