‘Mvita Widi wu Yave’

Mambu matona kutsuka mvu 1990 bo ntinu ku França kakuika zikhomba ku Filiali bafuta zimbongo baba vananga minkhailu ku Filiali, mu mvu 1993 ayi 1996. Tutomba lusalusu mu zinzo zi lufundusu ku França, vayi tusa nunga ko. Bosi bo tuvutuka kubue dinda ku nzo lufundusu muingi ba tunungisa, ntinu wubonga zimbongo zioso ziba mu conta yi Filiali, ayi muawu muba $6,300,000 U.S. Diawu vaba tombulu befu kukuenda ku Nzo Lufundusu Yilutidi ku Europa. Vayi ava tubaka makani amomo, Nzo Lufundusu Yilutidi ku Europa, wutukamba muingi tuyenda va kimueka na dingumba di mimfundisi mi ntinu, minsoniki ayi batu bankaka baba salanga mu zinzo zi lufundusu, mu lukutukunu lumueka ava lufundusu luvangama.

Tuzaba ti mutu waba sonikanga makani ma nzo lufundusu, wunkuiza tukuika muingi tufuta zimbongo ntinu kaba tomba. Vayi mvandi tuvisa ti kufuta zimbongo beni kunkuiza levula minsua mi kibibila, kibila zikhomba zitu bavana minkhailu muingi kubuela mioko bisalu bi kintinu ki Nzambi. Diawu, minkhailu beni misa ba ko mi ntinu wu França. (Mat. 22:21) Vayi kheti bobo tuyenda kuna, muingi kukinzika zimfumu zi luyalu.

Tukutikinina mu sala yimueka yinneni yiba ku nzo lufundusu. Masolo masa tonina ko buboti. Mutu waba sonikanga makani ma nzo yi lufundusu, wutuba ti zimbangi zi Yave ku França bafueti futa zimbongo zioso, ntinu kaba tomba. Diawu befu tunyuvula: “Ngie zebi ti ntinu wu França wubonga 6.300.000 di zidolar ziba ku conta yi Filial’itu?”

Nandi wudasuka kibila kasa zaba ko ti ntinu wu França wuvanga mawu. Diawu, bo dingumba di mimfundisi mi ntinu wu França batuba ti bawu bavanga mawu, nandi wubalula mayindu mandi, ayi wuba semba vantuala nzo yi lufundusu. Mu mawu yivisa ti Yave nandi wubalula mambu amomo, muingi ku tunungisa. Tuyituka beni, ayi tuabasa yindula ko ti tunkuiza nunga ku nzo lufundusu.

Mu kilumbu 30 Ngonda sambanu mvu 2011, Nzo Lufundusu Yilutidi ku Europa, wubaka makani ma ku tunungisa, wubotula phaku ntinu kaba tukuika tufuta ayi mvandi wuba Kamba muingi bavutula zimbongo zioso zi Filiali babonga ayi kubuela zimbongo zinkaka vambata. Makani amomo, mankiebanga zikhomba zitu ku França nati bubu. Kiuvu tuvanga kheti mu khambu kubama, ki tusadisa kununga ku nzo lufundusu. Kibila mbi tunungina? Kibila, dedi bo Davidi katubila kuidi Ngoliati, ‘mvita widi wu Yave.’—1 Samu. 17:​45-47.

Ayoyo, yisi ko to Khumbu ba tunungisa ku nzo lufundusu. Nati bubu, kheti basi politika ayi basi binganga ba tukuamisanga, nduka zinzo zioso zi lufundusu zilutidi mu 70 di zitsi bambakanga makani ma kunungisa Zimbangi zi Yave, mu kuvioka 1.225 di zikhumbu. Mambu amomo ma tuvananga kiphuanza muingi tubaka luaku lu kusikimisa kimvuka kitu, kusamuna zitsangu zimboti, kuba bavasuka mu mambu ma politika ayi kubika buela menga.

