Zikhomba Wadi Zimona mu Dingumba Dintuadisi
MU kilumbu Kintanu Ngonda Kumi mvu 2024, bazabikisa mu lukutukunu lu mvu ti zikhomba, Jody Jedele ayi Jacob Rumph, beka mu Dingumba Dintuadisi di Zimbangi zi Yave. Zikhomba aziozio, bansadilanga Yave mu lukuikumunu mu mimvu miwombo.
Yaya Jody Jedele ayi nkazi’andi Damaris
Yaya Jedele wu butukila ku Missouri, Estados Unidos. Matata mandi baba Zimbangi zi Yave. Bawu baba zingilanga ku kibuangu kimueka kiba beni tsatu yi minsamuni. Mu kibila akiokio, nandi wuzabila zikhomba ziwombo baba kuendanga kuna muingi kubuela mioko kisalu ki kusamuna. Luzolo luandi ayi kithuadi na zikhomba lusadisa bawombo mu kimvuka kiandi. Nandi wubotama bo kaba muana ditoko mu kilumbu 15, Ngonda Kumi mvu, 1983. Nandi waba zolanga beni kisalu ki kusamuna. Diawu, bo kamanisa kikola kifuana, wukota mu kisalu ki ntuami ntuala mu Ngonda Yivua, mvu 1989.
Bo yaya Jedele ayi khomb’andi wunkietu baba matoko, matata mandi baba kuba natanga muingi kuetala Beteli. Mawu ma basadisa kutsikika makani ma kue sadila ku Beteli. Ayi buviokila thangu, bawu badukisa makani amomo. Yaya Jedele wutona kusadila ku Beteli yi Wallkill mu Ngonda Yivua, mvu 1990. Nandi wusadila theti mu Dingumba Dindiodisilanga bibuangu, bosi mu Dingumba di Minfelimi.
Mu thangu beni, bimvuka biaba kolukanga mbembu yi Espanhol, biaba konzuka thinu, ayi vaba tombulu zikhomba ziwombo kubuela mioku. Diawu yaya Jedele kalandikinina lukutukunu mu mbembu beni ayi wutona kulonguka yawu. Bo vavioka mua thangu, nandi wuzabila yaya Damaris, khomba mueka wunkietu wuba ntuami ntuala ku kizunga beni. Buviokila thangu bawu bakuelana ayi batona kusadila ku Beteli.
Mu mvu 2005, bawu babika kisalu ki Beteli muingi kukeba matata mawu. Mu thangu ayoyo, bawu basadila dedi ntuami ntuala. Yaya Jedele wusadisa kutuadisa kikola ki mintuami ntuala, wusadila mu Dingumba Dinkakidilanga Matedi Menga, ayi mvandi mu Dingumba Dintadilanga Matedi kutunga.
Mu mvu 2013, Yaya Jedele ayi nkazi’andi, ba batumisa ku Beteli muingi kubuela mioku kisalu ki kutunga Beteli yi Warwick. Tona mu thangu beni, bawu bansadilanga ku Patterson ayi ku Wallkill. Yaya Jedele wusadila mu Dingumba Dintadilanga Matedi Kutunga, ayi Dingumba Dimvananga Zithuadusulu kuidi Zinzo zi Mbuku. Mu Ngonda yintatu mvu 2023, bansola muingi kusadila mu Dingumba Dintadilanga matedi Kisalu. Mu kutubila matedi biyeku kaba nandi wutuba: “Bo yaba tambulanga biyeku bimona, khumbu ziwombo yaba yimuenanga ti yilendi nunga ko kudukisa biyeku bioso yiba. Vayi mu thangu ayoyo, yintebukanga moyo nkinza wu kufiatilanga mu Yave, kibila nandi wu tusadisanga tununga dioso diambu diphasi tulenda dengana mu kiyeku kitu.”
Yaya Jacob Rumph ayi nkazi’andi Inga
Yaya Rumph wu butukila ku Califórnia, Estados Unidos. Bo kaba muana kilezi, mam’andi wuba wuvonga mu kiphevi. Vayi kheti bobo, wuvanga mangolo ma kunlongisa kiedika. Mvandi kadika mvu, nandi waba kue talanga khai’andi wuba Mbangi yi Yave wukuikama. Khai’andi wunsadisa kuba phuila yi kulonguka kiedika. Diawu, bo kaba 13 di mimvu, nandi wudinda muingi kalongukanga Kibibila. Mu kilumbu 27 Ngonda Yivua mvu 1992, nandi wubotama. Mayangi beni kuzaba ti mam’andi wuvutuka kubue ba kiphevi kimboti ayi basi dikanda diandi badi mu kukonzuka mu kiphevi ayi ba botama.
Mu butoko buandi, yaya Rumph wumona ti mintuami ntuala baba beni mayangi mu luzingu. Diawu bo kamanisa kikola kifuana, nandi wukota mu kisalu ki ntuami ntuala mu Ngonda Yivua mvu 1995. Mu mvu 2000, nandi wuyenda kue sadila ku Equador, kuba beni tsatu yi minsamuni. Kuawu kazabila Inga, khomba mueka wunkietu wuba ntuami ntuala wu butukila ku Canadá. Buviokila thangu bawu bakuelana, ayi baba sadilanga va kimueka na mua dingumba di minsamuni ku divula dimueka ku Equador. Bubu, kimvuka beni kimana konzuka.
Buviokila thangu, yaya Rumph ayi nkazi’andi batambula kiyeku ki kuba mintuami ntuala mifilu, ayi kuntuala kiyeku ki kukengidila bimvuka. Mu mvu 2011, ba batumisa mu turma 132 yi kikola ki Ngiliadi. Bo kikola ki Ngiliadi kimana, ba bafila mu bibuangu biwombo ayi basadila mu biyeku biviakana. Dedi kusadila ku beteli, kisalu ki misioni, ayi ku kengidila bimvuka. Yaya Rumph mvandi wubaka luaku lu kutuadisa kikola ki Minsamuni mi Kintinu.
Mu kibila ki kivunga ki COVID-19, yaya Rumph ayi nkazi’andi bavutuka ku Estados Unidos. Baba tumisa muingi kuesadila ku Beteli yi Wallkill, ko yaya Rumph katambula khubumunu muingi kusadila mu Dingumba Dintadilanga Matedi kisalu. Bosi babue vutuka ku Equador, ko yaya Rumph kasadila mu Dingumba di Filiali. Mu mvu 2023, baba fila ku Beteli yi Warwick. Mu Ngonda Yitheti mvu 2024, yaya Rumph bansola muingi kue sadisa mu Dingumba Dintadilanga Matedi Kisalu. Mu kuyindula mu biyeku bioso katambula nandi wutuba: “Diambu dilutidi nkinza mu kiyeku tutambula, disi ko kibuangu tunkuiza sadila, vayi batu bankuiza sala yitu.”
Tumvutulanga beni matondo mu kisalu kikuikama ki zikhomba aziozio. Diawu, tufueti tatamana kukinzikanga batu abobo.—Fil. 2:29.