Tsudukusu Bikuma bi Kibibila

A B C D E F G H I J K L M N O P Q R S T U Y Z

A

• Abibe.

  Dizina di ngonda yitheti mu kalendario yi basi Yuda, ayi dizina di ngonda yisambuadi mu zikalendario zinkaka. Dizina beni dinsundula kuvela “mbongu yitheti”; yaba toninanga va khati tsika ngonda yi Março nati va khati tsika ngonda yi Abril. Bo basi Isaeli babasika ku buvika ku Babiloni, batedila ngonda beni, Nisã. (Deu. 16:1)— Tala Ap. B15.

• Absinto.

  Mintindu miviakana mi minti midi beni nduli ayi mfuku yingolo. Mu Kibibila, kikuma absinto bansadilanga kiawu mu kifuani, muingi kutubila mambu ma nduli, ma kitsuza, ma buvika, mambu makhambulu masonga ayi kubalukila kiedika. Mu Nzaikusu 8:11, kikuma “absinto” kinsundula, kiuma kidi nduli voti kiyimbu.—Deu. 29:18; Zin. 5:4; Yel. 9:15; Amo. 5:7.

• Acaia.

  Mu Masonoko ma Kingeleko kikuma Acaia kinsundula divula di Loma didi ku sul yi Grécia. Divula dilutidi nkinza ku Acaia diba, Kolintu. Kizunga kioso ki Peloponeso ayi parte central da Grécia continental, diba mu khati divula di Acaia. (Mav. 18:12)— Tala Ap. B13.

• Adar.

  Bo basi Yuda babasika mu buvika ku Babiloni, bawu baba tedilanga ngonda yi kumi wadi mu dizina adiodio, ayi mu zikalendario zinkaka, yawu yiba ngonda yinsambanu. Ngonda beni yaba toninanga va khati tsika Fevereiro nati va khati tsika Março (Est. 3:7)— Tala Ap. B15.

• Alabastro.

  Didi dizina di kibudika bavangila mu dimanya didi ku Alabastron ku Ngipiti baba tulanga malasi. Bibudika beni biba miunu miluelu baba zibikanga mukhambu phasi, muingi malasi beni ma thalu mabika kudukuka. Dimanya beni mvandi bayiza tona ku ditedila alabastro.— Mala 14:3.

• Alamaiku.

  Yidi mbembu yidedakana na mbembu yi kiebeleo ayi mvandi yinsadilanga yoyawu alfabeto. Basi arameu, bawu batona kutuba mbembu beni, vayi ku ntuala, yawu yiyiza ba beni yizabakana mu kibila ki lungosu ayi mu nguizani divula di Asilia ayi Babiloni bayiza ba. Ayi yawu mvandi baba luta tubanga ku Persa. (Esa. 4:7) Mua zibuku zi Kibibila dedi, Esala, Yelemia ayi Danieli, zisonimina mu alamaiku.— Esa. 4:8–6:18; 7:12-26; Yel. 10:11; Dan 2:4b–7:28.

• Alamote.

  Kikuma bansadilanga mu minkunga, kinsundula “bakietu bakhambu zaba dibakala.” Ḿba mvandi yinsundula mbembu yo bakietu baba bikhupa babe kuimbilanga, mvandi baba sadilanga kikuma beni muingi kumonisa vama bafueti buela makisa mbembu.— 1Lu. 15:20; Min. 46; va thonono.

• Alfa ayi ômega.

  Mazina ma kisona kitheti ayi kitsuka ki alfabetu yi mbembu yi kingeleko. Mazina amomo, bansadila mawu khumbu zitatu muingi kutubila zithangununu zi Nzambi mu buku yi Nzaikusu. Mu matangu amomo, kikuma akiokio kinsundula “wutheti ayi wutsuka” ayi “thonono ayi tsukulu.”— Nza. 1:8; 21:6; 22:13.

• Alimangedoni.

  Kikuma ki kiebeleo Har Meghiddóhn, kinsundula “mongo wu Megido.” Kikuma beni bansadila kiawu muingi kutubila “kilumbu ki mvita wunneni wu Nzambi, Nkua Ngolo Zioso”, wo mintinu mioso mi nza bala kutakana muingi kunuanisa Yave. (Nza. 16:14, 16; 19:11-21)— Tala ZIPHASI ZINGOLO.

• Aliopago.

  Mongo wuzangama wuba ku Atena, ku nordeste yi Acrópole. Diba mvandi dizina baba tedilanga nzo yi lufundusu ayi mimfundisi baba kutakananga kuna. Polo bannata ku Aliopago kuidi batu balonguka beni baba tedilanga zitoiko ayi ziepikoleu muingi kasudikisa mambu kaba kikininanga.— Mav. 17:19.

• Amem.

  “Bika masalama” voti “bukiedika.” Kikuma kiyizila mu mbembu yi kiebeleo ʼamán, kinsundula “kuba wukuikama, kuba wulufiatu”. Baba tubanga “amem” muingi kukikinina tsila, nsambu voti muingi kukikinina mambu. Mu buku yi Nzaikusu, “Amem” yidi thangununu bantedilanga Yesu.— Deu. 27:26; 1Lu. 16:36; Nza. 3:14.

• Apostolo.

  Kikuma akiokio kinsundula “mutu wufilu.” Kikuma akiokio ba kisadilanga muingi kutubila matedi Yesu ayi mua batu bo batuma muingi kue sadisa bankaka. Nduka zikhumbu zioso, ba kisadila muingi kutubila matedi 12 di minlandikini mi Yesu bo nandi kasola muingi baba zimvuala ziandi.— Mala 3:14; Mav. 14:14.

• Arã; basi Arã.

  Batu bayizila mu nkuna wu Arã, muana wu Sem, no waba zingilanga ku kizunga baba tedilanga mu kiebeleo Arã. Kizunga beni kiaba toninanga mu miongo mi Líbano nati ku Mesopotâmia, ayi mvandi kutonina mu mongo wu Tauro, ku khonzu norte, nati ku Damasco, ku sul, ayi kubue komina nkadu kuntuala. Mua thangu kuntuala, bayiza tedila kizunga beni Silia, ayi batu baba kalanga kuna baba ku batedilanga basi Silia.— Nge. 25:20; Deu.  26:5; Hos. 12:12.

• Astorete.

  Nzambi yinkietu yi basi Kanani, no bawu baba kikininanga ti waba kuba sadisanga kununga mvita ayi kubuta. Nandi wuba nkazi Baal.— 1Sa. 7:3.

• Azazel.

  Dizina di kiebeleo dinsundula “khombo yizimbala”. Mu kilumbu ki kudindila nlemvu wu masumu, khombo baba solanga muingi kue zimbisa ku thandu, baba kuyifilanga ku thandu, mawu maba sundula ti yawu yaba natanga masumu mo dikabu divola mu mvu beni.— Lev. 16:8, 10.

• Azia.

  Mu Masonoko ma Kingeleko, diba dizina di divula di Loma. Divula beni diaba toninanga ku oeste ko bubu bantedilanga Turquia ayi mvandi mua biseki dedi, Samos ayi Patamo. Divula diandi dilutidi diba Efeso. (Mav. 20:16; Nza. 1:4)— Tala Ap. B13.

B

• Baal.

  Nzambi yi basi Kanani, no baba kikininanga ti wuba mfumu wu diyilu waba vananga zimvula ayi mbosi. Kikuma “Baal” mvandi baba ku kisadilanga muingi kutubila zinzambi zinkaka zikhambulu beni mfunu. Kikuma akiokio ki kiebeleo, kinsundula “mfumu; wuvuidi”.— 1Mit. 18:21; Lom. 11:4.

• Bafalisi.

  Diba dingumba di batu baba mu kinganga ki basi Yuda baba kinzikanga beni mu sekulu yitheti. Bawu basa butukila ko mu nkuna wu zinganga nzambi, vayi bawu baba sabisanga mu phila baba landikininanga minsiku. Mvandi baba tadilanga bikhulu dedi mueka na minsiku. (Mat. 23:23) Bafalisi baba lendanga bikhulu bi basi Grécia, ayi mu kuba batu bapisuka mu minsiku, bawu baba beni kimfumu kuidi dikabu. (Mat. 23:2-6) Bankaka mu bawu baba mu dingumba di Sinédrio. Khumbu ziwombo baba sombusanga Yesu mu matedi kisabala, kulandakana bikhulu, kuba nkangulu na minsumuki ayi batu baba kongulanga ziphaku. Bankaka bayiza ba minlandikini mi Yesu, dedi Saulu musi Tarso.— Mat. 9:11; 12:14; Mala 7:5; Luk. 6:2; Mav. 26:5.

• Bakeluba.

  Zidi zimbasi zidi beni mangolo, ayi badi biyeku binkinza. Bawu badi disuasana na ziserafins.— Nge. 3:24; Eso. 25:20; Yes. 37:16; Ebe. 9:5.

• Baklistu.

  Didi dizina Nzambi kavana minlandikini mi Yesu Klistu.— Mav. 11:26; 26:28.

• Bana ba Aloni.

  Badi batu babutukila mu nkuna wu Aloni, ntekulu wu Levi. Aloni, nandi mutu wutheti basola muingi kuba nkulutu wu zinganga nzambi mu Minsiku mi Mose. Bana ba Aloni baba vanganga kisalu ki zinganga nzambi ku Nzo Yinlongo ayi ku Tempelu.— 1Lu. 23:28.

• Basadusi.

  Baba batu baba mu kinganga ki basi Yuda, bawu baba bisina, zinganga nzambi, ayi baba kimfumu mu bisalu bioso biaba vangamanga ku tempelu. Bawu baba lendanga bikhulu ayi mambu Bafalisi baba kikininanga. Mvandi babasa kikininanga ko mu luvulubukusu, ayi ti vadi zimbasi. Basadusi baba lendanga Yesu.— Mat. 16:1; Mav. 23:8.

• Basi Media; Media.

  Dikabu diyizila kuidi Madai, muana wu Jafé. Bawu baba zingilanga ku kibuangu kidi va mongo iraniano, kio kiyiza ba kizunga ki basi Media. Basi Media bayiza ba kithuadi na basi Babiloni muingi kunuanisa basi Asilia. Mu thangu beni, Pelesia diba divula di basi Media, vayi Ciro wuyiza babalukila, bosi Media yiyiza ba kithuadi na Pelesia, mu phila ayoyo, bafonda kintinu ki Medo-Pelesia. Kintinu akiokio, kitulula kintinu ki Neobabilônico mu mvu 539 ATK. Mu Pentekoti yi mvu 33 TK, ku Yelusalemi, mvandi muba basi Media. (Dan. 5:28, 31; Mav. 2:9)— Tala Ap. B9.

• Basi Samalia.

  Va thonono, baba sadilanga kikuma akiokio muingi kutubila basi Isaeli baba kalanga mu kintinu ki kumi di minkuna ku norte. Vayi bo basi Asilia banunga basi samalia mu mvu 740 ATK, bayiza tona kusadila kikuma akiokio muingi kutubila matedi zinzenza basi Asilia banata kuna. Mu bilumbu bi Yesu, dizina adiodio disa ba ko kithuadi na pulitika. Vayi, baba sadilanga dizina adiodio muingi kutubila matedi binganga biba bifikama na mavula ma Siquém ayi Samalia, bawu baba kikininanga malongi madi disuasana na mo basi Yuda baba kikininanga.— Yoa. 8:48.

• Bato.

  Kidi kizongulu baba zongilanga biuma bi nlangu. Mu kutadila bibasa batu bamfionguninanga biuma bikhulu babakula, muba musonama “bato”, tulenda tuba ti kizongulu akiokio kidi kidedakana na 22 di zilitro. Nduka bizongulu binkaka banzongilanga biuma biyuma, ayi biuma bi nlangu bantubila mu Kibibila, ba bizongilanga mu kutadila kizongulu bantedilanga bato. (1Mit. 7:38; Yeh. 45:14)— Tala Ap. B14.

• Batu bakutakana.

  Nkangu wu batu bantumisa mu lukutukunu. Mu Masonoko ma Kiebeleo, kikuma akiokio khumbu ziwombo kintubila dikabu di Isaeli bo baba kutakananga mu minkungi mi kubuongimina, voti mambu mankaka matedi dikabu madi beni nkinza.— Deu. 16:8; 1Mit. 8:5.

• Belizebu.

  Dizina bavana Satana, mfumu yi ziphevi zimbi. Ḿba diawu dizina baba tedilanga Baal-zebub, Baal no baba buongiminanga kuidi basi Filisteia ayi ku Ecrom.— 2 Mit. 1:3; Mat. 12:24.

• Bidia bi mfumu va masika ma builu.

  Biba vinu ayi dipha dikhambulu luvi, biawu binsundula menga ayi nyitu yi Klistu. Baba vangilanga nkungi beni, muingi kutebukilanga moyo lufua lu Yesu. Mu Masonoko, kukemba nkungi awowo widi nsiku baklistu bafueti landakana, ayi nkungi beni mvandi ba wutedilanga “Mbambukulu moyo.”— 1Ko. 11:20, 23-26.

• Bikumu bizangama binlongo.

  Biba bibuangu baba buongiminanga Nzambi, biba mu miongo voti va kibuangu kizangama. Bikumu bizangama binlongo, khumbu ziwombo baba sadilanga biawu mu mbuongimini yi Yave, vayi nduka zikhumbu zioso baba kubisadilanga mu mbuongimini yi luvunu.— Zit. 33:52; 1Mit. 3:2; Yel. 19:5.

• Bilumbu bitsuka.

  Bikuma abiobio ayi binkaka dedi, “thangu bilumbu bitsuka”, ba bisadilanga mu zimbikudulu zi Kibibila muingi kutubila thangu yala manina kumonika mambu mankinza. (Yeh. 38:16; Dan. 10:14; Mav. 2:17) Mu kutadila kadika mbikudulu, kikuma akiokio kilenda sundula, mua thangu voti mimvu miwombo. Kibibila kinluta sadila kikuma akiokio muingi kutubila matedi “bilumbu bitsuka” bi nza ayiyi, thangu Yesu Klistu kala monika.— 2Ti. 3:1; Tia. 5:3; 2Pet. 3:3.

• Binuanunu.

  Bidi bikhutu masodi baba vuatanga muingi kuyikieba bo bannuana mvita. Biawu biba, phu yi kisengu, kikhutu ki kisengu, phonda, nkaku wu kisengu, ayi kiuma ki kukiebila mvindi kulu.— 1Sa. 31:9; Efe. 6:13-17.

• Bitumba bi dikanda.

  Ziba zinzambi zi bitumba zi dikanda. Khumbu ziwombo baba sadilanga biawu muingi kuzaba mambu mankuiza kuntuala. (Yeh. 21:21) Binkaka biba kutola dedi mutu, ayi binkaka biba biluelu. (Nge. 31:34; 1Sa. 19:13, 16) Batu bamfionguninanga biuma bikhulu, babakula ku Mesopotâmia biuma bimmonisa ti, bitumba bi dikanda, biaba monisanga nani wunkuiza vua kiuka. (Ḿba diawu Lakeli kabongila bitumba bi dikanda bi tat’andi.) Vayi ḿba mambu amomo mabasa monikanga ko ku Isaeli, kheti mu thangu Mimfundisi ayi mu thangu Mintinu, baba sadilanga bitumba bi dikanda. Mu biuma ntinu Yosia katulula, mvandi muba bitumba bi makanda.— Mkg. 17:5; 2Mit. 23:24; Hos. 3:4.

• Biuma baba botudilanga dibombi.

  Bidi biuma baba sadilanga ku nzo yinlongo ayi ku tempelu muingi kubotula dibombi voti ḿbufu va kikumu baba vaninanga minkhailu.— Eso. 27:3; 38:3.

• Biuma baba tualanga mu mvita.

  Bisadulu, bibulu voti biuma binkaka bi luvalu baba bonganga kuidi batu bannunga mu mvita.— Yos. 7:21; 22:8; Ebe. 7:4.

• Biuma baba vikilanga malasi.

  Biba bisadulu bivangulu mu wola, palata, voti mu cobre baba sadilanga ku nzo yinlongo ayi ku tempelu, muingi kuvikila malasi.— 2Lu. 26:19; Ebe. 9:4.

• Biuma baba zengilanga minsivu.

  Biuma baba sadilanga ku nzo yinlongo ayi ku tempelu bivangulu mu wola voti cobre. Ayi biawu biba buka luziolo baba zengilanga minsivu mi minda.— 2Mit. 25:14.

• Biuma bi kudokisila.

  Biuma bivangulu mu wola, baba sadilanga ku nzo yinlongo ayi ku tempelu muingi kudokisila voti kuzimisina minda.— Eso. 37:23.

• Braça.

  Kiuma baba sadilanga muingi kuzonga thibu, kiziba voti kuvinda ku nlangu. Braça yimueka yiba 1,8 di zimetro. (Mav. 27:28)— Tala Ap. B14.

• Buazi; Mutu widi buazi.

  Kimbevu kiphasi ki nkanda nyitu. Buazi bantubila mu Kibibila, yidi beni disuasana na mbela bantedilanga buazi bubu, kibila mu thangu yikhulu, bakana ko to batu baba bakananga buazi, vayi mvandi bikhutu ayi zinzo.— Lev. 14:54, 55; Luk. 5:12.

• Bul.

  Dizina di ngonda yi nana mu kalendario yi basi Yuda, ayi ngonda yimmuadi mu zikalendario zinkaka. Dizina adiodio diyizila mu kikuma kinsundula “kubuta mbongu”. Yaba toninanga va khati tsika ngonda yi Outubro nati va khati tsika ngonda yi Novembro. (1Mit. 6:38)— Tala Ap. B15.

• Bundoki.

  Kusadila mangolo mankuizilanga kuidi ziphevi zimbi, muingi kuvangila bankaka mambu mambi. (2 Lu. 33:6).

• Busonga.

  Mu Masonoko, kikuma akiokio kinsundula mambu masulama mu kutadila zithumu zisonga zi Nzambi, matedi mamboti ayi mambi. Mvandi kilenda sundula mutu wusonga va mesu ma Nzambi.— Nge. 15:6; Deu. 6:25; Zin. 11:4; Sef. 2:3; Mat. 6:33.

• Buzina.

  Kikuma ki kiebeleo shohfár kinsundula ziphoka zi dimemi dimbakala baba sadilanga muingi kusika minkunga voti kuvana zindubu.

C

• Cabo.

  Kizongulu baba zongilanga biuma biyuma, cabo mueka yiba 1,22 di zilitro, mu kutadila kizongulu bantedilanga bato. (2Mit. 6:25)— Tala Ap. B14.

• Caldeu; Basi caldeu.

  Dizina baba tedilanga dikabu diaba kalanga ku khonzu delta mu mila mi Tigre ayi Eufrates. Buviokila thangu, baba sadilanga dizina adiodio muingi kutubila divula di Babiloni ayi batu baba kalanga kuna. Kikuma “caldeu” mvandi kinsundula batu balonguka ciencia, binongo, zimbembu ayi zimbuetila. Mvandi baba ku disadilanga muingi kutubila batu baba vanganga bundoki ayi baba fionguninanga zimbuetila.— Esa. 5:12; Dan. 4:7; Mav. 7:4.

