DILONGI 31
“‘Luba Bakindama ayi Bakuikama’
‘Diawu zikhomba ziama zi luzolo, luba bakindama ayi bakuikama.’ —1 KOLI. 15:58.
NKUNGA 122 Ba Wukindama!
MAMBU TUANLONGUKAa
1-2. Mu phila mbi tulenda dedikisila Baklistu banga kibanga kinangama? (1 Kolintu 15:58)
MU MVU 1978, mintungi mimueka ku Japão, babaka makani ma kutunga kibanga kinangama beni. Batu baba kalanga ku kizunga beni baba kukikuvusanga buidi kibanga beni kinkuinza kindimina mu zindikununu zi ntoto zimmonikanga va kibuangu beni. Ngie zebi mbi batu batunga kibanga beni bavanga muingi kiawu kikindama mu zindikununu zi ntoto? Batu bafikula kiawu bavanga muingi kibanga beni kiba kikinda kheti bivuka bilenda monika. Befu Baklistu tuidi buka kibanga akiokio. Mu phila mbi?
2 Kisadi ki Yave kafueti ba mayindu mafuana matedi kukindama ayi kukuikama. Ayi mvandi, kafueti ba wukindama ayi wukuikama mu kukakidila minsiku ayi zithuadusulu zi Yave. (Tanga 1 Kolintu 15:58.) Nandi kafueti ba ‘wukubama muingi kutumukina.’ Mvandi kafueti ba ‘mayindu mafuana’ bo vantombulu kuvanga mawu. (Tiagu 3:17) Kisadi ki Yave widi mayindu mafuana, kasi ko mutu wuphasi voti wunkikininanga mu mambu moso. Mu dilongi adidi, tunkuiza mona buidi tufueti bela bakindama. Mvandi tunkuiza mona mambu matanu Satana kansadilanga muingi kuvongisa makani mitu ma kutatamana bakindama. Ayi tunkuiza mona buidi tulenda nungina miawu.
BUIDI TULENDA BELA BAKINDAMA?
3. Minsiku mbi mi Yave midi mu Mavanga 15:28, 29?
3 Yave, nandi mutu wufuana muingi kuvanga minsiku ayi wumvananga dikabu diandi minsiku mikhambulu phasi mu kuvisa. (Yesa. 33:22) Dedi, Dingumba Dintuadisi mu sekulu yitheti dizabikisa ziphila zitatu Baklistu balenda tatiminina bakindama: (1) mu kubuongimina to Yave, (2) mu kukinzika menga ayi (3) mu kutumukinanga minsua mi Yave. (Tanga Mavanga 15:28, 29.) Buidi Baklistu bubu balenda bela bakindama mu mambu matatu amomo?
4. Buidi tumvaninanga mbuongimini yo Yave to kafueni tambula? (Nzaikusu 4:11)
4 Tummanganga mbuongimini yi luvunu, mu kubuongimina to Yave. Nandi wuvana kuidi basi Isaeli nsiku wu kubuongimina to nandi. (Deute. 5:6-10) Ayi bo Satana katota Yesu, Yesu wunkamba ti tufueti buongimina to Yave. (Matai 4:8-10) Diawu, tubuongiminanga ko bitumba. Mvandi tubuongiminanga ko batu—dedi, zimfumu zi binganga, basi pulitika, batu bazabakana mu nza dedi bo bantanga bola. Befu tuba tadilanga ko banga zinzambi. Tumbanga va khonzo Yave mu kumbuongimina to nandi kibila ‘wuvanga biuma bioso.’—Tanga Nzaikusu 4:11.
