Mambu Wulenda Vanga Mwingi Ndongukulu’aku yi Kibibila Yiba Yimboti ayi Wuluta Baka Ndandu

Yosua wuntanga minsiku; bibaka bi Yeliko bidi mu kubwa vayi nzo yi Lahabi yisa tulula ko; Yosua wunanguna myoko ku yilu ayi wusambila

YOSUA waba twadisa dikabu dyoso di Isaeli mwingi dikota ku Ntoto Yave Kakanikisa. Diba dyambu diphasi di kuvanga. Vayi Yave wunkindisa bo kankamba: ‘Ba kibakala ayi kindama.’ Nandi wukamba Yosua ti na kutanga ayi kutumukina minsiku, wela baka makani mu ndwenga ayi ndandu mu luzingu.—Yosua 1:7, 8.

Twidi mu kuzingila mu ‘thangu yi ziphasi,’ diawu luzingu lwitu lulenda ba mvandi phasi. (2 Timoteo 3:1) Boti tutidi kubaka mamboti mu luzingu dedi Yosua, tufweti landakana zindubu Yave ka tuvananga. Tufweti tanga Kibibila kadika kilumbu ayi kusadila mambu tunlonguka mwingi kubaka makani mamboti.

Vayi bawombo mu befu tukhambu zaba bwidi bu kulongukila, voti tuzolanga ko kulonguka. Angi ndongukulu yi Kibibila yi ngye veka nkinza beni yidi. Bila wala bakula mambu mawombo mala kusadisa wuluta baka ndandu mu ndongukulu’aku yi Kibibila ayi kubwela vangila yawu mu mayangi. Mwingi wuzaba mbi wulenda vanga tala quadro yintuba “Mambu Wulenda Vanga.”

Nsoniki mweka wu minkunga wuyimbila: ‘Thwadisa mu nzila yi zithumu zyaku, bila muawu yimbakilanga mayangi.’ (Minkunga 119:35) Ngye mvaku wulenda baka mayangi mu kulonguka Dyambu di Nzambi. Ayi wala bakula mambu mawombo mamboti mala kusadisa wutatamana kulonguka Kibibila.

Kheti wisintwadisa ko dikabu dedi Yosua, ngye widi mambu ma kutatisa mu luzingu lwaku. Diawu fweti bela dedi Yosua mu kulonguka ayi kutumamana Dyambu di Nzambi. Ngye vanga mawu, wala baka makani mu ndwenga ayi wala baka mamboti mu luzingu.

MAMBU WULENDA VANGA

Sambila ava kulonguka. Mayindu ma Yave madi mu Kibibila, mawu masonimina mwingi befu tubaka ndandu. Diawu bo wuntanga Kibibila, dinda Yave lusalusu mwingi wuvisa ma wuntanga, kutebukila mawu moyo ayi kusadila mawu mwingi wubaka makani mamboti mu luzingu.—Esala 7:10.
Wuyivana byuvu bo wuntanga Kibibila voti bilongulu binkaka bi Kibibila. Wulenda yikuvusa: ‘Mbi mambu amama makundonga matedi Yave? Bwidi mawu madidi kithwadi na tsangu yilutidi nkinza mu Kibibila? Bwidi yilenda sadila mambu amama mwingi kusadisa bankaka?’
Fyongunina buboti mambu wunlonguka. Vunda nkadu, ayi yindula to mu mambu matanga. Wuyiyuvusa: ‘Bwidi mawu manyikunina mabanza mami? Kibila mbi? Bwidi mawu mammonisina kyedika ki mambu yimonikina kumbusa, ma yimmonikina bubu voti malenda kumbonikina mu bilumbu binkwiza? Bwidi yilenda sadila minswa amimi mi Kibibila voti dilongi adidi mu luzingu lwami? (Yobi 23:5; Minkunga 49:3) Bo wumfyongunina mawu, yindula boti wulenda nunga kusudikisa kibila mbi Yave kankandiminanga dikabu dyandi babika kuvanga mambu mankaka. Voti, yindula mambu mbi malenda monika boti mutu bantubila mu matangu beni wuvangila mambu mu phila yinkaka.—Deutelonomi 32:28, 29.
Sadila mayindu maku bo wuntanga Kibibila. Ngye wulenda yindula kifwani kintubila Yosefi mu thangu zikhomba zyandi zinsumbisa kwidi basi Isamaeli? (Ngenesi 37:18-28) Mbi wummona, wunkuwa ayi fhuku mbi wunkuwa? Wukitula va kibwangu ki batu bantubila mu mambu wuntanga. Mbi bawu baba yindula ayi mabanza mbi baba? Ngye kusadila mboti mayindu maku, ndongukulu’aku yinkwiza luba ba tsundu.
Sadila bilongulu binkaka bi kulongukila. Biawu bilenda kusadisa wubwela fyongunina ma wuntanga. Tomba longuka bu kusadila bilongulu bidi mu mbembu’aku, kheti bidi mu khondi mayo voti binkwizila mu minkanda. Bika mona boma kudinda lusalusu mwingi kulonguka bu kusadila bilongulu beni. Dedi Índice das Publicações da Torre de Vigia voti Guia de Pesquisa Para Testemunhas de Jeová bilenda kusadisa wubakula mambu mawombo ayi tsudukusu yi matangu ma Kibibila. Sadila mvandi zi apêndice zidi mu Tradução do Novo Mundo da Bíbila Sagrada boti zidi mu mbembu wulenda tanga. Ziawu zidi mambu mantubila bibwangu, thangu, kizitu ki byuma, phila baba zongilanga biawu ayi mambu mankaka.
Vutukila mambu malutidi nkinza. Kuvanga mawu kwala kusadisa kutebuka moyo mambu ngye belonguka ayi kusadisa mvandi bankaka. Vadi dyambu wulenda sadila mu kisalu ki kusamuna? Mu kuvanga mawu, ngye wala tebukanga moyo mambu malutidi nkinza, ayi bankaka balenda baka mvandi ndandu mu ndongukulu’aku.