DILONGI 37
Fiatila mu Yave Dedi bo Samisoni Kavangila
“Mfumu’ami Yave, lemvuka, thebukila moyo ayi khindisa.” —NKONGU. 16:28.
NKUNGA 30 Tat’ami, Nzambi’ami ayi Nkundi’ami
MAMBU TUANLONGUKAa
1-2. Kibila mbi kifuani ki Samisoni kididi nkinza kuidi befu?
MBI wunyindulanga bo wunkuwa dizina Samisoni? Boti ngie wunyindulanga ti wuba dibakala diba beni mangolo, buna make makiedika. Vayi Samisoni wubaka makani mambi mantuadisa ziphasi. Vayi kheti bobo, Yave wusikika thalu mu lukuikumunu lu Samisoni mu kutuadisa batu basonika mambu kavanga mu Kibibila, muingi tubaka ndandu.
2 Yave wusadila Samisoni kuvanga mangitukulu muingi kukula basi Isaeli. Buviokila thangu mu nzila phevi yinlongu, Yave wutuadisa mvuala Polo muingi kasonika dizina di Samisoni mu nkangu wu batu ba kiminu. (Ebe. 11:32-34) Kifuani ki Samisoni khindusulu kidi kuidi befu. Nandi waba fiatilanga mu Yave kheti bo kaba viokilanga mu mambu maphasi. Mu dilongi adidi, tunkuiza tubila mbi tulenda longuka mu kifuana ki Samisoni ayi buidi kiawu kilenda ku tukindisila.
SAMISONI WUFIATILA MU YAVE
3. Kiyeku mbi Samisoni katambula?
3 Bo Samisoni kabutuka, basi Filistea baba tumina basi Isaeli mu makhemi ayi baba tuadisa ziphasi ziwombu. (Nkongu. 13:1) Yave wusola Samisoni muingi ‘kavukisa Isaeli, mu mioku mi basi Filistea.’ (Nkongu. 13:5) Kiba kiyeku kiphasi, kibila muingi kununga kudukisa kiawu, vaba tombulu Samisoni kufiatila mu Yave.
Samisoni wufiatila mu Yave ayi wuvanga mamoso kanunga muingi kuvanga luzolo lu Yave (Tala matangu 4-5)
4. Buidi Yave kasadisila Samisoni kununga basi Filistea? (Nkongudidi 15:14-16)
4 Mona kifuani kimmonisa lufiatu Samisoni kaba mu Yave ayi buidi nandi kamvanina lusalusu. Viazi mueka masodi ma basi Filistea bayiza ku Yuda muingi kubuila Samisoni. Mu kibila ki boma, basi yuda babaka makani ma kukanga Samisoni mu minsinga mingolo ayi bamvana kuidi zimbeni ziawu. (Nkongu. 15:9-13) Vayi “phevi yi Yave, yisadisa” Samisoni ayi nandi wududa minsinga beni. Nandi ‘wubakula masokutu ma menu ma phunda,’ ayi wusadila mawu muingi kuvonda 1.000 di babakala ba basi Filistea!—Tanga Nkongudidi 15:14-16.
5. Mbi masokutu ma menu ma phunda Samisoni kasadila ma tulonga matedi lufiatu luandi mu Yave?
5 Kibila mbi Samisoni kasadila masokutu ma menu ma phunda? Akiokio, kisa ba ko kinuanunu kifuana. Diawu tulenda tubila ti Samisoni wuzaba ti ndandu kabaka, yiyizila mu lusalusu lu Yave kubika kuandi mu menu amomo kasadila. Bukiedika, dibakala adiodio di kiminu, wusadila kiuma kaba luaku muingi kuvanga luzolo lu Yave. Samisoni wubaka beni ndandu mu mambu kavanga bo kafiatila mu Yave!
6. Mbi tulenda longuka mu kifuani ki Samisoni matedi biyeku bitu?
6 Befu mvitu tulenda baka mangolo muingi kudukisa biyeku bitu, kheti tunyindula ti tuisinkuiza nunga ko. Ayi Yave kalenda tusadisa mu phila tukhambu yindudila. Ba lufiatu ti boti Yave wusadisa Samisoni, mvandi kalenda kusadisa ngie kufiatila mu lusalusu luandi.—Zinga. 16:3.