5. Kibila mbi tunkakidilanga nsiku wu Yave matedi luzingu ayi menga?
5 Tunkakidilanga nsiku wu Yave matedi luzingu ayi menga. Kibila mbi? Kibila Yave wutuba ti menga mansundula luzingu, nkhailu nandi katuvana. (Levi. 17:14) Bo Yave kavana nsua mu khumbu yitheti yi kudianga bibulu, nandi wukandimina kudia menga. (Ngene. 9:4) Nandi wu buevutukila lutumu alolo bo kavana Nsiku wu Mose kuidi basi Isaeli. (Levi. 17:10) Yave wukamba kuidi Dingumba-Dintuadisi mu sekulu yitheti muingi bazabikisa kuidi Baklistu boso ti bafueti tatamana ‘kutatuka. . . menga.’ (Mava. 15:28, 29) Tuntumukinanga nsiku awowo bo tumbaka makani matedi ntindu mbi mbukulu tunkuiza kikinina.b
6. Mangolo mbi tumvanganga muingi kutumukina minsiku mi Yave?
6 Tuntumukinanga minsua mi Yave. (Ebe. 13:4) Mu kusadila kifuani, mvuala Polo wu tulubula ‘tuyala’ binama binhitu’itu—mawu mansundula ti tufueti vanga mamoso tunnunga muingi tubika zinzinunu zioso zi kinsuni ayi kubika tala voti kuvanga kioso kiuma kilenda ku tunata kuvanga kitsuza. (Kolo. 3:5; Yobi 31:1) Bo tumviokila mu thotolo, mu nsualu tummanganga kuvanga dioso diambu dilenda bifisa kikundi kitu na Nzambi.
7. Mbi tufueti ba bakubama muingi kuvanga ayi kibila mbi?
7 Yave wuntomba muingi ‘tuntumukina mu ntima woso.’ (Loma 6:17) Nandi wu tuvananga zithuadusulu mu kutadila mamboti mitu ayi kabalulanga ko zithuadusulu ziandi. (Yesa. 48:17, 18; 1 Koli. 6:9, 10) Tumvanganga mangolo muingi kukuangidika Yave ayi kuba momawu mayindu nsoniki wu minkunga kaba bo katuba: ‘Yibaka makani ma kutumukina zithuadusulu ziaku nati kutsuka.’ (Minku. 119:112) Vayi, Satana wuntomba kuvongisa makani tubaka ma kutatamana bakuikama. Mintambu mbi kansadilanga?
MINTAMBU MBI SATANA KANSADILANGA MUINGI KU TUVONGISA?
8. Mbi Satana kansadilanga muingi ku tuvongisa?
8 Zikhuamusu. Satana wunsadilanga buphunha ayi kiunda muingi ku tuvongisa. Nandi wuntomba ‘ku tubuisa’ ayi kutulula kikundi kitu na Yave. (1 Pete. 5:8) Baklistu mu sekulu yitheti baba bula ayi bankaka baba vonda mu kibila ki makani babaka ma kutatamana bakuikama. (Mava. 5:27, 28, 40; 7:54-60) Bubu mvandi Satana wunsadilanga ntambu awowo. Tulenda mona bivisa mu mawu mu mambu bamvangilanga zikhomba zitu ku Rússia ayi mu zitsi zinkaka.
9. Vana kifuani kilenda tusadisa kukubama ava mambu malenda tutula boma mamonika.
9 Mambu malenda tutula boma. Kubika kuandi zikhuamusu, Satana wunsadilanga mvandi ‘mintambu’ minkaka. (Efeso 6: 11) Mona kifuani ki khomba mueka bantedilanga Bob, nandi wuba ku nzo mbuku ayi vabe tombulu kumpasula. Nandi wuzabikisa dotor ti kalendi kikinina ko bamvutula menga. Dotor beni wukikinina makani mandi ma kukhambu mvutula menga. Vayi, bo basi dikanda diandi bavutuka ku nzo, va builu dotor beni wuyenda ku kivinga yaya Bob kaba ayi wunkamba ti ḿba basinkuiza sadila ko menga vayi vabe tombulu kukubika mawu boti mambu mankuiza baluka. Dotor beni ḿba wuyindula ti yaya Bob wunkuiza balula mayindu mandi kibila basi dikanda diandi basa ba ko vana. Vayi yaya Bob wutatamana wukuikama ayi wubue nkamba ti balendi sadila ko menga kheti mambu mankuiza baluka.
