Tulenda Zinga Mvu ka Mvu

1. Mbi binkuiza monika befu kuyindula mu lukanu lu Yave lu kuzinga mvu ka mvu?

YAVE wukanikisa ti boboso ba kuntumukinanga bala “zinga mvu ka mvu.” (Loma 6:23) Bo tunyindula mu mambu Yave ka tukanikisa, luzolo luitu mu nandi lunluta kindamanga. Yindula mu mambu amama: Tat’itu yi diyilu wu tuzolanga beni ayi nandi kalasa bika ko ni kiuma ki tutatula kuidi nandi.

2. Buidi lukanu lu kuzinga mvu ka mvu lu tusadisilanga?

² Lukanu lu kuzinga mvu ka mvu lu tusadisanga kukindama mu ziphasi tuidi mu kuviokila bubu. Bo zimbeni zitu ba tukana ku tuvonda, tualasa ba ko boma bu kubika kusadila Yave. Kibila mbi? Kibila tuzebi ti befu kuba kiminu mu Yave, kheti tufuidi nandi wala tuvulubusa muingi kuzinga mvu ka mvu. (Yoa. 5:28, 29; 1 Koli. 15:55-58; Ebe. 2:15) Kibila mbi tulenda bela tufiatu ti tulenda zinga mvu ka mvu? Mona bibila binlanda.

YAVE WUNZINGANGA ZITHANGU ZIOSO

3. Kibila mbi tulenda bela lufiatu ti Yave widi lulendu muingi ku tuvana luzingu lu mvu ka mvu? (Minkunga 102:12, 24, 27)

³ Befu tuzebi ti Yave widi lulendu muingi ku tuvana luzingu lu mvu ka mvu, kibila nandi widi tho yi luzingu ayi wunzinganga thangu zioso. (Minku. 36:9) Mona matangu mu Kibibila mammonisa ti Yave wunzinganga thangu zioso ayi wala tatamana kuzinga. Minkunga 90:2 yintuba ti Yave “wunzinganga mu thangu zioso.” Minkunga 102 yintubila momawu mambu. (Tanga Minkunga 102:12, 24, 27.) Ayi mbikudi Habakuki wusonika matedi Tat’itu yi diyilu: “A Yave bukiedika ti ngie wuzinganga ko mvu ka mvu? A Nzambi’ami, Mfumu’ami ngie wufuanga ko.”—Haba. 1:12.

4. Bukiedika ti tufueti kuazuka boti tuisimvisa ko ti Yave wunzinganga mu zithangu zioso? Sudikisa.

⁴ Ngie wummonanga phasi kukikinina ti Yave wunzinganga thangu zioso”? (Yesa. 40:28) Batu bawombo mvandi bammonanga phasi kukikinina mu mambu amomo. Elihu wutuba matedi Nzambi: “Tulendi zaba ko thalu yi mimvu miandi.” (Yobi 36:26) Yindulabu mu kifuani akiki: Kheti tumonanga ko phemu, vayi tuidi lufiatu ti yawu yidi. Bobuawu mvandi kheti tumonanga ko Nzambi, tuidi lufiatu ti nandi widi ayi wunzinganga thangu zioso. Diawu befu batu tulendi visa ko bubote buidi Yave kanzingilanga zithangu zioso ayi kala tatiminina kuzinga. Vayi kukhambu visa mawu, masinsundula ko ti Nzambi kazinganga ko zithangu zioso. Mvang’itu kasi ko ndilu mu mambu kalenda vanga dedi befu batu. (Loma 11:33-36) Kibila ava biuma bioso bivangu—dedi thangu ayi zimbuetila, nandi wunzinganga—thangu zioso. Mawu ma tuvana lufiatu ti Yave nandi “wuvanga ntoto mu lulendu luandi.” Bukiedika nandi wunzinganga thangu zioso ava “kuvanga diyilu.” (Yele. 51:15; Mava. 17:24) Kibila mbi kinkaka tuidi muingi kuba lufiatu ti tulenda zinga mvu ka mvu?