Kheti yaba sadilanga ku kikhulutu ki Zimbangi zi Yave ku Nova York, kibila mbi yiyenda ku Nzo Lufundusu Yilutidi ku Europa?

MATATA MAMA BABA KIFUZA

Tat’ama George ayi mam’ama Lucille, bakota mu turma 12 yi kikola ki Ngiliadi ayi basadila ku Etiopia bo yibutuka mu mvu 1956. Bawu baphana dizina Filipi, mu kibila ki Filipi nsamuni wuzingila mu thangu bapostolo. (Mav. 21:8) Mu mvu wulanda bo yibutuka, ntinu wukandimina kisalu kitu. Kheti yiba muana kilezi, yintebuka moyo ti dikanda diama diaba buongimina Yave ku kinsueki. Bo yiba kilezi yaba zolanga beni mawu, vayi kiunda kuzaba ti zimfumu zi luyalu ba tukukisa ku tsi mu mvu 1960.

Kheti bo tuyenda kue zingila ku Kansas, Estados Unidos, matata mama batatamana kusamuna zitsangu zimboti mu kifuza. Bawu bazingila mu kiedika ayi ba tusadisa minu, khomb’ama wunkulutu Judy, ayi khomb’ama wu kilezi Leslie, tubaka makani ma kiphevi. Yibotama bo yiba 13 di mimvu. Bo vavioka mimvu mitatu, tuyenda kue sadila kuma kulutidi tsatu ku Peru.

Mu mvu 1974 bo yidukisa 18 di mimvu, zikhomba ba tutumisa va kimueka na zikhomba zinna mu kisalu ki mintuami ntuala mifilu. Vaba tombulu befu kusamuna mu bibuangu bimona, mu miongo mi Andes Central. Maba sundula mvandi, kukoluka na batu ba mimvila mi Quechua ayi Aymara. Tuviaja mu comboio baba tedilanga Arca, mu kibila ki phila yawu yiba. Yintebuka moyo bo yimonisa zikhanu zi Nzambi zidi mu Kibibila zitedi bimbefu ayi lufua kuidi batu baba zingilanga kuna. (Nzai. 21:​3, 4) Bawombo mu bawu bakikinina zitsangu zimboti.

BATHUMISA KU KIKHULUTU KITU

Bo kayenda kue tala zikhomba ku Peru mu mvu 1977, yaya Albert Schroeder, wuba mu Dingumba Dintuadisi di Zimbangi zi Yave, wukhindisa yi wesa nkanda wu kukota mu kisalu ki Beteli ku kikhulutu kitu. Mawu yivanga. Bo vavioka mua thangu mu kilumbu 17 Ngonda sambuadi mvu 1977, yitona kusadila ku Beteli yi Brooklyn. Mu mimvu minna milanda, yisadila mu dingumba di kuludika ayi kudiodisa bibuangu.

Mu lukutukunu lu mavula lu zitsi ku Nova Orleans, Louisiana mu ngonda sambanu mu mvu 1978, yizabila Elizabeth Avallone, wuyonzukila mu kiedika. Elizabeth waba sadila mu mimvu minna dedi ntuami ntuala ayi waba vuanga nkinza kisalu ki thangu ka thangu. Ayi befu tuaba kolukanga beni. Mu mua thangu tuyiza zolasana. Bosi mu kilumbu 20 mu ngonda kumi mu mvu 1979 tukuelana ayi tutona kusadila ku beteli.

Zikhomba zitu zi babakala ayi zi bakietu mu kimvuka kitu kitheti ku Brooklyn batuyamba mu luzolo. Bo vavioka mua mimvu, bimvuka bitatu batuyamba ayi batusadisa mu kiyeku kitu ku Beteli. Tutonda beni mu lusalusu loso lu bakundi ayi basi dikanda ditu batuvana mu kukeba matata mitu bo bayiza nuna.

