DILONGI 14
NKUNGA 8 Yave Kisuamunu Kitu
‘Sola Ngie Veka. . . Nani Wunkuiza Sadila’
“Minu ayi badi va nzuama Yave tusola kusadila.” —YOSUA 24:15.
MAMBU TUANLONGUKA
Tuentebukila moyo bibila bi tuvanga kusadila Yave.
1. Muingi tubaka mayangi makiedika, mbi tufueti vanga ayi kibila mbi? (Yesaya 48:17, 18)
TAT’ITU yi diyilu wutu zolanga beni ayi wuntomba tubaka luzingu lu mayangi bubu ayi luzingu lu mvu ka mvu mu bilumbu binkuiza. (Mpovi 3:12, 13) Nandi wutu vanga na diela di kuvanga mambu, vayi kasa tuvana ko nsua wu kuyituadisa ayi wu kuyiyala befu veka voti kusikika minsiku mu matedi mambu mamboti voti mambi. (Mpovi 8:9; Yele. 10:23) Nandi zebi ti muingi tubaka mayangi makiedika vantombulu kunsadila ayi kuzingila mu minsua miandi.—Tanga Yesaya 48:17, 18.
2. Mambu mbi Satana kantomba tukikinina, ayi buidi Yave kamonisina ti madi ma luvunu?
2 Satana wuntomba tuyindula ti tulenda baka mayangi makiedika mu kuyituadisa befu veka ayi mu khambu sadila Yave. (Ngene. 3:4, 5) Vayi Yave wumonisa ti mambu Satana katuba masi ko makiedika, mu kuvana batu luaku muingi bayala mu mua thangu. Kibibila kimmonisa bifuani bi babakala ayi bi bakietu babaka mayangi makiedika mu kusadila Yave mu luzingu luawu loso. Ayi wumueka mu batu abobo, Yesu Klistu. Ndoko tumona theti bibila mbi bimvanga kusadila Yave. Bosi tuemmona kibila mbi Tat’itu yi diyilu kafueni mu kutambudila mbuongimin’itu ayi kutsuka tunkuiza tubila bibila mbi bi tuvanga kusola kusadila Yave.
KIBILA MBI YESU KASODILA KUSADILA YAVE?
3. Mbi Satana kakanikisa kuvana Yesu, ayi makani mbi Yesu kabaka?
3 Bo Yesu kaba va ntoto vaba tombulu nandi kusola nani kankuiza sadila. Bo kabotama Satana wummonisa luyalu loso luidi va ntoto ayi wunkamba ti wunkuiza mvana luawu na kumbuongimina. “Yesu wumvutudila: Satana yenda wumbika, kibila madi masonama: Yave Nzambi’aku to wufueti buongimina ayi nandi to wufueti sadila.” (Mat. 4:8-10) Kibila mbi Yesu kasodila kusadila Yave? Tuemmona mua bibila.
4-5. Kibila mbi Yesu kasodila kusadila Yave?
4 Kibila kilutidi ki vanga Yesu kusola kusadila Yave kidi—Luzolo lungolo kaba mu tat’andi. (Yoa. 14:31) Mvandi Yesu wuzaba ti kusadila Yave diawu diambu dilutidi kafueti vanga. (Yoa. 8:28, 29; Nzai. 4:11) Nandi wuzaba ti Yave widi tho yi luzingu, widi mutu wu lufiatu ayi nkua kukaba. (Minku. 33:4; 36:9; Tia. 1:17) Mamoso Yave kaba kambanga Yesu maba makiedika ayi biabioso kaba, bifumina kuidi Yave. (Yoa. 1:14) Vayi Satana wutuadisa lufua, ayi wuntombanga to mamboti mandi veka. (Yoa. 8:44) Yesu wuzaba buboti Yave ayi wuzaba buboti Satana, diawu kabakila makani ma kubika landakana kifuani ki Satana ki kubanda mbusa Yave.—Fil. 2:5-8.
5 Kibila kinkaka kimvanga kusola kusadila Yave kidi—kuyindula ndandu kankuiza baka na kutatamana wukuikama. (Ebe. 12:2) Nandi wuzaba ti na kutatamana wukuikama, wunkuiza zitisa dizina di Tat’andi ayi wunkuiza manisa mambu moso maphasi Satana kantuadisanga.
YAVE TO FUENI MU TAMBULA MBUONGIMIN’ITU
6-7. Kibila mbi batu bawombo bubu bakhambu sadilanga Yave? Kibila mbi tufueti buongimina to Yave?