• Cássia.

  Widi nti baba vangilanga biuma bidi mfimbu (Cinnamomum cassia). Mvandi baba sadilanga wawu muingi kuvangila malasi ayi baba tulanga wawu mu nzeta baba biekilanga ntinu.— Eso. 30:24; Min. 45:8; Yeh. 27:19.

• Covado.

  Kidi kizongolo baba sadilanga muingi kuzonga zimetro, ayi kidi kidedakana na kinanu ki khokinyi nati va luzala lulutidi kukula lu dikanda. Basi Isaeli baba sadilanga covado yidi 44,5 cm. Mvandi baba sadilanga covado yidi kitesu kilutidi yiba kutola ku sambuadi di makanda ayi yawu yiba 51,8 cm. (Nge. 6:15; Luk. 12:25)— Tala Ap. B14.

D

• Dagom.

  Dizina di nzambi yi basi Filisteia. Kikuma kiyizila dizina adiodio, kisi ko kizabakana, vayi batu balonguka beni, bantubanga ti dizina beni didi kithuadi na kikuma ki kiebeleo dagh kinsundula (mfu).— Mkg. 16:23; 1Sa. 5:4.

• Darico.

  Luba lubongo luvangulu mu wola baba sadilanga ku Persa, luaba zitanga 8,4 g. (1Lu. 29:7)— Tala Ap. B14.

• Dekapoli.

  Didi dizina di kumi di mavula ma basi Grécia, kikuma ki (kingeleko déka, kinsundula “kumi”, ayi pólis, kinsundula “divula.”) Mvandi diba dizina di kizunga ku khonzu leste wu ḿbu wu Ngalili ayi muila wu Yolidani, kuawu kuluta ba mavula beni. Mavula beni maba bibuangu bi lungosu ayi baba monisinanga bikhulu bi basi Grécia. Yesu wuviokila va kizunga akiokio, vayi vasi ko bivisa bimmonisa ti wuyenda muingi kue tala mavula beni. (Mat. 4:25; Mala 5:20)— Tala Ap. A7 ayi B10.

• Denario.

  Luba lubongo basi Loma baba sadilanga, ayi luawu luaba zita 3,85 g. Luba fikula yi Sezali ku khonzu yinkaka. Luba lubongo baba futanga kisadi wunsala mu kilumbu kimueka, ayi luba lubongo baba futilanga “phaku yitedi kadika mutu” yo basi Loma baba kuikanga basi Yuda kufuta. (Mat. 22:17; Luk. 20:24)— Tala Ap. B14.

• Dikalu.

  Makalu maba zipeneu ziwadi baba titikanga kuidi mimvalu. Ayi baba sadilanga beni mawu mu mimvita.— Eso. 14:23; Mkg. 4:13; Mav. 8:28.

• Dikanda.

  Kidi kizongulu bansadilanga muingi kuzonga kukula ku biuma, kinanu kidi kutonina mu luzala lunneni lu dikanda, nati luzala lutsuka lu dikanda dizibuka. Mu kumona ti covado yidi 44,5 cm, buna dikanda didi 22,2 cm mu kukula. (Eso. 28:16; 1Sa. 17:4)— Tala Ap. B14.

• Dikunzi di ziphasi.

  Tsekudulu yi kikuma ki kingeleko staurós, kinsundula dikunzi voti nti, dedi dio ba bandila Yesu. Vasi ko bivisa bimmonisa ti kikuma ki kiebeleo dikunzi, kinsundula dikulusi, dedi dio baba sadilanga mu binganga binkaka mu mimvu miwombo ava Yesu kiza va ntoto. “Dikunzi di ziphasi” kiawu kikuma kimvana tsundu yikiedika yi kikuma staurós mvandi bansadilanga muingi kutubila ziphasi, ayi mambu matsoni minlandikini mi Yesu bankuiza viokila. (Mat. 16:24; Ebe. 12:2).

• Dikunzi dinlongo.

  Kikuma kiyizila mu kiebeleo ʼasheráh kinsundula (1) dikunzi dinlongo dimfuanikisa Axerá, nzambi yinkietu yi basi kanani, no bawu baba kikininanga ti nandi waba kuba sadisanga kubuta, (2) fikula yi naveka nzambi yinkietu Axerá. Nduka makunzi moso manlongo, baba kuma vangilanga mu mabaya.— Deu. 16:21; Mkg. 6:26; 1Mit. 15:13

• Dibaya; Nti.

  Kivingu ki nti, voti ki dibaya baba bandilanga batu. Mu zitsi zinkaka, baba sadilanga dikunzi muingi kubanda nyitu yi mutu muingi yiba kidimbu ki zitsoni va nyalu nguba. Basi Asilia baba bazabakana batu bankua makhema mu mimvita miawu, baba tobulanga zinyitu zi batu mu kusadila makunzi maba mavalu va tsongi. Makunzi beni maba viokilanga mu kivumu nati mambasikila va ntima. Mu nsiku wu basi yuda, batu baba fotu mu kuvanga diambu dimbi, dedi kuvueza Nzambi, voti kubuongimina bitumba, baba kuba vondanga, bosi baba kuba ledikanga va dikunzi, muingi kuvana ndubu kuidi batu bankaka. (Deu. 21:22, 23; 2Sa. 21:6, 9) Basi Loma, khumbu zinkaka baba kanganga batu badi fotu mu makunzi, baba vangila mawu bo mutu beni kakhidi wumonyo, ayi wabe fuilanga vana mu kibila ki khienzu, ki phuila yi nlangu, ki nzala ayi mu kibila ki muinya wungolo. Khumbu zinkaka baba bandanga zitsesi mu mioko ayi mu malu, dedi bo bavangila Yesu. (Luk. 24:20; Yoa. 19:14-16; 20:25; Mav. 2:23, 36)— Tala DIKUNZI DI ZIPHASI.

• Dikunzi.

  Kiuma baba tunganga kiba kitelama muingi kusikimisa bibaka. Makunzi mankaka baba ku matelimisanga banga kidimbu ki minkungi. Basadila makunzi ma kusikimisa biuma ku tempelu ayi mu bibanga biwombo bio Salomo katunga. Batu baba khambu buongiminanga Nzambi, baba sadilanga makunzi manlongo mu mbuongimini yi luvunu, ayi khumbu zinkaka basi Isaeli mvandi baba vanganga mawu. (Mkg. 16:29; 1Mit. 7:21; 14:23)— Tala KAPITELI.

• Dimanya di kunyikina zitheti.

  Didi dimanya divindubuka baba tulanga va mbata dimanya dinkaka muingi kunyikina zitheti nati zinkuiza ba falini. Mu thangu yikhulu, mu zinzo ziwombo bakietu baba sadilanga dimanya muingi kunyika zitheti. Minsiku mi Mose miabe kandiminanga mutu kubonga dimanya di kunyikina zitheti bo bakundeva, kibila diawu baba sadilanga muingi kuvanga mapha mo dikanda bankuiza dia. Baba sadilanga bibulu muingi kudiengumuna mamanya manneni ma kunyikina zitheti.— Deu. 24:6; Mala 9:42.

• Dimanya di thokongo.

  Didi dimanya baba tulanga va thokongo, muingi kusikimisa bibaka biodi. Kikuma akiokio bansadila kiawu muingi kutubila matedi lusersu lu ntoto. Yesu bakuntedila “dimanya di thokongo di lusersu” di kimvuka ki baklistu, kio kidi buka nzo yi kiphevi.— Efe. 2:20; Yob. 38:6.

• Divula di Davidi.

  Didi dizina bavana divula di Jebus, bo Davidi kanunga diawu ayi katunga kuna nzo’andi yi ntinu. Mvandi bantedila diawu divula di Sioni. Kidi kizunga ku sudoeste yi Yelusalemi, ayi diawu divula dilutidi dikhulu.— 2Sa. 5:7; 1Lu. 11:4, 5.

• Diyenga di mbazu.

  Kidi kibuangu bamfuanikisa, kimvikanga mu “mbazu yidi mamanya”, mvandi bantedilanga kiawu “lufua lummuadi”. Batu bakhambu balula mavanga, Satana, mvandi lufua ayi Dibumbi, bala kubikuba va kibuangu beni. Mu kumona ti kivangu ki kiphevi, lufua ayi Dibumbi, bilendi via ko mu mbazu, diawu tulenda tuba ti kibuangu akiokio, kidi to kifuani, kisi ko kibuangu bamvikilanga batu mvu ka mvu. Vayi kinsundula mbungulu yi mvu ka mvu— Nza. 19:20; 20:14, 15; 21:8.

• Dracma.

  Mu Masonoko ma Kingeleko, dracma yinsundula lubongo lu palata basi Grécia baba sadilanga, ayi luawu luaba zitanga 3,4 g. Mu Masonoko ma Kiebeleo, muidi matangu mantubila matedi dracma yivangulu mu wola baba sadilanga mu thangu Persa, lo bandedikisa na darico. (Neh. 7:70; Mat. 17:24)— Tala Ap. B14.

E

• Edom.

  Didi dizina dinkaka di Esau, muana Isaki. Batu babutukila mu nkuna wu Esau voti (Edom) bayiza vua kizunga ki Seir kiba ku miongo mifikama na mar Morto ayi golfo yi Aqaba. Kizunga akiokio mvandi bayiza kitedila Edom. (Nge. 25:30; 36:8)— Tala Ap. B3 ayi B4.

• Efa.

  Kidi kizongulu baba sadilanga muingi kuzongila biuma biyuma, mvandi baba zongilanga kiawu zitheti. Mu kumona ti kiba dedi mueka na kizongulu bantedilanga bato, kizongulu baba sadilanga muingi kuzongila biuma bi nlangu, diawu tulenda tuba ti kiawu kidi 22 di zilitro. (Eso. 16:36; Yeh. 45:10)— Tala Ap. B14.

• Efode.

  Wuba mua nledi voti avental zinganga nzambi baba vuatanga. Nkulutu wu zinganga nzambi waba vuatanga efode yi nkinza muba 12 di mamanya mathalu. (Eso. 28:4, 6)— Tala Ap. B5.

• Efraim.

  Didi dizina di muana wummuadi wu Yozefi. Buviokila thangu, bayiza vana dizina adiodio kuidi mvila wumueka wu basi Isaeli. Bo Isaeli yikabuka mu mintinu miodi, Efraim, wawu mvila wuluta ba wuzabakana bayiza tedila kintinu ki kumi di mimvila.— Nge. 41:52; Yel. 7:15.

• Elodi.

  Dizina di dikanda di mintinu basi Loma babieka, diaba yadilanga basi Yuda. Elodi Wulutidi, wuyiza ba beni wuzabakana bo katunga Tempelu ku Yelusalemi, ayi bo kavana nsua wu kuvonda bana boso ba bilezi, muingi kabaka bu kuvondila Yesu. (Mat. 2:16; Luk. 1:5) Bana bandi Elodi Alikelau ayi Elodi Antipas, baba bieka muingi bayadila kizunga kiaba yadilanga tat’awu. (Mat. 2:22) Mu minyadi mioso baba yadila bizunga binna, Antipas, nandi wuyiza ba wuzabakana buka “ntinu” ayi wuyala mu mimvu 3 ayi ndambu, mu thangu Yesu kavanga kisalu kiandi ki kusamuna, nati mu thangu bantubila mu Mavanga kapu 12. (Mala 6:14-17; Luk. 3:1, 19, 20; 13:31, 32; 23:6-15; Mav. 4:27; 13:1) Bo nandi kamana kuyala, Elodi Angilipa I, ntekulu wu Elodi Wulutidi, wuyiza tona kuyala, ayi bamvonda kuidi mbasi yi Nzambi bo kayala to mu mua thangu. (Mav. 12:1-6, 18-23) Muan’andi Elodi Angilipa II, nandi wuyiza tona kuyala, ayi wuyala nati mu thangu basi Yuda babalukila basi Loma.— Mav. 23:35; 25:13, 22-27; 26:1, 2, 19-32.

• Elul.

  Bo basi Isaeli babotuka ku buvika ku Babiloni, adiodio diawu dizina baba tedilanga ngonda yinsambanu mu kalendario yi basi Yuda ayi ngonda yi kumi mu zikalendario zinkaka. Yawu yaba toninanga va khati tsika ngonda yi Agosto nati va khati tsika ngonda yi Setembro. (Neh. 6:15)— Tala Ap. B15.

• Escriba.

  Mutu waba vanganga zikopia zi Masonoko ma Kiebeleo. Ziescriba, diba dingumba di batu baba bapisuka mu minsiku. Ayi bawu baba lendanga Yesu.— Esa. 7:6 n.; Mala 12:38, 39; 14:1.

• Espelta.

  Yidi ntindu trigu yikhambulu beni yimboti (Triticum spelta). Zitheti ziandi zidi beni phasi kubotuka mu bititi.— Eso. 9:32.

• Estilo.

  Kisadulu baba sadilanga muingi kusonikina mu tuphandu voti mu mabaya. (Min. 45:1; Yes. 8:1; Yel. 8:8) Vaba tombulu estilo voti kiuma kivangulu mu kisengu voti kioso kua kiuma kinkaka kidi ngolo, muingi kusonika mu mamanya voti mu kisengu.— Yob. 19:24; Yel. 17:1.

• Etanim.

  Didi dizina di ngonda yisambuadi yi kalendario yi basi Yuda, ayi di ngonda yitheti mu zikalendario zinkaka. Yawu yaba toninanga va khati tsika ngonda yi Setembro nati va khati tsika ngonda yi Outubro. Bo basi yuda babotuka mu buvika, bayiza tedila ngonda ayoyo tisri. (1Mit. 8:2)— Tala Ap. B15.

• Etiópia.

  Yiba tsi yikhulu yiba ku khonzu Ngipiti. Mu thangu beni, yawu yaba toninanga ku khonzu sul yi Ngipiti nati ku khonzu norte yi Sudão tsi yidi mu bilumbu bitu. Khumbu zinkaka, bansadilaga kikuma akiokio ki kiebeleo muingi kutubila “Cuche.”— Est. 1:1.

• Eufrates.

  Didi dizina di muila wulutidi kutola ku sudoeste yi Ásia, ayi widi wumueka mu mila milutidi midi ku Mesopotâmia. Khumbu yitheti bantubila wawu yidi mu Ngenesi 2:14, ayi wawu muila wunna mu mila miba ku Edeni. Wawu widi ku norte mu zindilu zi ntoto bavana basi Isaeli. (Nge. 15:18; Nza. 16:12)— Tala Ap. B2.

F

• Falawo.

  Yidi thangununu bavana kuidi mintinu baba yadilanga ku Ngipiti. Tanu di zifalawo bantubila mu Kibibila badi, Sisaque, Sô, Tiraca, Neco ayi Hofra. Mazina ma zifarawo zinkaka kubunda bo bazinga mu thangu Abalahami, Mose ayi Yozefi, basintubila ko mawu mu Kibibila.— Eso. 15:4; Lom. 9:17.

• Filistia; Basi Filistia.

  Diba dizina di kibuangu kiba ku ndeku sul yi Isaeli. Basi Filistia baba zinzenza ku Kreta ayi baye zingila ku kibuangu beni. Bawu baba nunga kuidi Davidi, vayi basa kikinina ko kusala mu kithuadi na basi Isaeli, ayi bayiza ba zimbeni zi basi Isaeli. (Eso. 13:17; 1Sa. 17:4; Amo. 9:7).

• Fulu yi mbazu.

  Kibuangu kiba mbazu baba sadilanga muingi kusulumuna bisengu ayi biuma binkaka. Mvandi baba kisadilanga muingi kuvanga zindonga, ayi biuma binkaka bivangulu mu mamanya. Mu thangu yikhulu, baba sadilanga fulu yi mbazu muingi kuvanga mateya. Mvandi baba sadilanga fulu yi mbazu muingi kuvanga cal.— Nge. 15:17; Dan. 3:17; Nza. 9:2.

G

• Gera.

  Kizitu kindedakana na 0,57 g. Yiba dedi mueka na kitini ki 20 ki sikulu yimueka. (Lev. 27:25)— Tala Ap. B14.

• Gitite.

  Kikuma tukhambu zaba buboti bansadilanga mu minkunga, kiawu kiyizila mu kikuma ki Kiebeleo, gath. Mu kumona ti gath yinsundula, kibuangu ki kukamina vinu, bankaka bankikininanga ti “gitite” kidi kisiku baba bundisanga na minkunga, mu thangu baba kamanga vinu.— Min. 81: va thonono.

• Gomor.

  Kidi kizongulu ki biuma biyuma, kindedakana na 2,2  di zilitro. Kiawu mvandi kiba kidedakana na kikhuku ki kumi ki efa yimueka. (Eso 16:16, 18)— Tala Ap. B14.

H

• Helime.

  Nzambi yi basi Grecia, muana wu Zeusi. Mu kumona ti bawu baba kikininanga ti Helime wuba mvuala wu zinzambi, ayi nzambi wupisuka, diawu batedila Polo mu dizina adiodio bo kaba ku Listra.— Mav. 14:12.

• Him.

  Kidi kizongulu baba sadilanga muingi kuzonga biuma bi nlangu. Ayi diba dizina baba tedilanga kizongulu beni. Kiawu kiba 3,67 di zilitro. Mu kutadila mambu nta kinongo Josefo katuba ti, him yimueka yiba zikoro wadi baba sadilanga ku Atena. (Eso. 29:40)— Tala Ap. B14.

• Hissopo.

  Widi nti widi meza ayi matafi maluelu baba sadilanga muingi kumuaka menga voti nlangu, muingi kudiodisa batu voti biuma. (Origanum maru; Origanum syriacum). Hissopo bantubila mu buku yi Yoane, ḿba yiba manjerona, baba kanganga mu mua nti, kibila mua nti beni wuba wufuana muingi kukanga esponja ayi kubuika wawu mu vinu yiba ngami, ayi kunonuna wawu nati mu munu wu Yesu.— Eso. 12:22; Min. 51:7.

• Horebe; Mongo wu Horebe.

  Kibuangu kidi mongo kidi ku ndeku mongo wu Sinai. Mvandi didi dizina dinkaka bantedilanga mongo wu Sinai. (Eso. 3:1; Deu. 5:2)— Tala Ap. B3.

I

• Ilírico.

  Diba divula di Loma ku khonzu noroeste yi Grécia. Tusa zaba ko buboti boti Polo wusamuna ku Ilírico, vayi, mu kisalu kiandi ki kusamuna, nandi wuvanga viage nati ku kizunga akiokio. (Lom. 15:19)— Tala Ap. B13.

• Isaeli.

