DILONGI 46

NKUNGA 49 Tuyangidika Ntima wu Yave

Zikhomba zi Babakala—Muidi mu Kuvanga Mongolo Muingi Muba Minsadisi mi Bakulutu ba Kimvuka?

“Kuvana kunluta tuadisanga mayangi kena kutambula.” —MAV. 20:35.

MAMBU TUANLONGUKA

Kindisa zikhomba zi babakala zi botama kukuna zikhadulu zintombulu ayi kuba phuila yi kuba minsadisi mi bakulutu ba kimvuka.

1. Buidi mvuala Polo kaba tadilanga minsadisi mi bakulutu ba kimvuka?

Mvutu’aku

MINSADISI mi bakulutu, bamvanganga kisalu kinkinza mu kimvuka. Mvuala Polo, waba vuanga nkinza babakala abobo ba lukuikumunu. Bo kasonikina nkanda kuidi Baklistu ku Filipi, nandi wufila zimboti kuidi bakulutu ayi minsadisa miawu.—Fil. 1:1.

2. Buidi yaya Luis kammuenanga mu kiyeku kadi ki kuba nsadisi wu bakulutu?

Mvutu’aku

² Boti ngie widi ditoku voti nkulutu, zikhomba ziwombu bambanga beni mu mayangi mu kuba minsadisi mi bakulutu. Dedi, Devan wutambula kiyeku ki kuba nsadisi wu bakulutu bo kaba 18 di mimvu. Vayi yaya Luis mvandi wutambula kiyeku beni, bo kaba 50 di mimvu. Nandi wutubila mu bukhufi mayindu bawombu bambanga, bo katuba: “Luidi luaku lunneni kuba nsadisi wu bakulutu, bulutidi mu kumona luzolo zikhomba mu kimvuka ba kumbonisanga!”

3. Biuvu mbi tunkuiza baka mimvutu?

Mvutu’aku

³ Boti ngie widi khomba wubotama ayi wubediabu ko nsadisi wu bakulutu, wulenda baka makani ma kuvanga mawu? Mbi bilenda kusadisa? Ayi zikhadulu mbi zi Kibibila zintombulu muingi kuba nsadisi wu bakulutu? Mu dilongi adidi, tunkuiza baka mimvutu mi biuvu abiobio. Vayi theti, tuantubila kiyeku minsadisi mi bakulutu badi.

BIYEKU MBI MINSADISI MI BAKULUTU BADI?

4. Kiyeku mbi nsadisi wu bakulutu kalenda tambula? (Tala foto.)

Mvutu’aku

⁴ Nsadisi wu bakulutu, kafueti ba khomba wubotama wusolu mu phevi yinlongo muingi kusadisa bakulutu, mu mambu mawombo ma kimvuka. Minsadisi minkaka, bantadilanga matedi bizunga bi kusamunina ayi bilongulu. Bankaka bansadisanga mu kudiodisa ayi kuludika Nzo yi Kintinu. Minsadisi minkaka bantambulanga kiyeku ki kuba minsudiki mi vama va kukala ayi bankaka bantadilanga matedi bisiku bi minkunga. Nduka bisalu bioso minsadisi mi bakulutu bamvanganga, bitedi Nzo yi Kintinu. Minsadisi mi bakulutu badi babakala bayonzuka mu kiphevi, banzolanga Yave ayi banzingilanga mu zithuadusulu ziandi. Ayi badi luzolo luwombo mu zikhomba ziawu. (Mat. 22:37-39) Buidi khomba wubotama kalenda bela nsadisi wu bakulutu ba kimvuka?