KISALU KI KUKAKIDILA KIMVUKA KI YAVE KU NZO LUFUNDUSU

Mu ngonda yitheti mvu 1982, bathumisa muingi yisala mu dingumba di kukakidila zikhomba mu zinzo zi lufundusu ku Beteli. Bo vavioka mimvu mitatu, bathuma ku faculdade muingi yilonguka misiku mi tsi ayi yiba advogado muingi kukakidilanga zikhomba. Yiyituka bo yaba longuka makani ma zinzo zi lufundusu, ayi yiba mu mayangi mu kuzaba ti nduka batu bawombo ku Estados Unidos ayi mu zitsi zikaka, babaka kiphuanza mu kibila ki zimbangi zi Yave banungina mu zinzo zi lufundusu. Ayi tuaba kolukanga beni matedi mambu amomo, ku faculdade.

Mu mvu 1986 bo yidukisa 30 di mimvu, baphana kiyeku ki kuba nkengididi wu dingumba dinkakidilanga zikhomba mu zinzo zi Iufundusu. Yiba beni mu mayangi bo baphana kiyeku akiokio kheti yiba ditoko, ayi mvandi yiyazuka beni kibila kisa ba ko kiyeku kiluelu.

Mu mvu 1988, yiyiza ba advogado. Vayi mambu amomo mayiza tula kikundi kiama na Yave va kingela. Kukota ku faculdade, kulenda vanga mutu kuyinangika ayi kuyindula ti nandi lutidi kena bankaka. Elizabeth wutsadisa beni, nandi wutsadisa kubue ba kiphevi kimboti, dedi bo yiba ava kukota faculdade. Vavioka thangu yiwombo vayi malembe malembe, yitona kubue vutula kiphevi kiama. Minu yidi bivisa ti kuzaba mambu mawombo ma kikola matuadisanga ko mayangi mu luzingu. Vayi mayangi makiedika mankuizilanga mu kuba kikundi kifikama na Yave ayi dikabu diandi.

KUKAKIDILA AYI KUSIKIMISA ZITSANGU ZIMBOTI

Yibaka makani ma kubika faculdade ayi kutsikika thalu muingi kuludika biabioso bintombulu ku Beteli, ayi kukakidila kimvuka ki Yave mu zinzo zi lufundusu. Kubuela mioko kimvuka ki Yave kidi mu kukonzuka thinu, kikuthuadisanga beni mayangi kheti disi ko diambu diluelu kuvanga mawu. Dedi, va thonono mvu 1990, batumisa zikhomba badi mu dingumba dinkakidilanga zikhomba mu zinzo zi lufundusu muingi batuama ntuala mu makani ma kubika kubue dindanga zimbongo ava kuvana bilongulu bitu. Mu phila ayoyo, Zimbangi zi Yave bamvananga bilongulu mu bobo. Mawu madekula bisalu biwombo ku Beteli ayi mu kisalu ki kusamuna. Nati bubu, makani amomo ma tusadisanga tubika bakana mambu matedi kufuta ziphapu. Bawombo bayindula ti bo tubalula mambu amomo, buna tuisinkuiza bue baka zimbongo zifuana muingi kubasisanga bilongulu biwombo, ayi mu phila ayoyo bawombo basinkuiza zaba ko kiedika. Vayi masi ko mawu mamonika. Tona mu mvu 1990, thalu yi batu bakikinina kiedika ayi bayiza ba Mbangi yi Yave, yibuelama. Ayi bubu, bawombo badi luaku lu kutambula bidia biwombo bi kipheve mu khambu futa. Mu lusalusu lu Yave to tunnunganga kuvanga mawu. Zithuadusulu Yave katuvanaga mu nzila kisadi ki kuikama, zi kutsadisanga kuvisa ti makani moso kimvuka ki Yave kimbakanga muingi kubalula mambu, mantuadisanga ndandu yiwombo.—Esodu 15:2; Mat. 24:45.

