DILONGI 37
NKUNGA 114 “Banga Mvibudulu”
Buidi bu Kunungina Mambu Makhambulu Masonga
“Nandi waba telimina busonga vayi mammonikina mambu makhambu masonga.”—YESA. 5:7.
MAMBU TUANLONGUKA
Tuemmona buidi kifuani ki Yesu kilenda tusadisila kununga mambu makhambulu masonga mu phila yinkuangidika Yave.
1-2. Mbi batu bankaka bamvanganga bo bammona mambu makhambulu masonga, ayi biuvu mbi tufueti kuyikuvusa?
TUIDI mu kuzingila mu nza yiwedi mambi. Batu bamviokilanga mu mambu mawombo makhambulu masonga mu kibila ki kukhambu mbakulu, tsi kabutukila, ayi nkanda wu nyitu. Bawombo bamviokilanga mu mambu makhambulu masonga kuidi basi lungoso ayi kuidi basi pulitika. Mambu amomo ma tutatisanga beni.
2 Tulendi kuituka ko kumona bawombo mu nganzi mu kibila ki mambu mawombo makhambulu masonga mamonikanga va nza. Befu boso tuntomba kuzingila mu nza yidi nsika, yo ba tuvangila mambu masonga. Muingi kumanisa mambu makhambulu masonga, bawombo bankotanga mu mangumba babalukila luyalu. Bankaka bambuelanga mioko zimfumu zi pulitika bakanikisanga kumanisa mambu moso makhambulu masonga. Vayi mu kuba baklistu, befu tuzebi ti tulendi kota ko mu mambu ma nza, kibila Kintinu ki Nzambi kiawu to kiala manisa mambu moso makhambulu masonga. (Yoane 17:16) Vayi kheti bobo, Khumbu zikanka tumbanga mu kiunda ayi mu nganzi mu kumona batu bamviokila mu mambu makhambulu masonga. Diawu tulenda kuyikuvusa: Buidi yilenda nungina mambu amomo? Ayi vadi diambu yilenda vanga bubu? Muingi kubaka mvutu wu biuvu abiobio, tuemmona buidi Yave ayi Yesu bantadilanga mambu makhambulu masonga.
YAVE AYI YESU BANLENDANGA MAMBU MAKHAMBULU MASONGA
3. Kibila mbi mambu makhambulu masonga ma tutatisilanga? (Yesaya 5:7)
3 Kibibila kimonisa kibila mbi mambu makhambulu masonga ma tutatisilanga. Kiawu kinsudikisa ti Yave wu tuvangila mu kifuani kiandi ayi nandi wunzolanga busonga. (Minku. 33:5; Ngene. 1:26) Nandi kavanganga ko mambu makhambulu masonga ayi mvandi kazolanga ko bo kammona batu kuvanga mambu makhambulu masonga. (Deute. 32:3, 4; Mika 6:8; Zaka. 7:9) Dedi, mu thangu ḿbikudi Yesaya, Yave wuyuwa bidilu bi kiunda bi basi Isaeli, baba ku bavangila mambu makhambulu masonga. (Tanga Yesaya 5:7.) Yave wuba kula mu kufundisa kumbu ziwombo baboso baba levula minsua miandi ayi baba tovulanga dikabu diandi.—Yesa. 5:5, 13
4. Buidi mambu madi mu Malaku mammonisa ti Yesu wunlendanga mambu makhambulu masonga? (Tala fikula.)
4 Dedi Yave, Yesu mvandi wunlendanga mambu makhambulu masonga. Kilumbu kimueka bo kaba mu kisalu ki kusamuna, nandi wudengana dibakala dimueka wuba koko kusioka. Yesu wummona kiadi ayi wunsadisa. Vayi zimfumu zi binganga baba mavanga mambi basa zola ko mawu. Bawu baba luta vuanga nkinza mayindu mawu makhambulu nguizani na misiku mi Nzambi, kena kusadisa mutu waba tovuka. Buidi Yesu kamuena mambu amomo? Nandi wuba mu kiunda mu kumona ntima wukhambulu kiadi bawu baba.—Mala. 3:1-6
Zimfumu zi binganga zi basi Yuda, babasa monanga ko kiadi batu baba tovuka, vayi Yesu waba monanga kiadi batu abobo (Tala lutangu 4)
5. Mbi tufueti tebukanga moyo befu kuba mu nganzi mu kibila ki mambu makhambulu masonga?
5 Yave ayi Yesu bambanga mu nganzi bo bammona mambu makhambulu masonga. Diawu disi ko diambu dimbi befu mvitu kubanga mu nganzi. (Efe. 4:26 Tala nota de estudo mu kikuma ‘Fiquem irados’) Vayi tufueti tebukanga moyo ti befu kuba mu nganzi kheti tuidi bibila, tuisinkuiza ludika ko mambu makhambulu masonga. Vayi kutatamana mu nganzi kulenda tutuadisa ziphasi mu mayindu ayi mu kinsuni. (Minku. 37:1, 8; Tia. 1:20) Buidi tulenda nungina mambu makhambulu masonga? Tulenda longuka mambu mawombo mu kulandakana kifuani ki Yesu.
