DILONGI 39
NKUNGA 54 “Ya yiyi Nzila”
“Sadisa Batu Badi Mintima mi Kubama”
“Baboso baba mintima mikubama muingi kubaka luzingu lu mvu ka mvu, bayiza ba minlandikini mi Yesu.”—MAVANGA 13:48.
MAMBU TUANLONGUKA
Tuemmona thangu mbi tulenda tona ndongukulu yi Kibibila ayi kutumisa mutu mu zikhutukunu.
1. Buidi batu balenda tadila zitsangu zimboti? (Mavanga 13:47, 48; 16:14, 15)
BATU bawombo mu thangu bapostolo bakikinina kiedika muna thangu ba bazabikisa zitsangu zimboti. (Tanga Mavanga 13:47, 48; 16:14, 15.) Bobuawu mvandi bubu, bawombo bankuangalalanga bo bankuwa mu khumbu yitheti zitsangu zimboti. Kheti bo bakhambu vua nkinza va thonono, bumviokila thangu bawu balenda kikinina. Mbi tufueti vanga befu kudengana batu badi mintima mi kubama mu kisalu ki kusamuna?
2. Buidi kisalu ki kuvanga minlonguki kidi dedi mueka na kisalu ki mvati?
2 Tala kifuani akiki. Kisalu ki kuvanga minlonguki kidi dedi mueka na kisalu ki mutu wumvatanga zitsola. Nandi kalenda bonga makundi mayela vayi mu yoyawu thangu, kuvata biuma binkaka va tsol’andi. Bobuawu mvandi, bo tundengana mutu widi wukubama muingi kukikinina zitsangu zimboti, tu kunsadisanga muingi kaba nlandikini wu Yesu. Vayi mu yoyawu thangu, tuntatamananga kutomba batu bankaka balenda kikinina zitsangu zimboti bumviokila thangu. (Yoa. 4:35, 36) Phisulu, yinkuiza tusadisa kuzaba buidi bu kunyikunina mintima mi batu. Ndoko tumona mbi tulenda vanga muingi kusadisa batu badi mintima mi kubama mu kilumbu kitheti tu bazabikisa zitsangu zimboti. Tunkuiza mona mvandi buidi tulenda ku basadisa bayonzuka mu kiphevi.
BO BATU BAMVUA NKINZA
3. Mbi tufueti vanga befu kudengana batu bamvua nkinza zitsangu zimboti? (1 Kolintu 9:26)
3 Bo tundengana batu bamvua nkinza zitsangu zimboti, befu tunlongukanga yawu Kibibila, muingi ku basadisa baba kikundi kimboti na Yave. Diawu bo tuntona kulonguka yawu Kibibila, mvandi tufueti ku batumisa muingi ba landakana zikhutukunu.—Tanga 1 Kolintu 9:26.
4. Vana kifuani ki mutu wuba wukubama muingi kulonguka Kibibila mu kilumbu bamvana kimbangi.
4 Tona ndongukulu yi Kibibila. Bawombo bankikininanga kulonguka Kibibila mu kilumbu kitheti tu bazabikisa zitsangu zimboti. Dedi, kikhupa kimueka ku Canadá, wufikama kuidi zikhomba baba samuna mu kusadila dikalu di bilongulu ayi wubonga mua buku Baka Mayangi ma Mvu ka Mvu. Khomba wunkietu waba vana kimbangi wunkamba ti vantombulu nandi kulonguka Kibibila mu kusadila mua buku beni. Kikhupa beni wuvua nkinza mawu ayi wuvana numero’andi yi telefone kuidi khomba beni. Vayi bo vavioka mua bilokula mu kiokiawu kilumbu, kikhupa beni wufila mensage kuidi khomba muingi batona ndongukulu yi Kibibila. Bo khomba kankamba ti bankuiza longuka kutsuka sabala, nandi wuyuvula boti balenda longuka mu kilumbu kilanda. Ayi mawu bavanga. Ayi kutsuka sabala beni, kikhupa beni wutona kulandakana zikhutukunu. Mu phila ayoyo, nandi wutatamana kukonzuka mu kiphevi.
5. Buidi tulenda zabila thangu yifuana yi kutona ndongukulu yi Kibibila na mutu? (Tala mvandi zifoto.)
5 Bakana ko batu boso bankikininanga kiedika mu kilumbu ba kuba zabikisanga zitsangu zimboti. Bankaka ḿba vala tombulu thangu muingi bavua nkinza. Ḿba vantombulu theti kutonina masolo mu kutubila mambu bawu bamvua nkinza. Vayi befu kuba mayindu mafuana ayi kumonisa ti tu kuba vua nkinza, malembe malembe, bawu balenda tona kulonguka Kibibila. Mambu mbi tulenda tuba muingi kutona yawu ndongukulu yi Kibibila? Bavana kiuvu akiokio kuidi zikhomba ziwombo zipisuka mu kutona masolo.
