Kubotama—Dyambu Dinkinza Baklisto Boso Bafweti Vanga

1, 2. (a) Bwidi matata mankaka bammwenanga boti mwan’awu tidi kubotama? (b) Kibila mbi batu batidi kubotama bafweti kuyikuvusa ti bayivana kwidi Yave? (Tala fikula yidi va thonono.)

MATATA ma Malia baba tala mwan’awu wu nkyeto bo katelama na batu bankaka baba tomba mvandi kubotama. Nlongi wuvana byuvu byodi. Malia wutambula mu mbembu yinangama ayi yisulama. Vangi nandi bambotika.

² Matata ma Malia bayangalala beni, bila mwan’awu wuyivana kwidi Yave ayi wubotama. Vayi ava kiza botama, mam’andi wuba nkadu dibamu. Diawu kayiyuvusila: ‘Nandi mafwana mwingi kubotama? Bukyedika ti nandi zebi bubote mbi binsundula kukivana kwidi Yave? Kibila mbi kamanga vibidila nkadu?’ Matata mawombo ma luzolo ba yikuvusanga phila byuvu abyobyo boti mwan’awu tubidi ti nandi tidi kubotama. (Mpovi 5:5) Nzengulu yilutidi woso kwa mutu kalenda baka mu luzingu, yidi mu kuyivana kwidi Yave ayi kubotama.​—Tala quadro “Ngyewu, mayivana kwidi Yave?”

3, 4. (a) Bwidi mvwala Petelo kamonisina nkinza widi mu kubotama? (b) Kibila mbi Petolo kadedikisila kubotama dedi thungulu yi nzaza yi Nowa?

³ Mvwala Petelo wudedikisa kubotama buka thungulu yi nzaza yi Nowa. Nandi wutuba: ‘Kubotama kwidi tsundu beni, mvandi kumuvukisa bubu.’ (Tanga 1 Petelo 3:20, 21.) Nzaza yimonisa kivisa kwidi batu ti Nowa waba tomba kuvanga luzolo lu Nzambi mu ntima woso. Nowa wuvanga mu ntim’andi woso kisalu Yave kamvana. Mu kibila ki kiminu kyandi, Yave wumvukisa ayi dikanda dyandi mu khuka minlangu. Mbi tulenda longuka mu mambu Petelo katuba?

⁴ Bo batu bamona nzaza, bazaba ti Nowa wuba kiminu mu Nzambi. Bo batu bammona mutu wumbotama, bawu bankikinina ti nandi wuyivana kwidi Yave mu kibila ki kiminu kadi mu Klisto. Buka Nowa, batu bambotama bafweti tumamana Nzambi ayi kuvanga kisalu nandi kavana. Dedi bo Yave kavukisila Nowa mu khuka minlangu, nandi wala vukisa bisadi byandi bikwikama babotama mu thangu kela bunga nza yi Satana. (Malako 13:10; Nzaikusu 7:9, 10) Diawu, nkinza beni kukivana kwidi Yave ayi kubotama. Bukyedika, mutu wunnatinanga mu kusakana makani matedi kubotama, kalenda zimbisa luzingu lu mvu ka mvu.

5. Mbi tunkwiza longuka mu dilongi adidi?

⁵ Bo tuma zaba ḿfunu widi mu kubotama, tufweti zaba mimvutu mi byuvu bitatu abibi: Mbi Kibibila kintuba mu matedi kubotama? Mbi mutu kafweti vanga theti ava nandi kubotama? Kibila mbi tufweti tebukilanga moyo nkinza widi mu kubotama bo tunlonga bana bitu voti minlonguki mitu mi Kibibila?

MBI KIBIBILA KITULONGA MU MATEDI KUBOTAMA

6, 7. (a) Mbi binsundula mbotumunu yi Yoane? (b) Mbotumunu yinani yiba diswasana mu zyazyoso, ayi mu kibila mbi?