7. Kifuani mbi kimmonisa nkinza wu kutombanga thuadusulu yi Yave?
7 Zikhomba ziwombu bakivana mu kisalu ki kutunga, bafiatila Yave. Mu mimvu mima vioka, zikhomba baba tunganga nduka zinzo zioso zi Kintinu ayi bibuangu binkaka. Vayi vaba tombulu kubalula mua mambu mu kimvuka ki Yave. Zikhomba zintuama ntuala, batomba thuadusulu yi Yave mu kutomba ziphila zimona, dedi kusumba bibuangu bitungu ayi kuludika biawu. Yaya Robert wusala mu mimvu miwombu mu kisalu ki kutunga kimvangamanga mu nza yimvimba, wutuba ti “va thonono, diba diambu diphasi kuidi zikhomba zinkaka kukolama phila ayoyi yimona yi kusadila.” Nandi wubue tuba: “Tumona disuasana phila tumvangilanga bisalu na phila tuaba vangilanga. Vayi zikhomba baba bakubama muingi kukolama mu phila yimona yi kusadila. Ayi tummonanga bivisa ti Yave widi mu kusakumuna makani amomo. Akiokio, kidi kimueka mu bifuani bimmonisa ti Yave kemu kutuadisa dikabu diandi muingi bavanga luzolo luandi.” Diawu buboti beni ku yikuvusanga, ‘yike mu kutomba thuadusulu yi Yave ayi kukolama bo mambu mambaluka mu kimvuka kiandi?’
SAMISONI WUBAKA NDANDU MU LUSALUSU YAVE KAMVANA
8. Mbi Samisoni kavanga bo kaba phuila yi nlangu?
8 Ḿba ngie mana tanga mambu mammonisa mangitukulu mankaka Samisoni kavanga. Nandi wunuana na khosi. Ayi buviokila thangu, wuvonda 3.000 di babakala ba basi Filitea. (Nkongu. 14:5, 6, 19) Samisoni wuzaba ti khanu kasa nunga ko kuvanga mambu amomo, boti kasa ba ko lusalusu lu Yave. Tuzabidi mawu kibila mu thangu nandi kaba phuila yinlangu, bo kamana kuvonda 1.000 ki basi Filistea. Mbi nandi kavanga? Nandi kasa yifiatila ko bo kaba phuila yinlangu, diawu kadindila lusalusu lu Yave.—Nkongu. 15:18.
9. Buidi Yave katambudila nsambu wu Samisoni? (Nkongudidi 14:5, 6,19 ayi nota)
9 Yave wutambudidila nsambu wu Samisoni mu kuvanga mangitukulu ma kubasisa muila wu nlangu. Bo Samisoni kanua wawu, ‘mangolo mandi mavutuka.’ (Tanga Nkongudidi 14:19 ayi nota.) Ḿba muila awowo wutatamana nati mu bilumbu bi mbikudu Samueli, wutuadusu mu phevi yinlongu muingi kusonika buku yi Nkongudidi. Basi Isaeli bamona muila awowo, ḿba batebuka moyo ti bisadi bikuikama bi Yave, balenda dinda lusalusu bo bamviokila mu tsatu.
Samisoni wubaka beni mangolo bo kanua nlangu Yave kamvana. Befu mvitu tufueti botula thangu muingi kusadila biuma bioso Yave ka tuvananga, muingi tuba bakinda mu kiphevi (Tala lutangu 10)
10. Mambu mbi tufueti vanga muingi tutambula lusalusu lu Yave? (Tala mvandi foto.)
10 Befu mvitu tuntombanga lusalusu lu Yave. Boso kua bubela mambu tuzebi kuvanga voti mambu tuma vanga mu kisalu kiandi. Mu kukikulula, tulenda baka ndandu yiwombu befu kufiatila Yave. Dedi bo Samisoni kabakila mangolo bo kanua nlangu Yave kamvana, befu mvitu tuala kindama mu kiphevi befu kusadila buboti zithuadusulu zioso Yave ku tuvananga.—Matai 11:28.