  Dizina Nzambi kavana kuidi Yakobi. Bosi, nkun’andi woso bayiza tona kuba tedila mu dizina adiodio. 12 di bana ba Yakobi, khumbu ziwombo ba kuba tedilanga bana ba Isaeli, nzo yi Isaeli, dikabu di Isaeli, babakala ba Isaeli, voti basi Isaeli. Dizina Isaeli, mvandi baba sadilanga diawu muingi kutubila matedi kintinu ki kumi di mimvila ku khonzu norte, kio kiyiza ba kikabuka na kintinu ki Yuda ku khonzu sul. Kuntuala, bayiza tona kusadila kikuma akiokio muingi kutubila matedi baklistu basolu, “Isaeli yi Nzambi”.— Nga. 6:16; Nge. 32:28; 2Sa. 7:23; Lom. 9:6.

J

• Jedutum.

  Kidi kikuma tukhambu zaba buboti tsundu, kidi va thonono zikapu 39, 62 ayi 77 zi Minkunga. Mambu madi va thonono zikapu aziozio, ḿba ziba zithuadusulu muingi kusikila minkunga. Ḿba ziaba sundulanga phila voti bisikulu bi minkunga. Vaba nyimbidi wumueka musi Levi baba tedilanga Jedutum, diawu ḿba phila ayoyo yi kuyodila, voti kisikulu akiokio ki minkunga, kidi nguizani ayi nandi voti bana bandi.

• Jejum.

  Kubaka makani ma kukhambu dia mu mua thangu. Basi Isaeli baba vanganga jejum mu kilumbu ki kudindila nlemvu wu masumu, mvandi mu thangu ziphasi, ayi bo baba tombanga thuadusulu yi Nzambi. Basi Yuda basikika khumbu zinna kadika mvu muingi kuvanganga jejum mu kutebukila moyo mambu maphasi baviokila. Baklistu bubu, basi ko mu lukuiku lu kuvanga jejum.— Esa. 8:21; Yes. 58:6; Luk. 18:12.

K

• Kanani.

  Wuba ntekulu Nowa, ayi wuba muana wunna wu Cã. 11 di minkunu bayizila mu Kanani, buviokila thangu bayezingila ku kizunga kiba ku khonzu leste yi Mediterrâneo, va ndeku divula di Ngipiti ayi Silia. Baba tedilanga kibuangu beni “ntoto wu Kanani”. (Lev. 18:3; Nge. 9:18; Mav. 13:19)— Tala Ap. B4.

• Kapiteli.

  Bidi biuma batula va mbata makunzi muingi kubuongisa mawu. Makunzi ma mamuadi baba ku matedilanga Jaquim ayi Bowazi ayi mawu maba va khotolo tempelu yi Salomo. Ayi zikapiteli beni ziba zizangama. (1Mit. 7:16)— Tala Ap. B8.

• Kasu yi luwawanu.

  Yidi kasu yivangulu mu mabaya ma acácia, bavinda wola, ayi yiba ku Kibuangu Kilutidi Kinlongo ku nzo yinlongo, vayi mu mimvu kuntuala, yiba ku Kibuangu Kilutidi Kinlongo ku tempelu yo Salomo katunga. Kasu beni yiba tampa yivangulu mu wola, ayi va mbata tampa beni vaba bitumba biodi bi bakeluba baba yitalasananga. Biuma biba mu khati kasu beni bidi, mabaya muadi maba kumi di minsiku. (Deu. 31:26; 1Mit. 6:19; Ebe. 9:4)— Tala Ap. B5 ayi B8.

• Khudulu.

  Yidi thalu bamfutanga muingi kukula mutu va kivika, mu ziphasi, disumu, voti mu mambu mankaka. Khudulu yabasa sundulanga ko to kufuta zimbongo. (Yes. 43:3) Vaba tombuluanga khudulu mu mambu mawombo maviakana. Dedi, bana boso batheti ba babakala ayi bana boso batheti ba mbakala ba bibulu, baba ba Yave. Diawu, vaba tombulu kuba kula muingi babika ba va kivika ki kuvangila Yave kisalu kingolo. (Zit. 3:45, 46; 18:15, 16) Boti ngombi yimbakala yimvanga phasi voti yimvonda mutu, vaba tombulu khudulu muingi kuvukisa mutu vuidi yawu mu lufua. (Eso. 21:29, 30) Vayi babasa kikininanga ko khudulu yi mutu wumvonda wadi yandi mu lutia. (Zit. 35:31) Vayi bulutidi, Kibibila kintubila matedi khudulu Yesu kafuta, muingi kuvukisa batu bantumukinanga Nzambi, va kivika ki lufua.— Min. 49:7, 8; Mat. 20:28; Efe. 1:7.

• Kibuangu bankaminanga biuma.

  Maba mabulu muadi masuasana, basika va dimanya bantedilanga calcária. Baba kaminanga makundi ma vinu va dibulu dilutidi kutola, ayi vinu yaba dodukanga mu dibulu dinkaka diluelu, mu mua nzila yiba va khati. Baba sadilanga bibuangu beni mvandi muingi kusosila nzeta. Bansadilanga mvandi kikuma akiokio muingi kutubila matedi zimfundusu zi Nzambi.— Yes. 5:2; Nza. 19:15.

• Kibuangu ki kusosila.

  Kiba kibuangu kiyalubuka kiba va mbata mongo ayi vaba vevubukanga beni phemu, vawu baba sosilanga mbongu muingi kubotula bititi. (Mat. 3:12)— Tala KUSOSA.

• Kibuangu kiba kunganda.

  Kidi kibuangu kikhambulu muanza kiba kukhati luphangu lu nzo yinlongo. Bosi kuntuala kiba kibuangu kiba kukhati luphangu lunneni lu tempelu. Kikumu ki minkhailu miviku, kiba ku kibuangu kidi kunganda yi nzo yinlongo, ayi kidi kibuangu kiba kukhati tempelu. (Tala Ziapendice. B5, B8, B11.) Kibibila mvandi kintubila bibuangu biba mu zinzo ayi mu zinzo zi mintinu.— Eso. 8:13; 27:9; 1Mit. 7:12; Est. 4:11; Mat. 26:3.

• Kibuangu kilutidi kinlongo.

  Kidi kivinga kiba ku nzo yinlongo ayi ku tempelu, ayi kuawu kuba kasu yi luwawanu. Mu kulandakana Minsiku mi Mose, nganga nzambi nandi to wuba nsua wu kukota ku Kibuangu Kilutidi Kinlongo, ayi waba kotanga kuna khumbu mueka to mu mvu mu kilumbu ki kudindila nlemvu.— Eso. 26:33; Lev. 16:2, 17; 1Mit. 6:16; Ebe. 9:3.

• Kibuangu kinlongo.

  Kivinga kitheti ayi kilutidi kutola ku nzo yinlongo voti ku tempelu, ayi kidi disuasani na Kibuangu Kilutidi Kinlongo. Ku Kibuangu Kinlongo ku nzo yinlongo, kuba kiuma kivangulu mu wola baba tetikanga minda, kikumu kivangulu mu wola muingi kuvikila malasi, meza yi mapha manlongo, ayi biuma binkaka bivangulu mu wola. Vayi ku Kibuangu Kinlongo kiba ku tempelu, kuba kikumu kivangulu mu wola, kumi di biuma bivangulu mu wola bantetikanga minda, ayi kumi di zimeza zi mapha manlongo. (Eso. 26:33; Ebe. 9:2)— Tala Ziapendice. B5 ayi B8.

• Kidimbu.

  Kidi kiuma, voti mambu mutu kamvanga, mammonisa bivisa bi mambu mammonika, voti mala monika.— Nge. 9:12, 13; 2Mit. 20:9; Mat. 24:3; Mav. 1:1.

• Kidimbu kinlongo ki khundudulu.

  Yiba lamina yivangulu mu wola yaba lezama baba tulanga va ntuala thata yi nkulutu zinganga nzambi. Muawu muba musonama mu kiebeleo mambu amama “Bunlongo buidi bu Yave.” (Eso. 39:30)— Tala Ap. B5.

• Kiebeleo.

  Yiba mbembu yi basi Ebeleo. Bo Yesu kaba va ntoto, mu mbembu ayoyo muba bikuma biwombo bi Alamaiku, ayi yawu mbembu Yesu ayi minlandikini miandi baba kolukanga.— Mav. 26:14.

• Kikhuku ki kumi.

  Kidi kitini ki kumi ki biuma bioso mutu kadi baba vananga muingi kubuela mioko bisalu bi Nzambi. (Mala 3:10; Deu. 26:12; Mat. 23:23) Mu kulandakana Minsiku mi Mose, kikhuku ki kumi ki bivatu voti kikhuku ki kumi ki zingombi voti mamemi, baba ku bivananga kuidi basi Levi kadika mvu muingi kukieba zitsatu ziawu. Basi Levi mvandi baba vananga kikhuku ki kumi kuidi zinganga nzambi babutukila mu nkuna wu Aloni, muingi mvawu badukisa zitsatu ziawu. Mvandi vaba bikhuku binkaka bi kumi baba vananga. Vayi mu thangu ayiyi, baklistu basi ko mu lukuiku lu kuvana kikhuku ki kumi ki biuma badi.

• Kikhutu ki thulu.

  Kiba kikhutu batula mamanya ma thalu, kio nkulutu wu zinganga nzambi kaba tetikanga va ntima kadika khumbu kaba kotanga ku kibuangu kinlongo. Baba ku kitedilanga “kikhutu ki lufundusu” kibila muawu muba Urim ayi Tumim, baba sadilanga muingi kuzabikisa zimfundusu zi Yave. (Eso. 28:15-30)— Tala Ap. B5.

• Kikumu.

  Kidi kiuma kizangama nkadu kivangulu mu mamanya voti mu zibloku, mu mabaya ayi mu ntoto. Va kikumu beni, vawu baba vikilanga minkhailu voti malasi mu mbuongimini. Ku kivinga kitheti ki nzo yinlongo ayi ki tempelu, kuba mua “kikumu ki wola” baba vikilanga malasi. Va nganda vaba mvandi “kikumu kivangulu mu cobre”, kio baba vikilanga minkhailu miviku. (Eso. 27:1; 39:38, 39; Nge 8:20; 1Mit. 6:20; 2Lu. 4:1; Luk. 1:11)— Tala Ziapendice. B5 ayi B8.

• Kikumu kinlongo.

  Diba dikunzi batungila mu mamanya. Ayi bivisa bimmonisa ti, biba bidimbu bi mbuongimini yi Baal ayi bi zinzambi zinkaka zi luvunu.— Eso. 23:24.

• Kilumbu ki khubumunu.

  Diba dizina bavana kilumbu ava kisabala. Mu kilumbu akiokio, basi Yuda baba kubikanga biabioso bankuiza sadila mu kisabala. Kilumbu beni kiaba maninanga va khotulu muinya, mu bilumbu bitu mu kintanu bosi kisabala kiaba tonanga. Mu bilumbu bi basi Yuda, kilumbu beni kiaba toninanga vabuilu ayi kiaba maninanga vabuilu bu kilumbu kinkaka.— Mala 15:42; Luk. 23:54.

• Kilumbu ki kudindila nlemvu wu masumu.

  Kiba kilumbu kinlongo kilutidi nkinza kuidi basi Isaeli, mvandi baba ku kitedilanga Yom Kippur (kikuma akiokio kiyizila mu kikuma ki kiebeleo yohm hakkippurím, kinsundula “kilumbu ki kufuka.”) Baba kembanga nkungi awowo mu kilumbu 10 ki ngonda yi etanim. Kiawu to kilumbu mu kadika mvu nkulutu wu zinganga nzambi kaba kotanga ku Kibuangu Kilutidi Kinlongo ku nzo yinlongo ayi buviokila thangu, ku tempelu. Bo kaba kotanga kuna, nandi waba vananga nkhailu wu menga muingi kudinda nlemvu wu masumu mandi, masumu ma basi Levi ayi masumu ma dikabu. Kiba kilumbu ki lukutukunu lunlongo ayi ki kuvanga jejum, mvandi kiba kisabala, mawu mansundula ti, bawu babasa vanganga ko bisalu binkaka mu kilumbu beni.— Lev. 23:27, 28.

• Kilumbu ki lufundusu.

  Kidi kilumbu voti thangu batsikika muingi dingumba di batu, mimvila voti batu boso va ntoto, bafueti fundusu va ntuala Nzambi. Kilenda sundula mvandi thangu muingi kuzengila nkanu baboso bafueti fua. Ayi lufundusu mvandi, lulenda sundula kuvana luaku kuidi baboso bafueti vuka ayi kubaka luzingu lu mvu ka mvu. Yesu Klistu ayi bapostolo bandi, batubila matedi “Kilumbu ki Lufundusu”, kio batu boso bala fundusu kuba kuandi batu bamonyo voti bafua.— Mat. 12:36.

• Kimasi.

  Wuba nkietu wummuadi, ayi khumbu zinkaka wuba mvika wu dibakala kakuela.— Eso. 21:8; 2Sa. 5:13; 1Mit. 11:3.

• Kimbevu.

  Kikuma akiokio, khumbu ziwombo ba kisadilanga muingi kutubila matedi mbela, tsingulu voti ziphasi Yave kantuadisanga kuidi batu muingi kuba semba— Zit. 16:49.

• Kimvuka.

  Didi dingumba di batu badi bakutakana mu makani mamueka. Mu Masonoko ma Kiebeleo, kikuma akiokio bakisadila muingi kutubila dikabu di Isaeli. Mu Masonoko ma Kingeleko, khumbu ziwombo bansadilanga kiawu muingi kutubila kimvuka kioso ki baklistu, vayi mvandi ba kisadila muingi kutubila kimvuka kimueka.— 1Mit. 8:22; Mav. 9:31; Lom. 16:5.

• Kindoki.

  Mambu batu bankikininanga ti, mutu widi phevi yintatamananga yimonyo bo mutu kamfua, ayi ti phevi beni yilenda koluka na batu bakhidi bamonyo, bulutidi kukoluka mu nzila zinganga zi minkisi.

• Kingeleko.

  Yidi mbembu bankolukanga ku Grécia. Mu Mosonoko ma Kingeleko, kikuma akiokio mvandi ba kisadilanga muingi kutubila makanda moso makhambulu basi Yuda voti batu baba landakananga kikhulu voti mbembu yi Kingeleko.— Yoe. 3:6; Yoa. 12:20.

• Kintinu ki Nzambi.

  Kikuma akiokio kinsundula nsua Nzambi kadi wu kuyala mu kusadila kintinu kio Muan’andi Yesu Klistu kadi ntinu.— Mat. 12:28; Luk. 4:43; 1Ko. 15:50.

• Kiphinga.

  Mutu wukuela wumbundana nyitu na mutu wunkaka wukhambu kuelana yandi.— Lev. 19:31; Deu. 18:11; Mav. 16:16

• Kiphuanza; Mutu weka kiphuanza.

  Mu thangu Loma kabe yadila nza, mutu wuba “kiphuanza” wabe butukanga na luaku alolo, ayi wuba luaku lu kubaka biuma bioso basi Loma baba vananga. Vayi mutu weka kiphuanza, wuba mutu baba botulanga va kivika. Ayi bo baba botulanga mutu va kivika, baba kumvananga luaku lu kuba musi Loma, vayi babasa kumvananga ko biyeku mu luyalu. Vayi boti babotudiabu ko mutu beni mu buvika, buna nandi kasa ba ko luaku lu kutambula biuma bioso basi Loma baba tambulanga.— 1Ko. 7:22.

• Kisabala.

  Kidi kikuma kiyizila mu Kiebeleo kinsundula “kuvunda; kubika kubue vanga kisalu”. Kidi kilumbu ki sambuadi mu sabala yi basi Yuda (kiawu kiaba toninanga va khotolo muinya wu kintanu ayi kiaba maninanga va khotolo muinya wu kisabala.) Bilumbu binkaka baba kembanga minkungi, dedi mvu wu sambuadi ayi mvu 50, baba ku mitedilanga mvandi kisabala. Mu kisabala, zinganga nzambi to baba nsua wu kuvanga kisalu ku tempelu. Mu mimvu mi bisabala, batu babasa banga ko nsua wu kuvata ayi wu kukuika musi Isaeli kufuta pholo. Mu Minsiku mi Mose, nsiku matedi kisabala wuba wufuana, vayi zimfumu zi binganga babuela minsiku mu kutadila kikhulu akiokio. Mu phila ayoyo, mu bilumbu bi Yesu baba kuikanga dikabu kulandakana mambu makhambulu kuandi mu nsiku.— Eso. 20:8; Lev. 25:4; Luk. 13:14-16; Kolo. 2:16.

• Kisalu kinlongo.

  Kidi kisalu mutu kamvanganga mu mbuongimini’andi kuidi Nzambi.— Lom. 12:1; Mav. 7:15.

• Kitumba; Mbuongimini yi bitumba.

  Kitumba kidi fikula, yo bamfuanikisa mu kiuma voti mutu muingi kusadila mu mbuongimini. Mbuongimini yi Bitumba, yidi mbuongimini voti luzolo mu kitumba, voti kiuma bamfuanikisa kitumba.— Min. 115:4; Mav. 17:16; 1Ko. 10:14.

• Kiunda ki lufua.

  Kidi kiunda kingolo mutu kambanga mu kibila ki lufua lu mutu voti mu kibila ki mambu maphasi kamviokila. Mu thangu yikhulu, batu baba kifu ki kubanga mu kiunda ki lufua mu mua thangu. Bawu baba dilanga mu mbembu yinangama muingi kumonisa ti badi mu kiunda ki lufua, mvandi baba vuatanga bikhutu bimmonisa ti badi mu kiunda ki lufua. Baba tulanga dibombi mu mintu, baba bakanga bikhutu, ayi kubunda va ntima. Khumbu zinkaka, batu bapisuka mu kuba mu kiunda, baba kuba tumisanga mu matanga.— Nge. 23:2; Est. 4:3; Nza. 21:4.

• Kivunga.

  Yidi yoso kua mbela yimfika tembakananga ayi yimvondanga batu bawombo. Khumbu ziwombo bansadilanga kikuma akiokio muingi kutubila zimfundusu zi Nzambi.— Zit. 14:12; Yeh. 38:22, 23; Amo. 4:10.

• Kiyunga.

  Kidi kikhutu batungila mu nledi kiba mioko mikula voti mikhufi, kiba kikula nati mu makungulu voti mu bikhesi. Kiba kikhutu baba vuatanga mu thangu yikhulu. Babakala ayi bakietu baba vuatanga kiyunga, ayi kiyunga bakietu baba vuatanga ḿba kiawu kiluta ba kikula. “Kiyunga kikhambulu mioko mikula” kiba kikhutu kiba kizibuka kuntuala, ayi baba tetikanga kiawu va mbata kikhutu kinkaka.— Eso. 39:23; Lev. 8:7.

• Klistu.

  Yidi thangununu yi Yesu yiyizila mu kikuma ki kingeleko Khristós, ayi kidi kidedakana na kikuma ki kiebeleo basekudila “Mesia” voti “Wusolu.”— Mat. 1:16; Yoa. 1:41.

• Koro.