⁶ Mu Kibibila, mutu wutheti wubotika bankaka wuba Yoane Mbotiki. (Matai 3:1-6) Kibila mbi batu bayendila kwidi nandi mwingi kubotama? Bawu bavangila mawu mwingi kumonisa ti banyonga mu masumu mawu, voti mwingi kumonisa ti bawu bakikinina ti babundula Nsiku wu Mose ayi babalula mavanga. Vayi vadi mbotumunu yinkaka yilutidi nkinza ayi yidi diswasana Yoane kavanga. Yoane wuba lwaku lunneni lu kubotika Yesu, mwana wuvedila wu Yave. (Matai 3:13-17) Yesu kasa sumuka ko. Diawu kasa tombulwa ko kuvilula madyela. (1 Petelo 2:22) Vayi, kibila mbi Yesu kabotimina? Mwingi kumonisa ti nandi wuba wukubama mu kukivana mu kuvanga luzolo lu Nzambi.​—Ebeleo 10:7.

⁷ Bo Yesu katona kusamuna, minlonguki myandi mvandi mitona kubotika bankaka. (Yoane 3:22; 4:1, 2) Batu boso baba botamanga kibila bawu bafungula masumu bavola mu kulevula Nsiku wu Mose. Angi kuntwala Yesu wufwa ayi wuvulubuka, baboso batomba kuba minlandikini myandi babotama vayi mu kibila kinkaka.

8. (a) Lutumu mbi Yesu kavana bo kavulubuka? (b) Kibila mbi Baklisto bafweti botimina?

⁸ Mu mvu 33, bo Yesu kavulubuka, nandi wuyoluka na 500 di babakala, bakyeto, ḿba ayi bana balezi. Ḿba yawu thangu nandi katuba: ‘Diawu yendanu, lukitula batu ba zitsi zioso minlonguki miama; Lubabotika mu dizina di Tata, di Muana ayi di Pheve Yinlongo. Ayi luba longa bakeba mambu moso momo yilutuma.’ (Matai 28:19, 20; 1 Kolinto 15:6) Yesu wukamba minlandikini myandi bakitula batu minlonguki. Woso wutidi kuba kilandi kyandi, voti kunata “vangu” kyandi, kafweti kubotama. (Matai 11:29, 30) Mwingi kusadila Nzambi mu phila nandi kanzolanga, mutu kafweti kikinina ti Nzambi wunsadilanga Yesu mwingi kuvanga luzolo lwandi. Bosi mutu beni kalenda botama mu luzolo lu Yave. Mu Kibibila mwidi bivisa biwombo bimmonisa ti minlandikini mi Yesu bazaba ḿfunu widi mu kubotama. Bawu basa yindula ko ti bafweti vingila theti bosi kubotama.​—Mavanga 2:41; 9:18; 16:14, 15, 32, 33.

BIKA KUVINGILA BENI MWINGI KUBOTAMA

9, 10. Mbi tulenda longuka mu matedi mbotumunu yi dibakala mwisi Etiopi ayi Saulo?

⁹ Tanga Mavanga 8:35, 36. Dibakala dimweka mwisi Etiopi, wukikinina kiminu ki basi Yuda. Nandi wuyenda ku Nzo Yinlongo ku Yelusalemi mwingi kubwongimina Nzambi ayi waba vutuka ku nzo’andi. Mu thangu beni, mbasi yi Yave yifila Filipi mwingi kanlonga, ayi nandi wunlonga ‘tsangu zimbote zitedi Yesu.’ Bwidi dibakala mwisi Etiopi kamwena mawu? Nandi wuvisa ḿfunu widi mu kukikinina Yesu banga mfumu, nandi waba tomba kuvanga ma Yave kantomba mu Baklisto. Nandi wubotama muna thangu beni.