BUIDI YESU KANUNGINA MAMBU MAKHAMBULU MASONGA?
6. Mambu mbi makhambulu masonga Yesu kamona bo kaba va ntoto? (Tala fikula.)
6 Yesu wumona mambu makhambulu masonga bo kaba va ntoto. Nandi wumona zimfumu zi binganga kukuamisa batu. (Mat. 23:2-4) Nandi wumona zimfumu zi luyalu zi basi Loma kutuadisa batu mu makhema. Bawombo mu basi Yuda baba tomba kubalukila luyalu lu basi Loma. Ayi bawombo baba bakubama muingi kunuana, vayi Yesu kasa kota ko mu mambu amomo ayi kasa buela ko mioko ni kheti mu mayindu. Bo kazaba ti batu baba tomba kumbieka ntinu, nandi wuba tatuka.—Yoane 6:15.
Yesu kasa kota ko mu mangumba ma pulitika yiba mu thangu’andi (Tala lutangu 6)
7-8. Bo kaba va ntoto, kibila mbi Yesu kasa manisina ko mambu makhambulu masonga? (Yoane 18:36)
7 Bo kaba va ntoto, Yesu kasa buela ko mioko mangumba ma pulitika muingi kumanisa mambu makhambulu masonga. Kibila mbi? Kibila nandi wuzaba ti batu basi ko nsua ayi mangolo muingi kuyituadisa baveka. (Minku. 146:3; Yele. 10:23) Mvandi batu balendi nunga ko kumanisa mambu makhambulu masonga. Nza yidi mu thuadusu yi Satana nkua makhema ayi mvondi, no wuntuadisanga mambu moso makhambulu masonga. (Yoane 8:44; Efe. 2:2) Ayi mu kuba batu ba masumu, tulendi nunga ko kumanisa mambu makhambulu masonga.—Mpovi 7:20.
8 Yesu wuzaba ti Kintinu ki Nzambi kiawu to kiala manisa mambu moso makhambulu masonga. Diawu kasadila thangu’andi ayi mangolo mandi muingi “kusamuna zitsangu zimboti zi Kintinu ki Nzambi.” (Luka 8:1) Nandi wubomba bo baba phuila yi mambu masonga mu ku bazabikisa ti, mambu moso makhambulu masonga mala mana. (Mat. 5:6 tala nota do estudo mu Luka 18:7, 8) Vasi ko mangumba ma batu malenda manisa mambu makhambulu masonga, vayi Kintinu ki Nzambi kiawu to kiala vanga mawu, kibila kiawu kisi ko “kithuadi na nza ayiyi.”—Tanga Yoane 18:36.
LANDAKANA KIFUANI KI YESU BO WUMVIOKILA MU MAMBU MAKHAMBULU MASONGA
9. Mbi bi kuvana lufiatu ti Kintinu ki Nzambi kiawu to kiala manisa mambu makhambulu masonga?
9 Bubu tunluta monanga mambu makhambulu masonga kuvioka mo Yesu kamona bo kaba va ntoto. Vayi tho yi mambu moso makhambulu masonga mu bilumbu abibi bitsuka, yidi Satana ayi batu nandi kantuadisanga. (2 Ti. 3:1-5, 13; Nzai. 12:12) Dedi Yesu, befu tuzebi ti Kintinu ki Yave kiawu to kiala manisa mambu moso makhambulu masonga. Befu tumbuelanga mioko Kintinu ki Nzambi, diawu tuisi ko kithuadi na mangumba ma batu bantomba kumanisa mambu makhambulu masonga. Tala kifuani ki yaya Stacy.a Ava katona kulonguka kiedika, nandi waba buelanga mioko mangumba ma batu baba tomba kumanisa mambu makhambulu masonga. Vayi nandi wuba divuda, boti mambu kaba vanganga maba masulama. Nandi wutuba: “Bo yaba banga na mangumba baba balukila luyalu minu yaba kuyikuvusa boti yidi mu kuvanga mambu masulama, vayi bubu yizebi ti yidi mu kuvanga mambu masulama kibila yimbuelanga mioko Kintinu ki Nzambi. Yizebi ti Yave wala nuanina baboso bamviokilanga mu mambu makhambulu masonga.”—Minku. 72:1, 4.