Buidi tulenda nyevisa ndongukulu yi Kibibila na mutu wumvua nkinza? (Tala lutangu 5)a
6. Mambu mbi tulenda tuba, muingi tutatamana kuba masolo mamboti na mutu wumvua nkinza?
6 Minsamuni ayi mintuami ntuala miwombo batuba ti mu zi tsi zinkaka, buboti beni kubika sadila kikuma “kulonguka Kibibila” voti “kulonga” muingi kutubila matedi ndongukulu yi Kibibila. Vayi batu kuna banluta zolanga bikuma dedi, “kusolula matedi Kibibila.” Ngie wulenda tona masolo mu kutuba: “Didi diambu di kukuitukila kuzaba ti Kibibila kimvana mimvutu mi biuvu biwombo binkinza bi luzingu. Kiawu kisi ko buku yi binganga ayi yilenda ku tusadisa mu mambu mawombo.” Mvandi wulenda buela mu kutuba: “Vasintombulu ko thangu yiwombo, tulenda baka ndandu mu malongi ma Kibibila kheti mu 10 voti 15 di minutu. Tulenda sadila bikuma bimmonisa kuidi mutu ti nandi widi luaku lu kusola.
7. Thangu mbi bankaka banluta kikininanga kiedika ki Kibibila? (1 Kolintu 14:23-25)
7 Tumisa mutu mu zikhutukunu. Mu thangu yi mvuala Polo, ḿba bawombo bakikinina zitsangu zimboti mu Khumbu yitheti balandakana zikhutukunu va kimueka na baklistu bankaka. (Tanga 1 Kolintu 14:23-25.) Mawu mvandi mammonikanga bubu. Minlonguki miwombo mi Kibibila, bamfika konzukanga mu kiphevi bo banlandakananga zikhutukunu. Vayi thangu mbi tufueti tumisa mutu mu zikhutukunu? Vasintombulu ko kuvitila theti mu dilongi 10 yi buku Baka Mayangi ma Mvu ka Mvu yintubila matedi zikhutukunu, muingi kutumisa mutu. Vayi tulenda vanga mawu, mu kilumbu kitheti tusolula yandi matedi Kibibila. Ḿba tulenda vanga mawu mu kunzabikisa ntu diambu wu dilongi di baboso, voti mambu mankinza mu Kibanga ki Nsungi tuala longuka mu sabala beni.
8. Mbi tulenda tubila matedi zikhutukunu zitu bo tuntumisa mutu? (Yesaya 54:13)
8 Bo tuntumisa mutu wumvua nkinza mu zikhutukunu, tufueti kunsadisa kumona ti zikhutukunu zitu zidi disuasana kena binganga binkaka. Bo nlonguki mueka wu Kibibila kalandakana ndongukulu yi Kibanga ki Nsungi, nandi wuyuvula kuidi nlongisi’andi: “Khomba wuntuadisa ndongukulu yi Kibanga ki Nsungi zebi mazina ma batu boso?” Nlongisi’andi wunkamba ti befu tumvanganga mangolo muingi kuzaba mazina ma zikhomba zioso mu kimvuka kitu, dedi bo tuzabidi mazina ma basi dikanda ditu. Nlonguki wu Kibibila wumona ti tuidi disuasana na batu ba kinganga kiandi. Bobuawu mvandi, vadi batu bawombo bakhambu zaba buidi buididi zikhutukunu zitu. (Tanga Yesaya 54:13.) Befu tunkutikininanga muingi kubuongimina Yave, kulonguka matedi nandi ayi kuyikindasana befu na befu. (Ebe. 2:12; 10:24, 25) Mu phila ayoyo, zikhutukunu zitu zinlandakananga zithuadusulu zi Kibibila kubika kuandi bikhulu bi batu. (1 Ko. 14:40) Tunlongukanga mawombo bo tumbanga ku nzo yi Kintinu. Tu tubilanga ko matedi kukota mu mambu ma pulitika kibila tuidi bavasuka, ayi tubuelanga ko mioku mangumba mambalukila zimfumu zi luyalu. Diambu dimboti tufueti vanga didi, kufika monisa kuidi nlonguki wu Kibibila video yintuba Mambu mbi ma monikanga ku ǹzo yi kintinu? Mu phila ayoyo, nandi wunkuiza zaba buidi buididi zikhutukunu zitu.
9-10. Bo tuntumisa mutu mu zikhutukunu, mbi tulenda nkamba muingi kabika ba mu boma? (Tala mvandi foto.)
