1925​​—⁠Khama di Mimvu Kumbusa

VABA TOMBULU KUVIBIDILA

Mu mvu 1925, Minlonguki miwombo mi Kibibila baba telimina muingi Paladizu yituka mu mvu beni. Kibila mbi? Yaya Albert Schroeder, wuba mu Dingumba Dintuadisi, wutuba: “Tuaba yindulanga ti minlandikini misolo mi Yesu Klistu misobila, bala tombuka ku diyilu muingi baba mu Kintinu ki Nzambi, ayi bisadi bikuikama bi Yave bi thangu yikhulu dedi Abalahami, Davidi ayi bankaka, bala vulubuka dedi minyadi muingi kuyala ntoto.” Vayi bo buviokila thangu, bawombo bayiza vonga ayi bazimbisa kivuvu kiawu.—Zinga. 13:12.

Kheti mu mambu amomo ma kiunda mayiza monika, nduka bawombo mu minlonguki mi Kibibila batatamana ku kivana mu kisalu ki kusamuna ayi bavisa kiyeku baba mu kuba Zimbangi zi Yave. Dedi, tala kisalu bavanga muingi kutiamuna zitsangu zimboti mu nza yimvimba.

KUTIAMUNA ZITSANGU MU RÁDIO

Tubaka ndandu yiwombo mu kusadila studio yi rádio tuaba tedilanga WBBR muingi kutiamuna zitsangu zimboti. Vayi Minlonguki mi Kibibila mvandi, bavanga studio yinkaka ku Chicago, Illinois. Bawu batedila studio beni, WORD. Yaya Ralph Leffler, wumueka mu zikhomba wusadila mu rádio beni wutuba: “Va builu mu thangu kisivu, tuaba tiamunanga zitsangu mu WORD mu bibuangu bioso”. Dedi, dikanda dimueka diaba zingilanga nduka 5.000 di zi kilometro di kinanu ku Alaska, bawu batheti balandakana zitsangu mu rádio. Bo balandakana zitsangu zimboti mu rádio dio, bawu basonika nkanda kuidi zikhomba basadila mu rádio beni, muingi kuba tonda mu bidia bi kiphevi batambula.

Mu kutubila phila studio WORD yaba tiamunina zitsangu, Kibanga ki Nsungi 1 Ngonda Kumi Wadi mvu 1925, kituba: “WORD yidi studio yiluta ba yinneni ku Estados Unidos, ayi yiluta tiamuna zitsangu mu bibuangu bi kinanu, ayi batu bawombo baba luaku lu kukuwa zitsangu batiamuna mu studio beni. Dedi, ku Costas do Atlântico ayi Pacífico, ku Cuba ayi ku norte yi Alaska. Mambu amomo masadisa batu bawombo bayuwa rádio ayi kulonguka kiedika.”

Mu thangu ayoyo, Minlonguki mi Kibibila mvandi bavanga mangolo muingi kutiamuna zitsangu mu kusadila rádio mu kisalu ki kusamuna ku Canadá. Mu mvu 1924 baba sadilanga rádio CHUC bavanga ku Saskatoon, Saskatchewan. Ayoyo yiba studio yiluelu yi rádio baba sadilanga mu zinzo nzambi ku Canadá. Mu mvu 1925, vaba tombulu studio ayoyo yi rádio kubaluka ku khonzo yinkaka. Diawu, a Sociedade Torre de Vigia kabaludila studio ayoyo yi rádio, ayi wunata yawu ku kibuangu kimueka baba vangilanga zi teatro ku Saskatoon.

Mu lusalusu lu zi rádio aziozio, batu bawombo baba zingilanga ku Saskatchewan, babaka luaku lu kukuwa zitsangu zimboti mu khumbu yitheti. Dedi, ku divula dimueka diba ditatuka, nkietu mueka baba tedilanga Graham wusonika kuidi zikhomba muingi kudinda bilongulu bitu. Yaya George Naish wutuba: “Tuzimbakananga ko bo nkietu beni katenduka ayi katuba: Wu tulonganu! Bo tuyuwa mawu, befu tumfila bilongulu biwombo bibongulu mu Kibibila.” Mu mua thangu, yaya Graham wutona kuzabikisa zitsangu zi Kintinu.