10. Dedi bummonisina Matai 5:43-48, kibila mbi tuisi ko kithuadi na mamgumba bantomba kumanisa mambu makhambulu masonga? (Tala mvandi foto.)
10 Mangumba bambalukilanga luyalu muingi kumanisa mambu makhambulu masonga, bantuadusuanga mu nganzi ayi mu mavanga makhambulu kithuadi na mambu Yesu kalonga. (Efe. 4:31) Khomba mueka bantedilanga Jeffrey wutuba: “Minu yizebi ti batu abobo bantubanga ti bantomba kumanisa mambu makhambulu masonga, balenda monikina ti bantomba kutuadisa ndembama, vayi mu kinzimbukulu mambu bamvanga malenda tuadisa buphunya.” Diawu Yesu ka tulonga tumonisa luzolo kuidi batu kheti bo ba tukuamisanga. (Tanga Matai 5:43-48.) Mu kuba baklistu, tumvanganga mamoso tulenda nunga muingi kutina dioso diambu dikhambulu kithuadi na mambu Yesu kalonga.
Vantombulu kibakala muingi kutatamana bavasuka mu mambu ma pulitika ma nza ayiyi (Tala lutangu 10)
11. Mambu mbi malenda thota lukuikumunu luitu matedi kukhambu kota mu mangumba bantomba kumanisa mambu makhambulu masonga?
11 Kheti tuzebi ti Kintinu ki Nzambi kiala manisa mambu makhambulu masonga, befu tulenda mona phasi kulandakana kifuani ki Yesu, bo batuvangila mambu makhambulu masonga. Tala kifuani ki yaya Janiya wuviokila mu kithatu. Nandi wutuba: “Yiba mu nganzi ayi mvandi yiba mu kiunda mu kumona mambu beni, diawu yibakila mayindu ma kubuela mioko dingumba dimueka diaba tomba kumanisa kithatu ayi luvasanu. Yimuena ti ayoyo yiba phila yifuana yilenda monisina nganzi yiba”. Vayi buviokila thangu, yaya Janiya wuvisa ti vaba tombulu kubalula phil’andi yi kuyindudila. Nandi wubue tuba: “Minu yibika muingi bankaka bavukumuna phil’ami yi kuyindudila ayi baphanga kufiatila mu batu kubika kuandi mu Yave, diawu yibika kubue diatanga na dingumba beni.” Tufueti ba keba keba, muingi tubika tuadusu mu nganzi voti kukota mu mangumba ma pulitika ma nza ayiyi, muingi kutomba kumanisa mambu makhambulu masonga.—Yoane 15:19
12. Kibila mbi didi diambu dimboti kusola zitsangu tunkuwa?
12 Mbi binkuiza tusadisa kuyala mayindu ma nganzi mu kibila ki mambu makhambulu masonga? Bawombo babakula ti didi diambu dimboti kusola buboti mambu bankuwa, bammona ayi bantanga. Zi programa ziwombo bammonisanga mu televisão, bantubilanga beni mambu makhambulu masonga, ayi mankindisanga batu kufonda mangumba muingi kumanisa mambu makhambulu masonga. Khumbu zinkaka batu bantiamunanga zitsangu bantianga beni kutuba mambu amomo. Bukiedika ti kutatamana kukuwa batu kutuba mambu makhambulu masonga mankuiza tusadisa? Befu kubungisa thangu yiwombo mu kukuwa zitsangu aziozo, tulenda ba mu kiunda voti mu nganzi. (Zinga. 24:10) Bulutidi tulenda zimbakana ti Kintinu ki Nzambi kiawu to kilenda manisa mu phila yilutidi mambu makhambulu masonga.
13. Buidi kutanga Kibibila kadika kilumbu kunkuiza tusadisa kuba mayindu mafuana?
13 Kutanga Kibibila ayi kufiongunina mu mawu, kunkuiza tusadisa kununga mambu makhambulu masonga. Khomba mueka bantedilanga Alia, waba kuazuka beni mu kibila ki batu baba kalanga yandi va nsengi baba kuba vangilanga mambu makhambulu masonga. Vaba monika ti batu baba tuadisa mambu beni, babasa kuba vangila ko ni diambu. Diawu nandi katuba: “Yivuena sui ayi yikiyuvusa: ‘Bukiedika ti yidi lufiatu ti Yave wunkuiza dedikisa mambu amomo?’ Mu thangu ayoyo, yitanga Yobi 34:22-29. Matangu amomo mathebula moyo ti Yave wummonanga mambu moso mambi batu bamvanganga, nandi to kalenda vanga mambu masonga mu phila yilutidi, ayi wala ludika mambu moso mu thangu yifuana. Bo tuntelimina Kintinu ki Nzambi kituala busonga bukiedika, tufueti tatamana kununga mambu makhambulu masonga bubu. Buidi?
