DILONGI 36
NKUNGA 103 Bakulutu ba Kimvuka—Nkhayilu wu Yave
“Tela Bakulutu ba Kimvuka”
“Bika nandi katela bakulutu ba kimvuka.”—TIA. 5:14.
MAMBU TUENLONGUKA
Tuemmona buidi bakulutu ba kimvuka balenda tusadisa mu kiphevi.
1. Buidi Yave kamonisina ti wumvuanga nkinza mameme mandi?
YAVE wumvuanga nkinza mameme mandi. Nandi wuba sumba mu menga ma muan’andi Yesu Klistu. Ayi wusola bakulutu ba kimvuka muingi bakeba mameme mandi. (Mav. 20:28) Nzambi wuntomba muingi bakeba mameme mandi mu luzolo. Mu thuadusulu yi Yesu Klistu, bakulutu ba kimvuka bankindisanga ayi bankebanga mu kiphevi mameme ma Yave.—Yesa. 32:1, 2.
2. Banani Yave kanluta kebilanga? (Yehezekeli 34:15, 16)
2 Yave wunkebanga mameme mandi moso, vayi wunluta kebanga mameme badi mu kutovuka. Mu nzila bakulutu ba kimvuka, nandi wunsadisanga bo badi mu kutovuka mu kiphevi. (Tanga Yehezekeli 34:15, 16.) Vayi mvandi, nandi wuntomba muingi tudinda lusalusu lu bakulutu ba kimvuka va kutombulu. Tufueti dinda mu nsambu muingi Yave ka tuvana mangolo, vayi mvandi tufueti tomba lusalusu lu bakulutu ba kimvuka kibila bawu badi “minsungi ayi minlongisi” mi kimvuka.—Efe. 4:11, 12.
3. Mambu mbi tuenlonguka mu dilongi adidi?
3 Mu dilongi adidi, tuemfiongunina buidi Yave kansadilanga bakulutu ba kimvuka muingi ku tusadisa mu kiphevi. Mvandi tunkuiza bakula mimvutu mi biuvu abibi: Thangu mbi tufueti tomba lusalusu lu bakulutu ba kimvuka? Kibila mbi tufueti vangila mawu? Ayi buidi bawu balenda tusadisila? Kheti tuisimviokila ko mu mambu maphasi, kubakula mvutu wu biuvu abiobio, kunkuiza buela phuil’itu yi kuvutudila Yave matondo mu ku tuvana bakulutu ba kimvuka muingi ku tusadisa.
THANGU MBI TUFUETI “TELA BAKULUTU BA KIMVUKA”?
4. Kibila mbi tulenda tuba ti Tiagu 5:14-16, 19, 20 yintubila matedi mbela yi kiphevi? (Tala mvandi zifoto.)
4 Matedi bakulutu ba kimvuka, nlandikini wu Yesu Tiagu wutuba: “Vadi mutu widi mu kubela va khat’inu? Bika nandi katela bakulutu ba kimvuka.” (Tanga Tiagu 5:14-16, 19, 20.) Matangu amomo mammonisa ti Tiagu waba tubila matedi mbela yi kiphevi. Dedi, nandi wuvana thuadusulu kuidi mutu widi mbela yi kiphevi muingi katomba lusalusu lu bakulutu ba kimvuka, kubika kuandi minfelimi. Kibila muingi kabeluka, kafueti tambula nlemvu wu masumu mandi. Phila mutu kalenda tombila lusalusu lu kiphevi muingi kabeluka, yidi yidedakana na phila mutu widi mu kubela mu kinsuni kafueti tomba lusalusu. Bo tuidi mu kubela mu kinsuni, tuntombanga minfelimi, tunsudikisanga mambu ma tutatisa ayi tunlandakananga zithuadusulu zi minfelimi. Bobuawu mvandi, bo tuidi mu kubela mu kiphevi, tunkolukanga na bakulutu ba kimvuka, tunzabikisanga disumu tu bevola ayi tunlandakananga malongi mabongulu mu Kibibila ba tuvananga.