KUTAMBULA PHISULU YIMONA

Kibanga ki Nsungi kitheti Ngonda Yintatu mvu 1925, yiba ntu diambu: “Nascimento da Nação”. Kibila mbi ntu diambu adiodio yibela nkinza? Kibila mu mua mi mvu, Minlonguki mi Kibibila bazaba ti Satana, wuba dingumba di ziphevi zimbi ku diyilu baba kumbuelanga mioko, ayi mvandi basi binganga, basi lungoso ayi basi pulitika va ntoto. Vayi mu Kibanga ki Nsungi akiokio, kisadi kikuikama kisadisa Minlonguki mi Kibibila kuvisa ti Yave widi Kimvuka kiandi va ntoto, kuidi batu badi basuasana ayi bo Satana katuadisanga. (Mat. 24:45). Ayi mvandi, kisadi kikuikama kisudikisa ti mu mvu 1914, yimonika mvita wunneni ku diyilu, Satana ayi ziphevi zimbi baba kuka ku diyilu ayi bayiza va ntoto.—Nzai. 12:​7-9.

Bawombo bamona phasi kukikinina phisulu ayoyo yimona. Diawu, Kibanga ki Nsungi kituba: “Boti vadi batu basinkikinina ko mu malongi amomo mamona, buna bika bavanga mangolo muingi batatamana kuvibidila mu Mfumu ayi kuba ntima wudiodila.”

Yaya Tom Eyre, wuba ntuami ntuala ku Grã-Bretanha, wutuba buidi Minlonguki miwombo mi Kibibila bamuena matedi mambu amomo. Nandi wutuba: “Zikhomba ziwombo bayituka mu phisulu ayoyo yimona yidi mu buku yi Nzaikusu kapu 12. Vayi bo tuvisa ti Kintinu ki Nzambi kidi ku diyilu, tuba beni phuila yi kuzabikisa zitsangu zimona kuidi bankaka. Kiedika akiokio ki tusadisa kubuela kukivana mu kisalu ki kusamuna ayi kumona phila Yave kaba tuadisila dikabu diandi.”

KUVANA KIMBANGI MATEDI YAVE

Bubu, Zimbangi zi Yave bazebi buboti mambu madi mu Yesaya 43:10: ‘Benu muidi Zimbangi ziama, butubidi Yave, ngete ngiewu widi kisadi kiama yisola.’ Vayi ava mvu 1925, tuabasa sadilanga ko lutangu alolo mu bilongolo bitu. Vayi mambu amomo maba belama kubaluka. Mu mvu 1925, Kibanga ki Nsungi kitubila matedi buku yi Yesaya 43:​10, 12 mu kumi yimueka di zilevista.

Kutsuka Ngonda Nana mu mvu 1925, Minlonguki mi Kibibila baba mu lukutukunu lu mavula ku Indianápolis, Índia. Mu nkanda wu thumusunu, yaya Joseph Rutherford wutuba: “Tuidi avava mu lukutukunu alulu lu mavula muingi tubaka . . . mangolo mamfumina kuidi Mfumu’itu, muingi kuvanga kisalu ki kusamuna kibila tuidi zimbangi ziandi.” Mu lukutukunu beni lu mavula luvanga nana di bilumbu, bakindisa baboso basadila luaku loso muingi kuvana kimbangi matedi Yave.