6 Bawombo bubu basadilanga ko Yave, kibila basa zaba ko zikhadulu ziandi zimboti, ayi bavisanga ko phila Yave kaba sadisilanga. Mawu mamonikina batu mvuala Polo kasamuna ku divula di Atena.—Mav. 17:19, 20, 30, 34.
7 Mvuala Polo wusudikisa kuidi batu baba kunkuwa ti Nzambi yi kiedika “wuvana bivangu bioso monyo, mvumuku ayi biuma bioso binkaka.” Nandi wutatamana kutuba: “Mu luzolo luandi befu tuididi monyo, tunyikukinanga, ayi tunzingilanga.” Nzambi nandi wuvanga dibakala ditheti muyizila batu ba zitsi zioso. Diawu kadidi nsua wu kutambula mbuongimin’itu.—Mav. 17:25, 26, 28.
8. Mbi Yave kalendi vanga ko? Sudikisa.
8 Mu kuba mvangi wu biuma bioso ayi Nzambi yilutidi zangama, Yave khanu wunkuikanga batu bansadila. Vayi Nzambi kalendi vanga ko mawu. Nandi wutu vananga bivisa ti nandi widi ayi wutuzolanga. Nandi wuntomba muingi batu boso baba bakundi bandi mvu ka mvu. (1 Ti. 2:3, 4) Diawu nandi katu kubikila muingi tulonga kuidi bankaka zikhanu ziandi ayi mambu mamboti kala vangila batu. (Mat. 10:11-13; 28:19, 20) Nandi wutu tumisa mu kimvuka kiandi muingi tumbuongimina ayi tutambula lusalusu lu bakulutu ba kimvuka badi luzolo.—Mav. 20:28.
9. Bivisa mbi bimmonisa ti Yave widi luzolo mu batu?
9 Tunnunganga kumona luzolo lu Yave, mu phila kankebilanga batu bakhambu kikininanga ti nandi widi. Tala mambu amama: Mu mimvu miwombo bivevi na bivevi bi batu basola kunatina luzingu mu phil’awu, vayi kheti bobo Yave mu luzolo wuba vana biabioso biaba tombulu muingi batatamana kuzinga mu mayangi. (Mat. 5:44, 45; Mav. 14:16, 17) Nandi wuba vana luaku lu kubaka bakundi, kubuta bana ayi mvandi kubaka ndandu mu bisalu biawu. (Minku. 127:3; Mpovi 2:24) Bivisa bimmonisa ti Tat’itu wu diyilu wunzolanga batu boso. (Esodu 34:6) Tuentubila bibila tuidi muingi kusadila Yave ayi buidi Yave katu sakumuninanga.
BIBILA BI TUVANGA KUSOLA KUSADILA YAVE
10. (a) Kibila mbi kilutidi ki tuvanga kusadila Yave? (Matai 22:37) (b) Ndandu mbi wunkuiza baka ngie kuyindulanga mu mvibudulu wu Yave? (Minkunga 103:13, 14)
10 Dedi Yesu tusola kusadila Yave kibila tuidi luzolo lungolo mu nandi. (Tanga Matai 22:37.) Mawu mamonika, bo tulonguka zikhadulu ziandi zimboti. Dedi, tala phila nandi kammonisinanga mvibudulu. Bo basi Isaeli bakhambu kuntumukina, nandi wuba lomba mu kutuba: “Lemvukanu bikanu zinzila zinu zimbi.” (Yele. 18:11) Yave zebi ti tuidi batu ba masumu ayi tuvangulu mu fundu fundu yi ntoto. (Tanga Minkunga 103:13, 14.) Kunyindulanga mu mvibudulu wu Yave ayi mu zikhadulu ziandi zimboti, kunkuiza kusadisa kuba phuila yi kunsadila mvu ka mvu.
11. Bibila mbi binkaka bi tuvanga kusola kusadila Tat’itu wu diyilu?
11 Mvandi Tunsadilanga Yave, kibila diawu diambu dilutidi tufueti vanga. (Mat. 4:10) Tuzebi mvandi ti kuvanga mawu kututuadisanga ndandu. Bo tuntatamananga bakuikama mu Yave, tundiodisanga dizina Diandi, tummonisanga ti Satana widi nkua luvunu ayi tunkuangidikanga ntima wu tat’itu. Befu kusola kusadila Yave bubu tunkuiza baka mvandi luaku lu kunsadila mvu ka mvu!—Yoa. 17:3.