¹⁰ Kifwani kinkaka kidi ki dibakala dimweka mwisi Yuda baba tedilanga Saulo. Dikanda dyoso di Yuda diba dikwikama mu kusadila Nzambi, angi Yave wuba manga kibila bawu basa ntumukina ko. Saulo waba kikininanga ti basi Yuda baba sadila Nzambi mu bukyedika, diawu nandi kaba tovudilanga Baklisto. Saulo wuzaba ti Yesu wuba wufwa, vayi kilumbu kimweka, Yesu wuntela mbila kuyilu. Bwidi Saulo kamwena mawu? Mu mayangi nandi wukikinina lusalusu lu Anania wuba kilandi ki Yesu. Kibibila kintuba: ‘Nandi wutelama ayi wubotama.’ (Mavanga 9:17, 18; Ngalatia 1:14) Kuntwala bayiza ntedila mvwala Polo. Ngye mamona, bo Saulo kavisa ti Nzambi waba sadila Yesu mwingi kuvanga luzolo Lwandi, nandi wubotama muna thangu.​—Tanga Mavanga 22:12-16.

11. (a) Mbi bimvanganga minlonguki mi Kibibila bubu mibaka makani ma kubotama? (b) Bwidi tummwenanga bo batu bankaka bambotama?

¹¹ Bubu, mammonika mvandi kwidi minlonguki minkaka mi Kibibila, kuba matoko voti bakulutu. Kibila bawu banzolanga ayi bamfyatilanga mambu Kibibila kantuba, ayi badi bakubama mwingi kuyivana kwidi Yave ayi kubotama. Bukyedika, thangu bamvanga dilongi kwidi bambotama mu zikhutukunu zinneni yimbanga thangu yi mayangi. Zimbangi zi Yave bankwangalalanga beni bo minlonguki mi Kibibila bankikana kyedika ayi bambaka makani ma kubotama. Matata bankwangalalanga mvandi bo bana bawu bamvanga mawu. Mu mvu 2017, yilenda vyoka 284.000 di batu babotama mwingi kumonisa ti bawu bayivana kwidi Yave. (Mavanga 13:48) Bukyedika, bawu bazaba ti nkinza beni Baklisto kubotama. Vayi mbi bawu bavanga ava kubotama?

12. Mbi minlonguki mi Kibibila bafweti vanga theti ava kubotama?

¹² Ava minlonguki mi Kibibila kubotama, bawu bafweti longuka theti kyedika kitedi Nzambi, lukanu lwandi mu batu ayi ntoto, ayi mbi kavanga mwingi kuvukisa batu. (1 Timoteo 2:3-6) Bawu bafweti ba kiminu, bila kiawu kyala basadisa kutumukina minsiku mi Nzambi ayi kubika vanga mambu Yave kanlendanga. (Mavanga 3:19) Mawu nkinza madi, bila Yave kalendi kikinina ko mutu wu kivana kwidi nandi vayi wuntatamana kuvanga mambu nandi kanlendanga. (1 Kolinto 6:9, 10) Vadi mvandi mankaka. Batu batidi kuyivana kwidi Yave bafweti kwendanga mu zikhutukunu zi kimvuka, kusamunanga zitsangu zimbote ayi kulonga bankaka. Mawu batu boso batidi kulandakana Klisto bafweti vanga. (Mavanga 1:8) Nlonguki wu Kibibila kafweti vanga theti mambu moso amomo. Bosi kalenda kuyivana kwidi Yave mu nsambu ayi kubotama.

SADISA MINLONGUKI MI KIBIBILA KUBAKA MAKANI MA KUBOTAMA

13. Bo tunlonga bankaka, kibila mbi tufweti tebuka moyo ti bawu bafweti kubotama mwingi kuba Baklisto bakyedika?

¹³ Bo tunsadisa bana bitu ayi minlonguki minka mi Kibibila kuvanga mambu amomo ma nkinza, tufweti tebuka moyo ti batu batidi kuba bilandi bikyedika bi Yesu bafweti botama. Diawu mu thangu yifwana tulendi ba ko boma ku bakamba ḿfunu widi mu kukivana ayi kubotama. Befu tutidi bana bitu ayi minlonguki minkaka mi Kibibila batatamana kukonzuka mu kipheve ayi kubotama!

