Ba Lufiatu ti Yave wu Kuzolanga

1. Kibila mbi ngie wukivanina kuidi Yave? (Tala mvandi zifoto.)

Ngie wubaka makani ma kukivana kuidi Yave, kibila wutona kunzaba ayi kunzola. Diawu ngie wukanikisa kutula luzolo luandi vatheti mu luzingu luaku ayi ti wunkuiza tatamana kunzola mu ntim’aku woso, mu muel’aku woso, mu mayindu maku moso ayi mangolo maku moso. (Malaku 12:30) Tona tubaka makani amomo, luzolo luitu mu Yave lumbuelamanga. Diawu mutu na ku kukuvula: Ngie wunzolanga Yave? Ḿba mu lufiatu ngie wunkuiza tuba ngete. Minu yi kunzolanga kuvioka woso mutu voti kioso kiuma.”

2-3. Kibila mbi tufueti bela lufiatu ti Yave wu tu zolanga ayi mbi tunkuiza longuka mu dilongi adidi? (Yelemia 31:3)

² Buabu mutu na ku kukuvula: Ngie widi lufiatu ti Yave wu ku zolanga? Wunkuiza ba divuda mu kuyindula ti wisi ko wufuana muingi kutambula luzolo lu Yave? Khomba mueka yinkietu wuba ndionzukulu yiphasi wutuba: Minu yidi lufiatu ti yinzolanga Yave. Vayi yimbanga divuda boti Yave wu ku nzolanga. Vayi mbi Yave kammonanga mu kadika mutu mu befu?

³ Yave wuntomba tuba lufiatu ti nandi wu tu zolanga. (Tanga Yelemia 31:3.) Kibibila kimmonisa ti Yave nandi wu tutumisa, ayi bo tukivana kuidi nandi ayi tubotama, tutambula luzolo lukuikama lu Yave. Luzolo alolo luidi lungolo ayi lunkadidilanga, luawu lumvanganga Yave ku tutadila batu ba luvalu. (Mal. 3:17) Yave wuntomba muingi befu tuba lufiatu ti nandi wu tu zolanga. Mu lufiatu mvuala Polo wutuba: “Kibila yidi lufiatu ti ni kiuma kimueka kilendi nunga ko ku tutatula mu luzolo lu Nzambi. Kuba kuandi lufua, luzingu, zimbasi, minyadi, mambu ma thangu ayiyi, mambu mankuiza, mangolo, biuma bidi kuyilu, biuma bidi ku tsi, ni kioso kua kivangu kinkaka, kiala nunga ku tutatula mu luzolo Nzambi ka tumonisa mu nzila Mfumu’itu Yesu Klistu.” (Lom. 8:​38, 39) Mu dilongi adidi tunkuiza mona mbi tufueti vanga muingi kukindisa lufiatu luitu mu luzolo Yave ka tumonisanga ayi mbi binkuiza tusadisa kuvanga mawu.

KIBILA MBI TUFUETI BELA LUFIATU TI YAVE WU TU ZOLANGA.

4. Ntambu mbi satana kasadilanga muingi ku tubuisa ayi buidi tulenda nungina mitambu miandi?

⁴ Befu kuba lufiatu ti Yave wu tu zolanga, tunkuiza nunga kukindama mu mintambu mi Satana (Efe. 6:11) Satana wumvanganga mangolo mawombo muingi tubika kubue sadila Yave. Ntambu mueka kansadilanga widi ku tuvanga kuyindula ti Yave ka tu zolanga ko. Vayi tufueti tebukanga moyo ti Satana widi nkua luvunu. Ayi khumbu ziwombo wuntombanga ku tuvukumuna bo tuidi balebakana mu kibila ki mambu maphasi tuviokila kumbusa voti tumviokila bubu. (Zinga. 24:10) Satana widi buka khosi wuntombanga luaku muingi ku tubuisa. Vayi befu kutatamana kukindisa lufiatu luitu ti Yave wu tu zolanga, tunkuiza ba bakubama muingi kunuanisa satana ayi kununga mintambu miandi.—1 Pet. 5:​8, 9; Tia. 4:7.