Bo tuidi mu kubela mu kinsuni, tuntombanga lusalusu lu minfelimi. Bobuawu mvandi, befu kuba mbela yi kiphevi, tufueti tomba lusalusu lu bakulutu ba kimvuka (Tala lutangu 4)
5. Biuvu mbi bilenda tusadisa kuzaba boti tuentona kulebakana mu kiphevi?
5 Mambu madi masonama mu kapu 5 yi buku yi Tiagu, ma tukindisa tutomba lusalusu lu bakulutu ba kimvuka befu kutona kulebakana mu kiphevi. Yidi mbonosono yi nduenga kufika tomba lusalusu lu bakulutu ba kimvuka muingi tutatamana kuba kikundi kimboti na Yave Nzambi. Vayi, vantombulu kukikulula muingi kuvanga mawu. Kibibila ki tulubula tubika kuyivuna mu kuyindula ti tuidi kiphevi kimboti. (Tia. 1:22) Bawombo mu baklistu batheti mu kimvuka ki Sardes, bayimuena ti baba kiphevi kimboti, vayi Yesu wuba semba kibila bawu baba kuyivuna. (Nzai. 3:1, 2) Phila yimueka tulenda fiongunina boti kiphevi kitu kidi kimboti, yidi mu kudedikisa boti kifuza tuba mu kisalu ki Yave mimvu kumbusa yikhidi voti kidi mu kudekuka. (Nzai. 2:4, 5) Tulenda kuyikuvusa: Bukiedika ti mayangi mama ma kutanga Kibibila kadika kilumbu ayi kufiongunina mu mawu madekuka? Yinkubikanga buboti zikhutukunu ayi yinlandakananga ziawu? Kifuza kiama mu kisalu ki kusamuna kidekuka? Yinluta yindulanga matedi zimbongo ayi zinyenzi zi kinsuni? Befu kubakula ti vadi vama tuidi balebakana mu biuvu abiobio, buna tuentona kulebakana mu kiphevi. Befu kumona ti tuidi balebakana mu kiphevi ayi tuisinnunga ko kusadila minsua mi kibibila muingi tubaka mangolo ma kukindama, tufueti dinda lusalusu lu bakulutu ba kimvuka.
6. Mbi batu bavola masumu mangolo bafueti vanga?
6 Mutu bevola disumu dingolo dilenda mvanga bambotula mu kimvuka, kafueti tomba lusalusu lu bakulutu ba kimvuka. (1 Ko. 5:11-13) Nandi kafueti vanga mawu muingi bakulutu ba kimvuka bansadisa kuvutula kikundi kiandi na Yave. Muingi katambula nlemvu wu masumu mandi mu nzila khudulu, nandi kafueti vanga mambu mammonisa ti benyongina masumu mandi. (Mav. 26:20) Mambu amomo mansundula mvandi, kutela bakulutu ba kimvuka boti tube vola disumu dingolo.
7. Banani bafueti tomba lusalusu lu bakulutu ba kimvuka?
7 Bakulutu ba kimvuka basadisanga ko to batu bavola masumu mangolo, vayi mvandi bansadisanga bo bantona kulebakana mu kiphevi. (Mav. 20:35) Dedi, ḿba ngie widi mu kukuazuka kibila widi mu kunuana na mayindu mambi. Mambu amomo malenda buelama, bulutidi boti ava wuzaba kiedika, ngie wuba kifu ki kunuanga zitsunga zingolo, kutala pornografia voti zifilme zimmonisa batu bambundasana nyitu, voti kuvanga kitsuza. Vayi vasintombulu ko kunuana mu mambu amomo ngie veka. Wulenda koluka na bakulutu ba kimvuka ayi bawu bankuiza kusadisa mu ku kuvana malongi mankuiza kusadisa kuyangidika Yave ayi wubika tuadusu mu ziphuila ayi mu mayindu mambi. (Mpovi 4:12) Ngie kuba mu kiunda, bakulutu ba kimvuka balenda kusadisa kumona ti ngie wumvuanga nkinza kikundi kiaku na Yave ayi widi mu kuvanga mangolo muingi kumfiatila.—1 Ko. 10:12.