TUVANGULU MUINGI KUZINGA MVU KA MVU

5. Luaku mbi Adami ayi Eva baba?

⁵ Kubotula kuandi batu, bivangu bioso binkaka Yave kavanga, wu bivanga na ndilu yi luzingu. Befu to batu, tuvangulu na luaku lu kuzinga mvu ka mvu. Vayi Yave wulubula Adami: “Mu matedi nti wu kuzabila mamboti ayi mambi, kawudia makundi ma nti beni, kibila kilumbu wala dia mawu bukiedika, ngiewu wala fua.” (Ngene. 2:17) Boti Adami ayi Eva batumukina Yave, khanu basa fua ko. Diawu ḿba tulenda tuba ti boti bawu batumukina Yave, khanu nandi wuba vana luaku lu kudia “nti wu luzingu.” Mawu maba sundula ti khanu “banzinganga mvu ka mvu.”b—Ngene. 3:22.

6-7. (a) Diambi mbi dinkaka dimmonisa ti batu basa vangulu ko muingi bafua? (b) Mbi ngie wala tomba kuvanga mu nza yimona? (Tala foto.)

⁶ Didi diambu di kukuitukila ti zi cientista babakula bivisa ti tonzu tuitu, tulenda nunga kulunda mambu malutidi kena mo tulenda nunga kulonguka mu luzingu luitu loso. Mu mvu 2010 jornal yimueka yibasika yiba ntu diambu Mente Científica Americana yituba ti mu tonzu tuitu muidi 2.5 di biveve na bivevi bi zi gigabytes ayi thalu ayoyi yidi dedi mueka na 3 di bivevi na bivevi di bilokula. Ayi boti tuidi mu kutala mambu madi mu tonzu mu televisão, tulenda viokisa 300 di mimvu. Mambu amomo mammonisa ti tonzu tulenda lunda mambu kuvioka thalu ayoyo. Mvandi mammonisa ti Yave wuvanga tonzu tuitu muingi kulunda mambu kuvioka 70 voti 80 di mimvu tulenda zingila.—Minku. 90:10.

⁷ Yave wu tuvanga na phuila yi kuzinga mvu ka mvu. Diawu Kibibila kintubila ti Nzambi “wutula mu mintima miawu phuila yi kuzinga mvu ka mvu.” (Mpovi 3:11) Akiokio, kiawu kibila tuntadilanga lufua banga mbeni. (1 Koli. 15:26) Diawu boti tuidi kimbevu kingolo, bukiedika ti tuisinkuiza vanga ko ni diambu muingi kutemina to lufua? Ndamba. Kibila befu tuala tomba doctor ka tuvana bilongu bintombulu muingi tubeluka. Bukiedika befu tunkuiza vanga dioso kua diambu muingi tubika kufua. Diawu tumbelanga mu kiunda mu thangu yiwombo bo tumfuilu mutu tunzolanga kuba kuandi kimuamuana voti kiboba. Kibila Yave wu tuvanga muingi tuzinga mvu ka mvu. (Yoa. 11:32, 33). Ayi tuidi bibila biwombo muingi kukikinina mu mambu amomo. Buabu ndoku tumona mambu Yave kavanga mu thangu yikhulu ayi mu bilumbu bitu, mammonisa ti lukanu luandi lusa baluka ko.

YAVE KASA BALULA KO LUKANU LUANDI

8. Mu matedi lukanu lu Yave, lufiatu mbi tuidi mu mambu madi mu Yesaya 55:11?

⁸ Kheti bo Adami ayi Eva basumuka ayi batuadisa lufua kuidi bana bawu, Yave kasa balula ko lukanu luandi kaba tona vana thonono. (Tanga Yesaya 55:11.) Nandi wukhidi makani ma kuvana luzingu lu mvu ka mvu kuidi bisadi biandi bikuikama. Tuzabidi mawu, mu kutadila mambu Yave katuba ayi kamana vanga matedi lukanu luandi.