14. Kibila mbi tufweti bika kukwika bankaka kubotama?

¹⁴ Bukyedika, ni mutu mu befu kalendi ko kukwika, kununguna mwana voti nlonguki wu Kibibila mwingi kubotama. Yave kakwikanga ko batu bansadila. (1 Yoane 4:8) Bo tunlonga bankaka, tufweti kuba sadisa kuvisa nkinza widi mu kuba kikundi kingolo na Yave. Diawu, boti nlonguki wu Kibibila wunkwangalala mu kuzaba kyedika kitedi Nzambi ayi tidi kuvanga mambu moso Baklisto bakyedika bafweti vanga, nandi wela tomba kubotama.​—2 Kolinto 5:14, 15.

15, 16. (a) Vadi mimvu batsikika mutu kafweti ba mwingi kubotama? Sudikisa. (b) Kibila mbi nlonguki wu Kibibila kafweti botimina kheti wubotama mu kinganga kinkaka?

¹⁵ Vasi ko mimvu batsikika mutu kafweti ba mwingi kubotama. Baboso diswasana badi, ayi minlonguki minkaka mi Kibibila minluta konzuka thinu mu kipheve na bankaka. Batu bankaka bambotamanga bo bakhidi matoko, ayi bantatamananga bakwikama mu Yave ti mu bukulutu buawu. Vayi bankaka banlongukanga kyedika ki Kibibila ayi kubotama bo beka beni bakulutu. Bankaka kuvyoka 100 di mimvu.

¹⁶ Nkyeto wumweka ava kalonguka Kibibila, wumana botama mu binganga biwombo bivyakana. Diawu kayuvudila nlongisi’andi wu Kibibila ti nandi kafweti bwe botama. Nlongisi’andi wummonisa matangu ma Kibibila mamvana mvutu wu kyuvu kyandi. Bo nandi kavisa mantuba Kibibila, kheti 80 di mimvu kaba, nandi wubotama. Mbi tulenda longuka mu kifwani akiki? Yave kalenda kikinina to mbotimin’itu befu kuzaba kyedika kitedi luzolo lwandi. Kheti tubotama mu kinganga kinkaka, befu tufweti botama mwingi tuba Zimbangi zi Yave.​—Tanga Mavanga 19:3-5.

17. Mbi kadika mutu kafweti yindula mu matedi kilumbu kambotama?

¹⁷ Kilumbu mutu kambotama kimbanga kilumbu ki mayangi. Yimbanga mvandi thangu yimbote yi kuyindudila mbi binsundula kukivana ayi kubotama. Disi ko dyambu dilwelu kununga kuvanga mamoso mantombolu mwingi kuba wumweka mu Baklisto bakyedika. Kibila bo banlandakana Yesu, bafweti ‘bika kuzingila mu diambu di bawu veka vayi mu diambu di mutu wowo wufwila mu kibila kiawu ayi wuvulubuka.’​—2 Kolinto 5:15; Matai 16:24.

18. Byuvu mbi twala tubila mu dinlongi dinkwiza?

¹⁸ Dedi bo tuma longukila mu dilongi adidi, makani ma kuba kisadi kikyedika ki Nzambi, masi ko mambu ma kusakana. Kiawu kibila mam’andi na Malia kayiyuvudila byuvu bidi va thonono dilongi. Boti ngye widi tata voti ngudi, ḿba wulenda yikuvusa: ‘Bukyedika ti mwan’ama mafwana mwingi kubotama? Mwan’ama mavisa mambu mawombo matedi Yave mwingi kayivana kwidi nandi? Mwan’ama kafweti kota theti kikola kinangama ayi kusala ava kabotama? Boti mwan’ama vodidi disumu dingolo bo kammana kubotama?’ Mu dilongi dinkwiza twala tubila matedi byuvu abibi. Ayi twala longuka mbi bilenda sadisa matata badi Baklisto babika kumona boma mu thangu mwana kantomba kubotama.