10. Widi ntambu kulandakana mayindu makhambu fuana? Sudikisa (1 Kolintu 3:19, 20)
10 Mayindu makhambu fuana. Befu kutona kuyindula dedi batu bakhambu tumukinanga minsiku mi Yave, mvandi tunkuiza tona kubayisa minsiku mi Yave. (Tanga 1 Kolintu 3:19, 20.) ‘Nduenga yi nza’ yimvanganga batu kukhambu tumukina Nzambi. Baklistu bankaka ku divula di Pergamu ayi Tiatira balandakana zikhadulu zimbi zi batu baba vanganga kitsuza ayi baba buongiminanga zinzambi zi luvunu. Yesu wuba semba mu kubika bifu abiobio kukota mu kimvuka. (Nzai. 2:14, 20) Bubu, batu bawombu ba tuvukumunanga muingi tuba mayindu makhambu fuana. Basi dikanda ayi batu tuzebi balenda tukamba vasintombulu ko kulandakana minsiku mioso mi Yave. Dedi, balenda kutukamba ti kudukisa zitsatu zitu zi kinsuni diawu diambu diluti nkinza ayi zithuadusulu zi Kibibila zisiala ko luvalu.
11. Mbi tufueti bika kuvanga, bo tumvanga mangolo ma kukuikama?
11 Khumbu zinkaka tulenda yindula ti zithuadusulu zi Yave zisi ko zifuana. Ayi ḿba tulenda tomba kusabuka ndilu mu ‘mambu masonama.’ (1 Koli. 4:6) Zimfumu zi binganga mu bilumbu bi Yesu, mvandi babe vanganga mawu. Bawu babuela minsiku miawu mu minsiku misonama. Mu kibila akiokio, batu bawombo babe monanga phasi kutumukina nsiku. (Matai 23:4) Yave wu tuvana zithuadusulu zisulama mu nzila Kibibila ayi kimvuka kiandi. Ayi tuisi ko ni kibila kimueka muingi kubuela mambu mankaka mu zithuadusulu Yave ka tuvananga. (Zinga. 3:5-7) Diawu, tubuelanga ko mayindu mitu mu mambu masonama mu Kibibila ayi tukuikanga ko batu balandakana mayindu mitu mu mambu matedi makani ma kadika mutu.
12. Mbi Satana kansadilanga muingi kutuadisa ‘luvunu’?
12 Luvunu. Satana wunsadilanga ‘luvunu’ batu ‘bantubanga mu nza muingi kuvasa batu’. (Kolo. 2:8) Mu sekulu yitheti, mayindu beni maba kuidi batu ba luzabu, mu bikhulu bi basi Yuda bikhambu ba kithuadi na Kibibila ayi mu dilongi diaba tubanga ti Baklistu bafueti tumukina nsiku wu Mose. Mayindu amomo maba ma luvunu kibila mabe vanganga batu kubika sikika mayindu mu Tho yi mambu makiedika, Yave. Bubu, Satana wunsadilanga internet muingi kutiamuna mayindu ma luvunu zimfumu zi luyalu bantuadisanga. Ayi mambu amomo mamonika beni mu thangu kivunga ki COVID-19.c Zimbangi zi Yave batumukina zithuadusulu zi kimvuka ki Yave ayi basa kuazuka ko beni dedi bo batu babe landakananga mayindu amomo ma luvunu.—Matai 24:45.
13. Kibila mbi tufueti bela keba keba mu mambu malenda kutuvuvula?
13 Kuvuvuka. Tufueti sikika mayindu mitu mu ‘mambu malutidi nkinza.’ (Filipi 1:9, 10) Kuvuvuka kulenda tukuiba thangu yiwombo yo tulenda botula muingi kuvanga mambu malutidi nkinza. Befu kukhambu ba keba keba, mambu ma lumbu ka lumbu dedi kudia—kunua, kuvuvusa ayi kisalu—malenda ba mambu malutidi nkinza mu luzingu luitu. (Luka 21:34, 35) Ayi kadika kilumbu, tunkuwanga matedi batu babalukila luyalu ayi zimfumu zi luyalu bannuanina luyalu. Tufueti ba keba keba, muingi tubika vuvuka mu mambu amomo, kibila mawu malenda kabula ntim’itu ayi kutona kusola mu ntima dingumba di pulitika. Satana wunsadilanga mintambu mioso amiomio, muingi kuvongisa makani mitu ma kutatamana kuvanga mambu masulama. Buabu, tuemmona mbi tulenda vanga muingi kukindama kheti mu mintambu mioso mi Satana.
