Ba Kifuza mu Kisalu ki Kusamuna, Dedi Yesu

1. Mbi bimvanganga dikabu di Yave, kuba disuasana na baklistu ba luvunu?

ZIMBANGI zi Yave, banzolanga beni kusamuna zitsangu zimboti. Mawu ma bavanganga kuba disuasana na baklistu ba luvunu.a (Titu 2:14) Khumbu zinkaka ḿba mayangi maku mu kisalu ki kusamuna malenda tona kudekuka. Ayi wulenda kuyimuena buka nkulutu wumueka wu kimvuka wutuba: “Khumbu zinkaka yibanga ko phuila yi kuvanga kisalu ki kusamuna.”

2. Mbi bilenda dekula kifuza kitu mu kisalu ki kusamuna?

² Ḿba ngie wulenda luta zola vanga biyeku binkaka bi kimvuka kena kisalu ki kusamuna. Dedi kutungisa bibuangu bitu bi zikhutukunu, kusadisa zikhomba bamviokila mu bivuka voti kuba kindisa. Kibila mbi malenda monikina? Kibila tunnunganga kumona ndandu mawu mantuadisanga kuidi zikhomba, ayi mvandi tunsalanga mu ndembama na zikhomba zitu, tuyimonisanga luzolo ayi tummonanga ti bawu bamvuanga nkinza ayi bantondanga mambu tu bavangilanga. Vayi mu matedi kisalu ki kusamuna, ḿba tumana sala mimvu miwombo va kizunga kimueka, vayi batu bawombo bakikininanga ko voti bavuanga ko nkinza. Mvandi bo tukue fikamanga ku tsuka nza ayiyi, batu bankuiza luta lenda zitsangu tunlonga. (Mat. 10:22) Diawu mbi binkuiza tusadisa, kutatamana kusamuna voti kubuela kifuza kitu mu kisalu ki kusamuna?

3. Buidi Luka 13:​6-9 yimfuanikisila kifuza ki Yesu?

³ Kulonguka kifuani ki Yesu, kunkuiza tusadisa kuba kifuza mu kisalu ki kusamuna. Bo kaba va ntoto nandi, wutatamana kuba kifuza mu kisalu ki kusamuna. (Tanga Luka 13:​6-9.) Dedi bo dibakala Yesu katubila kaviokisa mimvu mitatu muingi kuvata mfigu wabasa butanga ko ni makundi, Yesu mvandi wuviokisa mimvu mitatu mu kusamuna kuidi basi Yuda, vayi bawombo mu bawu basa kikinina ko zitsangu beni. Dedi bo dibakala beni kasa vonga ko kuvata mfigu, Yesu mvandi kasa dekula ko kifuza mu kulonga zitsangu zimboti. Vayi nandi, wubuela kukivana muingi kunyikuna mintima mi batu baba bakubama.

4. Mambu mbi Yesu kavanga, tunkuiza longuka mu dilongi adidi?

⁴ Mu dilongi adidi tuemmona buidi Yesu kamonisina kifuza, bulutidi mu sambanu di zingonda zitsuka zi luzingu luandi va ntoto. (Tala “Depois disso” mu nota de estudo yidi mu Luka 10:1.) Kulonguka mambu kalonga ayi kusadila mawu, kunkuiza tusadisa kuba kifuza bubu. Tuemmona ziphila zinna Yesu kamonisina kifuza. (1) Nandi wutsikika thalu mu luzolo lu Yave, (2) wutsikika thalu mu zimbikudulu zi Kibibila, (3) wufiatila mu lusalusu lu Yave, ayi (4) wuba lufiatu ti bankaka bankuiza nyuwila.

NANDI WUTSIKIKA THALU MU LUZOLO LU YAVE

5. Buidi Yesu kamonisina ti waba sikikanga thalu’andi mu luzolo lu Nzambi?

⁵ Yesu wusamuna mu kifuza “zitsangu zimboti zi Kintinu,” kibila wuzaba ti kiawu kisalu Nzambi kaba tomba kavanga. (Luka 4:43) Kheti ku tsuka kisalu kiandi, Yesu wutula kisalu ki kusamuna va theti mu luzingu luandi. Nandi wuvangila mawu mu kue longanga mu “kadika divula ayi kadika buala”. (Luka 13:22) Mvandi wukubika milandikini minkaka muingi bavanga kisalu beni.—Luka 10:1.