9. Mbi Nzambi kakanikisa? (Danieli 12:2, 13)

⁹ Yave wukanikisa ti wala vulubusa bafua ayi wala bavana luzingu lu mvu ka mvu. (Mava. 24:15; Tito 1:1, 2) Yobi wuba lufiatu ti Yave wala vulubusa bafua. (Yobi 14:14, 15) Mbikudi Danieli mvandi wuba lufiatu ti batu bala vulubuka ayi bala baka luaku lu kuzinga mvu ka mvu. (Minku. 37:29; tanga Danieli 12:2, 13.) Ayi mu bilumbu bi Yesu, basi Yuda baba kikininanga ti Yave wala vana “luzingu lu mvu ka mvu” kuidi bisadi biandi bikuikama. (Luka 10:25; 18:18) Khumbu ziwombo Yesu wutubila matedi lukanu alolo ayi naveka bamvulubusa kuidi Tat’andi.—Matai 19:29; 22:31, 32; Luka 18:30; Yoa. 11:25.

10. Mbi luvulubukusu luvangama mu thangu yikhulu lummonisa? (Tala fikula.)

¹⁰ Yave tho yi luzingu ayi widi lulendu muingi kuvulubusa bafua. Ayi wuvana mangolo muingi Elia kuvulubusa muana wu mfuizi wu Salefa. (1 Minti. 17:21-23) Buviokila thangu, Yave wusadisa mbikudi Elisa kavulubusa muana wu nkieto musi Sunemi. (2 Minti. 4:18-20, 34-37) Luvulubukusu lu batu abobo, lummonisa ti Yave widi lulendu lu kuvulubusa bafua. Bo kaba va ntoto, Yesu wumonisa ti Yave wumvana lulendu lu kuvulubusa batu. (Yoa. 11:23-25, 43, 44) Bubu Yesu widi ku diyilu ayi bamvana “lulendu loso. . . tona ku diyilu ayi va ntoto.” Ayi nandi widi lulendu lu kuvulubusa “baboso badi mu biziami” muingi kuzinga mvu ka mvu.—Matai 28:18; Yoa. 5:25-29.

11. Buidi khudulu yi tuvanina luaku lu kubaka luzingu lu mvu ka mvu?

¹¹ Kibila mbi Yave kabikila Muan’andi wu luzolo kafua lufua lu phasi? Yesu wumonisa kibila bo katuba: “Nzambi wuzola beni batu va nza, diawu kafidila Muan’andi wumueka to muingi woso wu kunlekila kiminu kabika bungu, vayi kabaka luzingu lu mvu ka mvu.” (Yoa. 3:16) Mu kuvana Muan’andi muingi ka tukula mu masumu, mawu mammonisa ti Nzambi wuntomba tubaka luzingu lu mvu ka mvu. (Matai 20:28) Ayi mvuala Polo wusudikisa mambu amomo matedi lukanu lu Nzambi bo kasonika: “Kibila bo lufua luyizila mu mutu wumueka, buawu mvandi luvulubukusu lu bafua luyizila mu mutu wumueka. Kibila dedi bo batu boso bamfuilanga mu Adami, buawu mvandi mu Klisto baboso bala tambudila luzingu”—1 Koli. 15:21, 22.

12. Buidi Kintinu ki Nzambi kiala dukisila lukanu luandi mu befu?

¹² Yesu wulonga minlandikini miandi muingi badinda mu nzila nsambu Kintinu ki Nzambi kiza ayi kivanga luzolo luandi va ntoto. (Matai 6:9, 10) Ayi diambu dinkaka badinda mu nsambu awowo didi, batu bazinga mvu ka mvu va ntoto. Muingi kudukisa lukanu alolo, Yave wusola Muan’andi muingi kuba Ntinu mu Kintinu kiandi. Nzambi wukutikisa 144.000 di batu bazinga va ntoto muingi bayala va kimueka na Yesu mu Kintinu ki Nzambi.—Nzai. 5:9, 10.