Ndandasana yi zifoto: Minsadisi mi bakulutu bakivana mu biyeku biawu. 1. Khomba widi mu kuludika bilongulu. 2. Khomba wunkaka widi mu kufiona kikozu. 3. Khomba wunkaka wumvana ndizulu yimboti zikhomba bantuka mu lukutukunu. 4. Khomba wunkaka widi mu kusala mu audio video ku Nzo Kintinu. — Minsadisi mi bakulutu ba kimvuka banlandakana kifuani ki Yesu mu kusadila bankaka (Tala lutangu 4)

5. Mbi bintombulu muingi kuba nsadisi wu bakulutu?

Mvutu’aku

⁵ Kibibila kintubila zikhadulu zintombulu muingi kuba nsadisi mi bakulutu ba kimvuka. (1 Ti. 3:8-10, 12, 13) Boti ngie wuntomba kusadisa bankaka mu kuba nsadisi wu bakulutu, buna longuka matedi zikhadulu aziozio ayi vanga mangolo muingi kukuna ziawu. Vayi theti, ngie fueti zaba kibila mbi wuntombila kiyeku akiokio.

KIBILA MBI WUNTOMBILA KUBA NSADISI WU BAKULUTU?

6. Mbi bilenda kusadisa kuvanga kiosokua kisalu muingi kusadisa zikhomba ziaku? (Matai 20:28; tala fikula va thonono levista.)

Mvutu’aku

⁶ Tala kifuani kilutidi ki Yesu. Nandi wuvangila mamoso mu luzolo kadi mu Tat’andi—ayi kuidi batu. Luzolo beni, lumvanga kubuela kukivana mu kisalu ayi kuvanga mambu bankaka banyindulanga ti masi ko luvalu. (Tanga Matai 20:28; Yoa. 13:5, 14, 15) Ngie kuvangila mambu mu luzolo, Yave wala kusakumuna ayi wala kusadisa muingi kudukisa makani maku, ma kuba nsadisi wu bakulutu ba kimvuka.—1 Ko. 16:14; 1 Pet. 5:5.

Yesu wunlava malu ma wumueka mu bapostolo bandi ayi bankaka badi mu kukuituka. — Yesu wulongisa bapostolo bandi kusadila bankaka mu kukikulula, kubika kuandi kutomba kiyeku kinzinka(Tala lutangu 6)

7. Kibila mbi khomba kafueti bika kuvangila mambu mu lungundayi?

Mvutu’aku

⁷ Batu mu nza, banzitisanga beni batu bakimonisanga ti badi batu bankinza. Vayi masi ko mawu mammonikanga mu kimvuka ki Yave. Khomba wunzolanga batu dedi Yesu, katombanga ko kuba kimfumu muingi kutumina bankaka voti kuvanga bantadila mutu wulutidi nkinza. Boti mutu wuntomba bankaka bantadila mu phila ayoyo, na kutambula kiyeku mu kimvuka ḿba kalenda manga kuvanga bisalu biluelu bintombulu muingi kukieba mamemi ma Yave. Nandi kalenda yindula ti biyeku abiobio, bisi ko mu kitesu kiandi. (Yoa. 10:12) Yave kasakumunanga ko mangolo ma mutu widi lungundayi voti wuntulanga zitsatu ziandi va theti.—1 Ko. 10:24, 33; 13:4, 5.

8. Malongi mbi Yesu kavana kuidi bapostolo bandi?

Mvutu’aku

⁸ Khumbu zinkaka, kheti bo baba bakundi ba Yesu bafikama, baba tombanga biyeku mu phila yikhambu fuana. Mona mambu bapostolo buadi ba Yesu bavanga—Tiagu ayi Yoane. Bawu badinda Yesu muingi kaba vana kiyeku kinkinza mu Kintinu kiandi. Yesu wuba semba mu mambu bavanga. Vayi nandi wusudikisa kuidi 12 di bapostolo mu kutuba: “Woso mutu wuntomba kiyeku kinkinza va khat’inu, kafueti ba kisadi kinu. Ayi woso wuntomba kuba wutheti va khat’inu, kafueti ba kisadi ki baboso.” (Mala. 10:35-37, 43, 44) Zikhomba badi mayindu mafuana bantomba kusadila bankaka, bala sadisa kimvuka mu ziphila ziwombo.—1 Te. 2:8.

MBI BILENDA KU KUSADISA KUSADILA ZIKHOMBA?