6. Buidi biyeku binkaka bi kimvuka, bididi kithuadi na kisalu ki kusamuna? (Tala mvandi foto.)

⁶ Bubu mvandi kuvanga kisalu ki kusamuna diawu diambu dilutidi nkinza Yave ayi Yesu bantomba tuvanga. (Mat. 24:14; 28:​19, 20) Vadi kithuadi kisalu ki kusamuna na biyeku binkaka bi kimvuka tumvanganga. Dedi kutungisa zinzo zi kintinu, kusala ku beteli zidi ziphila zi kubuedila mioko kisalu ki kusamuna. Mvandi tunsadisanga zikhomba bammonikinanga bivuka, kubika kuandi to mu kinsuni vayi mvandi mu ku basadisa kuvutuka kubue vanganga mambu ma kipheve, kubunda mvandi kisalu ki kusamuna. Befu kuvisa nkinza kisalu ki kusamuna kidi ayi kukikinina ti kiawu kisalu Yave kantomba tuvanga, mankuiza tukindisa kusamuna mu kifuza. Nkulutu wumueka wu kimvuka wunkalanga ku Hungria, bantedilanga János wutuba: “Vasi ko kisalu kinkaka ki kimvuka, kilutidi nkinza kena kisalu ki kusamuna.”

7. Kibila mbi Yave kantombila tutatamana kusamuna? (1 Timoti 2:​3, 4)

⁷ Kutadila batu mu phila Yave ka batadilanga, mala tusadisa kubuela kifuza mu kisalu ki kusamuna. Nandi tidi batu boso bayuwa ayi bakikinina zitsangu zi kintinu. (Tanga 1 Timoti 2:​3, 4.) Diawu ka tukubikilanga muingi tuba bapisuka mu kusamuna zitsangu aziozio zimvukisa miela mi batu. Dedi mua buku Zola Batu—Ayi Vanga Minlonguki, muidi mambu ma ku tusadisanga kutona masolo malenda sadisa kuvanga minlonguki. Kheti bubu batu basimvua ko nkinza mambu tuba longa, ḿba balenda mavua nkinza mu thangu ziphasi zingolo. Mambu tunlonganga, mala basadisa to befu kutatamana kusamuna.

NANDI WUTSIKIKA THALU MU ZIMBIKUDULU ZI KIBIBILA

8. Buidi kuzaba buboti zimbikudulu zi Kibibila, kusadisila Yesu kusadila buboti thangu’andi?

⁸ Yesu wuvisa buboti thangu yaba salimina zimbikudulu zi Kibibila. Ayi mvandi wuzaba ti kisalu kiandi ki kusamuna kiala vanga to mimvu mitatu ayi ndambu. (Dani. 9:​26, 27) Nandi wuzaba zimbikudulu ziaba tubila thangu kafueti fua. (Luka 18:​31-34) Mambu Yesu kazaba, mamvanga kusadila buboti thangu’andi. Nandi wusamuna mu kifuza nati kadukisa kiyeku kiandi.

9. Kibila mbi Zimbikudulu zi Kibibila zi tukindisila kusamuna mu kifuza?

⁹ Kuzaba buboti zimbikudulu zi Kibibila kulenda tusadisa kusamuna mu kifuza. Tuzebi ti thangu yiluelu to yisiedi. Mvandi mambu madi mu kumonika ayi zikhadulu zi batu bubu mammonisa ti tuidi mu kuzingila mu bilumbu bitsuka Kibibila kintubila. Tummonanga zimbikudulu zi Kibibila zintubila matedi ntinu wu sul ayi ntinu wu norte, kusalama mu ‘bilumbu abibi bitsuka’ ayi tummonanga mvandi kithatu mu mintinu amiomio. (Dani. 11:40) Mvandi tumvisanga ti ntinu wulutidi mu nza yimvimba Anglo-Americana, nandi wunsundula bitambi bi malu bantubila mu kitumba kidi mu mbikudulu yidi mu Danieli 2:​43-45. Befu tuidi lufiatu ti nkadu to wunkhambu kintinu ki Nzambi kiambelama kutulula mintinu mi nza. Zimbikudulu zioso aziozio, zimmonisa thangu tuidi mu kuzingila ayi zi tukindisa kusamuna mu kifuza ayi mu nsualu.

