DILONGI 38
NKUNGA 25 Dikanda Dinlongo
Ngie Widi mu Kuteka Matu mu Zindubu?
“Wumueka bala kunnata vayi wunkaka bala kumbika.” —MAT. 24:40.
MAMBU TUANLONGUKA
Tuammona bifuani bitatu Yesu katubila ayi kumona buidi bididi nkuizani mu lufundusu luala salama mu thangu yitsuka.
1. Lufundusu mbi luambelama kumonika?
TUIDI mu kuzingila mu thangu yike mu kubaluka beni mambu! Yesu wuzabikisa kuidi minlandikini miandi mambu mala monika ava lufundusu lu batu, mu kuba zabikisa kidimbu ki ndizulu’andi ayi “kidimbu” mbi kiala tumonisa phutukulu’andi ayi “tsukulu yi nza ayiyi.” (Mat. 24:3) Mbikudulu ayoyo yike mu Matai kapu 24 ayi 25, Malaku kapu 13 ayi Luka kapu 21.
2. Mbi tunkuiza tubila mu dilongi adidi ayi buidi mawu manlenda tusadisila?
2 Yesu wusadila bifuani bitatu muingi kutusadisa kuba bakubama. Kitheti kintubila mamemi ayi zikhombo, kimmuadi bakietu bakhambu zaba dibakala baba nduenga ayi bakhambu ba nduenta ayi kintatu zitalentu. Kadika kifuani, kinkuiza tusadisa kuvisa buidi kadika mutu kala fundusulu mu kutadila mavanga mandi. Mu dilongi adidi, tunkuiza bakula malongi mu bifuani abiobio ayi buidi bu kusadila mawu. Mu kifuani kitheti, tuantubila mamemi ayi zikhombo.
MAMEMI AYI ZIKHOMBO
3. Thangu mbi Yesu kala fundisila batu?
3 Mu kifuani ki mamemi ayi zikhombo, Yesu wutubila lufundusu lu batu baba luaku lu kuvitika zisangu zimboti ayi kusadisa zikhomba ziandi baklistu basolu. (Mat. 25:31-46) Mu thangu “ziphasi zingolo,” nandi wala fundisa mamemi ayi zikhombo ava Alimangedoni. (Mat. 24:21) Dedi bo nsungi kamvasilanga mamemi ayi zikhombo, Yesu wala vasa bo bambuelanga mioku baklistu basolu ayi bo bakhambu vanganga mawu.
4. Dedi bummonisina Yesaya 11:3, 4, kibila mbi tulenda bela lufiatu ti Yesu wala fundisila mu phila yisonga? (Tala mvandi va thonono levista.)
4 Mbikudulu yi Kibibila yimmonisa ti Yave wusola Yesu muingi kuba Mfundisi ayi nandi wala fundisila mu busonga. (Tanga Yesaya 11:3, 4.) Nandi wunsikikanga thalu mu mavanga ma batu, mayindu ayi zithubulu—kubunda mvandi buidi bawu bansadisilanga zikhomba ziandi. (Mat. 12:36, 37; 25:40) Yesu wala zaba nani wubuela mioku zikhomba ziandi zisolu mu kisalu kiawu.a Phila yimueka yilutidi nkinza tulenda buedila mioku zikhomba zi Yesu yidi, mu kubuela mioku kisalu ki kusamuna. Baboso bambuelanga mioku zikhomba zi Yesu bala batadila “basonga” ayi bake kivuvu ki “kuzinga mvu ka mvu va ntoto”. (Mat. 25:46; Nzai. 7:16, 17) Baboso bantatamananga bakuikama, bala tambula lusakumunu lumboti beni! Ayi bo bala tatamana bakuikama mu thangu ziphasi zingolo, mazina mawu mala tatamana mu “buku yi luzingu.”—Nzai. 20:15.
Nkadu to wunkambu, Yesu wunkuiza fundisa batu muingi kuzaba boti badi mamemi voti zikhombo (Tala lutangu 4)
5. Dilongi mbi didi mu kifuani ki mamemi ayi zikhombo ayi banani bafueti vua mawu nkinza?
5 Monisa lukuikumunu. Kifuani ki Yesu kitedi mamemi ayi zikhombo, kintubila baboso bake kivuvu ki kuzingila va ntoto. Bawu bammonisanga kiminu kubika to mu kubuela mioku zikhomba zi Yesu mu kisalu ki kusamuna, vayi mvandi mu kumonisa lukuikumunu mu mua dingumba di Baklistu Yesu kasola. (Mat. 24:45) Vayi bo bake kivuvu ki kuzingila ku diyilu, mvandi bafueti teka matu mu kifuani ki mamemi ayi zikhombo. Kibila mbi? Kibila Yesu wunsikikanga thalu mu mavanga mawu, mayindu ayi zithubulu ziawu. Diawu vantombulu bawu kumonisa lukuikumunu. Yesu wutubila bifuani biodi bintubila baklistu basolu. Mvandi tulenda mona bifuani beni mu Matai kapu 25. Buabu tuantubila kifuani ki bakietu bakhambu zaba dibakala, baba nduenga ayi bakhambu ba nduenga.