5. Kibila mbi tufueti bela lufiatu ti Yave wu tu zolanga?

⁵ Befu kuba lufiatu ti Yave wu tu zolanga, tunkuiza luta kumfikama. Yave wu tuvanga muingi tumonisanga bankaka luzolo, ayi mvandi bankaka ba tumonisanga lozolo. Bo bankaka ba tuzola, befu mvitu tu kuba zolanga. Diawu bo tummona Yave ku tumonisa luzolo, befu mvitu tunkuiza tatamana kunzola. (1 Yoane 4:19). Kibibila kintuba: “Fikamanu Nzambi ayi nandi wala ku lufikama.” (Tia. 4:8) Vayi buidi tulenda kindisila lufiatu luitu ti Yave wu tu zolanga?

MBI BINKUIZA TUVANA LUFIATU TI YAVE WU TU ZOLANGA?

6. Mbi tulenda dinda mu nsambu muingi tuba lufiatu ti Yave wu tuzolanga?

⁶ Tatamana kusambila. (Luk. 18:1; Lom. 12:12) Sambila kadika kilumbu muingi Yave ka kusadisa kuvisa kibila mbi nandi ka kuzodilanga. Mutu widi mu kiunda kingolo, kalenda mona phasi kukikinina ti Yave wu kunzolanga. Vayi tebuka moyo ti Yave lutidi kena mintima mitu. (1 Yoane 3:​19, 20) Nandi wu tuzebi buboti ayi zebi mambu mbi kadika mutu kalenda nunga kuvanga. (1 Samu. 16:7; 2 Lusa. 6:30) Nandi wummonanga mamboti mitu kheti tununganga ko kumona mawu. Diawu, zibudila ntim’aku kuidi Yave ayi nkamba mabanza maku moso, ṅdinda ka kusadisa kuba lufiatu ti nandi wu kuzolanga. (Minku. 62:8) Bosi vanga mangolo ma kuzingila mu kithuadi na mambu bedinda mu nsambu, mu kuvanga mambu manlanda.

7-8. Buidi buku yi Minkunga yi tuvana lufiatu ti Yave wu tuzolanga?

⁷ Fiatila mu diambu di Nzambi. Yave wutuadisa minsoniki mi Kibibila muingi basudikisa ntindu mbi mutu nandi kadi. Ntinu Davidi wusonika ti Yave widi wufikama kuidi batu boso badi mintima mi khofakana. (Minku. 34:18) Bo tuidi mu kiunda, nandi wumbanga va khonzu’itu muingi ku tusadisa. Mu nkunga wunkaka Davidi wubue sonika: ‘Sueka matsuela mami mu kibasa kiaku.’ (Minku. 56:8) Nandi wu tuvuanga nkinza ayi wunsuekanga matsuela mitu voti wumonanga kibila ki tuvanganga kudila. Minkunga 139:​3, yintuba: ‘Ngie Yave zebi buboti zinzila ziama.’ Yave wummonanga zinzila zitu ayi wumvuanga nkinza mamboti tumvanganga. (Ebe. 6:10) Kibila mbi? Kibila nandi wumvuanga nkinza mangolo kadika mutu mu befu kamvanganga muingi kunkuangidika.a

⁸ Mu nzila matangu ma Kibibila makhindusulu Yave wu tukamba: “Yintomba mu zaba ti minu yi muzolanga beni, ayi yi muvuanga nkinza.” Vayi dedi bo tuma tubila kumbusa, Satana kantomba tuyindula ti Yave ka tuzolanga ko. Diawu ngie kuba divuda boti Yave wu kuzolanga, wukiyuvusa: Kuidi nani yinkuiza kikinina, kuidi Satana tata yi luvunu voti kuidi Yave Nzambi yi kiedika?—Yoane 8:44; Minku. 31:5.

9. Mbi Yave kakanikisa kuidi batu ba kunzolanga? (Esodu 20:​5, 6)

⁹ Yindula phila Yave kantadilanga batu ba kunzolanga. Mona mambu Mose kasonika matedi Yave. (Tanga Esodu 20:​5, 6.) Yave wukanikisa ti, wala tatamana kumonisa luzolo luandi lukuikama kuidi batu boso ba kunzolanga. Mawu ma tuvana lufiatu ti Nzambi’tu wala tatamana kuzola baboso ba kunzolanga. (Nehe. 1:5) Diawu, bo wuntomba kubaka bivisa ti Yave wu kuzolanga, wukiyuvusa, minu yinzolanga Yave? Bosi yindula mambu amama: Boti ngie wunzolanga Yave ayi widi mu kuvanga mangolo muingi kunkuangidika, buna ba lufiatu ti nandi wu kuzolanga beni. (Dani. 9:4; 1 Ko. 8:3) Mu bikuma binkaka tulenda tuba ti, ngie kuba lufiatu ti wunzolanga Yave, buna ba mvandi lufiatu ti nandi wu kuzolanga.