BUIDI TULENDA TATIMININA KUKINDAMA?
Muingi wutatamana wukindama, yindula kibila mbi wukivanina kuidi Yave ayi wubotimina, tanganga ayi yindulanga mu Diambu di Nzambi, kindisa ntim’aku ayi fiatila mu Yave (Tala lutangu 14-18)
14. Mbi bilenda ku tusadisa kutatamana kuba bakuikama ku khonzo Yave?
14 Yindula makani maku ma kukivana ayi kubotama. Ngie wuvanga mawu, kibila waba tomba kuba ku khonzo Yave. Yindula mbi bi kusadisa kuba lufiatu ti wubakula kiedika. Ngie wuyiza ba luzabu lukiedika matedi Yave ayi wutona kunkinzika ayi kunzola dedi Tata’aku yi diyilu. Ngie wuyiza kuna kiminu ayi kiawu ki kusadisa kunhongina masumu maku, kubika vanganga mambu mambi ayi kuzingila mu kithuadi na luzolo lu Nzambi. Ngiewu wuba mu mayangi mu kuzaba ti Nzambi wulemvukila masumu maku. (Minku. 32:1, 2) Ngie wutona kukuendanga mu zikhutukunu ayi kuzabikisa bankaka mambu moso wabe longuka mu Kibibila. Mu kukivana ayi kubotama, ngie widi mu kudiatila mu nzila yi luzingu ayi wubaka makani ma kukhambu vekuka mu nzila ayoyo.—Matai 7:13, 14.
15. Buidi kutanga ayi kuyindula mu mambu tuntanga matutuadisilanga ndandu?
15 Tanga Diambu di Nzambi ayi yindula mu mambu wuntanga. Dedi bo nti wulenda bela wukinda boti ziganzi zisikama mu ntoto, bobuawu mvandi befu kuba lufiatu mu mambu Kibibila kintuba, kiminu kitu kinkuiza ba kikinda. Bo nti wunkunkonzukila, buawu zinganzi ziandi zinkuiza luta kotila mu ntoto ayi zinkuiza bela zikinda. Bobuawu mvandi, bo tuntanga ayi tunyindula mu mambu tuntanga, buawu kiminu kitu kinkuiza buelimina ayi kuba lufiatu ti phila Nzambi kamvangilanga mambu yawu yilutidi. (Kolo. 2: 6, 7) Yindula buidi malongi, zithuadusulu ayi lukiebu lu Yave lusadisila bisadi biandi mu thangu yikhulu. Dedi, mbikudi Yehezekeli wuteka matu bo mbasi yi Yave kazonga tempelo. Kimona mesu akiokio kikindisa Yehezekeli ayi ki tulonga mambu mawombu matedi buidi tulenda kakidila zithuadusulu zi Yave matedi mbuongimini yikiedika.d (Yehe. 40: 1-4; 43:10-12) Befu mvitu tumbakanga ndandu bo tumbotula thangu muingi kulonguka ayi kuyindula mu mambu maphinda madi mu Diambu di Nzambi.
16. Buidi lukuimunu mu Yave lukiebila yaya Bob? (Minkunga 112:7)
16 Kindisa ntim’aku. Ntinu Davidi wutuba mu nkunga ti kalendi bika ko luzolo kadi mu Yave, bo katuba: ‘A Yave, ntim’ami widi wukuikama.’ (Minku. 57:7) Befu mvitu tulenda kindisa luzolo luitu mu Yave mu kumfiatila mu ntim’itu woso. (Tanga Minkunga 112:7.) Mona buidi mawu masadisila yaya Bob, tube tubila va thonono. Bo bankamba ti va kutombulu bankuiza sadila menga, muna thangu beni nandi wutuba ti ba kutomba kumvutula menga, buna wunkuiza bika nzo mbuku. Buviokila thangu yaya Bob wutuba: ‘Minu yisa ba ko divuda mu makani yibaka ayi yisa ba ko dibamu.’