11. Buidi tulenda bakila ndandu mu lusalusu lu Yave? Vana kifuani.
11 Tala kifuani ki yaya Aleksey wunkalanga ku Rússia kemu kuviokila mu zikhuamusu ziwombu. Mbi binsadisa kutatamana wukindama kheti mu mambu mawombu maphasi kamviokila? Nandi ayi nkazi’andi basikika thuadusulu yimboti yi kiphevi. Nandi wutuba: “Yintatamananga kuvanga ndokulu’ama ayi kutanga kadika kilulmbu Kibibila. Kadika meni, minu ayi nkazi’ama tumfionguninanga matangu ma kadika kilumbu ayi tunsambilanga va kimueka.” Mbi mawu ma tulonga? Tubika kuyifiatila vayi tufueti fiatila mu Yave. Buidi? Mu kukindisa kiminu kitu, mu kuvanganga ndongulu’itu yi Kibibila ayi mambu mankaka ma kiphevi. Befu kuvanga mawu, Yave wala sakumuna mangolu mitu ma kunsadila. Nandi wukindisa Samisoni ayi mvandi kalenda ku tukindisa.
SAMISONI KASA VONGA KO
12. Makani mbi Samisoni kabaka ayi buidi madidi disuasana na makani kabaka kumbusa?
12 Samisoni wuba mutu wumasumu dedi befu. Khumbu zinkaka nandi wubaka makani mantuadisa beni ziphasi. Dedi bo kaba mfundisi, buviokila thangu nandi ‘wuyiza zola nkietu mueka baba tedilanga Dalila.’ (Nkongu. 16:4) Ava Samisoni kiza zola Dalila, nandi wukanikisa kukuela nkietu musi Filistea ayi Yave ‘wubika mambu amomo mamonika,’ kibila ‘waba tombu luaku muingi kununga basi Filistea.’ Buviokila thangu, Samisoni wuyenda kue vikila ku nzo nkietu wu kindumba ku Ngaza divula dimueka di basi Filistea. Mambu amomo, mavana luaku Samisoni kununga kunuanisa basi Filistea mu lusalusu lu Yave. (Nkongu. 14:1-4; 16:1-3) Mambu ma Dalila disuasana maba, kibila nandi kasa ba ko musi Filistea, vayi ḿba wuba musi Isaeli.
13. Buidi Dalila kanungina kuvuna Samisoni?
13 Dalila wuvitika zimbongu ziwombu basi Filistea bamfuta, muingi kuvakula Samisoni. Bukiedika ti mu kibila ki lufiatu—ayi luzolo, mawu mavanga Samisoni kabika kumona mambu—Dalila kavanga? Boso kua bubela, Dalila wukuika Samisoni kankamba buidi kaba bakilanga mongolo ayi Samisoni wunkamba. Kiadi ayi kiunda kuzaba ti mu kibila akiokio, mu mua thangu, mangolo ma Samisoni mamana ayi wuzimbisa lunungu kaba va meso ma Yave.—Nkongu. 16:16-20.
14. Mambu mbi Samisoni kamonikina mu kufiatila Dalila?
14 Mu kufiatila Dalila ayi kukhambu fiatila Yave, Samisoni wutovuka beni. Basi Filistea bambuila ayi bantobula meso. Bannata kudivula di Ngaza, ko bantula mvika muingi kaba nyikinanga zitheti. Kilumbu kimueka basi Filistea baba kemba ngunzi kuidi nzambi’awu yi luvunu ayi babaka makani ma kubasisa Somisoni muingi bantula—‘kisakununu kiawu,’ kibila bawu baba kikininanga ti nzambi’awu yi luvunu, nandi wuba sadisa kubuila Samisoni.—Nkongu. 16:21-25.
Yave wuvana Samisoni mangolo muingi kufundisa basi Filistea (Tala lutangu 15)
15. Buidi Samisoni kabue monisina ti waba fiatilanga Yave? Nkongudidi 16:28-30 (Tala fikula va thonono levista.)
15 Samisoni wuvanga nzimbala yinneni vayi kheti bobo kasa vonga ko. Nandi wutomba ziphila kalenda vangila kiyeku katambula kuidi Nzamibi matedi basi Filistea. (Tanga Nkongudidi 16:28-30.) Samisoni wudinda Yave: ‘Tsadisa muingi yitulula basi Filistea.’ Nzambi wutambudila nsambu wu Somisoni mu kubue mvana mangolo ma kukuitukila. Mu kilumbu akiokio, Samisoni wuluta vonda basi Filistea kena mu zikhumbu zinkaka.