Mu kisabala, mu kilumbu 29 mu Ngonda nana, yaya Rutherford wuvanga dilongi diba ntu diambu: “Um Apelo à Ação.” Mu dilongi adiodio nandi wutubila nkinza wu kuvana kimbangi bo katuba: “Yave wukamba kuidi dikabu diandi: ‘Benu luidi zimbangi ziami . . . Minu yidi Nzambi.’ Bosi wuvana nsua, monisanu kidimbu kuidi dikabu dioso. Vasi ko dikabu dinkaka didi phevi yi Nzambi, kena zimbangi ziandi.”—Yesa. 43:12; 62:10.

Kutsuka dilongi di yaya Rutherford, nandi wutanga nkanda mueka wuba ntu diambu: “Mensagem de Esperança.” Nkanda beni waba tubila ti Kintinu ki Nzambi kiawu to kiala tuala ndembama, kumanisa bimbevu, kuvana kiphuanza ki kiedika, ayi mayangi ma mvu ka mvu. Kuntuala bayiza sekula mambu mu nkanda beni, mu zimbembu ziwombo. Ayi yawu yiyiza ba mu khati bilongolu bitu, ayi bakabula nduka 40 milhões di zikopia mu nkanda beni.

Bo vavioka mua mimvu, Minlonguki mi Kibibila basa fika tambula ko dizina di zimbangi zi Yave, vayi bawu bavisa ti kiba kiyeku kiawu kimfunu, kuvana kimbangi matedi Yave.

KUVUTUKILA BATU BAVUA NKINZA

Bo thalu yi Minlonguki mi Kibibila yaba buelama mu nza yimvimba, mvandi vaba tombulu kuvutukila batu bavua nkinza. Bo bamana kuvanga campanha yi kukabula mua buku Mensagem de Esperança, bavana thuadusulu mu nkanda Ministério do Reinoa: “Vutukanu mu zinzo zi batu bakikinina mua buku Mensagem de Esperança.”

Ministério do Reino ki Ngonda Yitheti ki mvu 1925, kituba mvandi kipholo ki nlonguki wumueka wu Kibibila ku Texas, wutuba: Tu yangalala kumona batu tuvutukila, kuvua nkinza zitsangu zimboti. Vaba divula dimueka ku kibuangu tumana samunina Khumbu zitanu mu kuvioka kumi di mimvu. Vayi bubu yaya Hendrix ayi mam’ama bavutukila batu kuna ayi bakabula zibuku ziwombo.”

Ku tsi yi Panamá, nsamuni mueka wutuba: “Khumbu ziwombo batu babasa bikanga ko muingi yisamuna mu zinzo ziawu, vayi bawu bubu babalula mayindu mawu, ayi banzolanga beni bo yimvutukila kuna muingi kubue yoluka yawu. Bubu yinluta tsikikanga mangolo mama mu kisalu ki kusamuna, kuvutukila batu bo bavua nkinza mu thangu baba vana kimbangi mu mua thangu kumbusa ayi yinbakanga ndandu yiwombo mu kuvanga mawu.”

TSIKIKA THALU KUNTUALA

Mu nkanda kaba sonikanga kadika mvu kuidi minsamuni, yaya Rutherford wutubila mu bukhufi kisalu bavengi mu mvu woso, ayi wutubila mambu mbi bankuiza vanga mu mvu wunlanda. Nandi wutuba: “Mu mvu wubedi, tubaka luaku lu kubomba batu bawombo baba mu kiunda. Kisalu tuidi mu kuvanga, kintuadisanga beni mayangi mu ntim’ami. Mu mvu wunkuiza, tuala sadila luaku loso tuidi, muingi kuvana kimbangi matedi Nzambi ayi Kintinu kiandi va kimueka na dikabu diandi. Diawu, tutatamananu kuvana nzitusu kuidi Nzamb’itu mu mbembu yinangama ayi kuidi Ntinu’itu.”

Bo mvu 1925 waba belama kumana, zikhomba babaka makani ma kutodisa beteli yi Brooklyn. Mu mvu 1926, Tutona kisalu ki kutunga beteli beni dedi bo tubakila makani.