Befu kuba kiphevi kimboti, tunkuiza tatamana bakuikama kheti mu moso kua mambu malenda kutukuizila (Tala lutangu 17)
17. Mbi tulenda longuka mu kifuani ki yaya Bob? (Tala mvandi foto.)
17 Yaya Bob wutatamana wukuikama kibila wubaka makani amomo ava kenda ku nzo mbuku. Ditheti, nandi wabe tomba kukuangidika Yave. Dimmuadi, nandi wufiongunina buboti Kibibila ayi bilongulu bitu bintubila matedi monyo ayi luzingu. Dintatu, nandi wuba lufiatu ti kulandakana zithuadusulu zi Yave zinkuiza ntuadisa ndandu yala kadidila. Befu mvitu tulenda nunga kukindama mu moso mambu malenda ku tukuizila.
Balaki ayi masodi mandi mu kibakala bayenda kuenuanisa Sisela ayi masodi mandi (Tala lutangu 18)
18. Buidi kifuani ki Balaki ki tumonisina nkinza wu kufiatila mu Yave? (Tala mvandi foto.)
18 Fiatila mu Yave. Mona buidi Balaki kabakila ndandu mu kufiatila mu thuadusulu yi Yave. Mu thangu beni dikabu di Isaeli basa ba ko bakubama muingi kunuana mvita kibila basa ba ko mata. Vayi Yave wukamba Balaki muingi kenuanisa Sisela mfumu yi masodi yi basi Kanani ayi masodi mandi baba binuanunu biwombo. (Minko. 5:8) Debola, mbikudi wunkietu wukamba Balaki kenda ku thandu muingi kedengana Sisela ayi 900 di makalu mandi ma mimvita. Kheti Balaki wuzaba ti dinkuiza ba diambu diphasi kunuana na masodi beni maba makalu ma mimvita vayi nandi wutumukina. Bo masodi ma Sisela batuka ku mongo Taboli, Yave wunokisa mvula yingolo. Makalu ma mvita ma Sisela matona kudiama mu diyanga ayi Yave wunungisa Balaki. (Minko. 4:1-7, 10, 13-16) Bobuawu mvandi, Yave wala tunungisa befu kufiatila mu zithuadusulu katuvananga mu nzila batu bantuama ntuala mu kimvuka.—Deute. 31:6.
BAKA MAKANI MA KUTATAMANA WUKUIKAMA
19. Kibila mbi wuntomba kutatiminina wukuikama?
19 Bo tukhidi zingila mu bilumbu bitsuka biwedi beni ziphasi, vala tombulu kuvanga mangolo muingi tuba bakuikama. (1 Timo. 6:11, 12; 2 Pete. 3:17) Diawu, bika kadika mutu mu befu kabaka makani ma kukhambu bika mambu dedi: Zikhuamusu, mambu malenda tutula boma, mayindu makhambu fuana, luvunu ayi kuvuvuka ma tuvukumuna. (Efe. 4:14) Vayi, tufueti ba bakindama mu kutatamana kuzola Yave ayi kutumukina minsiku miandi. Mvandi, tufueti vanga mangolo ma kuba mayindu mafuana. Mu dilongi dinlanda, tunkuiza tubila buidi Yave ayi Yesu badi kifuani kilutidi mu matedi kuba mayindu mafuana.
NKUNGA 129 Tufueti Kuikamanu
a Tona mu bilumbu bi Adami ayi Eva, Satana wuntuadisanga diyindu ti batu bafueti baka makani mawu matedi mamboti ayi mambi. Nandi wuntomba befu mvitu tuba mayindu amomo matedi minsiku mi Yave ayi zithuadusulu zioso tuntambulanga mu kimvuka kiandi. Dilongi adidi dinkuiza tusadisa kuyikieba mu mayindu amomo ma kuyituadisa ayi kukindisa makani mitu ma kubuela mioko Yave.
b Muingi wubuela zaba buidi Baklistu bantadilanga menga, mona dilongi 39 mu buku Baka Mayangi ma Mvu ka Mvu.
c Tala dilongi mu jw.org dintuba “Como se proteger de informações falsas.”
d Muingi wubuela zaba, tala dilongi 13 ayi 14 di buku Adoração Pura de Jeová—é Restaurada!