  Kidi kizongulu baba zongilanga biuma bi nlangu ayi biyuma. Koro mueka yiba 220 di zilitro, mu kutadila kutola ku kizongulu bantedilanga bato. (1Mit. 5:11)— Tala Ap. B14.

• Kubalukila kiedika.

  Kikuma ki kingeleko (apostasía) kiyizila mu verbo yinsundula “kutatuka mu”. Mvandi kidi tsundu yi “kutina, kukuekula voti kubalukila”. Mu Masonoko ma Kingeleko, “kubalukila kiedika” ba kisadila muingi kutubila batu babalukila mbuongimini yikiedika.— Zin. 11:9; Mav. 21:21; 2Te. 2:3.

• Kubieka.

  Kikuma ki Kiebeleo kinsundula “kudukudila nzeta.” Baba dukudilanga nzeta kuidi mutu voti kuidi kiuma muingi kumonisa ti bekivana voti babe sola kiawu mu kisalu kimfunu. Mu Masonoko ma Kingeleko, kikuma akiokio mvandi bakisadila muingi kutubila matedi kukulumuna phevi yinlongo kuidi basolu, bo badi kivuvu ki kukuenda ku diyilu.— Eso. 28:41; 1Sa. 16:13; 2Ko. 1:21.

• Kubue vela mbongu.

  Kunsundula kuvela mbongo yisobila mu tsola yo batu baba velanga mbongu babika, kuba kuandi mu lutia luawu voti ndamba. Minsiku mi Mose miaba vananga nsua kuidi dikabu, muingi babika kuvelanga mbongu yoso, ayi mvandi babika kuvela makundi moso ma nti wu olive ayi makundi ma vinu. Kuvela mbongu yisobila, wuba nsiku Nzambi kavana kuidi batu bakhambulu beni mbakulu, batu badi tsatu, kuidi zinzenza, kuidi bafuila matata, ayi kuidi mimfuizi.— Lut. 2:7.

• Kukidiodisa; Kuba wudiodila.

  Mu Kibibila, kikuma akiokio kisinsundula ko to kuba wudiodila mu nyitu, vayi mvandi kuba wudiodila mu mavanga, kukhambu ba ni ditona mu mambu moso, kuba kuandi mu nyitu voti mu kiphevi. Mu Minsiku mi Mose, kikuma akiokio kinsundula kikhulu ki basi Yuda ki kuyidiodisanga.— Lev. 10:10; Min. 51:7; Mat. 8:2; 1Ko. 6:11.

• Kukivana mu mambu ma Nzambi.

  Kunsundula lukinzu, kubuongimina ayi kuvanga kisalu ki Yave mu lukuikumunu, mu kibila ki nsua kadi wu kuyala.— 1Ti. 4:8; 2Ti. 3:12.

• Kukuela nzadi.

  Mu kikhulu akiokio, dibakala waba kuelanga mfuizi wubika khomb’andi, boti nandi kasa buta ko muana wu dibakala. Baba vangilanga mawu, muingi kubutila khomb’andi muana. Ayi kikhulu akiokio, kuntuala bayiza tula kiawu mu minsiku mi Mose ayi kiba kizabakana dikuela di zikhomba.— Nge. 38:8; Deu. 25:5.

• Kuleva phesi.

  Madi mambu mutu kantuba muingi kumonisa ti mambu kantuba madi makiedika. Mvandi malenda ba lukanu mutu kamvanga ti, wunkuiza vanga voti ndamba mambu kabe kanikisa. Khumbu ziwombo mansundula kulevila phesi mu dizina di mutu wulutidi, buka Nzambi. Yave wuleva phesi muingi kukindisa luwawanu kavanga na Abalahami.— Nge. 14:22; Ebe. 6:16, 17.

• Kunata ku buvika.

  Kunsundula kubotula batu ku ntoto babutukila voti ku tsi’awu muingi ku banata va kivika. Kikuma akiokio ki kiebeleo kinsundula “kunanguka.” Basi Isaeli baba nata khumbu wadi va buvika. Basi Isaeli baba kalanga ku kintinu ki norte, baba nata va buvika kuidi basi Asilia. Bosi kuntuala, basi Isaeli baba kalanga ku kintinu ki sul, baba nata ku buvika kuidi basi Babiloni. Bankaka basobila mu mangumba ma mamuadi amomo, bavutuka ku ntoto’awu mu thuadusulu yi ntinu Ciro waba yadilanga divula di Persa.— 2Mit. 17:6; 24:16; Esa. 6:21.

• Kunyongina masumu.

  Mu Kibibila, kikuma akiokio kinsundula kubalula mavanga, ayi kumonisa kiunda kingolo mu kibila ki nzingulu yikhambu fuana mutu kaba natanga, mu kibila ki zinzimbala kavanga voti mu mambu maba tombulu kuvanga, vayi kasa vanga ko mawu. Kunyongina masumu mu bukiedika, kuntuadisanga ndandu ayi kumvanganga mutu kubalula mavanga.— Mat 3:8; Mav. 3:19; 2Pet. 3:9.

• Kurtina.

  Wuba nledi waba kabula Kibuangu Kinlongo ayi Kibuangu Kilutidi Kinlongo, kuba kuandi ku nzo yinlongo voti ku tempelu. Kurtina beni, yiba yimboti ayi bafikula muna bakeluba. (Eso. 26:31; 2Lu. 3:14; Mat. 27:51; Ebe. 9:3) Mvandi, vaba kurtina yiba va khotolo nzo yinlongo ayi ku kibuangu ki nganda. (Eso. 26:36; 27:16)— Tala Ap. B5

• Kusinga; Lusingu.

  Kutundila voti kukana kuvangila mutu diambu dimbi. Tsingulu, khumbu ziwombo yinsundula kutuba diambu dimbi dinkuiza monikina mutu wunkaka. Bo Nzambi kansinga voti kansadila mutu wunkaka muingi kasinga, buna lusingu luawu luidi buka mbikudulu.— Nge. 12:3; Zit. 22:12; Nga. 3:10.

• Kusosa.

  Kisalu baba vanganga muingi kubotula zitheti mu minsesi. Baba vangilanga kisalu beni mu kusadila mua nti ayi boti vaba tombulu kukokuna zitheti ziwombo, baba sadilanga kisadulu kifuana, dedi zitrenó voti zirolo zi kukokunina zio baba titikanga kuidi bibulu. Bisadulu abiobio biaba viokilanga va mbata zitheti zio batidi kukokuna. (Lev. 26:5; Yes. 41:15)— Tala Kibuangu ki kutsosila.

• Kutesa.

  Baba tesanga mu kusadila mua mamanya voti mabaya, muingi kubaka makani. Baba zinganga mua mamanya beni mu bikhutu, bosi baba sasumunanga kikhutu beni. Woso waba builanga dimanya beni, nandi baba solanga. Ayi baba vangilanga mawu mu nsambu.— Yos. 14:2; Zin. 16:33; Mat. 27:35.

• Kutetika mioko.

  Baba tetikanga mioko kuidi mutu muingi kunsola, kumvana kiyeku ki nkinza, kunsakumuna, kumbelusa ayi kumvana nkhailu wu phevi yinlongo. Khumbu zinkaka baba tetikanga mioko kuidi bibulu bio bankuiza vana buka nkhailu.— Eso. 29:15; Zit. 27:18; Mav. 19:6; 1Ti. 5:22.

• Kuvanga tsila.

  Luidi lukanu mutu kamvanga kuidi Nzambi ti wunkuiza vanga diambu, voti wunkuiza mvana nkhailu, kuvanga kisalu kinlongo voti kubaka makani ma kutatuka biuma bikhambulu kuandi disumu mu mua thangu. Babe tadilanga tsila buka mutu wunleva phesi.— Zit. 6:2; Mpo. 5:4; Mat. 5:33.

• Kuvueza.

  Kikuma ki kingeleko blasfemía kinsundula thubulu yi bifingu, yi kuvueza bankaka, ayi yi kutubila bubi. Baba sadilanga ntindu thubulu ayoyo, muingi kutubila bubi Nzambi voti batu. Mu Tsekudulu yi Nza Yimona, banluta sadila kikuma “kuvueza” muingi kutubila thubulu yimbi voti kufinga Nzambi ayi kutubila bubi biuma binlongo.— Zit. 15:30; Mat. 12:30; Nza. 16:9.

• Kuzengila nkanu wu mbungulu.

  Bo bansadila bikuma abiobio mu kiebeleo muingi kutubila batu, Kibibila kimmonisa ti buna batu beni bafueti vondu. Bo bantubila matedi bibulu, biuma, zitsola voti mavula, buna bikuma abiobio binsundula ti biuma bioso abiobio, bafueti ku bitulula voti ku bitula va khonzu muingi ku bivedisa muingi basadilanga biawu mu kisalu kinlongo ki zinganga nzambi voti ku tempelu mu kutadila makani Yave kambaka mu mawu.— Lev. 27:28; 1Sa. 15:8.

• Kuzengusu nyitu yi kibakala.

  Kunsundula kubotula nkanda wumbanga va mbata pheni yi babakala. Luba lukuiku Abalahami kuvanga mawu ayi baboso babutukila mu nkun’andi, vayi baklistu bubu basi ko mu lukuiku lu kuvanga mawu. Kikuma akiokio mvandi ba kisadila muingi kufuanikisa mambu mankaka mu matangu mawombo ma Kibibila.— Nge. 17:10; 1Ko. 7:19; Fil. 3:3.

L

• Laabe.

  Kikuma bansadila mu buku yi Yobi, Minkunga ayi Yesaya (vayi kisinsundula ko nkietu batedilanga Laabe, mu buku yi Yosua). Mu buku yi Yobi, matangu mankaka ma tusadisa kuvisa ti, Laabe bantubila muawu wunsundula kibulu kitsisi ki nlangu. Mu matangu mankaka, kibulu beni kitsisi ki nlangu, kinsundula Ngipiti.— Yob. 9:13; Min. 87:4; Yes. 30:7; 51:9, 10.

• Lépton.

  Mu thangu basonika Masonoko ma Kingeleko, luba lubongo lu kisengu luluelu basi Yuda baba sadilanga luvangulu mu cobre voti bronze. Mu zitsekudulu zinkaka zi Kibibila, bantedilanga luawu “óbolo”. (Mala 12:42 n.; Luk. 21:2)— Tala Ap. B14.

• Levi; Zilevita.

  Wuba muana wuntatu wu Yakobi, na nkazi’andi Leia. Mvandi diba dizina baba tedilanga nkuna wuyiza tambula dizina adiodio. Mu bana batatu ba Levi, muawu muyizila mangumba matatu ma zilevita. Khumbu zinkaka bansadilanga kikuma zilevita, muingi kutubila mvila woso, kubotula kuandi zinganga nzambi bayizila mu dikanda di Aloni. Bo bakabula ntoto baba kanikisa, nkuna wu Levi, kasa tambula ko kiuka ki ntoto, vayi wutambula 48 di mavula mu khati mintoto mi mimvila minkaka.— Deu. 10:8; 1Lu. 6:1; Ebe. 7:11.

• Leviatã.

  Kidi kibulu kinkalanga mu nlangu. Leviatã bantubila mu buku yi Yobi 3:8 ayi 41:1, ḿba yinsundula kimbolo, voti kibulu kinkaka ki nlangu kinneni ayi kidi beni mangolo. Leviatã bantubila mu buku yi Minkunga 104:26, ḿba yinsundula baleia. Mu matangu mankaka, bansadila kikuma akiokio muingi kufuanikisa kiuma, ayi tusa zaba ko buboti kibulu mbi bantubila muawu.— Min. 74:14; Yes. 27:1.

• Logue.

  Kiba kizongulu kilutidi kiluelu bantubila mu Kibibila baba sadilanga muingi kuzonga biuma bi nlangu. Mu thangu Talmude yi basi Yuda, logue beni yaba sundula (1/12) di zihim. Mu kutadila mambu amomo, tulenda tuba ti logue yimueka yiba 0,31 di zilitro. (Lev. 14:10)— Tala Ap. B14.

• Luvulubukusu.

  Lunsundula mutu wufua kubue vutuka kuzinga. Kikuma ki Kingeleko anástasis kinsundula “kutelama; voti kuba wutelama.” Kibibila kintubila nana di batu bavulubuka kubunda mvandi luvulubukusu lu Yesu, lo Yave Nzambi kavanga. Elia, Eliseu, Yesu, Petelo ayi Polo bavulubusa batu, vayi bawu banungina kuvanga mawu mu mangolo ma Nzambi. Luvulubukusu muingi kuzingila va ntoto ‘lu basonga ayi bakhambulu basonga bantubila mu Kibibila, luidi nguizani na lukanu lu Nzambi. (Mav. 24:15) Kibibila mvandi kintubila matedi “luvulubukusu lutheti”, voti luvulubukusu “luala monika theti.” Luvulubukusu alolo lunsundula luvulubukusu lu zikhomba zi Yesu, batu bo bala kuenda ku diyilu, baklistu basolo mu phevi yinlongo.— Fil. 3:11; Nza. 20:5, 6; Yoa. 5:28, 29; 11:25.

• Luwawanu.

  Yidi tsila batu buadi bamvanga, yo bambinana boti bankuiza vanga diambu voti ndamba. Batu baba vanganga tsila badi, batu na Nzambi, voti batu na badi yawu. Khumbu zinkaka, vabe tombulu mutu mueka kadukisa tsila beni. Ayoyo yidi tsila mutu mueka kafueti dukisa. Vayi khumbu zinkaka, batu baba buadi baba mu lukuiku lu kudukisa tsila, ayoyo yidi tsila yi batu buadi. Kubotula kuandi luwawanu Nzambi kabe vanganga na batu, Kibibila kintubila mvandi luwawanu lu batu, lu minkuna, lu mimvila, voti lu mangumba ma batu. Nzambi wuvanga luwawanu na Abalahami, na Davidi, ayi mvandi wuvanga luwawanu na dikabu di Isaeli, lo mvandi bantedilanga (luwawanu lu Minsiku). Mvandi wuvanga luwawanu na Isaeli yi Nzambi, lo bantedilanga (luwawanu lumona).— Nge. 9:11; 15:18; 21:27; Eso. 24:7; 2Lu. 21:7.

• Luzolo lukuikama.

  Yidi tsekudulu yilutidi zabakana yi kikuma ki kiebeleo hhésedh, kinsundula luzolo lunkuizilanga mu lukuikumunu ayi kuba wukangama mu mutu wunkaka. Khumbu ziwombo bansadilanga kiawu muingi kutubila luzolo luwombo Nzambi kadi mu batu, vayi mvandi kilenda sundula luzolo batu badi bawu na bawu.— Eso. 34:6; Lut. 3:10.

M

• Maalate.

  Ḿba kidi kikuma bansadilanga mu Minkunga, kimmonika va thonono kapu 53 ayi 88 yi Minkunga. Ḿba kiyizila mu kikuma ki kiebeleo, kinsundula “kuvonga; kubela,” mammonisa ti yiba phila yi kuyodila nkunga wu kiunda. Mawu madi nguizani na mambu madi mu zikapu ziwadi aziozio zi Minkunga.

• Mabaya ma kimbangi.

  Mansundula kumi di Minsiku Yave kavana kuidi Mose mio kasonika mu mamanya muadi.— Eso. 31:18.

• Mabubu voti Papiro.

  Kidi kititi kimmenanga mu nlangu bansadilanga muingi kuvanga bipanya, mua zikacha, ayi mvandi miatu. Mvandi baba kubisadilanga muingi kuvanga minkanda mi kusonikina. Zirolo ziwombo mu thangu yikhulu bavangila ziawu mu mabubu voti zipapiro.— Eso. 2:3.

• Malasi.

  Baba sobikisanga maka ayi bálsamo yidi mfimbu wumboti baba vikanga malembi malembi, ayi yaba basisanga mfimbu wumboti. Vaba malasi mamfunu basobikisa mu kusadila biuma binna bimfimbu wumboti. Baba sadilanga mawu ku nzo yinlongo ayi ku tempelu. Baba vikanga malasi beni va meni ayi mvandi va masika ma builu, va kikumu ki kuvikila malasi kiba ku Kibuangu Kinlongo. Mu kilumbu ki kudindila nlemvu wu masumu, baba vikilanga malasi beni ku Kibuangu Kilutidi Kinlongo. Mawu maba fuanikisa minsambu mi bisadi bikuikama bi Nzambi. Bubu, baklistu basi ko mu lukuiku lu kuvanga mawu.— Eso. 30:34, 35; Lev. 16:13; Nza. 5:8.

• Malcã.

  Ḿba widi nonandi kuandi Moloque, nzambi basi amoni baba kinzikanga beni. (Sef. 1:5)— Tala MOLOQUE.

• Mamboti malutidi.

  Kikuma ki kingeleko kinsundula kiuma kidi beni kimboti ayi ki luvalu. Bansadilanga beni kiawu muingi kutubila nkhailu wumboti voti phila yimboti yi kuvanina nkhailu. Bo ba kisadila muingi kutubila mamboti malutidi ma Nzambi, kiawu kimmonisa nkhailu Nzambi katuvana mu ntima woso mu kukhambu temina tumvutudila kioso kiuma. Mu phila ayoyo, kikuma akiokio kimmonisa kitesu ki kukaba, luzolo luwombo ayi mamboti Nzambi kammonisanga kuidi batu. Kikuma akiokio ki kingeleko mvandi kinsundula “nlemvu” ayi “nkhailu wumboti.” Wawu widi nkhailu wulutidi wo mutu kamvanina mu ntima woso.— 2Ko. 6:1; Efe. 1:7.

• Mambu ma butsuza.

  Yidi tsekudulu yi kikuma ki kingeleko porneía, ayi kidi kikuma bansadilanga mu Mosonoko muingi kutubila matedi ziphila zi kubundinina nyitu zio Nzambi kanlendanga. Dedi: Kiphinga, kuvanga kindumba, kubundana nyitu na mutu wukhambu kuelana yaku, kubundana nyitu babakala na babakala, voti bakietu na bakietu ayi kubundana nyitu na bibulu. Mu buku yi Nzaikusu, bansadilanga kikuma akiokio, muingi kutubila mavanga ma “Babiloni Yinneni” no bamfuanikisa nkietu wu kindumba. Nandi wumvanganga kitsuza na mintinu mi nza ayiyi, muingi kuba mangolo ayi kimvuama. (Nza. 14:8; 17:2; 18:3; Mat. 5:32; Mav. 15:29; Nga. 5:19)— Tala NDUMBALETA.

• Mambu madi va thonono.

  Mambu mammonika va thonono yi minkunga, dedi: dizina di mutu wusonika, kinongo, bisiku bi minkunga voti tsundu yi mambu beni.— Tala mambu madi va thonono Minkunga 3, 4, 5, 6, 7, 30, 38, 60, 92 ayi 102.

• Mambu matsoni.