10-11. Buidi Yave kantombila tutadila nkhailu wu khudulu? (Ngalatia 2:20)

¹⁰ Yindula mu khudulu. Khudulu yi Yesu yidi mbonosono yilutidi yi luzolo Yave kadi mu batu. (Yoane 3:16) Vayi bukiedika ti Yesu wufuila mu kibila ki kadika mutu va ntoto? Ngete. Mona mambu mamonikina Mvuala Polo. Nandi wuvanga zinzimbala ziwombo ava kuba nlandikini wu Yesu ayi waba tatamana kunuana nzingu ayi zinzimbala ziandi. (Lom. 7:​24, 25; 1 Ti. 1:​12-14) Vayi nandi wutona kutadila khudulu yi Yesu banga nkhailu Yave kamvana. (Tanga Ngalatia 2:20.) Yave nandi wutuadisa mvuala Polo muingi kasonika mambu mammonikina. Ayi mambu moso masonama mu Kibibila masonimina muingi ku tulonga. (Lom. 15:4) Mambu mvuala Polo kasonika mamonisa ti, Yave wuntomba muingi tuba lufiatu ti nandi wuvana khudulu kuidi kadika mutu mu befu. Bo tuntadila nkhailu wu khudulu mu mu phila ayoyo, tunkindisanga lufiatu luitu ti Yave wu tuzolanga.

¹¹ Tumvutulanga matondo kuidi Yave mu kufila muan’andi Yesu Klistu muingi kafuila mu kibila kitu. Vayi vadi kibila kinkaka Yesu kayizila va ntoto. Nandi wuyizila muingi ku tulonga kiedika matedi Nzambi. (Yoane 18:37) Yimueka mu kiedika akikio yidi, ti Yave wu tuzolanga.

YESU WU TUSADISA KUBA LUFIATU TI YAVE WU TUZOLANGA

12. Kibila mbi tulenda fiatila mu mambu Yesu katuba matedi Yave?

¹² Bo kaba va ntoto, Yesu wuzabikisa kuidi batu phila mutu Yave kadi. (Luka 10:22) Befu tuidi bibila biwombo muingi kufiatila mu mambu Yesu katuba matedi Yave. Nandi wuzinga mimvu miwombo va kimueka na tat’andi Yave. (Kolo. 1:15) Ayi nandi wumona mu phila Yave kanzodilanga bisadi biandi bikuikama. Buidi Yesu kasadisila batu bafiatila mu luzolo lu Yave?

13. Buidi Yesu kantombila tutadilanga Yave?

¹³ Yesu wuntomba muingi tutadila Yave mu phila nandi ka kuntadilanga. Mu zibuku zintubila luzingu lu luandi, Yesu wutedila Yave tata kuvioka 160 di zikhumbu. Ayi bo kaba yoluka na minlandikini miandi, nandi wusadila bikuma dedi tat’inu, voti tat’inu widi ku diyilu. (Mat. 5:16; 6:26) Nota yidi mu Matai 5:16 yintuba: “Bisadi bi Nzambi baba sadilanga zithangununu muingi kutedila Yave, dedi Nkua ngolo zioso, Nzambi lutidi zangama ayi mvangi wu biuma bioso.” Vayi Yesu waba sadilanga kikuma ‘tata’ muingi kumonisa kikundi kifikama Nzambi kadi na bisadi biandi, ayi waba tomba muingi befu boso, tutadila Yave banga tat’itu yi luzolo wunzolanga bana bandi. Mona bifuani biodi Yesu kasadila kikuma ‘tata.’

14. Buidi Yesu kamonisina ti kadika mutu mu befu widi luvalu va meso ma tat’itu yi diyilu? (Matai 10:​29-31) (Tala mvandi fikula.)