BAKIETU BAKHAMBU ZABA DIBAKALA BABA NDUENGA AYI BAKHAMBU BA NDUENGA
6. Buidi tanu di bakietu bakhambu zaba dibakala bamonisina nduenga? (Matai 25:6-10)
6 Yesu wutubila kifuani ki kumi di bakietu bakhambu zaba dibakala, bayenda kue dengana dibakala dinkuela. (Mat. 25:1-4) Bawu baba temina kulandakana dibakala dinkuela mu nkungi’andi wu dikuela. Yesu wutuba ti tanu mu bawu baba “nduenga” ayi tanu dinkaka “basa ba ko nduenga.” Bo baba nduenga, baba bakubama ayi bakotuka, muingi kutemina dibakala dinkuela mu yoso kua thangu kankuiza vitila, kheti va khati builu. Diawu banatina minda mi mafuta mu kibila ki kitombi. Mvandi banata mafuta mankaka mu bibudika muingi minda miawu mi bika kudoka nati yoso kua thangu dibakala dinkuela kankuiza vitila. (Tanga Matai 25:6-10.) Bo dibakala dinkuela kavitila, bakietu bakhambu zaba dibakala baba nduenga, bakota yandi mu nkungi wu dikuela. Bobuawu mvandi Baklistu basolu bake bakubama mu kutatamana bakotuka ayi bakuikama nati thangu Yesu kala kuiza, bala kuba tadila bafuana mu kuba va kimueka na dibakala di dikuela Yesu, mu Kintinu kiandi ki diyilu.b (Nzai. 7:1-3) Buabu mbi tulenda tuba matedi tanu di bakietu bakhambu zaba dibakala, bakhambu nduenga?
7. Mbi bimonikina tanu di bakietu bakhambu zaba dibakala bakhambu ba nduenga ayi kibila mbi?
7 Bakietu batanu bakhambu zaba dibakala bakhambu nduenga, basa ba ko bakubama bo dibakala dinkuela kavitila. Minda miawu miaba belama kudoka kibila basa nata ko mafuta mankaka. Bo bazaba ti dibakala dinkuela wambelama kuvitila, bawu bayenda kue sumba mafuta. Bawu basa vutuka ko mu thangu yifuana bo dibakala dinkuela kavitila. Mu thangu beni, “Bakietu baba bakubama, bakota mu nkungi wu dikuela ayi bazibika muelu. (Mat. 25:10) Bo bakietu bakhambau nduenga bavitila ayi baba tomba kukota, dibakala dinkuela wuba kamba: “Minu yisa muzaba ko.” (Mat. 25:11, 12) Bakietu abobo, basa ba ko bakubama muingi kutemina dibakala dinkuela mu thangu yaba tombulu. Mbi Baklistu basolu balenda longuka?
8-9. Dilongi mbi tulenda longuka mu kifuani ki bakietu bakhambu zaba dibakala? (Tala mvandi foto.)
8 Ba wukubama ayi wukotuka. Yesu kasa tuba ko ti kuala ba mangumba muadi ma Baklistu basolu—dimueka diala ba dikubama nati kutsuka ayi dinkaka ndamba. Vayi nandi wusudikisa mbi biala monikina Baklistu basolu, bala khambu ba bakukuikama nati kutsuka. Mu phila ayoyo, bawu balasa tambula ko nsendu’awu. (Yoa. 14:3, 4) Adiodio didi diambu dinkinza kuidi badi kivuvu kikuzingila ku diyilu voti va ntoto. Befu boso tufueti vua nkinza ndubu yike mu kifuani ki bakietu bakhambu zaba dibakala. Kadika mutu mu befu kafueti tatamana wukotuka ayi wukubama muingi kukuikama nati kutsuka.—Mat. 24:13.
9 Bo kamana kutubila kifuani ki bakietu bakhambu zaba dibakala, Yesu wukindisa nkinza wu kuba bakubama ayi bakotuka mu kutubila kifuani ki zitalentu. Kifuani akiokio, kintubila nkinza wu kuba mutu wunzolanga kusala.