  Kikuma kiyizila mu kingeleko asélgeia, kinsundula mavanga mambi manlevula minsiku mi Nzambi, zikhadulu zimmonisa kukhambu ku lukinzu, kukhambu vua nkinza ayi kulenza batu badi kimfumu, minsiku voti zithumu. Kikuma akiokio, kisinsundula ko zikhadulu zimbi mu mambu maluelu.— Nga. 5:19; 2Pet. 2:7.

• Maná.

  Biba bidia basi Isaeli baba dianga mu 40 di mimvu baviokisa ku thandu. Yave nandi waba kuba vananga biawu. Maná beni, mamonikina mu lusalusu lu Nzambi. Kadika meni, maná maba buanga va tsi buka mabeti ma mvula, kubotula kuandi mu kisabala. Bo basi Isaeli bamona mawu mu khumbu yitheti, bawu batuba: “Mbi bio?” mu kiebeleo, “man huʼ?” (Eso. 16:13-15, 35) Mu matangu mankaka, maná beni ba kuma tedila “bidia bi diyilu” (Min. 78:24), “dipha di diyilu” (Min. 105:40) ayi “dipha di bankua mangolo” (Min. 78:25). Yesu mvandi wusadila maná muingi kufuanikisa mambu.— Yoa. 6:49, 50.

• Mapha monlongo.

  Maba 12 di mapha baba tulanga mu bikhuku biodi, mu kadika kikhuku muba 6 di mapha, batula va meza yiba ku Kibuangu Kinlongo, ku nzo yinlongo ayi ku tempelu. Mvandi baba kuma tedilanga “Mapha Bakupika mu Bikhuku” ayi “Mapha Manlongo.” Mu kadika kisabala, baba vingisanga mapha beni mu mapha mankaka ma mona. Zinganga nzambi to baba nsua wu kudia mapha baba botulanga. (2Lu. 2:4; Mat. 12:4; Eso. 25:30; Lev. 24:5-9; Ebe. 9:2)— Tala Ap. B5.

• Masedoni.

  Kibuangu kidi ku khonzu norte yi Grécia, kio kiyiza ba beni kizabakana mu luyalu lu Alexandre Wulutidi, ayi kiawu kiba dipanda, nati bayiza nunga kiawu kuidi basi Loma. Bo Mvuala Polo kayenda ku Europa mu khumbu yitheti, Masedoni yiba divula di Loma. Polo wuye tala kizunga beni khumbu zitatu. (Mav. 16:9)— Tala Ap. B13.

• Masodi mankengidilanga ntinu.

  Diba dingumba di masodi ma basi Loma, babieka muingi kukengidila ntinu. Dingumba adiodio, diyiza ba dingumba dingolo di pulitika, muingi kubuela mioko voti kutulula ntinu.— Fil. 1:13.

• Masquil.

  Kikuma ki kiebeleo kio tukhambu zaba buboti tsundu, kidi va thonono 13 di zikapu zi Minkunga. Ḿba kiawu kinsundula “poema contemplativo.” Bawombo bankikininanga ti tsundu yi kikuma akiokio, yidi dedi mueka na kikuma basekudila dedi ‘kusadila mu nduenga.’— 2Lu. 30:22; Min. 32:thonono.

• Masuama manlongo.

  Mambu madi mu lukanu lu Nzambi, madi masueku nati thangu Nzambi kambaka makani ma kuzabikisa mawu kuidi batu bo nandi kasola.— Mala 4:11; Kolo. 1:26.

• Mavula ma kutinina.

  Maba mavula ma basi Levi ko batu baba tininanga bo bamvonda mutu mukhambu lutia, muingi kutomba lukiebu mu kibila ki basi dikanda di mutu kabe vonda. Ku ntoto Yave kavana basi Isaeli, kuba 6 di mavula ma kutinina mo Mose katubila ayi kuntuala mo Yosua kayiza sola mu thuadusulu yi Yave. Bo mvondi kaba vitilanga ku divula beni, nandi waba zabikisanga mambu kabe vanga kuidi bakulutu va muelu divula, ayi bawu baba kuntambulanga buboti. Muingi batu baba vondanga badi yawu mu lutia, babika kubaka ndandu mu lusalusu alolo, baba fundisilanga mutu bevonda ku divula kabe vondila wadi yandi, muingi kuzaba boti widi fotu voti ndamba. Ba kuzaba ti nandi kasi ko fotu, nandi waba vutukanga ku divula di kutinina, ayi waba kalanga kuna mu luzingu luandi loso voti nati nkulutu wu zinganga nzambi kamfua.— Zit. 35:6, 11-15, 22-29; Yos. 20:2-8.

• Mbasukulu yi ngonda yimona.

  Kiba kilumbu kitheti ki kadika ngonda mu kalendario yi basi Yuda. Kiba kilumbu baba kutakananga muingi kuvanga nkungi ayi kuvana minkhailu minkinza. Buviokila thangu, kilumbu akiokio kiyiza ba kilumbu ki nkungi wumfunu mu dikabu dioso. Mu kilumbu beni, batu basa ba ko nsua wu kuvanga kisalu.— Zit. 10:10; 2Lu. 8:13; Kolo. 2:16.

• Mbikudi.

  Widi mutu Nzambi kansadila muingi kuzabikisa zitsangu ziandi. Mimbikudi baba zimvuala zi Nzambi baba zabikisanga, kubika to zimbikudulu vayi mvandi malongi, zithumu ayi zimfundusu zi Yave.— Amo. 3:7; 2Pet. 1:21.

• Mbikudulu.

  Yidi tsangu yi Nzambi; mbikudulu yilenda ba malongi ma Nzambi, zitsangu matedi zimbikudulu zi Nzambi, voti tsangu yi mambu mala monika kuntuala.— Yeh. 37:9, 10; Dan. 9:24; Mat. 13:14; 2 Pet. 1:20, 21.

• Mbotumunu; Kubotika.

  Kikuma basekudila mu kingeleko kubotika kinsundula, “kukota ngie woso mu nlangu,” voti kubuama mu nlangu. Yesu wutuma muingi minlandikini miandi babotama. Masonoko mvandi mantubila matedi mbotumunu yi Yoane, mbotumunu mu phevi yinlongo, ayi mbotumunu mu mbazu, ayi zinkaka.— Mat. 3:11, 16; 28:19; Yoa. 3:23; 1Pet. 3:21.

• Mbuetila yimbasikanga va meni.

  Yawu mbuetila yitsuka yinzimbalanga ku khonzu leste ava muinya kubasika, ayi yimmonisanga ti kilumbu kimona kientona.— Nza. 22:16; 2Pet. 1:19.

• Ḿbumbi tuphandu.

  Widi mutu wunsadilanga tuphandu, muingi kuvanga zinzungu, zindonga, bibasa, ayi biuma binkaka bi tuphandu. Kikuma ki kiebeleo basekudila ḿbumbi tuphandu, kinsundula “mvangi.” Nsua ḿbumbi tuphandu kadi wu kuvanga kioso kiuma katidi, bamfuanikisanga wawu na nsua Yave kadi wu kuvanga kioso kiuma katidi kuidi batu, voti kuidi mimvila.— Yes. 64:8; Lom. 9:21.

• Merodaque.

  Dizina di nzambi basi Babiloni baba luta kinzikanga. Bo Hamurábi, no wuba ntinu ayi wabe fondanga minsiku mi basi Babiloni, kavanga Babiloni kuba divula dilutidi mu kintinu ki Babiloni, Merodaque (voti Marduque) wuyiza ba beni nkinza. Nandi wuyiza vinginina zinzambi zioso zinkaka zi Babiloni, ayi wuyiza ba nzambi yilutidi nkinza kuidi basi Babiloni. Mua thangu kuntuala, dizina Merodaque (voti Marduque) bavingisa diawu mu thangununu “Belu” (“wuvuidi”), ayi Merodaque, bayiza tona kuntedilanga Bel.— Yel. 50:2.

• Mesia.

  Kidi kikuma ki kiebeleo, ayi “Klistu” kidi kikuma ki kingeleko, bikuma bibiodi binsundula “wusolu.”— Dan. 9:25; Yoa. 1:41.

• Mfiongunini wu zimbuetila.

  Widi mutu wumfionguninanga matedi ngonda, thangu ayi zimbuetila, muingi kutuba mambu mankuiza.— Dan. 2:27; Mat. 2:1.

• Mfumu yinkietu yi diyilu.

  Yidi thangununu yi nzambi no batu babalukila Nzambi baba buongiminanga mu bilumbu bi ḿbikudi Yelemia. Bankaka bantubanga ti, ayoyo yidi thangununu yi nzambi yi basi Babiloni Istar (Astarte.) Thangununu ayoyo yidi dedi mueka na nzambi yinkietu sumeriana Inana, wunsundula “mfumu yi diyilu.” Mvandi bawu bankikininanga ti, nzambi ayoyo yinkietu nandi wu kuba sadisanga kubuta. Mu kutadila mambu masonama babakula ku Ngipiti, Astarte mvandi bakuntedilanga “mfumu yinkietu yi diyilu”.— Yel. 44:19.

• Mfumu zimbasi.

  Kikuma kinsundula “mbasi yimfunu.” Mu kumona phila basadila kikuma “mfumu zimbasi” mu Kibibila, tulenda tuba ti widi mutu wumueka. Mawu mansundula ti vadi mfumu yimueka to yi zimbasi. Ayi Kibibila kimmonisa ti nandi widi Misieli.— Dan. 12:1; Yud. 9; Nza. 12:7.

• Mfumu zinganga nzambi.

  Mu Masonoko ma Kiebeleo, kidi kikuma bansadilanga muingi kutubila “nkulutu zinganga nzambi.” Vayi mu Masonoko ma Kingeleko, kikuma “zimfumu zi zinganga nzambi” kintubila matedi babakala baba kiyeku kinkinza mu kinganga nzambi, kubunda mvandi bakulutu ba zinganga nzambi, ayi mvandi bakulutu baba mu 24 di mangumba ma zinganga nzambi.— 2Lu. 26:20; Esa. 7:5; Mat. 2:4; Mala 8:31.

• Mfutu.

  Biba biuma ntinu voti nyadi kaba futanga kuidi ntinu wunkaka, muingi kumonisa kukikulula ayi kutuadisa ndembama ayi mvandi kubaka lukiebu. (2Mit. 3:4; 18:14-16; 2Lu. 17:11) Kikuma akiokio mvandi ba kisadila muingi kutubila phaku kadika mutu kaba futanga.— Neh. 5:4; Lom. 13:7.

• Mictão.

  Kidi kikuma ki kiebeleo kidi va thonono zikapu zisambanu zi Minkunga (Min. 16, 56-60) Tusa zaba ko buboti tsundu yi kikuma beni, vayi ḿba kidi kithuadi na kikuma “kusonama.”

• Milcom.

  Nzambi yi basi amonita, ayi ḿba widi nonandi kuandi baba tedilanga Moloque. (1Mit. 11:5, 7) Kutsuka luyalu luandi, Salomo wutunga bikumu muingi kusambidila zinzambi zi luvunu.— Tala MOLOQUE.

• Milha.

  Kidi kizongulu baba sadilanga muingi kuzongila zimetro. Kikuma akiokio ba kisadila khumbu mueka to mu Masonoko matheti ma Kingeleko, mu nota yidi mu Matai 5:41. Ḿba kinsundula milha baba sadilanga ku Loma, yiba 1. 479,5 di zimetro.— Tala Ap. B14.

• Mimbutu mitheti.

  Minsundula mimbutu mitheti bamvelanga mu mbongu. Yave wuvana nsua kuidi basi Isaeli muingi bamvana bana bawu ba babakala, bibulu, ayi mimbutu mitheti mi ntoto. Mu kuba dikabu diandi, basi Isaeli baba vananga mimbutu mitheti kuidi Nzambi mu Nkungi wu Mapha Makhambulu Luvi ayi mu Nkungi wu Pentekoti. Kikuma “mimbutu mitheti” mvandi ba kisadila muingi kutubila matedi Yesu, ayi baklistu basolu.— 1Ko. 15:23; Zit. 15:21; Zin. 3:9; Nza. 14:4.

• Mimfundisi.

  Baba batu Yave kasola muingi kuvukisa dikabu diandi, ava nandi kutona kusadila mintinu mi Isaeli.— Mkg. 2:16.

• Mina.

  Mvandi bantedilanga mané mu buku yi Yehezekieli. Kiba kizongulu baba sadilanga muingi kuzonga kizitu ayi zimbongo. Mu kutadila mambu batu bamfionguninanga biuma bikhulu babakula, ti mina yimueka yiba 50 di zisikulu, ayi sikulu yimueka yaba zitanga 11,4 g, tulenda tuba ti mina mu Masonoko ma Kiebeleo, yaba zitanga 570 g. Ḿba vaba mvandi mina yi mintinu, dedi covado. Mu Masonoko ma Kingeleko, mina yimueka yidi dedi mueka na 100 di zidracma, ayi yaba zitanga 340 g. 60 di zimina, ziaba sundula talentu yimueka. (Esa. 2:69; Luk. 19:13)— Tala Ap. B14.

• Mindedeka.

  Miawu, miabe diatanga mu nkangu. Mu Minsiku mi Mose, mindedeka miba biuma bidiodila ayi bifuana muingi kudia. Nkangu wunneni wu mindedeka baba dianga bioso biuma bandengana mu nzila, mu phila ayoyo baba bunganga biuma biwombo. Ayi baba tadilanga mambu miawu miabe vanganga buka tsingulu.— Eso. 10:14; Mat. 3:4.

• Minkhailu.

  Madi makaba baba vananga Nzambi muingi kuntonda, ayi muingi kumonisa ti mutu wuba fotu yi masumu, ayi wuntomba kubue vutuka kuba kikundi na Nzambi. Kutonina kuidi Abeli, batu baba vananga minkhailu mu lutia luawu, kubunda mvandi minkhailu mi bibulu. Vayi mu thangu Minsiku mi Mose, basi Isaeli baba mu lukuiku lu kuvana minkhailu. Bo Yesu kavana luzingu luandi banga nkhailu wuvedila, vabasa bue tombulu ko, minkhailu mi bibulu, vayi baklistu bamvananga minkhailu mi kiphevi kuidi Nzambi.— Nge. 4:4; Ebe. 13:15, 16; 1Yoa. 4:10.

• Minkhailu mi kiadi.

  Miba minkhailu baba vananga muingi kusadisa batu baba mu tsatu. Kheti basa tubila ko kikuma akiokio mu Masonoko ma Kiebeleo, vayi Minsiku miaba vananga kuidi basi Isaeli zithuadusulu matedi lukuiku lu kuvana minkhailu kuidi batu bakhambulu mbakulu.— Mat. 6:2.

• Minsiku.

  Boti kisona kitheti ki kikuma akiokio, kidi maiúscula, buna kiawu kinsundula Minsiku mi Mose, voti zibuku zitheti zitanu zi Kibibila. Vayi boti kisona kitheti ki kikuma akiokio kidi minúscula, buna kinsundula nsiku wumueka mu Minsiku mi Mose, voti nsua wu nsiku.— Zit. 15:16; Deu. 4:8; Mat. 7:12; Nga. 3:24.

• Minsiku mi Mose.

  Midi Minsiku Yave kavana kuidi basi Isaeli mu nzila Mose, ku thandu yi Sinai mu mvu 1513 ATK. Zibuku zitheti zitanu zi Kibibila, mvandi ba zitedilanga khumbu ziwombo, Minsiku.— Yos. 23:6; Luk. 24:44.

• Mira.

  Maka mamfimbu wumboti, maba basikilanga mu minti miviakana, miba zitsendi. Mira mvandi baba sobikisanga yawu, muingi kuvanga malasi manlongo ma kubiekila. Baba sadilanga yawu muingi kutula mfimbu wumboti va kika, bikhutu ayi mu biuma binkaka. Mvandi baba sobikisanga yawu na malasi muingi kuziodila nyitu, voti kuvinda mu nyitu. Baba sadilanga mvandi mira beni muingi kukubikila mvumbi yo bakue zika.— Eso. 30:23; Zin. 7:17; Yoa. 19:39.

• Moloque.

  Nzambi yi basi amoni, ayi ḿba widi nonandi kuandi Malcã ayi Milcom. Ayoyo, ḿba yiba thangununu, bika ti dizina di nzambi yimueka. Minsiku mi Mose miabe zengilanga nkanu wu lufua kuidi woso kuandi mutu wumvika bana bandi buka minkhailu kuidi nzambi Moloque.— Lev. 20:2; Yel. 32:35; Mav. 7:43.

• Mua dingumba.

  Dingumba di batu bankikinina voti banlandakana malongi mawu veka. Vaba binganga biodi bi basi Yuda biba beni bizabakana, bafalisi ayi basadusi. Batu bakhambu ba baklistu baba tedilanga baklistu “kinganga” voti “kinganga ki basi Nazaleti,” kibila baba yindula ti kiawu kiyizila kuidi basi Yuda. Buviokila thangu, vayiza monika binganga biwombo mu kimvuka ki baklistu. Dedi “dingumba di Nicolau” bantubila mu buku yi Nzaikusu.— Mav. 5:17; 15:5; 24:5; 28:22; Nza. 2:6; 2Pet. 2:1.

• Muana Davidi.

  Bansadilanga kikuma akiokio muingi kutubila matedi Yesu. Muingi kumonisa ti nandi wutambula luwawanu lu Kintinu, ayi ti nandi wuyizila mu nkuna wu Davidi.— Mat. 12:23; 21:9.

• Muana Mutu.

  Mu zibuku zintubila luzingu lu Yesu, kikuma akiokio , kimmonika muawu 80 di zikhumbu. Bansadila kiawu muingi kutubila Yesu Klistu ayi muingi kumonisa mbutukulu’andi yi kinsuni, bika ti kivangu ki kiphevi kibutuka na nyitu yi kinsuni. Kikuma akiokio mvandi kimmonisa ti, Yesu wudukisa mbikudulu yidi mu Danieli 7:13, 14. Mu Masonoko ma Kiebeleo, kikuma akiokio, mvandi ba kisadila muingi kutubila Yehezekieli ayi Danieli, muingi kumonisa disuasana mimvuala amiomio baba, na Tho yi zitsangu zio bawu batambula.— Yeh. 3:17; Dan. 8:17; Mat. 19:28; 20:28.

• Muana ngombi.

  Mu bibulu bioso basi Isaeli baba vananga mu minkhailu, muana ngombi, kiawu kibulu kiluta ba luvalu.— Eso. 24:5; Ebe. 9:12.

• Muana wutheti wu dibakala.

  Mu thangu yikhulu, muana wutheti wu dibakala waba tambulanga kiyeku ki nzitusu va dikanda, ayi kutambula kimfumu ku nzo, bo tata kamfua. Kikuma akiokio, mvandi bakisadila muingi kutubila “muana wutheti wumbakala wu kibulu.— Eso. 11:5; 13:12; Nge. 25:33; Kolo. 1:15.

• Muela.