10. Mu ziphila mbi zimbikudulu zi Kibibila zilenda buedila kifuza kitu?

¹⁰ Zimbikudulu zi kibibila zintubila mvandi mambu mamboti Nzambi kala vanga. Kuzaba mawu kutu vananga phuila yi kuzabikisa mawu kuidi bankaka. Carrie khomba mueka wunkietu wunkalanga ku República Dominicana wutuba: “Kuzaba zikhanu zi Yave zitedi nza yimona, zi kuphananga phuila yi kuzabikisa ziawu kuidi bankaka.” Nandi wubue tuba: “Bo yimmonanga mambu batu bamviokila, yimvisanga ti bawu, bafueti zaba zikhanu zi Nzambi.” Zimbikudulu zi Kibibila zi tukindisanga kuba kifuza mu kisalu ki kusamuna, kibila tuzebi ti Yave Nandi widi mu kutuadisa kisalu beni. Leila, wunkalanga ku Hungria wutuba: “Yesaya 11:​6-9 yi kukhindisanga, kuzabikisa kuidi bankaka zitsangu zimboti kheti bankuiza yuwa voti ndamba. Yizebi ti mu lusalusu lu Yave batu balenda balula mayindu mawu.” Ayi khomba mueka bantedilanga Christopher wunkalanga ku Zâmbia wutuba: “Dedi bo Malaku 13:10 kambikudila, zitsangu zimboti zidi mu kusamunu mu nza yimvimba. Ayi yimbanga beni mu mayangi kubuela mioko mbikudulu ayoyo.” Zimbikudulu mbi zi Kibibila zi kukindisanga kutatamana kusamuna?

NANDI WUFIATILA MU LUSALUSU LU YAVE

11. Mbi bisadisa Yesu kutatamana kusamuna mu kifuza? (Luka 12:​49, 53)

¹¹ Yesu wutatamana kusamuna mu kifuza, kibila wufiatila mu lusalusu lu Yave. Kheti nandi waba kolukanga mu lukinzu ayi mu keba keba, nandi wuzaba ti batu bankaka bankuiza lenda zitsangu zimboti. (Tanga Luka 12:​49, 53.) Mu kibila ki zitsangu kaba samunanga, zimfumu zi binganga bi basi Yuda baba tomba kumvonda. (Yoa. 8:59; 10:​31, 39) Vayi Yesu wutatamana kusamuna kibila wuzaba ti Yave wuba yandi. Nandi wutuba: “Yisi ko minu veka, vayi Tata, mutu no wuthuma widi yama. . . . Nandi kasa kukhuekula ko, kibila thangu zioso, yimvanganga mambu ma kunkuangidika.”—Yoa. 8:​16, 29.

12. Buidi Yesu kakubikila minlandikini miandi, batatamana kusamuna mu thangu zikhuamusu?

¹² Yesu wukindisa minlandikini miandi bafiatilanga mu lusalusu lu Yave. Khumbu ziwombo wuba kanikisa ti Yave, wunkuiza basadisa kununga zikhuamusu bankuiza viokila. (Mat. 10:​18-20; Luk. 12:​11, 12) Diawu kaba kambila baba keba keba. (Mat. 10:16; Luk. 10:3) Nandi wuba kindisa muingi babika kukuika batu, kukuwa zitsangu zimboti. (Luk. 10:​10, 11) Ayi wuba kamba ti ba kuba kuamisa bafueti tina. (Mat. 10:23) Kheti Yesu wuba kifuza ayi waba fiatilanga mu Yave, nandi waba banga keba keba mu mambu malenda ntuadisa ziphasi.—Yoa. 11:​53, 54.

13. Kibila mbi fueti bela lufiatu ti Yave wala kusadisa?

¹³ Muingi tununga kusamuna mu kifuza vantombulu lusalusu lu Yave. (Nzai. 12:17) Mbi bi tuvana lufiatu ti Yave wunkuiza tusadisa? Tala nsambu Yesu kavanga, widi mu buku yi Yoane 17. Yesu wudinda kuidi Yave, muingi kakengidila bapostolo, ayi Yave wunyuwila. Buku yi Mavanga yintuba phila Yesu kasadisila bapostolo bandi batatamana kusamuna mu kifuza kheti mu zikhuamusu. Mu nsambu’andi, Yesu wubue dinda kuidi Yave muingi kakengidila bo bala kuna kiminu mu zitsangu zio bapostolo baba zabikisa. Dedi bo Yave kayuwila nsambu wu Yesu ayi kasadisila bapostolo, Nandi mvandi wunkuiza kusadisa.—Yoa. 17:​11, 15, 20.