¹⁴ Mona mambu Yesu katuba masonama mu Matai 10:​29-31. (Tanga.) Makuanga zidi zinuni ziluelu zimmonisanga ko luzolo, ayi zisadilanga ko Yave. Vayi kheti bobo, tat’itu ku diyilu wunzabanga bo dikuanga dimueka dimbua va ntoto. Voti nandi wu zivuanga nkiza. Tuidi lufiatu ti nandi wunluta kebanga kadika mutu wu kunsadilanga mu lukuikumunu ayi mu luzolo. Ayi mvandi bo Yesu katuba ti nandi zebi thalu yi milengi mioso midi mu mitu mitu, nota de estudo mu lutangu 30 yintuba: “Mu kuzaba thalu yi minlengi yidi mu mintu mitu, Yave wumonisa ti wumvuanga nkinza kadika mutu mu befu. Bukiedika, Yesu wuntomba muingi tuba lufiatu ti kadika mutu mu befu, widi luvalu va meso ma tat’itu ku diyilu.

15. Mbi mambu Yesu katuba mu Yoane 6:44 ma tulonga matedi Yave?

¹⁵ Mona phila yinkaka Yesu kasadila kikuma ‘tata’. (Tanga Yoane 6:44.) Tat’itu yi diyilu wu tutumisa mu kiedika, kibila nandi wumona mamboti mu ntim’itu. (Mavanga 13:48) Nota de estudo mu Yoane 6:44; yintuba ti mu lutangu alolo, Yesu waba sadila mambu Yelemia kasonika mu lutangu lu ntu diambu dibongulu dilongi adidi. Minu Yave yi kutumisa mu luzolo luama lukuikama voti yitatamana kumonisa luzolo luama lukuikama.(Yele. 31:3; dedikisa na Hosea 11:4) Yindula mbi mawu masundula. Tat’itu yi diyilu mu luzolo, wuntatamana kumona mamboti mu kadika mutu mu befu.

16. (a) Mbi Yesu kaba tomba kutuba mu kutedila Yave tat’itu ayi kibila mbi tufueti kikinina mu mambu nandi katuba? (b)Buidi ngie wulenda kindisila lufiatu luaku ti Yave widi tata wufuana? (Tala Quadro, Tata Wufuana Kuidi Befu Boso)

¹⁶ Bo katedila Yave tat’itu, Yesu waba tomba kutuba: “Yave widi tat’itu befu boso, bika to tat’ama.” Ayi yidi lufiatu ti nandi wu ku muzolanga ayi wu ku muvuanga nkinza. Diawu, ngie kuba divuda boti Yave wu kuzolonga, wukiyuvusa: Yifueti fiatila mambu muana wu Yave no wunzebi buboti ka kukhamba matedi Yave?—1 Petelo 2:22.

TATAMANA KUKINDISA LUFIATU LUAKU TI YAVE WU KUZOLANGA

17. Kibila mbi tufueti kindisila lufiatu luitu ti Yave wu tuzolanga?

¹⁷ Tufueti tatamana kukindisa lufiatu luitu ti Yave wu tuzolanga. Dedi bo tuma tubila, mben’itu Satana, wunkuiza tatamana kuvanga mamoso kannunga muingi ku tuvanga kubika kubue sadila Yave. Nandi wala tatamana kutula mintambu miandi muingi tuba divuda boti Yave wu tuzolanga. Tulendi bika ko Satana kanunga.—Yobi 27:5.

18. Buidi ngie wulenda kindisila lufiatu luaku ti Yave wu kuzolanga?

¹⁸ Muingi tukindisa lufiatu luitu mu luzolo Yave kadi mu befu, tufueti tatamana kusambila ayi kundinda lusadusu muingi ka tusadisa kuvisa kibila mbi nandi ka tuzodilanga. Yindula mu matangu ma Kibibila mammonisa luzolo luandi, ayi mvandi mu ziphila nandi ka tumonisinanga luzolo. Vanga mangolo muingi kutadila nkhailu wu khudulu banga nkhailu Yave ka kuvana. Ayi ba lufiatu ti Yave widi tata yi luzolo dedi bo Yesu katubila. Bosi mutu na ku kukuvula: Ngie widi lufiatu ti Yave wu kuzolanga? Ngie wunkuiza mvutudila, ‘ngete’ minu yimvanganga mamoso yinnunga kadika kilumbu muingi yimonisa ti minu yi kunzolanga.