  Tsekudulu yi kikuma ki kiebeleo néfesh ayi ki kingeleko psykhé. Bo tumfiongunina phila bansadila bikuma abiobio mu Kibibila, tumbanga lufiatu ti, biawu binsundula (1) batu, (2) bibulu voti (3) luzingu lu batu voti lu bibulu. (Nge. 1:20; 2:7 ; Zit. 31:28; 1Pet. 3:20.) Vayi kikuma “muela” bakisadilanga mu phila yikhambu fuana mu binganga biwombo. Kibibila kimmonisa ti bikuma néfesh ayi psykhé, ba kubisadila muingi kutubila bivangu va ntoto, bivangu bio tulenda mona, bio tulenda simba ayi bio bilenda fua. Mu tsekudulu ayiyi yi Kibibila, bikuma abiobio mu zimbembu bisonimina, khumbu ziwombo basekudila biawu mu kutadila tsundu yi kadika mambu bantubila, mu kusadila bikuma dedi “luzingu,” “bivangu,” “mutu,” “mutu woso” voti mvandi dizina di mutu (dedi, “minu” kubika kuandi “muel’ama.”) Vadi zinota zinkaka zimmonisa bikuma binkaka tulenda sadila muingi kutubila “muela.” Bo tunsadila kikuma “muela,” kuba kuandi mu matangu voti zinota, tufueti visila kiawu mu kutadila mambu madi mu matangu va yilu. Bo lutangu luntuba ti mutu wuvangila kisalu mu muela woso, mawu mansundula ti nandi wuvangila kisalu beni mu ntima woso, mu mangolo moso voti mu kukivana. (Deu. 6:5; Mat. 22:37) Mu matangu mankaka, bikuma abiobio bilenda sundula, phuila mutu kadi. Kiawu mvandi kilenda sundula mutu wufua voti mvumbi.— Zit. 6:6; Zin. 23:2; Yes. 56:11; Han. 2:13.

• Musi Ebeleo.

  Abalahami nandi theti bavana thangununu ayoyo muingi kunsuasisa na basi amoreu baba kalanga va kinzunga kio nandi kabe kalanga. Bosi, thangununu ayoyo mvandi bayisadila muingi kutubila matedi batu babutukila mu nkuna wu Abalahami, mu nzila ntekulu’andi Yakobi.— Nge. 14:13; Eso. 5:3.

• Musi Nazaleti.

  Didi dizina bavana Yesu, kibila wuba musi Nazaleti. Ḿba didi kithuadi na kikuma ki kiebeleo “ditafi dimona,” kidi mu Yesaya 11:1. Buviokila thangu, basadila kikuma akiokio muingi kutubila mvandi matedi minlandikini mi Yesu.— Mat. 2:23; Mav. 24:5.

• Musi Yuda.

  Dizina bansadilanga muingi kutubila matedi mutu wubutukila mu nkuna wu Yuda, bo bamana kutulula kintinu ki kumi di mimvila mi Isaeli. (2Mit. 16:6) Bo basi Isaeli babotuka mu buvika ku Babiloni, bayiza tona kusadila dizina beni muingi kutubila matedi basi Isaeli babutukila mu minkuna miviakana, bavutuka ku Isaeli. (Esa. 4:12) Buviokila thangu, bayiza sadila dizina beni muingi kusuasisa basi Isaeli na batu ba zitsi zinkaka, kuba kuandi kioso kibuangu baba kalanga. (Est. 3:6) Mvuala Polo wusadila dizina adiodio muingi kutuba ti, mu kimvuka ki baklistu, tsi mutu kabutukila, yisi ko beni mfunu.— Lom. 2:28, 29; Nga. 3:28.

• Mute-labém.

  Kikuma kidi va thonono kapu 9 yi Minkunga. Mu kutadila kikhulu, kiawu kinsundula “matedi lufua lu muana.” Batu bawombo bantubanga ti diba dizina voti bidi bikuma bitheti bi nkunga wumueka wuba wuzabakana baba sadilanga bo banyola nkunga beni.

• Mutu wukhambu kikininanga mu Klistu.

  Kikuma akiokio ki kingeleko, kidi zitsundu wadi. Kiawu kinsundula mutu wunlendanga voti wummanga kukikinina mu Klistu. Mvandi kilenda sundula mutu wumvunikisa kuba Klistu voti mutu wunkuizila va kibuangu ki Klistu. Woso kua mutu voti dingumba bantuba ti bankuizila va mvingi Klistu, badi Mesia, voti bambalukila Klistu ayi minlandikini miandi, mvandi balenda kuba tedila batu bakhambu kikininanga mu Klistu.— 1Yoa. 2:22.

• Mutu wusolu muingi kuvana luzingu.

  Kidi kikuma ki kingeleko, kinsundula, “ntuadisi wulutidi.” Kiawu kimmonisa kiyeku kinkinza Yesu Klistu kadi, ki kukula batu bakuikama mu buvika bu masumu, ayi ku batuadisa muingi babaka luzingu lu mvu ka mvu.— Lev. 19:31; Deu. 18:11; Mav. 16:16.

• Mutu wuvokulu.

  Widi mutu bavonda bibutulu. Khumbu ziwombo baba solanga babakala abobo muingi kusadila ku nzo mintinu buka bisadi voti minsungi mi nkietu ntinu, ayi bimasi biandi. Kikuma akiokio mvandi ba kisadilanga muingi kutubila mutu waba kiebanga nzo yi ntinu, vayi babasa kumvokulanga ko bibutulu. Kikuma ‘mutu wuyivokula mu kibila ki Kintinu,’ kinsundula mutu wummanga kukuela voti kubuta bana muingi kabuela kukivana mu kisalu ki Nzambi.— Mat. 19:12; Est. 2:15; Mav. 8:27.

• Mvindu.

  Kikuma akiokio kilenda sundula mutu wukhambulu wudiodila mu kinsuni, voti mutu widi mu kulevula minsiku mi Nzambi. Mu Kibibila, bansadilanga khumbu ziwombo kikuma akiokio muingi kutubila mambu makhambulu mafuana, ayi makhambulu madiodila, mu kutadila Minsiku mi Mose. (Lev. 5:2; 13:45; Mat. 10:1; Mav. 10:14; Efe. 5:5)— Tala KUKIDIODISA; KUBA WUDIODILA.

N

• Nardo.

  Nzeta yiba mfimbu wumboti yiba beni thalu, yiba ndimba yibenga, yivangulu mu nti widi diodiawu dizina (Nardostachys jatamansi.) Mu kumona ti nzeta beni yiba beni thalu, diawu bawombo baba sobikisanga yawu na nzeta yikhambulu beni luvalu. Vayi buku yi Malaku ayi Yoane zintuba ti basadila “nardo bakhambu sobikisa” muingi kuvinda Yesu.— Mala 14:3; Yoa. 12:3.

• Nazileu.

  Kidi kikuma kiyizila mu kiebeleo, kinsundula “mutu basola,” “wukivana”, “bavengubula.” Vaba mangumba muadi ma zinazileu: batu bakivana ayi bo naveka Nzambi kasola. Babakala ayi bakietu bavanga tsila mu kukanikisa Yave, kuzingila buka nazileu mu mua thangu. Batu baba vanganga tsila ayoyo, baba minsiku mitatu bafueti landakana: basa ba ko nsua wu kunua malavu mankolusuanga, ni kudia makundi ma vinu; basa ba ko nsua wu kuvuka minlengi; ayi kusimba mvumbi. Vayi batu bo naveka Nzambi kasola muingi baba zinazileu, baba tatamananga mu kiyeku akiokio mu luzingu luawu loso, ayi naveka Yave waba kuba vananga minsiku mi mambu bafueti landakana.— Zit. 6:2-7; Mkg. 13:5.

• Ndimba yibenga.

  Kikuma akiokio, kinsundula ndimba yidi beni yibenga ayi bansadila yawu muingi kutubila minsanga, minledi, bikhutu ayi masumu.— Eso. 25:4; Zit. 4:8; 2Sa. 1:24; Yes. 1:18.

• Ndumbaleta.

  Nkietu wumbundananga nyitu mu kibila ki zimbongo na mutu wukhambu kuelana yandi. (Kikuma ki Kingeleko pórne basekudila “ndumbaleta,” kiyizila mu kikuma kinsundula “kusumbisa.”) Kibibila kintubila mvandi matedi babakala baba salanga kindumba. Minsiku mi Mose miaba kandiminanga ntindu kisalu akiokio, ayi zimbongo zindumbaleta baba bakanga mu kibila ki kisalu akiokio, zisaba ko zifuana muingi kuvana banga nkhailu ku nzo yinlongo yi Yave. Vayi binganga binkaka bi luvunu baba sadilanga babakala ayi bakietu ku tempelu, muingi basala kindumba ayi babaka zimbongo. (Deu. 23:17, 18; 1Mit. 14:24) Kibibila mvandi kinsadila kikuma akiokio muingi kutubila matedi dikabu, mimvila voti mangumba ma batu bantubanga ti bambuongiminanga Nzambi, vayi badi kithuadi na mbuongimini yi bitumba. Dedi, binganga bioso bi luvunu bantubila mu buku yi Nzaikusu bantedila “Babilonia, Yinneni” ba bifuanikisa buka nkietu wu kindumba, kibila nandi widi kithuadi na zimfumu zi nza ayiyi muingi kubaka mangolo ayi kimvuama.— Nza. 17:1-5; 18:3; 1Lu. 5:25.

• Neilote.

  Kikuma tukhambu zaba buboti tsundu, kidi va thonono yi kapu 5 yi Minkunga. Bankaka bankikininanga ti ḿba kiawu kinsundula, kisadulu ki kusikila minkunga, kidi mu kikuma ki kiebeleo hhalíl (voti flauta.) Vayi, ḿba kikuma beni kinsundula nkunga.

• Nela yi kidimbu.

  Yiba nela baba tudilanga kidimbu, baba vuatanga mu luzala voti baba zengidikanga va dinga mu kusadila nsinga. Nela beni yiba kidimbu ki kimfumu, ki nyadi voti mfumu. (Nge. 41:42).

• Nganga nkisi.

  Mutu wuntubanga ti widi nzailu yi kutuba mambu mala monika kuntuala. Mu dingumba di batu abobo, muidi zinganga zi minkisi, batu bamfionguninanga zimbuetila ayi bankaka.— Lev. 19:31; Deu. 18:11; Mav. 16:16

• Nganga nzambi.

  Wuba mutu waba tubilanga va mvingi dikabu vantuala Nzambi, mu kuba longa matedi Nzambi ayi minsiku miandi. Mvandi waba kolukanga na Nzambi va mvingi dikabu, mu kuvana minkhailu ayi kuba dindila vantuala Nzambi mu minsambu. Ava Minsiku mi Mose, zimfumu zi makanda bawu baba zinganga nzambi mu makanda mawu. Vayi bo bayiza vana Minsiku mi Mose, bana ba Aloni, bayizila mu nkuna wu Levi, bawu bayiza ba zinganga nzambi. Vayi basi Levi bankaka baba sadisanga to. Bo basikika luwawanu lumona, Isaeli yi kiphevi yiyiza ba dikabu di zinganga nzambi, ayi Yesu Klistu nandi Nkulutu wu zinganga Nzambi.— Eso. 28:41; Ebe. 9:24; Nza. 5:10.

• Ngeena.

  Dizina di kingeleko di ḿbuinga wu Hinom, ku sul ayi sudoeste yi Yelusalemi yikhulu. (Yel. 7:31) Babikula ti kiawu kiala ba kibuangu muingi kulozilanga mimvumbi. (Yel. 7:32; 19:6) Vasi ko bivisa bimmonisa ti baba kubanga ku Ngeena bibulu, voti batu bamonyo muingi kuba vika ayi kuba tovula. Diawu, kikuma akiokio, kisinsundula ko kibuangu ki kiphevi bamvikilanga miela mi batu, muingi kumitovula mvu ka mvu ku mbazu. Vayi Yesu ayi minlandikini miandi basadila kikuma Ngeena muingi kutubila matedi tsembolo yi “lufua lummuadi,” lunsundula mbungulu yi mvu ka mvu.— Nza. 20:14; Mat. 5:22; 10:28.

• Ngileali.

  Kidi kibuangu kiba beni mbongu ku khonzu leste yi muila wu Yolidani, ayi kiaba vitanga ku norte ayi ku sul wu ḿbuinga wu Jaboque. Dizina adiodio mvandi baba ku disadilanga muingi kutubila kizunga kioso ki Isaeli ku leste yi Yolidani, ko kuaba kalanga nkuna wu Rubem, Gadi ayi mua ndambu mu nkuna wu Manase. (Zit. 32:1; Yos. 12:2; 2Mit. 10:33)— Tala Ap. B4.

• Nisã.

  Bo basi Isaeli babasika mu buvika ku Babiloni, adiodio diba dizina di ngonda yitheti mu kutadila kalendario yi basi Yuda, ayi ngonda yisambuadi mu zikalendario zinkaka. Ava dizina adiodio, bawu baba tedilanga ngonda beni “abibe.” Yawu yabe toninanga va khati tsika ngonda yi Março nati va khati tsika ngonda yi Abril. (Neh. 2:1)— Tala Ap. B15.

• Nkadi’ampemba.

  Didi dizina didi mu Masonoko ma Kingeleko muingi kutubila Satana dinsundula “mvuezi.” Satana wutambula dizina adiodio, kibila nandi mutu wunluta vuezanga Yave ayi kumvuninanga mambu, wumvuezanga diambu diandi ayi dizina diandi dinlongo.— Mat. 4:1; Yoa. 8:44; Nza. 12:9.

• Nkamba.

  Widi nti baba sadilanga muingi kutula mfuna mu zikhonzu wadi muingi babaka bu kunatina va mavangiti. Voti mua kitini ki dibaya baba kanganga mu nkokoto wu bibulu biodi bidi mangolo, (baba luta sadilanga zingombi,) muingi kutitika mfuna voti muingi kukubika ntoto. Khumbu ziwombo mimvika baba sadilanga minkamba muingi kunata mimfuna midi beni kizitu. Diawu baba sadilanga kikuma nkamba muingi kutubila matedi buvika, voti lukuiku lu kutumukina mutu, mvandi muingi kutubila matedi ziphasi. Kubotula voti kutulula nkamba, mabe sundulanga kiphuanza ki kuba wukulu mu buvika voti mu ziphasi.— Lev. 26:13; Mat. 11:29, 30.

• Nkawu widi kisengu kilengulu va tsongi.

  Luidi lusuadi lukula luidi kisengu kilengulu va tsongi minsungi baba sadilanga muingi kutuadisa bibulu. Kikuma akiokio, mvandi ba kidedikisa na malongi ma mutu wu nduenga mankindisa mutu kutumukina malongi ba kumvana. Kikuma “kumanga tumukina nkawu widi kisengu kilengulu va tsongi,” kiyizila mu mavanga ma ngombi yimbakala yidi ntu ngolo yimmanganga kutumukina lusuadi luidi kisengu, vayi wumbundanga lusuadi beni ayi wukituadisanga ziphasi.— Mav. 26:14; Mkg. 3:31.

• Nkawu.

  Widi mua nti mintinu baba simbanga, wunsundula kimfumu ki kuyala.— Nge. 49:10; Ebe. 1:8.

• Nkawu wu kuzongila.

  Wuba sambanu di zicovado mu kukula. Boti bantubila covado baba sadilanga beni, buna nkawu beni wuba 2,67 di zimetro; vayi boti bantubila matedi covado yikula, buna nkawu beni wuba 3,11 di zimetro. (Yeh. 40:3, 5; Nza. 11:1)— Tala Ap. B14.

• Nkengididi.

  Mutu widi kiyeku ki kukieba ayi kukengidila kimvuka. Kikuma ki kingeleko epískopos kinsundula kukengidila ayi kukieba. Bikuma “nkengididi” ayi “nkulutu” binsundula kiokiawu kiyeku mutu kadi mu kimvuka. Kikuma “nkulutu” kinluta monisa zikhadulu zi mutu wuyonzuka mu kiphevi, vayi kikuma “nkengididi’ kinluta monisa kisalu kidi mu khati kiyeku akiokio.— Mav. 20:28; 1Ti. 3:2-7; 1Pet. 5:2.

• Nkhailu baba diengisanga.

  Widi nkhailu wo nganga nzambi kabe simbanga va kimueka na mutu wumvana nkhailu beni, ayi baba diengisanga wawu kuntuala ayi kumbusa. Voti nganga nzambi nandi to wabe vangana mawu. Kuvanga mambu amomo, kuabe monisa ti babe vana nkhailu beni kuidi Yave.— Lev. 7:30.

• Nkhailu wu baboso.

  Widi nkhailu baba vananga kuidi Yave muingi mutu wumvana wawu kaba mu ndembama na Nzambi. Mutu waba vananga nkhailu beni, wabe dianga wawu va kimueka na dikanda diandi, nkulutu wu zinganga nzambi, ayi zinganga nzambi zinkaka baba sadisanga. Muisi wo baba vikilanga mafuta ma kibulu beni, waba monisanga ti Yave bevitika nkhailu beni. Menga mansundula luzingu, mvandi baba ku matambikanga kuidi Nzambi. Mawu maba buka ti zinganga nzambi ayi mutu waba vananga nkhailu beni, baba kalanga na Yave ayi kudia yandi. Mawu maba mbonosono yi ndembama.— Lev. 7:29, 32; Deu. 27:7.

• Nkhailu wu fotu.

  Minkhailu baba vananga mu kibila ki disumu mutu kabe vola. Miawu miba mua disuasana na minkhailu minkaka baba vananga mu kibila ki disumu. Kibila nkhailu awowo, wabe sadisanga mutu wuvola disumu, kubue vutuka kuba kiphuanza voti kubue baka luaku lo kazimbisa mu kibila ki disumu kavola, na kumonisa ti benyongina disumu beni. Mvandi baba kunkulanga mu tsembolo.— Lev. 7:37; 19:22; Yes. 53:10.

• Nkhailu wu kuvutudila matondo.

  Widi nkhailu wu kuzitisila Nzambi va kimueka, mu kibila ki mamboti mandi ayi luzolo luandi lukuikama. Baba dianga mbizi yi kibulu bamvana buka nkhailu va kimueka na mapha batula luvi ayi mapha bakhambu tula luvi. Vabe tombuluanga kudia mbizi yoso muna kilumbu.— 2Lu. 29:31.

• Nkhailu wu malavu.

  Vinu baba vananga buka nkhailu, baba dukulanga yawu va kikumu va kimueka na minkhailu minkaka. Polo wusadila kikuma akiokio, muingi kutubila phila kabela wukubama muingi kukivana, ayi kusala muingi kutuadisa ndandu kuidi zikhomba mu kimvuka.— Zit. 15:5, 7; Fil. 2:17.

• Nkhailu wu masumu.

  Widi nkhailu baba vananga mu kibila ki masumu mutu kabe vanga mukhambu lutia luandi, voti mu kibila ki kuba nkua masumu. Baba sadilanga bibulu biwombo biviakana, kutonina mu ngombi yimbakala nati dibembi, mu kutadila mbakulu yi mutu bevola disumu.— Lev. 4:27, 29; Ebe. 10:8.