9 Bawombo bammonanga boma kulandakana zikhutukunu zitu kibila banyindulanga ti tunkuiza ba kuika baba zimbangi zi Yave. Diawu, tufueti ku basadisa bazaba ti befu tunzolanga batu balandakana yitu zikhutukunu ayi ti tuisinkuiza ba kuika ko kuvanga mawu. Mvandi tufueti ku bazabikisa ti basi dikanda diandi, bibabana ayi bakulutu balenda landikinina zikhutukunu va kimueka, ayi ti bana banlongukanga va kimueka na matata mawu. (Deute. 31:12) Mvandi tufueti ku basadisa bavisa ti tukongulanga ko makaba ayi tudindanga ko zimbongo. Vayi tunlandakananga mambu Yesu katuba: “Dedi bo benu lutambudila mu khambu futa ni kiuma, mvandi vananu bankaka mu khambu badinda ni kiuma.” (Mat. 10:8) Tulenda kuba zabikisa mvandi ti vasintombulu ko bawu kusumba bikhutu bidi bukalu muingi balandakana yitu zikhutukunu. Kibila Nzambi wunluta vua nkinza mambu tuidi mu ntima kena bikhutu tube vuata.—1 Samu. 16:7.
10 Mutu na kulandakana lukutukunu, vanga mangolo muingi kunyamba buboti. Nzabikisa kuidi bakulutu ba kimvuka ayi kuidi minsamuni minkaka. Befu kuvanga mawu, ḿba nandi kalenda bue vutuka kilumbu kinkaka. Mu thangu lukutukunu, kala va khonzu’andi, mmonisa matangu moso ayi nsadisa kavisa dilongi badi mu kuvanga voti mambu badi mu kulonguka mu Kibanga ki Nsungi.
Befu kufika tumisa mutu kalandakana zikhutukunu, nandi wunkuiza fika baka ndandu (Tala lutangu 9-10)
THANGU YI KUTONA NDONGUKULU YI KIBIBILA
11. Buidi tulenda monisina ti tunkinzika thangu mutu katsikika muingi kulonguka?
11 Mambu mbi tufueti tebukanga moyo matedi kutuadisa ndongukulu yi Kibibila? Ku kinzika thangu mutu kabe sola muingi kulonguka Kibibila. Dedi, vitilanga mu thangu mu tsikika mu kutadila phila batu bantadilanga thangu va kibuangu kiaku. Mvandi bo muntona ndongukulu yi Kibibila, bika kutuba mambu mawombo. Minsamuni miwombo mipisuka, bantubanga ti kufika manisa ndongukulu yi Kibibila kheti mutu beni wuntomba kubue longuka mambu mankaka, didi diambu dimboti. Ayi mvandi kubika koluka beni, vayi tufueti bika muingi mutu wumvua nkinza kayoluka.—Zinga. 10:19.
12. Makani mbi tufueti baka bo tuntona ndongukulu yi Kibibila na mutu?
12 Tona va thonono, makani mitu mafueti ba kusadisa mutu bevua nkinza mambu ma Kibibila kuzaba Yave ayi Yesu, ayi kukuna luzolo lungolo mu bawu. Tulenda nunga kuvanga mawu, befu kusadila buboti diambu di Nzambi kubika kuandi nzayilu’itu veka. (Mavanga 10:25, 26) Khumbu ziwombo mvuala Polo wutsikika thalu mu mambu Yesu kalonga, kibila nandi wuzaba ti Yave wusola Yesu muingi kunsadisa kunzaba ayi kunzola. (1 Kolintu 2:1, 2) Mvuala Polo wusadisa baklistu kumona nkinza wu kusadisa minlandikini mimona kukuna zikhadulu zimboti. (1 Ko. 3:11-15) Zikhadulu dedi kiminu, nzailu, nduenga ayi boma bu Yave. (Minku. 19:9, 10; Zinga. 3:13-15; 1 Pet. 1:7) Landakana phila Mvuala Polo kalongila, muingi kusadisa minlonguki miaku mi Kibibila ba kuna kiminu kingolo ayi baba kikundi kifikama na Yave Nzambi.—2 Ko. 1:24.
13. Buidi tulenda monisina mvibudulu ayi kuvisa mabanza ma mutu bevua nkinza diambu di Nzambi? (2 Kolintu 10:4, 5) (Tala mvandi foto.)