8. Mu mambu mbi vasintombulu ko kutela bakulutu ba kimvuka?
8 Vasintombulu ko kutela bakulutu ba kimvuka mu mambu moso. Yindula boti betuba diambu di belueka ntima wu khomba mueka, ayi wufuemisa khomba beni. Mu mambu amomo, vasintombulu ko kutela bakulutu ba kimvuka, vayi kusadila malongi Yesu kavana matedi kudedikisa mambu na khomba. (Mat. 5:23, 24) Wulenda fiongunina mu bilongulu bitu zikhadulu dedi kulembama, mvibudulu ayi kukiyala, muingi kumonisa ziawu bo ntindu mambu amomo ma kumonika. Vayi boti wisinnunga ko kudedikisa mambu na khomba beni, ngie wulenda dinda lusalusu lu bakulutu ba kimvuka. Mu nkanda kasonikina kuidi baklistu ku Filipi, mvuala Polo wudinda kuidi khomba mueka muingi kasadisa Evodia ayi Sintike ba dedikisa mambu baba. Bobuawu mvandi bubu, bakulutu ba kimvuka mvandi balenda sadisa mu ntindu mambu amomo.—Fil. 4:2, 3.
KIBILA MBI TUFUETI TELA BAKULUTU BA KIMVUKA?
9. Kibila mbi tulendi bika ko muingi zitsoni zi tutula nkaku kutomba lusalusu lu bakulutu ba kimvuka? (Zingana 28:13)
9 Vantombulu kiminu ayi kibakala muingi kutela bakulutu ba kimvuka, befu kuvola disumu dingolo voti kutona kulebakana mu kiphevi. Tulendi bika ko zitsoni zi tutula nkaku kudinda lusalusu lu bakulutu ba kimvuka. Kibila mbi? Kibila befu kuvanga mawu, tunkuiza monisa ti tumfiatilanga mu Yave ayi mu zithuadusulu ka tuvananga muingi tuba kiphevi kimboti. Tuntombanga lusalusu luandi, mu thangu tuidi mu kubua mu kiphevi. (Minku. 94:18) Ayi befu kuvola disumu, tulenda tambula nlemvu wu Nzambi befu kufungula masumu mitu ayi kubika kubue vutukila zioziawu zinzimbala.—Tanga Zingana 28:13.
10. Mbi bilenda monika befu kusueka masumu mitu?
10 Tumbakanga ndandu yiwombo bo tuntombanga lusalusu lu bakulutu ba kimvuka. Vayi kusueka masumu kuntuadisanga ziphasi ziwombo. Bo Ntinu Davidi kasueka masumu mandi, nandi wutovuka mu kiphevi, mu mayindu ayi mu kinsuni. (Minku. 32:3-5) Dedi mbela yi kinsuni, mbela yi kiphevi yilenda buelama befu khambu tomba lusalusu lufuana. Yave zebi mawu, diawu ka tukindisa muingi tudedikisa mambu ayi nandi mu nzila batu kasola muingi ku tusadisa.—Yesa. 1:5, 6, 18.
11. Ziphasi mbi tulenda tuadisa kuidi bankaka, befu kusueka masumu mangolo?
11 Befu kusueka masumu mangolo, tulenda tuadisa ziphasi kuidi bankaka. Tulenda tula nkaku pheyi yinlongo yituadisa ndembama mu kimvuka. (Efe. 4:30) Bobuawu mvandi, befu kubakula ti vadi khomba mu kimvuka bevola disumu dingolo, tufueti kunkindisa kayoluka na bakulutu ba kimvuka. a Kusueka masumu mangolo ma bankaka, malenda ku tuvanga kuba foto mu mawu. (Levi. 5:1) Luzolo tuidi mu Yave lufueti ku tuvanga kutuba kiedika. Mu phila ayoyo, tunkuiza sadisa kimvuka kitatamana kidiodila, ayi kusadisa batu bavola masumu mangolo kuvutuka kubue ba kikundi kimboti na Yave.