Tununganga ko to mu zinzo zi lufundusu mu kuba zi advogado zimboti, vayi Khumbu zinkaka batuningisanga mvandi mu kibila ki mavanga mitu mamboti. Yimona mawu mu mvu 1998 bo zikhomba zitatu baba mu Dingumba Dintuadisi ayi bakazi bawu, balandikinina lukutukunu lu mavula lumfunu ku Cuba. Mavanga mawu mamboti ayi lukinzu baba monisanga, mavanga zimfumu zi luyalu kukikinina ti befu tukotanga ko mu mambu ma politika.

Khumbu zinkaka vantombuluanga kuededikisa mambu ku nzo lufundusu muingi kunuanina zitsangu zimboti. (Fil. 1:7) Dedi, mu mimvu miwombo zimfumu zi luyalu ku Europa ayi ku Corea do Sul, bankuikanga zikhomba kukota mu busodi. Mu kibila akiokio, nduka 18.000 di zikhomba ku Europa ayi kuvioka 19.000 di zikhomba ku Corea do Sul, baba tula mu buloku mu kibila ki kukhambu kota mu busodi.

Mu kilumbu sambuadi ngonda sambuadi mvu 2011, Nzo yi Lufundusu Yilutidi ku Europa, wubaka makani ma kuvana bisalu binkaka kuidi baboso bammanga kukota busodi mu kibila ki kilunzi kiawu. Bosi kuntuala, mu kilumbu 28 ngonda sambanu mvu 2018, nzo yi lufundusu ku Corea do Sul mvandi wubaka makani amomo. Boti zikhomba zitu kubunda mvandi matoko basa tatamana ko bakuikama, khanu mambu amomo masa monika ko.

Dingumba Dinkakidilanga zikhomba mu zinzo zi lufundusu ku kikhulutu kitu ayi mu zifiliali zioso mu nza yimvimba, badi mu kusala muingi kukakidila nsua tuidi wu kusadila Yave ayi kusamuna zitsangu zimboti. Tuidi beni mayangi kukadidila zikhomba bamviokila mu zinzo zi lufundusu. Kheti Khumbu zinkaka tunnunganga mu zinzo zi lufundusu voti ndamba, mavanga mitu mamboti mamvananga kimbangi kuidi mimfudisi, zimfumu zi luyalu ayi batu bankaka. (Mat. 10:18) Mimfundisi, zimfumu zi luyalu basi televisão ayi batu bankaka, bantanganga mambu tunsonikanga kuidi zinzo zi lufundusu mammonisanga kibila mbi tumbakilanga makani amomo, ayi bawombo badi mintima mikubama banlongukanga matedi Zimbangi zi Yave, ayi bankikininanga ti Yave, nandi tho yi malongi moso tunlonganga. Mu kibila akiokio, bawombo mu bawu bayiza ba Zimbangi zi Yave.

YAVE, MATONDO BENI

Mu 40 di mimvu yiba luaku lu kusala va kimueka na zifiliali ziwombo mu nza yimvimba, muingi kukakidila kisalu kitu mu zinzo zi lufundusu zilutidi. Yinzolanga beni zikhomba bansalanga yama mu dingumba dinkakidilanga zikhomba mu zinzo zi lufundusu ku kikhulutu kitu, ayi zikhomba zinkaka mu diodiawu dingumba mu nza yimvimba. Yave wu kutsakumunanga beni, ayi yidi luzingu lu mayangi bubu.

Elizabeth wu kutsadisanga beni mu kuvioka 45 di mimvu, kuba kuandi mu thangu yimboti ayi mu thangu ziphasi. Yikunzolanga beni kibila nandi wutsadisa kheti waba viokila mu kimbevu kingolo.

Tummonanga mu luzingu luitu ti tulendi nunga ko mambu maphasi mu mangolo mitu veka, vayi mu lusalusu lu Yave to. Dedi bo Davidi katuba, ‘Yave widi tho yi mangolo ma dikabu diandi.’ (Minku. 28:8) Bukiedika, ‘mvita widi wu Yave.’