• Nkhailu wuviku.

  Widi nkhailu baba vikanga kibulu va kikumu, muingi kukabila kia kioso buka nkhailu kuidi Nzambi. Mutu wumvana nkhailu beni, kabasa dianga ko ni kitini mu kibulu beni. Bibulu baba vikanga bidi: ngombi yimbakala, dimemi, khombo, kiduka voti ntendi dibembi.— Eso. 29:18; Lev. 6:9.

• Nkua Mambi.

  Yidi thangununu yinkaka bansadilanga muingi kutubila matedi Satana, no widi mbeni yi Nzambi ayi mbeni yi zithumu ziandi zisonga.— Mat. 6:13; Yoa. 5:19.

• Nkulutu zinganga nzambi.

  Mu kutadila Minsiku mi Mose, mfumu zinganga nzambi nandi waba kolukanga na Nzambi vamvingi dikabu, ayi nandi waba tuadisanga zinganga nzambi zinkaka. Mvandi ba kuntedilanga “mfumu zinganga nzambi.” (2Lu. 26:20; Esa. 7:5) Nkulutu zinganga nzambi nandi to wuba nsua wu kukota ku Kibuangu Kilutidi Kinlongo, kivinga kiba ku nzo yinlongo, ayi buviokila thangu ku tempelu. Ayi waba vanganga mawu khumbu yimueka to mu mvu, mu kilumbu ki kudinda nlemvu. Kikuma “nkulutu zinganga nzambi” ba kisadila mvandi muingi kutubila Yesu Klistu.— Lev. 16:2, 17; 21:10; Mat. 26:3; Ebe. 4:14.

• Nkulutu wu Kimvuka.

  Mutu widi wuyonzuka mu mayindu. Mu Kibibila, kiawu kinsundula mutu widi kimfumu voti widi kiyeku ki kutuadisa va nsengi voti va divula. Mu buku yi Nzaikusu, bansadila kikuma akiokio, muingi kutubila bivangu bi kiphevi. Basekula kikuma presbýteros mu kikuma “nkulutu” muingi kutubila matedi batu bantuama ntuala mu kimvuka.— Eso. 4:29; Zin. 31:23; 1Ti. 5:17; Nza. 4:4.

• Nkulutu.

  Wuba mutu wuba kimfumu. Zimfumu zi 12 di minkuna mi Isaeli, baba kuba tedilanga “bakulutu.” (Zit. 1:16; Yos. 22:14) Baba sadilanga mvandi thangununu ayoyo, muingi kutubila matedi mintinu, ayi batu bo baba kinzikanga beni, mvandi baba sadilanga kikuma beni mu ziphila zinkaka.— Nge. 23:6; 1Mit. 11:34; Yeh. 21:25; 38:2; 44:3.

• Nkunga.

  Wunsundula minkunga mi kuzitisila Nzambi. Minkunga miba bisiku ayi baba ku mikuimbilanga kuidi bisadi bi Nzambi khumbu ziwombo, ayi mu zithangu ziviakana, kubunda mvandi mu mbuongimini yi Yave ku tempelu ku Yelusalemi.— Luk. 20:42; Mav. 13:33; Tia. 5:13.

• Nkunga wu mafua.

  Minkunga mimmonisa kiunda mu kibila ki lufua lu nkundi voti mutu tunzolanga.— 2Sa. 1:17; Min. 7:va thonono.

• Nkunga wu miongo.

  Madi mambu madi va thonono Minkunga 120 ayi 134. Vadi mayindu mawombo mantubila matedi kikuma akiokio, vayi bawombo bankikininanga ti mambu madi mu 15 di minkunga, miba minkunga mi mayangi batu baba buongiminanga ku Isaeli baba kuimbilanga bo baba tombukanga khumbu tatu mu kadika mvu mu zikhutukunu zilutidi ku Yelusalemi, divula diba ku mongo wu Yuda.

• Nkungi wu khundudulu.

  Basola kilumbu kimueka mu mvu, muingi kutebukila moyo kilumbu badiodisa Tempelu yo babifisa kuidi Antíoco Epifânio. Baba kembilanga wawu mu 8 di bilumbu, ayi wabe toninanga mu kilumbu 25 ki ngonda yi quisleu.— Yoa. 10:22.

• Nkungi wu mapha makhambulu luvi.

  widi wumueka mu minkungi mitatu milutidi baba kembanga kadika mvu ku Isaeli. Wabe toninanga mu kilumbu 15 ki ngonda yi nisã, mu kilumbu kinlanda kio baba kembanga Pasika, ayi baba kembilanga wawu mu 7 di bilumbu. Mu thangu baba kembanga nkungi awowo, basi Isaeli baba dianga mapha makhambulu luvi, muingi kutebukila moyo mbasukulu’awu ku Ngipiti.— Eso. 23:15; Mala 14:1.

• Nkungi wu mavuala.

  Mvandi baba ku wutedilanga Nkungi wu Zitenda. Baba kembanga wawu mu kilumbu 15 nati 21 yi ngonda etanim. Baba vanganga nkungi wowo bo baba mananga kuvela mbongu ku Isaeli. Yiba thangu yi mayangi ayi baba tondanga mu lusakumunu Yave kaba kuba vananga mu bivatu. Mu thangu ayoyo yi nkungi, basi Isaeli baba zingilanga mu Mavuala, muingi kutebuka moyo phila baba zingilanga tona kilumbu babasika ku Ngipiti, nati bakota ku ntoto baba kanikisa. Wuba wumueka mu minkungi mitatu mio babakala boso ba basi Isaeli baba kuendanga ku Yelusalemi.— Lev. 23:34; Esa. 3:4.

• Nlemvu.

  Kikuma akiokio mu Kiebeleo, ba kidedikisa na minkhailu batu baba vananga muingi babaka luaku lu kufikama Nzambi ayi kumbuongimina. Mu Minsiku mi Mose, bulutidi mu kilumbu ki kudindila nlemvu mu kadika mvu, baba vananga minkhailu muingi kudinda nlemvu wu masumu ma kadika mutu, ayi mvandi mu masumu ma dikabu dioso muingi kuvutuka kubue ba kithuadi na Nzambi. Minkhailu amiomio, miaba fuanikisa nkhailu wu Yesu wo nandi kavana muingi kuvedisa masumu mitu mu khumbu yimueka to ayi kubue tuvana luaku lu kuba kithuadi na Yave.— Lev. 5:10; 23:28; Kolo. 1:20; Ebe. 9:12.

• Nsadisi.

  Widi mutu widi kiyeku ki kusadisa muingi zikhonzu ziwadi ziba kithuadi. Mu kibibila, Mose nandi nsadisi wu luwawanu lukhulu, ayi Yesu nandi nsadisi wu luwawanu lumona.— Nga. 3:19; 1Ti. 2:5.

• Nsadisi wu bakulutu.

  Kidi kikuma ki kingeleko diákonos, kio khumbu ziwombo bansekudilanga “nkiebi” voti “nsadisi.” Kikuma “nsadisi wu bakulutu” kinsundula mutu wumbuelanga mioko bakulutu ba kimvuka. Muingi kuba nsadisi wu bakulutu, vantombulu kukuna zikhadulu zidi mu Kibibila.— 1Ti. 3:8-10, 12.

• Nsenga.

  Kikuma bansadila muingi kutubila matedi mintindu miwombo mi minti mimmenanga mu bibuangu bidi nlangu. Khumbu ziwombo kikuma akiokio mvandi kinsundula nkawu mintinu bansadilanga (Arundo donax.) (Yes. 42:3; Mat. 27:29; Nza. 11:1)— Tala NKAWU WU KUZONGILA.

• Nsungi.

  Mutu waba kengidilanga va builu muingi kukieba batu voti bibuangu, ayi ḿba nandi waba sikanga kiuma muingi kulubula boti diambu dimbi diambelama kumonika. Khumbu zinkaka minsungi beni baba banga mu luphangu voti va kibanga ki divula muingi kununga kumona ku kinanu batu bamfikama ku divula ava bawu kukota. Mimbikudi khumbu ziwombo baba kuba tadilanga buka minsungi mi dikabu di Isaeli ayi bawu baba lubulanga dikabu boti mbungulu yima fikama.— 2Mit. 9:20; Yeh. 3:17.

• Ntesi.

  Mutu Nzambi kavana nzailu yi luzolo luandi lo ni mutu wunkaka kalendi nunga ko kuzaba. Kikuma akiokio ki Kiebeleo, kiyizila mu kikuma kinkaka kinsundula “kumona” mambu ma kinsuni voti ma kiphevi. Batu baba tombanga lusalusu lu ntesi muingi kudinda malongi ma nduenga matedi mambu mawu.— 1Sa. 9:9.

• Nti wu kuzabila mamboti ayi mambi.

  Nti wuba ku lumbu lu Edeni. Nzambi wusadila nti beni muingi kumonisa nsua kadi wu kutsikika zithumu mu matedi “mambu mamboti ayi mambi” kuidi batu.— Nge. 2:9, 17.

• Nti wu luzingu.

  Nti wuba ku lumbu lu Edeni. Kibibila kisintuba ko ti makundi ma nti awowo maba lulendu lu kuvana luzingu, vayi nti beni wunsundula nsua Nzambi kadi wu kuvana luzingu lu mvu ka mvu kuidi woso mutu kamvana luaku lu kudia makundi ma nti beni.— Nge. 2:9; 3:22.

• Ntuadisi wu minkunga.

  Mu minkunga, kikuma akiokio ki Kiebeleo ḿba kinsundula mutu wuntuadisa phila banyodila, voti kutuadisa minyimbidi. Mutu awowo, mvandi waba botulanga thangu muingi kutuadisa minyimbidi mi basi Levi, ayi waba tuadisanga minkunga. Bibibila binkaka basekudila kikuma akiokio “mutu wupisuka mu minkunga” ayi “ntuadisi wu koro.”— Min. 4:va thonono; 5:va thonono.

• Nzaikusu.

  Kikuma akiokio kiyizila mu kikuma ki kingeleko apokálypsis, kinsundula “kumonisa,” “kuzabikisa.” Bansadila kiawu, muingi kutubila bimona mesu bi mambu ma kiphevi, luzolo ayi zikhanu zi Nzambi. (1Ko. 14:6, 26; 2Ko. 12:1, 7; Nza. 1:1) Dizina Nzaikusu, dimmonisa buboti mambu madi mu buku yitsuka yi Kibibila, kibila mu buku beni, muidi bimona mesu matedi zikhanu zi Nzambi mu bilumbu binkuiza.

• Nzila.

  Kidi kikuma bansadila mu Masonoko muingi kutubila nzingulu yifuana voti yikhambu fuana va mesu ma Yave. Batu boso bayiza ba minlandikini mi Yesu Klistu, baba kuba tadilanga buka batu badi mu “nzila.” Mawu mansundula ti bawu baba natanga nzingulu yimmonisa kiminu mu Yesu Klistu mu kulandakana kifuani kiandi.— Mav. 19:9.

• Nzo yi lufundusu.

  Mu matangu mankaka madi mu Masonoko ma Kingeleko, kikuma akiokio kinsundula kibuangu kiba kinangama kiba ku nganda ayi kiba bikada kio batu baba kimfumu baba kalanga, muingi kukoluka voti kuzabikisa makani kuidi dikabu. (Mat. 27:19; Mav. 12:21; 18:12; 25:6) Bikuma “nzo yi lufundusu yi Nzambi” ayi “nzo yi lufundusu yi Klistu” binsundula biuma Yave kansadilanga muingi kufundisa batu.— Lom. 14:10; 2Ko. 5:10; Yoa. 19:13.

• Nzo yi lukutukunu.

  Kikuma kinsundula “kukhupama; dingumba,” vayi mu matangu mawombo, kiawu kinsundula kibuangu basi Yuda baba kutikininanga, muingi kutanga Masonoko, kulonguka, kusamuna ayi kusambila. Mu bilumbu bi Yesu, kadika divula muba batu bawombo ku Isaeli, baba nzo’awu yi lukutukunu, ayi mavula maba manneni muba zinzo ziwombo zi zikhutukunu.— Luk. 4:16; Mav. 13:14, 15.

• Nzo yinlongo.

  Tenda basi Isaeli baba sadilanga muingi kubuongimina Nzambi bo babotuka mu buvika ku Ngipiti. Ayi ku tenda beni kuawu baba suekilanga kasu yi luwawanu lu Yave, yawu yaba sundula ti Nzambi wuba va khati dikabu. Tenda beni baba ku yisadilanga muingi kuvana minkhailu ayi kubuongimina. Khumbu zinkaka, ba yitedilanga “tenda yi zikhutukunu”. Yawu yivangulu mu minti mi mabaya bafuka minledi mivangulu mu linho mio bafikula bakeluba. Tenda beni yiba yikabuka mu bivinga biodi: Kibuangu Kinlongo ayi Kibuangu Kilutidi Kinlongo. (Yos. 18:1; Eso. 25:9)— Tala Ap. B5.

O

• Olíbano.

  Nomi yi minti. Bo baba vikanga Olíbano, yawu yabe vananga mfimbu wumboti. Yawu yiba yimueka mu biuma baba sobikisanga muingi kuvanga malasi manlongo, baba sadilanga ku nzo yinlongo ayi ku tempelu. Mvandi baba kuyivananga va kimueka na minkhailu mi mimbutu, ayi baba tulanga yawu va kimueka na mapha manlongo, ku Kibuangu Kinlongo.— Eso. 30:34-36; Lev. 2:1; 24:7; Mat. 2:11.

• Ômer.

  Kiba kizongolo baba zongilanga biuma biyuma, kiba dedi mueka na Koro. Ayi kiawu kiba 220 di zilitro, mu kutadila kutola ku kizongolo bantedilanga bato. (Lev. 27:16)— Tala Ap. B14.

• Ônix.

  Didi dimanya didi mua thalu voti luvalu, didi ngolo buka dimanya di ágata ayi mvandi didi buka dimanya di calcedônia. Mu dimanya adiodio ônix, muidi ndimba yiphembi yisobakana na ndimba yinomba, yi castanho, yibenga yi cinzenta, ayi ndimba yi verde. Dimanya adiodio, ba ditula mu kikhutu ki nkulutu wu zinganga nzambi.— Eso. 28:9, 12; 1Lu. 29:2; Yob. 28:16.

P

• Paladizu.

  Kidi kibuangu kidi beni kimboti ayi kidi nlumbu. Paladizu yitheti yivangu yidi Edeni, kibuangu Yave kakubikila Adami ayi Eva. Bo Yesu kaba fua va dikunzi, nandi wukamba mutu no babanda va khonzu’andi ti, ntoto wala ba paladizu. Mu 2 Kolintu 12:4, kikuma akiokio kinsundula paladizu yinkuiza, ayi mu Nzaikusu 2:7 yintubila paladizu yi diyilu.— Nku. 4:13; Luk. 23:43.

• Pasika.

  Widi nkungi baba kembanga mu kilumbu 14 mu ngonda yi abibe (ngonda yo kuntuala bayiza tedila nisã.) Baba kembanga nkungi awowo muingi kutebukila moyo thangu babasika ku Ngipiti. Muingi kukemba nkungi beni, dikabu baba vondanga dimemi voti khombo, bosi baba dilanga biawu na meza ma ndudi ayi mapha makhambulu luvi.— Eso. 12:27; Yoa. 6:4; 1Ko. 5:7.

• Penhor.

  Kikuma akiokio, mvandi bantedilanga kivisa. Kiba kiuma mutu wundeva wunkaka kaba vananga muingi kuvana bivisa ti wala futa pholo yingana. Mu minsiku mi Mose muba nsiku matedi penhor, waba vananga lukiebu kuidi batu bakhambulu beni mbakulu.— Eso. 22:26; Yeh. 18:7.

• Pentekoti.

  Wawu nkungi wummuadi mu minkungi mitatu mio basi Yuda baba kembanga ku Yelusalemi. Pentekoti yinsundula “kilumbu makuma tanu.” Adiodio diawu dizina bansadila mu Masonoko ma Kingeleko, vayi mu Masonoko ma Kiebeleo yinsundula Nkungi wu Kuvela Mbongu, voti Nkungi wu Zisabala. Baba kembanga nkungi awowo mu kilumbu makuma tanu, kutonina kutanga mu kilumbu 16 ki nisã.— Eso. 23:16; 34:22; Mav. 2:1.

• Phevi.

  Kikuma ki kiebeleo rúahh ayi ki kingeleko pneúma, basekudila “phevi,” kidi zitsundu ziwombo. Ayi mu zitsundu beni kiawu kinsundula, kiuma kikhambu monikanga va mesu ma batu ayi kinsundula mangolo. Kikuma ki kiebeleo ayi ki kingeleko kinsundula, (1) phemu, (2) mangolo madi mu bivangu bidi va ntoto, (3) mangolo mamvanganga mutu kukoluka voti kuvanga mambu, (4) mambu batubila mu nzila bivangu bi kiphevi, (5) bivangu bi kiphevi ayi (6) mangolo ma Nzambi voti phevi yinlongo.— Eso. 35:21; Min. 104:29; Mat. 12:43; Luk. 11:13.

• Phevi yinlongo.

  Madi mangolo Nzambi kansadilanga muingi kudukisa luzolo luandi. Phevi beni yidi yinlongo, kibila kuidi Yave yimfuminanga, nandi widi mutu wulutidi wudiodila ayi wusonga. Yawu mvandi yidi yinlongo kibila yawu Nzambi kansadilanga muingi kuvanga biuma binlongo.— Luk. 1:35; Mav. 1:8.

• Phingu nti.

  Kiuma baba sadilanga muingi kutovula batu bansemba. Bankaka baba kanganga malu ma mutu bevanga diambu, bankaka baba kanganga mioko ayi kidongo kiandi, mu phila ayoyo baba vanganga mutu kutovuka ayi kumona phasi.— Yel. 20:2; Mav. 16:24.

• Phoka.

  Yinsundula ziphoka zi bibulu baba sadilanga buka zikopu voti kiuma baba lundilanga nzeta, tinta ayi biuma binkaka. (1Sa. 16:1, 13; 1Mit. 1:39) Kikuma “Phoka” khumbu ziwombo ba kisadilanga muingi kutubila mangolo ayi lunungu.— Deu. 33:17; Mik. 4:13; Zak. 1:19.

• Phutukulu, Kumonika.

  Mu matangu mankaka madi mu Masonoko ma Kingeleko, kikuma akiokio kintubila matedi phutukulu yi Yesu Klistu banga Mesia ayi Ntinu. Phutukulu’andi beni, yitonina bo bambieka ku diyilu ayi yikhidi tatamana nati mu bilumbu abibi bitsuka.— Mat. 24:3.

• Pim.

  Kidi kizitu, ayi mvandi yidi thalu basi Filisteia baba dindanga muingi kulengula biuma. Mamanya mawombo babakula kuidi batu bamfionguninanga biuma bikhulu ku Isaeli, muba musonama “pim,” mu Kiebeleo yikhulu. Pim yimueka yiba kizitu ki 7,8 g, mu kutala ayi kumona yidi 2 terço yi sikulu yimueka.— 1Sa. 13:20, 21.