9. Buidi wulenda buedila phuil’aku yi kusadisa bankaka?

Mvutu’aku

⁹ Tuidi lufiatu ti ngie wunzolanga Yave ayi wuntomba kusadila bankaka. Vayi ḿba wisi ko phuila yi kutambula kiyeku ki kuba nsadisi wu bakulutu. Buabu mbi bilenda kusadisa kuba phuila muingi wutambula kiyeku akiokio? Yindula mayangi mankuizilanga mu kusadila zikhomba ziaku! Yesu wutuba: “Kuvana kunluta tuadisanga mayangi kena kutambula.” (Mav. 20:35) Yesu wusadila mambu katuba. Nandi wubaka mayangi makiedika ma kusadila bankaka. Ayi mvaku wulenda baka mawu.

10. Buidi Yesu kamonisina ti wuba mayangi mu kusadila bankaka? (Malaku 6:31-34)

Mvutu’aku

¹⁰ Tala kifuani kimmonisa ti Yesu wubaka mayangi mu kusadila bankaka. (Tanga Malaku 6:31-34.) Khumbu yimueka Yesu ayi bapostolo bandi, baba bavonga. Bawu baba tomba kuba va baveka muingi kuvunda. Vayi nkangu wu batu wuvitila vo baba kibila baba tomba Yesu kaba longa. Nandi khanu wumanga, kibila nandi ayi bapostolo bandi “basa baka ko thangu yi kudia kioso kiuma.” Voti ḿba khanu Yesu kasa viokisa ko thangu yiwombo muingi kuba longa. Vayi mu kibila ki luzolo, nandi “wutona kuba longa mambu mawombo.” Ayi nandi wutatamana kuba longa “nati buisi buyila.” (Mala. 6:35) Nandi kasa vangila ko mawu mu lukuiku, vayi kavangila mawu kibila “wuba mona kiadi” ayi mu kibila ki luzolo kaba mu bawu. Bukiedika, kusadisa bankaka kutuadisa beni mayangi kuidi Yesu.

11. Buidi Yesu kasadisila batu? (Tala mvandi fikula.)

Mvutu’aku

¹¹ Yesu kasa longa ko to nkangu wu batu, vayi mvandi wukieba zitsatu ziawu zi kinsuni. Nandi wuvanga mangitukulu mu kufunisa bidia ayi wuvana biawu kuidi minlandikini miandi muingi bakabula. (Mala. 6:41) Mu kuvanga mawu, nandi wulongisa minlandikini miandi buidi bu kusadila bankaka. Nandi mvandi wumonisa ti kisalu minsadisi mi bakulutu bamvanganga nkinza kikeli. Yindula mayangi bapostolo baba, bo Yesu kaba vana luaku lu kukabila bidia kafunisa mu mangitukulu kavanga muingi “baboso badia ayi bayukuta”! (Mala. 6:42) Ayoyo yisi ko yawu khumbu yitheti Yesu katula zitsatu zi bankaka, vantuala zitsatu ziandi. Ayi nandi wuvanga mawu mu luzingu luandi loso. (Mat. 4:23; 8:16) Yesu wubaka mayangi ma kulonga ayi kukieba zitsatu zi bankaka. Ba lufiatu ti ngie mvaku wala baka mayangi amomo, ngie kukivana muingi kuba nsadisi wu bakulutu.

Ndandasana yi zifoto: 1. Yesu wumbomba nkietu mueka ayi wunkoluka yandi mu luzolo. 2. Khomba wu ditoko widi nsadisi wu bakulutu, wunsadisa khomba manuna widi yandi mu kisalu ki kusamuna. — Luzolo mu Yave ayi phuila yi kusadila bankaka, yinkuiza kusadisa kusadila zikhomba mu kimvuka mu diosokua diambu (Tala lutangu 11)a

12. Kibila mbi wulendi yindudila ko ti wisi ko luvalu mu kimvuka?

Mvutu’aku

¹² Ngie kumona ti wisi ko ni diambu wididi wupisuka muingi kuvanga, bika kuvonga. Tuidi lufiatu ti ngie widi zikhadulu zilenda sadisa kimvuka. Yindula mu mambu mvuala Polo katuba madi mu 1 Kolintu 12:12-30. Dinda Yave mu nzila nsambu, ka kusadisa kumona buidi mawu malenda kusadisila. Mambu mvuala Polo katuba mammonisa ti, ngie widi luvalu mu kimvuka. Boti ngie wukimuena ti wisi ko zikhadulu zintombulu muingi kuba nsadisi wu bakulutu, bika kuvonga. Vayi vanga mamoso wulenda nunga muingi wusadila Yave mu kusadisa zikhomba. Ba lufiatu ti bakulutu ba kimvuka, bankuiza kuvana biyeku bio ngie wulenda nunga kuvanga.—Lom. 12:4-8.