12-13. Mbi tulenda longuka mu kifuani ki Jane ayi Pam?
12 Kheti tuidi matoko, tulenda nunga kukuna luzolo lungolo mu Yave, lo luala tatamana nati tuala nuna. Tala kifuani ki zikhomba wadi babutukila mu kivumu kimueka bantedilanga Jane ayi Pam.a Wumueka wuba 11 ayi wunkaka 10 di mimvu bo batona kulonguka Kibibila. Kheti matata mawu basa vua ko mawu nkinza, vayi babika Jane ayi Pam balongukanga Kibibila na zimbangi zi Yave. Vayi vabe tombulu bawu kukuendanga mu kinganga ki matata mawu mu kadika tsuka sabala. Jane wutuba: “Mambu zimbangi zi Yave bandongisa mu kibibila, matsadisa kununga zikhuamusu mu kikola, ayi kubika vukumuka mu kunua zitsunga ayi kuvanga kitsuza.”
13 Buviokila thangu bawu bayiza ba minsamuni ayi bo bayonzuka bayiza ba mintuami ntuala ayi batona kukebanga matata mawu bayiza nuna. Bo yaya Jane katebukila moyo mambu kaviokila, wutuba: “Yilonguka ti Yave wunkebanga bakundi bandi ayi dedi bummonisina 2 Timoti 2:19 ‘Yave zebi bo bamvuidi, diawu vasi ko divuda ti Yave wumvuanga nkinza baboso bansola kunzola ayi kunsadila.’
14. Buidi tunkakidilanga dizina di Yave mu luvunu loso bantubanga? (Tala mvandi foto.)
14 Tutidi kusadisa kudiodisa dizina di Yave mu luvunu loso. Yindulabu boti ngie widi nkundi widi mavanga mamboti dedi, wunzolanga kukaba ayi wunlemvukilanga bankaka. Vayi kilumbu kimueka ngie wunkuwa mutu wunkaka kumvunina mambu mu kutuba ti nandi widi mutu wu makhemu ayi nkua luvunu. Mbi ngie wunkuiza vanga? Bukiedika ti ngie wunkuiza vanga mamoso muingi kukakidila nkundi’aku. Bobuawu mvandi, bo satana ayi badi ku khonzo’andi bamvuninanga Yave mambu muingi kubivisa kimutu Kiandi befu tunkakidilanga dizina di Yave mu kutuba kiedika matedi Nandi. (Minku. 34:1; Yesa. 43:10) Tummonisanga ti tuntomba kusadila Yave mu muel’itu woso, mu mambu tunkoluka ayi mu mavanga mitu.
Ngie wunkuiza kakidila dizina di Yave? (Tala lutangu 14)b
15. Ndandu mbi mvuala Polo katambula mu makani kabaka ma kubika kiyeku ki nkinza? (Filipi 3:7, 8)
15 Mvuala Polo wubika kiyeku ki nkinza, muingi kaba nlandikini wu Yesu ayi kusadila Yave. (Nga. 1:14) Mu kibila akiokio, nandi wubaka luzingu lu mayangi ayi wutambula luaku lu kuyala na Klistu ku diyilu. Mvitu bubu, mu kibila ki luzolo tuidi mu Yave, tumbalulanga mua mambu mu luzingu luitu, muingi tununga kunsadila mu phila kantombila ayi mu ntima woso. Bukiedika, Polo kasa yongina ko mu makani kabaka. Mvitu tuisinkuiza yongina ko mu makani tumbaka ma kusadila Yave.—Tanga Filipi 3:7, 8.