13 Landakana phila Yesu kalongila mu kumonisa mvibudulu, ayi kuvisa mabanza ma mutu wumvua nkinza. Bika kuvana biuvu bilenda vanga mutu beni kumona zitsoni. Va kutombulu, bika kufika tubila mambu nandi kafueti balula mu luzingu luandi, vayi bumviokila thangu mulenda vutukila kubue tubila mawu muingi kunsadisa. Vasintombulu ko kukuika mutu beni ka kikinina mu mambu kakhambu ba wukubama muingi kulonguka. Vantombuluanga thangu muingi kiedika ki Kibibila kiba kisikama mu ntima wu mutu. (Yoa. 16:12; Kolo. 2:6, 7) Kibibila kindedikisa malongi ma luvunu dedi biuma bingolo bidi beni phasi muingi kununga. (Tanga 2 Kolintu 10:4, 5; tala mu nota de estudo mu kikuma “demolir fortalezas.”) Sadisa nlonguki’aku katadila Yave kisuamunu kiandi.—Minku. 91:9.
Vantombulu thangu muingi kiedika ki Kibibila kisikama mu ntima wu mutu (Tala lutangu 13)
BO BATU BAMONA BANLANDAKANA ZIKHUTUKUNU
14. Buidi tufueti tadila bo banlandakana zikhutukunu zitu?
14 Yave wuntomba tutadila mu phila yifuana batu bamona banlandakana lukutukunu mu khumbu yitheti, mu khambu tsikika thalu mu bikhulu biawu, mbakulu voti nkanda nyitu. (Tia. 2:1-4, 9) Buabu, buidi tulenda monisina luzolo kuidi batu banlandakana zikhutukunu zitu mu khumbu yitheti?
15-16. Buidi tulenda sadisila batu bamona banlandakana zikhutukunu zitu?
15 Bawombo banlandakananga zikhutukunu zitu kheti basa ba tumisa ko, vayi bankaka ba kuba tumisanga. Diawu, tufueti fikama batu abobo bo tuidi mu zikhutukunu, mu kuba yamba buboti, kukala va khonzu’awu, ku bamonisa matangu ma Kibibila bantubila mu dilongi ayi ku bamonisa bilongulu tuidi mu kusadila mu lukutukunu beni. Mvandi tufueti vua nkinza mabanza mawu. Dibakala dimueka wulandakana lukutukunu luitu mu Khumbu yitheti, wukamba kuidi khomba mueka ti nandi waba mona zitsoni mu kibila ki bikhutu kabe vuata. Vayi khomba beni wuvumbika mabanza mandi, ayi wunkamba ti zimbangi zi Yave badi dedi mueka na batu boso. Dibakala beni wuyonzuka mu kiphevi ayi wubotama. Vayi nandi kazimbakananga ko mambu khomba beni kankamba. Diambu dimfunu tufueti tebukanga moyo didi, bo tunkoluka na mutu bekuiza landakana lukutukunu, tufueti mmonisa ti tu kumvuanga nkinza, ayi tubika kota mu mambu mangana voti kutubila mambu tu khambulu nsua.—(1 Pet. 4:15).
16 Mvandi, tufueti vananga ndizulu yimboti kuidi batu bankuiza landakana zikhutukunu, kuyoluka yawu mu lukinzu, ayi bo tumvana mvutu mu lukutukunu, tubika tubila bubi mambu batu bakhambu ba zimbangi zi Yave bankikininanga. Tufueti bika ku tubilanga mambu malenda vanga bankaka kusumuka voti kuyindula ti tu batubila bubi. (Titu 2:8; 3:2) Dedi, tulendi lenza ko mambu batu bakhambu ba mbangi yi Yave bankikininanga. (2 Ko. 6:3) Bulutidi zikhomba bamvanganga dilongi di baboso, bafueti ba keba keba mu mambu bankoluka. Bafueti tebukanga moyo ti mu zikhutukunu zitu, kumbanga batu bawombo bakhambu ba zimbangi zi Yave. Ayi mvandi, bafueti sadila bikuma batu boso bankuiza visa.
17. Mbi tufueti vanga befu kudengana batu bamvua nkinza diambu di Nzambi?
17 Tufueti samuna mu nsualu zitsangu zimboti, bulutidi mu bilumbu abibi bitsuka. Tufueti tomba batu badi “mintima mikubama muingi kubaka luzingu lu mvu ka mvu.” (Mav. 13:48) Bo tundengana mutu wumvua nkinza, tufueti tona yawu ndongukulu yi Kibibila ayi kuba tumisa mu zikhutukunu. Befu kuvanga mawu, tunkuiza basadisa batona kudiatila mu nzila yi luzingu.—Mat. 7:14.
NKUNGA 64 Samuna mu Mayangi
a MAMBU MADI MU FOTO VA: Zikhomba wadi bamfikama kuidi dibakala dimueka wuba disodi wukala va varanda yi nzo’andi; zikhomba wadi zi bakietu bamvana kimbangi kuidi ngudi mueka widi wufietakana.