13. Mbi bintombulu muingi kuba nsadisi wu bakulutu?

Mvutu’aku

¹³ Mona kibila ngie wulenda kukivanina muingi wuba nsadisi wu bakulutu ba kimvuka: Zikhadulu zintombulu muingi kuba nsadisi wu bakulutu, ziawu Baklistu boso bafueti kuna. Bukiedika, Baklistu boso badi luaku muingi kufikama Yave, kubaka mayangi mankuizilanga mu kuzingila mu phila yi kunkuangidika. Mbi khomba kafueti vanga muingi kusadila bankaka?

MBI BINTOMBULU MUINGI WUBA NSADISI WU BAKULUTU

14. Mbi binsundula kuba mutu ‘wu lufiatu’? (1 Timoti 3:8-10, 12)

Mvutu’aku

¹⁴ Buabu tuemmona zikhadulu zidi mu 1 Timoti 3:8-10, 12. (Tanga.) Minsadisi mi bakulutu ba kimvuka badi “batu ba lufiatu.” Mawu mansundula kuba “mutu wu lukinzu,” “widi mavanga mamboti.” Mawu mansinsundula ko ti wulendi botula ko thangu muingi kuvuvisa. (Mpovi 3:1, 4) Vayi mawu mansundula ti, ngie fueti vanga buboti biyeku biaku. Ngie kuba mutu wu lufiatu, zikhomba mu kimvuka bala kukinzika.

15. Mbi binsundula “kutubanga kiedika” ayi “kubika baka biuma mu kuvuna bankaka”?

Mvutu’aku

¹⁵ “Bantubanga kiedika” mawu mansundula ti ngie widi mutu wu lufiatu ayi wuntubanga kiedika. Wunsadilanga mambu wuntuba ayi wuvunanga ko bankaka. (Zinga. 3:32) “Ni kubaka biuma mu kuvuna bankaka” mawu mansundula ti ngie wuntubanga kiedika bo wumvanga lungosu ayi wunsadilanga buboti zimbongo. Diawu ba keba keba muingi wubika sadila luaku lu kikundi widi na zikhomba, muingi wuluta baka zimbongo.

16. (a) Mbi binsundula “kubika nua beni vinu”? (b) Mbi binsundula “kuba kilunzi kidiodila”?

Mvutu’aku

¹⁶ “Balendi nua ko beni vinu” mawu mansundula, kubika kuviokisa kitesu voti kukolu malavu. Kuba “kilunzi kidiodila,” kunsundula kusadila zithumu zi Yave. Masinsundula ko kuba wuvedila vayi kubaka mayangi mankuizilanga mu kuba kinkundi kifikama na Nzambi.

17. Buidi khomba kalenda monisina ti ‘widi wufuana’? (1 Timoti 3:10; tala mvandi foto.)

Mvutu’aku

¹⁷ “Fionguninanu theti boti badi bafuana” mawu mansundula ti, bakulutu ba kimvuka bammonanga ti ngie wunkiebanga buboti biyeku biaku ayi balenda kuku fiatila. Diawu bo bakulutu ba kuvana kiyeku, landakana zithuadusulu ziawu ayi zio tuntambulanga mu nzila kimvuka. Tomba kuzaba buidi bu kuvangila kiyeku beni ayi thangu mbi fueti manisina kiawu. Bo wunkieba buboti kiyeku kiaku, zikhomba zinkaka mu kimvuka, bala mona ayi bala vua nkinza ndionzukulu’aku yi kiphevi. Bakulutu ba kimvuka, banu bakubama muingi kukubika zikhomba zi babakala badi babotama. (Tanga 1 Timoti 3:10.) Vadi zikhomba zi babakala babotama mu kimvuka kiaku beka bakulutu voti bakhidi matoko? Badi kifuani kimboti mu matedi kuvanga ndongukulu’awu yi Kibibila? Bawu bamvananga mimvutu mu zikhutukunu ayi badi kifuza mu kisalu ki kusamuna? Boti buawu, buna wulenda kuba vana biyeku bintombulu mu kutadila phungawu. Mu phila ayoyi, matoko amomo bala monisa ti “badi bafuana.” Boti beka kutsuka butoko buawu, bawu ḿba balenda ba minsadisi mi bakulutu ba kimvuka.