13. Mbi Yave kadi mu kuvanga bubu ayi mbi ngie fueti vanga?

¹³ Bubu Yave widi mu kukubika “nkangu wunneni wu batu” muingi bazinga kutsi luyalu luandi. (Nzai. 7:9, 10; Yako. 2:8) Kheti batu bubu mu nza badi luvasanu, banlendanga batu bankaka ayi bantuadisanga mimvita, vayi nkangu wunneni, badi mu kuvanga mangolo muingi kubika mavanga amomo mambi. (Mika 4:3) Bawu banuananga ko mimvita vayi bansadisanga batu kuzaba “tsundu yi luzingu” mu kuba longa matedi kiedika ki Nzambi ayi zikhanu ziandi. (1 Timo. 6:19) Zikhomba zinkaka bamviokilanga mu zikhuamusu va dikanda ayi bankaka bamviokilanga mu mambu ma kukhambu ku zimbongo mu kibila ki kubuela mioko Kintinu ki Nzambi. Vayi Yave wundukisanga zitsatu ziawu. (Matai 6:25, 30-33; Luka 18:29, 30) Mambu moso amomo, ma tuvana lufiatu ti Kintinu ki Nzambi kidi kikiedika ayi kiala dukisa zikhanu zioso.

MAMBU MAMBOTI MANKUIZA

14-15. Buidi lukanu lu Yave matedi kumanisa lufua luala salimina?

¹⁴ Yesu bubu widi mu kuyala ku diyilu ayi wala dukisa mambu moso Yave kakanikisa. (2 Koli. 1:20) Tona mu mvu 1914, Yesu widi mu kufuisa tsoni zimbeni ziandi. (Minku. 110:1, 2) Mua thangu to yisiedi Yesu ayi Baklisto basolu bala yala yandi, bala tulula bankua mambi.—Nzai. 6:2.

¹⁵ Mu luyalu luandi lu kivevi di mimvu, Yesu wala vulubusa bafua ayi wala sadisa bo bala tumukina Yave kuba bavedila. Bosi kutsuka thotolo yitsuka, batu boso basonga bala “vua ntoto ayi bala zingila muawu mvu ka mvu.” (Minku. 37:10, 11, 29) Mayangi beni kuzaba ti “mben’itu yitsuka lufua lualasa bue ba ko.”—1 Koli. 15:26.

16. Mbi bilenda ku tusadisa kutula kisalu ki Yave va theti?

¹⁶ Dedi bo tuma muena mu dilongi adidi, kivuvu kitu ki kuzinga mvu ka mvu kidi ki kiedika dedi bummonisina Kibibila. Ayi kiawu, kilenda tusadisa kutatamana bakuikama mu bilumbu abibi bitsuka. Vayi muingi kukuangidika Yave, vasintombulu ko to kuba phuila yi kutatamana kuzinga. Vayi makani mitu mafueti ba, ma kutatamana bakuikama mu Yave ayi mu Yesu ayi kubuela monisa luzolo luitu mu bawu. (2 Koli. 5:14, 15) Luzolo alolo, lu tusadisa kuzabikisa kivuvu kitu kuidi batu bankaka. (Loma 10:13-15) Ayi bo tunluta kuna zikhadulu Yave kanzolanga, tunkuiza ba ntindu batu nandi kantomba ayi kuba yandi bukundi buala kadidila.—Ebe. 13:16.

17. Luaku mbi kadika mutu mu befu kadi? (Matai 7:13, 14)

¹⁷ Bukiedika ti befu tuala ba mu dingumba di batu bala tambula luzingu lu mvu ka mvu? Yave widi mu ku tuvana luaku alolo. Buabu kadika mutu widi luaku lu kusola nzila yinnata luzingu. (Tanga Matai 7:13, 14.) Buidi luzingu luitu luala bela bo tuala zinga mvu ka mvu? Tunkuiza baka mvutu wu kiuvu akioki, mu dilongi dinlanga.