16. Mbi tulenda longuka mu kifuani ki yaya Julia? (Tala mvandi zifoto.)
16 Befu kutula kisalu ki Yave va theti mu luzingu luitu, tuala baka luzingu lu mayangi bubu ayi mu bilumbu binkuiza. Tala mambu mamonikina khomba mueka bantedilanga Julia. Ava kalonguka kiedika nandi waba yolanga mu nzo nzambi tona mu bumuana buandi. Nkietu mueka wuba wuzabakana ayi wupisuka mu kuyola wunyuwa kuyola ayi wuzola beni, diawu katonina kunkubika. Mu kibila akiokio yaya Julia wununga kukuenda mu bibuangu biwombo bankuimbilanga muingi kukuimbila. Bo katona kukota kikola kio bankuimbilanga, koleg’andi wumueka wutona kukolukanga yandi matedi Nzambi ayi wunkamba ti dizina di Nzambi, Yave. Mu mua thangu Julia wutona kulongukanga Kibibila khumbu wadi mu sabala, ayi wuyiza baka makani ma kubika kisalu ki kuyola muingi kusadila Yave. Nandi wutuba: ‘Disa ba ko diambu diluelu kubaka makani amomo. Kibila bawombo baba kukhambanga ti minu yaba bungisa mambu yizebi kuvanga. Vayi minu yabe tomba kusadila Yave.’ Buidi luzingu lu yaya Julia luididi bubu mu makani amomo kabaka? Nandi wutuba: ‘yidi ndembama yi ntima ayi yidi lufiatu ti Yave wala dukisa zitsatu ziama zioso mu bilumbu binkuiza.’—Minku. 145:16.
Befu kutula kisalu ki Yave vatheti mu luzingu luitu, tunkuiza baka luzingu lu mayangi (Tala lutangu 16)c
TATAMANA KUSADILA YAVE
17. Mbi mambu Polo kasonika ma tulonga?
17 Tuidi mu kuzingila mu bilumbu bitsuka. Mvuala Polo wusonika: “Kibila mua nkadu to wunkambu, mutu no wunkuiza, wala tuka ayi kasi bue kala ko kisina.” (Ebe. 10:37) Mbi mambu Polo kasonika ma tulonga? Ma tulonga ti ayiyi yawu thangu batu bakhambu sadilanga Yave bafueti sola kunsadila kibila thangu yeka yikhufi. (1 Ko. 7:29) Befu tusola kusadila Yave, tulenda longuka ti kheti tumviokila mu zikhuamusu, ziawu zisinkuiza kadidila ko kibila ‘thangu yiluelu to yinkhambu.’
18. Mbi Yave ayi Yesu bantomba tuvanga?
18 Yesu wukindisa minlandikini miandi batatamana kunlandakana. (Mat. 16:24) Diawu kheti tueka mimvu miwombo mu kusadila Yave, makani mitu mafueti ba kutatamana kuba kifuza mu kisalu ki Yave. Disi ko diambu diluelu kuvanga mawu, vayi befu kutatamana tuala tambula lusakumunu ayi luzingu lu mayangi bubu!—Minku. 35:27.
19. Mbi tulenda longuka mu kifuani ki Gene?
19 Batu bankaka banyindulanga ti kusadila Yave didi diambu diphasi. Boti ngie widi ditoko, wunyindulanga ti widi mu kubungisa thangu’aku mu kusadila Yave? Khomba mueka wu ditoko bantedilanga Gene wutuba: “Yaba kukimuenanga ti kuba mbangi yi Yave kuaba kuthula nkaku kuvuvisa. Yabe monanga bana bawombo bayonzuka yama kukuenda mu minkungi, kuba bumasi, kuta zi jogo zi buphunha, vayi minu thangu’ama yaba viokisanga beni mu kisalu ki kusamuna ayi mu zikhutukunu. Mu kibila ki mayindu amomo mbi Gene kayiza vanga? Nandi wutuba: ‘Yitona kuvanga mambu mambi mu kinsueki. Mu mua thangu yizola vayi mawu masa kuthuadisa ko mayangi makiedika. Bo yitona kuyindula mu kiedika ki kibibila yilonguka yibaka makani ma kusadila Yave mu ntima woso, ayi tona kuandi mu thangu beni yinnunganga kumona ti Yave wuntambudilanga minsambu miama.’
20. Makani mbi tufueti ba?
20 Nsoniki wumueka wu minkunga wuyola matedi Yave: ‘Mayangi kuidi batu bo ngie wusola ayi bo ngie wutumisa bakala ku luphangu luaku.’ (Minku. 65:4) Bika tuba momawu makani Yosua kaba bo katuba: ‘Minu ayi badi va nzo’ama Nzambi tusola kusadila.’—Yosua 24:15.
NKUNGA 28 Nani wulenda ba nkundi Yave
a Bavingisa mazina mankaka.
b MAMBU MADI MU ZIFOTO: Nkietu wumueka wummona zimbeni zitu kuvanga divunza ku nganda kibuangu ki lukutukunu lu mavula. Kuntuala nkietu beni wummona zikhomba kusamuna mu kusadila dikalu di bilongulu ayi nandi wumfikama muingi kukuwa kiedika.
c MAMBU MADI MU ZIFOTO: Julia wubika kisalu kiandi ki kuyola muingi kusadila Yave.