MAMBU TULENDA VANGA BUBU
14. Mbi tulenda vanga bubu muingi tubika buela mioko mambu makhambulu masonga? (Kolosai 3:10, 11)
14 Ḿba tulendi nunga ko kubalula mavanga makhambulu masonga ma batu bankaka, vayi tulenda nunga kuyala mavanga mitu. Dedi bo tuma tubila, tufueti landakana kifuani ki Yesu ki kumonisa luzolo. Luzolo alolo lunkuiza tu kindisa kumonisa lukinzu kuidi batu boso, kubunda mvandi batu bamvanganga mambu makhambulu masoga. (Mat. 7:12; Lom. 12:17) Yave wumbanga beni mu mayangi bo tummonisa mamboti ayi busonga kuidi batu boso.—Tanga Kolosai 3:10, 11
15. Buidi kiedika ki Kibibila kilenda sadisila batu bantomba kumanisa mambu makhambulu masonga?
15 Phila yilutidi yi kunungina mambu makhambulu masonga yidi kuzabikisa kiedika kuidi bankaka. Kibila mbi tuntubila mawu? Kibila nzayilu yi Yave yilenda vanga mutu nkua nganzi ayi buphunya, kuba mutu wuntuadisanga mamboti ayi ndembama. (Yesa. 11:6, 7, 9) Ava kuzaba kiedika, Jemal wukota mu dingumba di batu babalukila luyalu, mu kibila ki mambu makhambulu masonga baba kuba vangilanga. Nandi wutuba: “Tulendi kuika ko bankaka babalula mavanga mawu, vayi kiedika ki Kibibila yilonguka, kiawu kitsadisa.” Mambu Jemal kalonguka mu Kibibila, mansadisa kubalula mayindu mandi. Batu bankuiza bika mavanga mambi, voti mambu makhambulu masonga, ba kulonguka kiedika ki Kibibila.
16. Kibila mbi tuidi phuila yi kuzabikisa kuidi batu matedi Kintinu ki Nzambi?
16 Dedi Yesu, befu tuidi luaku lu kuzabikisa batu ti Kintinu ki Nzambi, kiawu to kiala manisa mambu moso makhambulu masonga. Kivuvu akiokio kilenda kindisa baboso bamviokila mu mambu makhambulu masonga. (Yele. 29:11) Stacy, tuma tubila kumbusa wutuba: “Kulonguka kiedika kitsadisa kutadila mu phila yifuana mambu makhambulu masonga yimona ayi yiviokila. Yave wusadila Kibibila muingi kumbomba.” Tufueti sadila buboti Kibibila muingi kusadisa batu banunga mambu makhambulu masonga. Befu kufiatila mu kiedika ki Kibibila tuma tubila mu dilongi adidi matedi mambu makhambulu masonga, tunkuiza ba bakubama muingi kutubila mawu mu lukinzu na batu bankaka kuba kuandi mu kikola voti mu kisalu.b
17. Buidi Yave ka tusadisilanga bubu kununga mambu makhambulu masonga?
17 Bo tukhidi zingila mu nza ayiyi yi Satana, befu tunkuiza viokila mu mambu mawombo makhambulu masonga. Vayi tuidi kivuvu ti nyadi yi nza ayiyi bala kunkuka.( Yoane 12:31) Mu nzila Kibibila, Yave wu tumonisa kibila mbi mambu makhambulu masonga mamonikinanga va nza, ayi buidi nandi kambelanga bo kammona batu kutovuka. (Minku. 34:17-19) Mu nzila kifuani ki muan’andi, Yave wu tulonga muingi tuba mayindu mafuana bo mambu makhambulu masonga mammonika, ayi mvandi wu tumonisa ti nkadu to wunkhambu Kintinu kiandi kiambelama kumanisa mambu moso makhambulu masonga. (2 Pet. 3:13) Diawu, tutatamananu kusamuna zitsangu zimboti zi Kintinu ki Nzambi mu kifuza, bo tuntelimina thangu nza yoso yala wala busonga.—Yesa. 9:7.
NKUNGA 158 “Zikhanu Ziaku Ziala Salama”
a Bavingisa mazina mankaka.
b Mona mvandi lutangu 24-27 mu mambu madi kutsuka mua buku A Zola Batu—Ayi Vanga Minlonguki.