Dike diambu dinkinza kadika mutu mu befu kuteka matu mu ndubu yike mu kifuani ki bakietu bakhambu zaba dibakala, muingi kuba bakubama ayi bakotuka muingi tununga nati kutsuka (Tala lutangu 8-9)
KIFUANI KI ZITALENTU
10. Buidi bisadi biodi bamonisina lufiatu? (Matai 25:19-23)
10 Mu kifuani ki zitalentu, Yesu wutubila matedi bisadi bitatu, bisadi biodi bimonisa lufiatu kuidi mfumu’awu vayi kisadi kintatu ndamba. (Mat. 25:14-18) Ava mfumu kukuenda mu viagi, wuba vana zimbongo ziwombu. Bisadi biodi bimonisa lufiatu mu kusala mu kifuza muingi kubutisa zimbongo zi mfumu’awu. Bawu basadila mu nduenga ayi mu kifuza zimbongo baba vana. Mambu mbi mamonika? Bo mfumu’awu kavutuka, bawu babue butisa yoyawu thalu yi zimbongo baba vana. Mfumu’awu wuba nyunga—ayi ‘bayangalala va kimueka na mfumu’awu.’ (Tanga Matai 25:19-23.) Buabu mbi tulenda tuba matedi kisadi kintatu? Mbi nandi kavanga mu zimbongo mfumu’andi kamvana?
11. Mbi bimonikina kisadi ki “bolo” ayi kibila mbi?
11 Kisadi kintatu wutambula talentu yimueka vayi wuba “bolo.” Mfumu’andi waba tomba muingi kasadila buboti zimbongo vayi nandi wuzika ziawu kutsi ntoto. Bo mfumu’andi kavutuka, nandi kasa vanga ko ni diambu muingi kubutisa zimbongo bamvana. Kisadi akiokio, kasa ba ko mayindu mamboti. Nandi kasa butisa ko zimbongo zi mfumu’andi vayi wuntedila mfumu widi “ntima wungolo.” Mu kibila akiokio, nandi kasa tambula ko lunungu lu mfumu’andi, bambonga talentu ayi bankuka ku nzo mfumu’andi.—Mat. 25:24, 26-30.
12. Banani bamfuanikisa bisadi biodi bikuikama?
12 Bisadi biodi bikuikama, bawu bamfuanikisa Baklistu basolu. Mfumu Yesu, wuba tumisa muingi ‘bayangalala va kimueka.’ Bawu batambula luaku lu kuzinga ku diyilu mu luvulubukusu lutheti. (Mat. 25:21, 23; Nzai. 20:5b) Vayi kifuani ki kisadi kimbi, kike ndubu kuidi Baklistu basolu. Buidi?
13-14. Dilongi mbi baklistu basolu balenda longuka mu kifuani ki zitalentu? (Tala mvandi foto.)
13 Monisa ti wunzolanga kusala. Mu kifuani ki zitalentu ayi ki bakietu bakhambu zaba dibakala, Yesu kasa tuba ko ti Baklistu basolu bala ba bolo. Vayi nandi wusudikisa mbi biala monika bakubika kubue ba kifuza. Bawu bala zimbisa ‘kivuvu, kio baba tedila ayi baba sodila’ ayi balasa kota ko mu Kintinu ki diyilu.—2 Pet. 1:10.
14 Kifuani ki Yesu matedi bakietu bakhambu zaba dibakala ayi ki zitalentu, kimmonisa ti Baklistu boso basolu bafueti ba bakubama ayi bakotuka mu kuzola kusala. Vayi bukiedika ti Yesu wutuba dioso diambu muingi kulubula Baklistu basolu? Ngete! Nandi wutuba mambu madi mu Matai 24:40, 41 ayi lufundusu lutsuka lu baklistu basolu.
Yesu wuntomba muingi Baklistu basolu basala mu kifuza nati kutsuka (Tala lutangu 13-14)d
NANI ‘BALA NATA’?
15-16. Buidi Matai 24:40, 41 yimmonisina nkinza baklistu basolu kutatamana bakotuka?
15 Ava katubila bifuani bitatu, Yesu wutubila lufundusu lutsuka matedi baklistu basolu bala baka lunungu. Nandi wutubila babakala buadi baba sala mu tsola ayi bakietu buadi baba nyika zitheti va dimanya. Mu bifuani bia bibiodi, bidi buka bawu bamvanga kisalu kimueka, vayi Yesu wutuba ti “wumueka bala kunnata vayi wunkaka bala kumbika (Tanga Matai 24:40, 41.) Diawu Yesu kalubudila minlandikini miandi mu kuba kamba: “Banu balubuka, kibila benu musa zaba ko kilumbu mbi Mfumu’inu kala kuiza.” (Mat. 24:42) Yesu wutuba diambu didedakana bo kamana kutubila kifuani ki bakietu bakhambu zaba dibakala. (Mat. 25:13) Bukietika ti mawu madi nkuizani? Ḿba ngete. Baklistu basolu ayi bakuikama, bawu to “bala kota” na Yesu mu Kintinu ki diyilu.—Yoa. 14:3.