14. Buidi tuzabidi ti tuala baka lusalusu muingi tutatamana kusamuna mu kifuza? (Tala mvandi foto.)

¹⁴ Kheti disi ko diambu diluelu kusamuna mu bilumbu abibi bitsuka tuidi mu kuzingila, tulenda ba lufiatu ti, tuidi lusalusu loso luntombulu. (Luk. 21:​12-15) Dedi Yesu ayi minlandikini miandi, befu tukuikanga ko batu kukikinina zitsangu tuba longa ayi mvandi, tuyambilanga ko yawu. Kheti bo bankandimina kisalu kitu mu zitsi zinkaka, zikhomba zitu bamvanganga mamoso bannunga muingi kutatamana kusamuna zitsangu zimboti, mu kufiatila mu Yave kubika kuandi mu baveka. Dedi bo kavanina mangolo kuidi bisadi biandi mu sekulu yitheti, bubu mvandi Yave wutuvananga mangolo, muingi “tusamuna zitsangu zimboti kuidi batu ba mimvila mioso”. (2 Ti. 4:17) Ngie kufiatila mu Yave wunkuiza nunga kusamuna zitsangu zimboti mu kifuza.

NANDI WUBA MAYINDU MAFUANA

15. Mbi bimmonisa ti Yesu wuba mayindu mafuana matedi kisalu ki kusamuna?

¹⁵ Yesu wuba mayindu mafuana matedi kisalu ki kusamuna, ayi mawu mansadisa kutatamana kusamuna mu mayangi. Dedi, kutsuka mvu 30 T.K., Yesu wumona ti batu bawombo baba bakubama muingi kukikinina zitsangu zimboti ayi nandi wuba fuanikisa buka tsola yidi mbongu yiyela. (Yoa. 4:35) Nduka mvu mueka nandi wukamba minlandikini miandi: “mbongu yi kuvela yidi yiwombo.” (Mat. 9:​37, 38) Bosi nandi wuyiza bue tuba: “, mbongu yi kuvela yidi yiwombo . . . Dindanu Mfumu vuidi tsola muingi kabue fila bisadi bamvela mbongu’andi.” (Luk. 10:2) Yesu wutatamana kuba lufiatu ti batu bankuiza yuwa zitsangu zimboti ayi waba banga mu mayangi bo mawu maba monikanga.—Luk. 10:21.

16. Buidi bifuani Yesu kasadila bimonisina ndionzukulu yi kisalu ki kusamuna? (Luk. 13:​18-21) (Tala mvandi fikula.)

¹⁶ Yesu wukamba minlandikini miandi ti, muingi batatamana kuba kifuza mu kisalu ki kusamuna, bafueti ba mayindu mafuana. Dedi, tala bifuani biodi nandi kasadila. (Tanga Luka 13:​18-21.) Yesu wusadila lutheti lu mutalide, muingi kulonga ti zitsangu zi Kintinu ziala tembakana mu phila tukhambu yindudila. Ayi mvandi wusadila luvi muingi kufuanikisa phila zitsangu zimboti ziala tembikinina ayi ziala nyikunina mintima mi batu muingi babalula mavanga mawu. Diawu Yesu kasadisila minlandikini miandi kuvisa ti zitsangu zimboti ziala tuadisa ndandu.

17. Kibila mbi tufueti tatamana kuba mayindu mafuana matedi kisalu ki kusamuna?

¹⁷ Bo tummona mambu madi mu kuvangama mu kimvuka ki Yave mu nza yimvimba, mawu ma tukindisanga kutatamana kusamuna mu kifuza. Dedi kadika mvu, biveve na biveve bi batu banlandakananga Mbambukulu Moyo Lufua lu Yesu ayi banlongukanga yitu Kibibila. Biveve na biveve bi batu bambotamanga ayi va kimueka tunsamunanga zitsangu zimboti. Tusa zaba ko batu bakua bankuiza kikinina zitsangu zimboti, vayi tuzebi ti Yave widi mu kukutikisa nkangu wunneni wu batu bala vuka mu ziphasi zingolo. (Nzai. 7:​9, 14) Yave Mfumu tsola widi lufiatu ti vadi batu bawombo bankuiza kikinina zitsangu zimboti. Diawu, tatamana kusamuna zitsangu zimboti mu kifuza.

18. Mbi tuntomba batu bavisa bo batumona kusamuna?

¹⁸ Minlandikini mi Yesu baba bazabakana mu kifuza kiawu mu kisalu ki kusamuna. Bo batu baba monanga phila bapostolo baba kolukilanga, “bawu bayituka ayi bavisa ti badiata va kimueka na Yesu.” (Mav. 4:13) Bo batu ba tumona kuvanga kisalu ki kusamuna, bamvisanga ti befu tunlandakananga kifuani ki kifuza ki Yesu.