16. Mbi tulenda longuka mu nzimbala yi Samisoni?
16 Kheti Samisoni wutovuka mu kibila kinzimbala kavanga, nandi kasa bika ko kuvanga luzolo lu Yave. Bobuawu mvandi, kheti tumvanga nzimbala yintombulu ba tusemba voti yi tubotula biyeku tuidi, tubika kuvonga. Tebuka moyo ti Yave ka tuvongilanga ko. (Minku. 103:8-10) Kheti mu nzimbala tumvanga, Yave wu tuvuanga nkinza dede bo kavuila nkinza Samisoni.
Samisoni wuba beni mu kiunda mu zinzimbala kavanga, vayi kasa vonga ko—ayi befu mvitu tulendi vonga ko (Tala matangu 17-18)
17-18. Mbi tulenda longuka mu kifuani ki ya Michael? (Tala mvandi foto.)
17 Tala kifuani ki khomba yi ditoku bantedilanga Michael. Nandi waba kukivananga beni mu mambu ma kiphevi, wuba nsadisa wu bakulutu ba kimvuka ayi wuba ntuami ntuala. Vayi kiadi ayi kiunda kuzaba ti buviokila thangu nandi wuyiza vanga nzimbala ayi mu kibila akiokio, wubika biyeku kaba mu kimvuka. Nandi wutuba: “Mambu maba kuenda buboti mu kisalu kiama kuidi Yave, vayi yiyiza mona ti yilendi bue vanga ko ni diambu mu kisalu ki Yave. Yabasa yindulanga ko ti Yave kalenda kukhuekula vayi yi kiyuvusa boti kikundi kiama na Yave kiala tatiminina bobo voti yala bue vutuka kunsadila dedi bo yaba kunsadilanga mu kimvuka.”
18 Mayangi beni kuzaba ti Michael kasa vonga ko. Nandi wubue tuba: “Yisikika mayindu mu kutala buidi kikundi kiama na Yave kibela, mu kunzibudila ntim’ami mu nizila nsambu, kuvanga ndongukulu’ami ayi kubotula thangu muingi kuyindula mambu yaba longuka.” Buviokila thangu, Michael wuyiza bue tambula biyeku mu kimvuka. Bubu nandi weka nkulutu wu kimvuka ayi ntuami ntuala. Nandi wubue tuba: “Mu lusalusu ayi khindusulu yitambula, bulutidi kuidi bakulutu ba kimvuka, matsadisa kumona ti Yave wukhidi kunzolanga. Ayi yilenda bue sadila Yave mu kilunzi ki diodila. Kifuani akiokio ki tulonga ti Yave wunlemvukilanga woso kua mutu wunyongina masumu mandi mu bukiedika.” Tulenda ba lufiatu ti Yave wala tatamana kutusadila ayi ku tusakumuna, befu kuvanga mamoso tunnunga muingi kubika zinzimbala zitu ayi kutatamana kumfiatila.—Minku. 86:5; Zinga. 28:13.
19. Buidi kifuani ki Samisoni kima tukindisila?
19 Mu dilongi adidi tuma tubila kinongu ki Samisoni. Kheti nandi wuvanga nzimbala na Dalila, nandi kasa bika ko kusadila Yave ayi Yave mvandi kasa kumbika ko. Nandi wutatamana kunsadila kibila wuntadila mutu wu kiminu ayi wuntula mu nkangu wu batu ba kiminu dedi bummonisila Ebeleo 11. Yike khindusulu yiwombu kuzaba ti Tat’itu wuntomba ku tukindisa bulutidi bo tuke balebakana. Dedi Samisoni, linda kuidi Yave: ‘Lemvuka, thembukila moyo ayi khindisa.’—Nkongu. 16:28.
NKUNGA 3 Mangolo Mitu, Kivuvu Kitu, Lufiatu Luitu
a Samisoni—Widi wumueka bantubila mu Kibibila ke beni wuzabakana kuidi batu bawombu, kheti kuidi bo bakhambulu beni nzailu yi Kibibila. Kinongu kiandi ki luzingu, bantubilanga beni kiawu kuidi minyimbidi, batu bamvanganga zi tiaturo ayi zifilme. Ayi kiawu kisi ko to kinongu, kibila tulenda longuka mawombu matedi dibakala adiodio di kiminu.