Khomba wu ditoko widi mu kusadisa kutambika micro, kuidi khomba wumvana mvutu mu lukutukunu. — Bo bakulutu ba kimvuka bamvana zikhomba zi babakala babotama biyeku, bawu bammonisanga ti “beka bafuana” (Tala lutangu 17)

18. Mbi binsundula kuba mutu “wukhambulu tsembolo”?

Mvutu’aku

¹⁸ “Batu bakhambulu tsembolo” mansundula ti ni mutu kalendi kuba vunina ko mambu mambi. Befu tuzebi ti, Baklistu balenda kuba vunina mambu. Ayi Yesu mvandi bamvunina mambu ayi nandi wutuba ti minlandikini miandi bala viokila mu mawu. (Yoa. 15:20) Diawu ngie kuba zikhadulu zimboti dedi bo Yesu kabela, wala ba mutu wu lukinzu ayi widi mavanga mamboti mu kimvuka.—Mat. 11:19.

19. Mbi binsundula kukuela “nkietu wumueka to”?

Mvutu’aku

¹⁹ Bafueti kuela “nkietu wumueka to.” Mansundula ti boti ngie widi wukuela, fueti tadila dikuela mu phila Yave kadi tsikikila—dibakala mu nkietu wumueka. (Mat. 19:3-9) Dibakala dikuela kalendi vanga ko kitsuza. (Ebe. 13:4) Nandi kafueti ba wukuikama mu nkietu’andi ayi kalendi zinina ko bakietu bankaka.—Yobi 31:1.

20. Mbi binsundula “kutuadisa buboti dikanda diaku”?

Mvutu’aku

²⁰ “Bafueti kieba ayi kutuadisa buboti dikanda ayi bana bawu.” Boti ngie widi mfumu dikanda, fueti kieba buboti kiyeku kiaku. Dedi, kuvanganga mbuongimini yi dikanda. Kubasikanga mu kisalu ki kusamuna na kadika mutu va dikanda diaku ayi kusadisa bana baku kukuna kinkundi kifikama na Yave. (Efe. 6:4) Dibakala wunkiebanga buboti dikanda diandi, wummonisanga ti kalenda kieba buboti kimvuka.—Dedikisa mawu na 1 Timoti 3:5.

21. Mbi fueti vanga boti wubediabu ko nsadisi wu bakulutu?

Mvutu’aku

²¹ Zikhomba zi babakala, boti mu bediabu ko minsadisi mi bakulutu ba kimvuka, sambila ayi landakana zithuadusulu bantubila mu dilongi adidi. Longuka zikhadulu zintombulu muingi kuba nsadisi wu bakulutu ayi kuna zikhadulu beni. Yindula mu luzolo widi kuidi Yave ayi mu zikhomba ziaku. Ayi buela kukivana muingi kuba sadila. (1 Pet. 4:8, 10) Yindula mayangi wunkuiza baka mu kusadila zikhomba ziaku zi kiphevi. Bika Yave kasakumuna mangolo wumvanga muingi kusadila bankaka mu kuba nsadisi wu bakulutu!—Fil. 2:13.

NKUNGA 17 ‘Yitidi’

a FOTO VATHONONO: Ku khonzu lukietu, mu kukikulula Yesu wunsadila bapostolo bandi; ku khonzu lubakala, nsadisi wu bakulutu ba kimvuka wunsadisa khomba manuna mu kimvuka