BUIDI BAKULUTU BA KIMVUKA BA TUSADISILANGA?
12. Buidi bakulutu ba kimvuka bansadisilanga bo badi balebakana mu kiphevi?
12 Bakulutu ba kimvuka badi kiyeku ki kusadisa bo badi balebakana mu kiphevi. (1 Te. 5:14) Ngie kuvola disumu, bawu balenda kuvana biuvu mu lukinzu muingi bavisa mayindu ayi mabanza maku. (Zinga. 20:5) Ngie wulenda basadisa mu ku bazabikisa kiedika kheti didi diambu diphasi kuvanga mawu mu kibila ki phila wuyonzukila, zikhadulu ziaku, zitsoni voti mambu mankaka malenda kutula nkaku. Bika kumona boma mu mambu wunkuiza tuba. (Yobi 6:3) Bakulutu ba kimvuka bankuiza vanga mangolo muingi kukuwa mu mvibudulu ayi kuvisa mambu moso widi mu kuviokila ava ba kuvana malongi. (Zinga. 18:13) Bawu bazebi ti kukeba mameme ma Yave, vantombulu thangu, diawu basinkuiza dedikisa ko mambu beni mu khumbu yitheti munkuiza yoluka.
13. Buidi bakulutu ba kimvuka balenda ku tusadisila mu nzila nsambu ayi Kibibila? (Tala mvandi foto.)
13 Bo wuntomba lusalusu lu bakulutu ba kimvuka, bawu bankuiza vanga mangolo muingi ku kusadisa kubika kukivana beni foto. Bawu bala sambila yaku, ayi mvandi bankuiza ku kindisa mu kusadila diambu di Nzambi. (Tia. 5:14-16) Mu nzila Kibibila, bakulutu ba kimvuka balenda kubomba, kukindisa ayi ku kusadisa kuvutuka kubue ba kikundi kimboti na Yave. (Yesa. 57:18) Zithuadusulu bankuiza kuvana, zinkuiza kusadisa kubaka makani ma kutatamana kuvanga mambu masulama. Mu nzila zithuadusulu beni, ngie wulenda kuwa Yave ku kukamba: ‘Ayiyi yawu nzila, diatila muawu.’—Yesa. 30:21.
Bakulutu ba kimvuka bansadilanga Kibibila muingi kubomba ayi kuvumbika bo badi mu kubela mu kiphevi (Tala lutangu 13-14)
14. Dedi bummonisina Ngalatia 6:1, buidi bakulutu ba kimvuka bansadisanga khomba wumvanga diambu di mbi mu “khambu zaba”? (Tala mvandi foto.)
14 Tanga Ngalatia 6:1. Baklistu bamvanga diambu dimbi mu khambu zaba, basindiata ko mu kithuadi na minsua mi Nzambi. Kuvanga diambu dimbi mu khambu zaba, kulenda sundula kubika kubue tadila mambu mu phila yifuana, voti kulevula minsiku mi Nzambi. Mu luzolo, bakulutu ba kimvuka bankuiza sadisa mutu beni kavutuka mu nzila vayi mu phila yivumbama. Kikuma ki kingeleko basekudila “kuvutuka mu nzila,” mvandi kilenda sundula “kuludika.” Dedi bo mfelimi wupisuka kamvanganga mangolo muigi kuludika mvesi wu mutu mu khambu kumbuela ziphasi, bakulutu ba kimvuka bamvanganga mangolo muingi kubelusa mbela yi kiphevi mu khambu buela ziphasi kuidi khomba wuvola disumu beni. Vayi diambu di Nzambi mvandi di balubula, baba keba keba muingi babika kuvukumuka. Bo bansadisa khomba kuludika nzila, bakulutu ba kimvuka bamvisanga ti bawu mvawu basi ko bavedila ayi mvawu bamvanganga zinzimbala. Bawu ba kikululanga, bantubanga kiedika ayi bamvanganga mangolo muingi kumonisa mamboti.—1 Pet. 3:8.