16 Ba wukotuka. Baklistu basolu bala khambu tatamana bakotuka mu kiphevi, balasa ba ko va kimueka na batu “bandi kasola.” (Mat. 24:31) Ayi boso kua bubela kivuvu tuidi, tufueti teka matu ndubu yi Yesu matedi kutatamana kuba bakotuka ayi bakuikama.
17. Kibila mbi tulendi kuazuka ko bo Yave kansola Baklistu basolu mu bilumbu bitu?
17 Befu tuzabizi buboti Yave, diawu tufueti fiatila mu lufundusu luandi. Ayi tubika kukuazuka boti Yave wunsola baklistu basolu mu bilumbu bitu.c Tufueti tebuka moyo mambu Yesu katuba mu kifuani ki bisadi bivitila ku tsola yi vinu mu kilokula ki 11. (Mat. 20:1-16) Bisadi abiobio bavitila kutsuka kilumbu, vayi batambula thalu yimueka yi zimbongu na bo batona kusala yimeni. Bobuawu mvandi, boso kua bubela thangu baklistu bosolu ba kuba sodila, bawu bala tambula to nsendu’awu wu kukuenda ku diyilu, ba kutatamana bakuikama.
TEKA MATU MU ZINDUBU
18-19. Malongi mbi ayi zindubu mbi tuma longuka?
18 Mbi tuma longuka? Kifuani ki mamemi ayi zikhombo, kimmonisa nkinza kuidi baboso bake kivuvu ki kuzinga mvu ka mvu va ntoto, batatamana bakuikama bubu kuidi Yave ayi mu thangu ziphasi zingolo. Mu thangu ayoyo, Yesu wala tadila basonga batu bafuana muingi kutambula “luzingu lu mvu ka mvu.”—Mat. 25:46.
19 Mvandi tuma mona bifuani biodi binlubula baklistu basolu. Mu kifuani ki bakietu bakhambu zaba dibakala, tanu mu bawu bamonisa nduenga. Bawu baba bakubama ayi bakotuka mu kutelimina dibakala dinkuela mu yoso kua thangu kankuiza vitila. Vayi bakietu bakhambu zaba dibakala bakhambu ba nduenga, basa ba ko bakubama. Diawu dibakala dinkuela kamangina muingi bakota mu nkungi’andi wu dikuela. Mvitu tufueti ba bakubama muingi kutemina nati yoso kua thangu Yesu kala manisa mambi ma nza ayiyi. Mvandi mu kifuani ki Yesu ki zitalentu, tuma mona bisadi biodi bikuikama basala beni mu kifuza ayi babaka lunungu lu mfumu’awu. Vayi kisadi kimbi, bankuka. Mbi mawu ba tulonga? Tufueti kukivana beni mu kisalu ki Yave, nati kutsuka. Bosi kutsuka tuma mona, buidi Baklistu basolu bafueti tatiminina bakotuka muingi babaka nsendu wu “kukuenda ku diyilu.” Bawu bake phuila yi “kuba va kimueka” na Yesu ku diyilu. Bo mvita wu Alimangedoni wala vioka, Baklistu basolu badi nkietu wu dikuela di Yesu, bala ba mu nkungi wu dikuela di Muana Dimemi.—2 Te. 2:1; Nzai. 19:9.
20. Mbi Yave kala vangila bo bantekanga matu zindubu ziandi?
20 Kheti lufundusu lu Yesu luke mu kubelama, vasintombulu ko kuba boma. Befu kutatamana bakuikama, Tat’itu yi diyilu wala tuvana “mangolo malutidi” “muingi tubaka. . . bu kutelemina va ntuala Muana Mutu.” (2 Ko. 4:7; Luk. 21:36) Boso kua bubela kivuvu tuidi, kuba kuandi ki kuzingila ku diyilu voti va ntoto, tuala kuangidika Tat’itu befu kuteka matu mu zindubu zidi mu bifuani bi Yesu. Mu kibila ki mamboti malutidi ma Yave, mazina mitu mala ba “masonama mu buku” yi luzingu.—Dani. 12:1; Nzai. 3:5.
NKUNGA 26 Ma Wuba Vangila, Minu Wuvangila
a Tala dilongi dintuba “Mbi Tuzebi Matedi Phila Yave Kala Fundisila Batu mu Bilumbu Binkuiza?” mu Kibanga ki Nsungi Ngonda Yintanu 2024.
b Muingi wubuela zaba, tala dilongi dintuba “Você vai ‘se manter vigilante’?” mu Kibanga ki Nsungi kilumbu 15 Ngonda Yintatu, 2015.
d MAMBU MADI MU ZIFOTO VA THONONO: Khomba yinkietu wusolu, wuntuadisa ndongukulu yi Kibibila mu kisalu ki kusamuna.