15. Mbi tulenda vanga befu kuviokila mu mambu maphasi?
15 Tulenda fiatila mu bakulutu ba kimvuka. Bawu batambula khubumunu muingi kubika zabikisa mambu mangana kuidi batu bakhambulu nsua wu kuzaba. Bawu bamvananga malongi mabongulu mu Kibibila kubika kuandi mayindu mawu, ayi badi bakubama muingi ku tusadisa kudekula mambu maphasi tuidi mu kuviokila. (Zinga. 11:13; Nga. 6:2) Phunga ayi zikhadulu zi kadika nkulutu wu kimvuka zidi ziviakana. Vayi tulenda yoluka na woso kua nkulutu wu kimvuka kitu, mambu tuidi mu kuviokila. Vayi tuisintomba ko kue dindanga lusalusu kuidi bakulutu bawombo mu kimvuka nati tunkuiza dengana nkulutu wunkuiza tukamba mambu tuntomba kukuwa. Kibila befu kuvanga mawu, tunkuiza ba dedi batu bantomba to kukuwa mambu batidi. (2 Ti. 4:3) Bo tunzabikisa mambu kuidi nkulutu mueka wu kimvuka, nandi kalenda tu kuvula boti tu besolula na bakulutu bankaka matedi mambu beni ayi malongi mbi ba tuvana. Mu kukikulula, nandi kalenda dinda lusalusu kuidi nkulutu wunkaka wu kimvuka.—Zinga. 13:10.
MAKANI MA KADIKA MUTU
16. Makani mbi kadika mutu mu befu kafueti baka?
16 Kheti bakulutu ba kimvuka bankebanga mameme ma Yave, bawu babakanga ko makani va mvingi wu mutu wunkaka. Madi makani ma kadika mutu mu befu, kusola kuzingila mu kithuadi na minsua mi Nzambi. Befu veka tuidi foto mu mambu tuntuba ayi tumvanga vantuala Nzambi. Mu lusalusu lu Yave, tulenda nunga mambu moso ma tutula nkaku kutatamana bakuikama. (Lom. 14:12) Diawu, bakulutu ba kimvuka ba tubakilanga ko makani, vayi ba tusadisanga kuyindula mu phila Yave kanyindudilanga mu kusadila Kibibila. Befu kulandakana malongi mawu mabongulu mu Kibibila, tulenda kubika kilunzi kitu muingi tubaka makani ma nduenga.—Ebe. 5:14.
17. Mbi tufueti ba bakubama muingi kuvanga?
17 Didi luaku lunneni kuba mu khati mameme ma Yave. Yave wufila Nsungi wumboti Yesu, muingi kafuila mu kibila kitu ayi ku tuvana luzingu lu mvu ka mvu. (Yoa. 10:11) Ayi mu nzila bakulutu ba kimvuka, Yave wundukisanga mambu kakanikisa bo katuba: ‘Yala mu vana minsungi bala vangila luzolo luama, ayi bawu bala mu dikila mu nzayilu ayi phisulu.’ (Yele. 3:15) Befu kuba balebakana mu kiphevi, tulendi ba ko boma bu kutela bakulutu ba kimvuka muingi ba tusadisa. Makani mitu mafueti ba, kubaka ndandu mu nkhailu awowo Yave ka tuvana muingi ku tusadisa.
NKUNGA 31 Diatanga na Nzambi!
a Boti mutu bevanga disumu ayi kasinzabikisa ko mawu kuidi bakulutu ba kimvuka, ngie wulenda nkindisa kayoluka na bakulutu ba kimvuka. Boti mutu beni kheti bobo kasinzabikisa ko kuidi bakulutu mambu ka bevanga, lukuikumunu luaku mu Yave lunkuiza kuvanga kuzabikisa mawu kuidi bakulutu ba kimvuka.