• Purim.

  Widi nkungi baba kembanga kadika mvu mu kilumbu 14 ayi 15 mu ngonda yi adar. Mu kilumbu akiokio, basi Yuda baba tebukanga moyo phulusu’awu mu bilumbu bi Esteli. Kikuma purím kinsundula “zisorte.” Mu thangu Hamã kakuba pur voti (sorte,) muingi kuzaba kilumbu bankuiza vonda basi Yuda boso, buawu buyizila dizina di Nkungi wu Purim, voti Nkungi wu Zisorte.— Est. 3:7; 9:26.

Q

• Quemós.

  Dizina di nzambi yi basi Moabe.— 1Mit. 11:33.

• Quisleu.

  Bo basi Yuda babasika ku buvika ku Babiloni, adiodio diba dizina di ngonda yivua mu kalendario yi basi Yuda, ayi ngonda yintatu mu zikalendario zinkaka. Yawu yaba toninanga va khati tsika ngonda yi Novembro nati va khati tsika ngonda yi Dezembro. (Neh. 1:1; Zak. 7:1)— Tala Ap. B15.

R

• Rolo.

  Widi mua nkanda wukula wuvangulu mu mabubu voti mu nkanda bibulu baba sonikanga, ayi baba zinganga mu mua nti. Masonoko matheti ma Kibibila, basonikina mawu mu zirolo, ayi buawu bubela zibuku zi Kibibila mu thangu yikhulu.— Yel. 36:4, 18, 23; Luk. 4:17-20; 2Ti. 4:13

• Romã.

  Dikundi didi buka maçã, vayi kititi kiandi kidi beni ngolo ayi kidi ndimba yi benga. Diawu balandudila mu biuma bafikula mu kikhutu ki nganga nzambi kiba ndimba yi azul ayi mu makunzi maba kuntuala tempelu, baba tedilanga Jaquim ayi Bowazi.— Eso. 28:34; Zit. 13:23; 1Mit. 7:18.

S

• Samalia.

  Diba divula dilutidi nkinza mu kintinu ki kumi di minkuna mi Isaeli, mu 200 di mimvu, ayi didi dizina di kizunga beni. Batungila divula beni va mbata mongo baba tedilanga samalia. Mu bilumbu bi Yesu, Samalia diba dizina di kizunga kiba ku khonzu norte yi Ngalili, ayi ku khonzu sul yi Yuda. Mu ziviage Yesu kavanga, nandi kabasa samunanga ko batu baba kalanga ku kizunga beni, vayi nandi wuviokila kuna zikhumbu zinkaka ayi wuyoluka na batu baba kalanga kuna. Petelo wusadila tsabi yimmuadi yi kintinu mu thangu basi Samalia batambula phevi yinlongo. (1Mit. 16:24; Yoa. 4:7; Mav. 8:14)— Tala o Apend. B10.

• Satana.

  Kikuma ki Kiebeleo kinsundula “mbeni,” mvandi kinsundula Satana, Nkadi’ampemba mbeni yitheti yi Nzambi.— Yob. 1:6; Mat. 4:10; Mav. 12:9.

• Sátrapa.

  Kilandu ki ntinu voti nyadi waba yadilanga divula mu kintinu ki Babiloni ayi Pelesia. Ntinu nandi waba solanga Zisátrapa muingi baba minyadi.— Esa. 8:36; Dan. 6:1.

• Seá.

  Kizongolo ki biuma biyuma kidi 7,33 di zilitro, mu kutadila kizongolo bantedilanga bato. (2Mit. 7:1)— Tala Ap. B14.

• Sebate.

  Bo basi Yuda babasika ku buvika ku Babiloni, adiodio diba dizina baba tedilanga ngonda kumi mueka mu kalendario yi basi Yuda, ayi ngonda yintanu mu zikalendario zinkaka. Yawu yaba toninanga va khati tsika ngonda yi Janeiro nati va khati tsika ngonda yi Fevereiro. (Zak. 1:7)— Tala Ap. B15.

• Selá.

  Kidi kikuma bansadilanga mu minkunga, ayi kikuma beni kimmonika mu buku yi Minkunga ayi Habakuki. Ḿba kinsundula kutelimisa nkunga muingi kuyindula, voti kutubila mabanza ma nkunga beni. Mu Septuaginta grega basekudila “selá” mu phila ayiyi diápsalma, kinsundula “kutelimisa nkunga.”— Min. 3:4; Hab. 3:3.

• Sezali.

  Dizina di dikanda ku Loma, ayi diawu diyiza ba thangununu yi mintinu bayiza yadila Loma. Augusto, Tibério ayi Cláudio ba batedila mu mazina amomo mu Kibibila. Thangununu ayoyo, mvandi ba yisadila muingi kutubila matedi Nero, kheti basintubila ko dizina diandi mu Kibibila. Mu Masonoko ma Kingeleko, bansadila mvandi kikuma Sezali muingi kutubila zimfumu zi dikabu voti zimfumu zi luyalu.— Mala 12:17; Mav. 25:12.

• Sikulu.

  Kidi kizongolo baba sadilanga muingi kuzonga kizitu, ayi kiawu kiaba zitanga 11,4g. Kikuma “sikulu-yi kibuangu kinlongo” ḿba bakisadila muingi kutuba ti vaba tombulu kizitu kiba kifuana voti kulandudila kizongolo ki kizitu baba sadilanga ku nzo yinlongo. Ḿba vaba sikulu yi mintinu (yidi disuasana na yo baba sadilanga beni) voti kizongolo ki kizitu baba suekanga mu zinzo zi mintinu.— Eso. 30:13.

• Sinédrio.

  Nzo yi lumfundusu yilutidi yi basi Yuda yiba ku Yelusalemi. Mu bilumbu bi Yesu yawu yiba 71 di batu, kubunda mvandi nkulutu zinganga nzambi, ayi batu babika kiyeku ki kuba bakulutu ba zinganga nzambi, basi dikanda di bakulutu ba zinganga nzambi, bakulutu ba dikabu, zimfumu zi minkuna ayi zi makanda, ayi ziescriba.— Mala 15:1; Mav. 5:34; 23:1, 6.

• Sioni; Mongo Sioni.

  Dizina di Jebus, divula di basi jebus, ku khonzu sudeste yi Yelusalemi. Bo ntinu Davidi kanunga divula adiodio ayi katunga kuna nzo’andi, bayiza tona kutedila Sioni “Divula di Davidi.” (2Sa. 5:7, 9) Bo Davidi kanata kuna kasu yi luwawanu, Sioni wuyiza ba mongo wunlongo wu Yave. Buviokila thangu, batona kusadila dizina Sioni, kibuangu kioso kiba tempelu ku mongo wu Moriá, ayi khumbu zinkaka baba kukisadilanga muingi kutubila divula dioso di Yelusalemi. Mu Masonoko ma Kingeleko, khumbu ziwombo ba kisadilanga muingi kufuanikisa.— Min. 2:6; 1Pet. 2:6; Mav. 14:1.

• Sivã.

  Bo basi Yuda babasika mu buvika ku Babiloni, adiodio dizina di ngonda yintatu mu kalendario yi basi Yuda, ayi ngonda yivua mu zikalendario zinkaka. Yawu yaba toninanga va khati tsika Maio nati va khati tsika Junho. (Est. 8:9)— Tala Ap. B15.

T

• Talentu.

  Kiba kizitu ayi thalu yi zimbongo yiba mu kitezu kilutidi. Yawu yaba zitanga 34,2 kg. Talentu yi basi Grécia yiba yiluelu, yiba kizitu ki 20,4 kg. (1Lu. 22:14; Mat. 18:24)— Tala Ap. B14.

• Tamuz.

  (1) Widi nzambi no bakietu ba basi Yuda baba khambu tumukinanga Nzambi, baba sambidilanga ku Yelusalemi. Bantubanga ti Tamuz wuba ntinu, ayi bo kafua bayiza tona kuntadila buka nzambi. Mu minkanda mi basi sumeria, Tamuz ba kuntedila Dumúzi ayi widi nnuni voti kimasi ki nzambi nkietu Inana no bawu baba kikininanga ti nandi waba kuba sadisanga kubuta. (Yeh. 8:14) (2) Bo babasika ku buvika ku Babiloni, Tamuz diba dizina di ngonda yinna mu kalendario yi basi Yuda, ayi dizina di ngonda kumi mu zikalendario zinkaka. Yawu yaba toninanga va khati tsika Junho nati va khati tsika Julho.— Tala Ap. B15.

• Társis, makumbi ma Társis.

  Kidi kikuma basadila muingi kutubila makumbi maba kuendanga ku Társis (kizunga kio bubu bantedilanga Espanha.) Vayi buviokila thangu, kikuma akiokio bayiza kisadila muingi kutubila matedi makumbi manneni, maba diatanga beni kinanu. Salomo ayi Yozafati basadila makumbi amomo muingi kuvanga ziviage zi lungosu.— 1Mit. 9:26; 10:22; 22:48.

• Tártaro.

  Mu Masonoko ma Kingeleko, kikuma akiokio kinsundula mutu bambotula va kiyeku kimfunu, ayi widi buka mutu bantula mu buloku. Mambu amomo mawu mamonikina zimbasi bakhambu tumukina Nzambi mu bilumbu bi Nowa. Mu buku 2 Petelo 2:4, kikuma tartaróo kinsundula (“kukuba ku Tártaro”) mawu masinsundula ko ti “zimbasi basumuka” baba kuba ku Tártaro yo binganga bi luvunu banlonganga (ti kidi kibuangu ki buloku kidi ku tsi ntoto, ayi kidi beni kitombi ko bankubanga zinzambi zikhambulu beni luvalu.) Vayi mawu mansundula ti zimbasi aziozio, bazimbisa luaku luawu baba ku diyilu, ayi Nzambi wu babotula kiyeku kinkinza baba ku diyilu, ayi buka ti wuba tula va kibuangu kidi beni kitombi, kio bakhambu bue muena kiezila ki zikhanu zi Nzambi. Kitombi mvandi kinsundula ti bawu bala bungu, ayi dedi bo Masonoko mantubila, mbungulu beni yala ba yi mvu ka mvu, va kimueka na ntuadisi’awu Satana, Nkadi’ampemba. Diawu tulenda tuba ti, Tártaro yinsundula kubotula zimbasi bakhambu tumukina Nzambi va kiyeku kinkinza. Tártaro beni yidi disuasani na “diyenga” bantubila mu buku yi Nzaikusu 20:1-3.

• Tear.

  Widi ntungulu baba sadilanga muingi kutunga minledi.— Mkg. 16:14.

• Tebete.

  Bo basi Yuda babasika ku buvika ku Babiloni adiodio diawu dizina baba tedilanga ngonda kumi mu kalendario yi basi Yuda, ayi ngonda yinna mu zikalendario zinkaka. Yawu yaba toninanga va khati tsika Dezembro nati va khati tsika Janeiro. Nduka zikhumbu zioso ba yitedilanga “ngonda kumi”. (Est. 2:16)— Tala Ap. B15.

• Tempelu.

  Kiba kibanga kiba ku Yelusalemi kivinginina nzo yinlongo, ayi yawu basi Isaeli baba sadilanga muingi kubuongimina Nzambi. Tempelu yitheti Salomo nandi wutunga yawu, ayi basi Babiloni batulula yawu. Zorobabel nandi wutunga Tempelu yimmuadi bo babasika ku buvika ku Babiloni ayi buviokila mimvu, Elodi Wulutidi wuyiza bue tunga yawu. Mu Masonoko, tempelu ba yitedilanga zikhumbu ziwombo “nzo yi Yave”. (Esa. 1:3; 6:14, 15; 1Lu. 29:1; 2Lu. 2:4; Mat. 24:1)— Tala Ziapendice. B8 ayi B11.

• Tenda yi zikhutukunu.

  Dizina baba tedilanga tenda Mose katunga ku thandu, ayi yo mvandi baba tedilanga nzo yinlongo.— Eso. 33:7; 39:32.

• Thandu.

  Kikuma thandu ba kisadilanga muingi kutubila bibuangu bidi biyuma, bikhambu kalanga beni batu, bakhambu kunanga beni bivatu, voti bikhambu menisanga beni mbongu.

• Thata.

  Nledi wuba wuzingama baba kanganga ku ntu. Nkulutu zinganga nzambi waba vuatanga thata yivangulu mu linho fino ayi muba wola batula vantuala, bakanga mu kusadila nsinga widi ndimba azul. Ntinu mvandi waba vuatanga thata ava katetika kolowa. Yobi wusadila kikuma thata muingi kufuanikisa busonga buandi.— Eso. 28:36, 37; Yob. 29:14; Yeh. 21:26.

• Tsukulu yi Nza.

  Yidi thangu yi tsuka yi mambu moso maphasi, voti luyalu lu Satana. Ayi yawu mvandi thangu Yesu kala monika. Mu thuadusulu yi Yesu, zimbasi bala vasa ‘bankua mambi na basonga,’ ayi bala tulula bankua mambi. (Mat. 13:40-42, 49) Minlandikini mi Yesu, baba tomba kuzaba kidimbu ki “tsukulu yi nza.” (Mat. 24:3) Ava kavutuka ku diyilu, nandi wukanikisa minlandikini miandi ti, wala ba yawu nati ku tsukulu nza ayiyi.— Mat. 28:20.

• Tulumbeta.

  Kisiku kivangulu mu kisengu, baba sadilanga muingi kulubula ayi kusika minkunga. Mu kutadila mambu madi mu Zintalu 10:2, Yave wuvana zithuadusulu muingi bavanga zitulumbeta wadi zi palata, zio bankuiza sadila muingi kulubula dikabu bakutakana, kulubula dikabu muingi bananguka voti kulubula matedi mvita. Ḿba zitulumbeta beni ziba zisilubuka, ayi ziba disuasana na “zibuzina” ziba zikondalala baba sadilanga, zivangulu mu ziphoka. Zitulumbeta zivangulu mu biuma tukhambu zaba buboti, mvandi baba ku zisadilanga muingi kusika minkunga ku tempelu. Khumbu ziwombo bansadilanga nkuimbi wu Zitulumbeta, muingi kutubila matedi zimfundusu zi Yave, voti mambu mankaka mankinza ma Nzambi.— 2Lu. 29:26; Esa. 3:10; 1Ko. 15:52; Nza. 8:7–11:15.

U

• Urim ayi Tumim.

  Bidi biuma nkulutu zinganga nzambi kaba sadilanga muingi kuzaba luzolo lu Nzambi, mu mambu mankinza maba tombulu mvutu wu Yave matedi dikabu dioso. Baba sadilanga Urim ayi Tumim yoyawu phila baba sadilanga mamanya ma kutesila. Baba tulanga Urim ayi Tumim mu kikhutu ki thulu ki nkulutu zinganga nzambi ava kakota ku nzo yinlongo. Ḿba babika kubue sadila biuma abiobio bo batulula Yelusalemi kuidi basi Babiloni.— Eso. 28:30; Neh. 7:65.

Y

• Yakobi.

  Muana Isaki ayi Lebeka. Buviokila thangu, Nzambi wumvana dizina Isaeli, ayi nandi wuyiza ba mfumu yi dikanda di Isaeli, (dio mvandi bantedilanga basi Isaeli, bosi bayiza batedila basi Yuda.) Yakobi, wuba tata yi 12 di bana, ayi bana beni va kimueka na batu bayizila mu minkuna miawu, badukisa 12 di minkuna mi Isaeli. Batatamana kusadila dizina Yakobi muingi kutubila matedi dikabu di Isaeli.— Nge. 32:28; Mat. 22:32.

• Yave.

  Yidi tsekudulu mu Ibinda yi Tetragrama (bisona binna bi kiebeleo binsundula dizina di Nzambi,) bimmonika kuvioka 7.000 di zikhumbu mu tsekudulu ayiyi yi Kibibila.— Tala Ziapendice. A4 ayi A5.

• Yubileu.

  Nkungi baba vanganga mu kadika 50 di mimvu, kutonina mu mvu basi Isaeli bakota ku ntoto baba kanikisa. Mu mvu wu yubileu, basa ba ko nsua wu kuvela mbongu, ayi basi ebeleo baba mu buvika, baba kuba kulanga mu buvika beni. Mintoto mio bavua, mio basumbisa, baba vutulanga miawu mu thangu yubileu. Bukiedika, yubileu wuba nkungi baba kembanga mu mvu wuvimba. Wawu wuba mvu wu kiphuanza. Ayi mu mvu beni, dikabu baba luaku lu kuvutuka kubue ba kiphuanza kio Nzambi kaba vana va thonono.— Lev. 25:10.

• Yuda.

  Widi muana wunna wu Yakobi no kabuta na nkazi’andi Leia. Mu thangu Yakobi kaba fua, nandi wubikula ti nyadi wulutidi wala kuizila mu nkuna wu Yuda. Yesu bo kaba va ntoto, nandi wubutukila mu nkuna wu Yuda. Dizina adiodio mvandi ba disadila muingi kutubila mvila, ayi buviokila thangu, bayiza sadila dizina beni muingi kutubila matedi kintinu ki Yuda. Kintinu beni mvandi ba kitedila kintinu ki sul. Mu kintinu beni muba mimvila miodi mi basi Isaeli, mvila wu Yuda ayi wu Beyamini, kubunda mvandi zinganga nzambi ayi zilevita. Mvila wu Yuda, waba kalanga ku kizunga ki sul, kuawu kuba divula di Yelusalemi ayi Tempelu.— Nge. 29:35; 49:10; 1Mit. 4:20; Ebe. 7:14.

Z

• Zeusi.

  Diba dizina di nzambi basi Grécia baba kinzikanga beni. Balinabasi bantedila Zeusi ku Listra. Babakula biuma ku khonzu Listra bintubila “zinganga nzambi zi Zeusi” ayi ti “Zeusi, widi nzambi yi muinya.” Dikumbi dio Polo banangukina ku kiseki ki Malta bafikula kuntuala dikumbi beni bitumba bi “bana ba Zeusi,” mawu mansundula bibaza Castor ayi Pólux.— Mav. 14:12; 28:11.

• Ziepikoleu.

  Baba minlandikini mi dibakala dimueka musi grécia wulonguka filosofia Epicuro (341-270 ATK.) Bawu baba kikininanga ti kudukisa zitsatu zi kinsuni, diawu diambu dilutidi nkinza mu luzingu.— Mav. 17:18.

• Zimbasi.

  Kikuma ki kiebeleo malʼákh ayi ki kingeleko ággelos binsundula “mvuala.” Bo bantubila matedi zimvuala zi kiphevi, bansekudilanga kikuma akiokio mu “mbasi”. (Nge. 16:7; 32:3; Tia. 2:25; Nza. 22:8) Zimbasi bidi bivangu bi kiphevi bibi mangolo. Bawu theti Nzambi kavanga ava kavanga batu. Mu Kibibila mvandi ba kuba tedilanga “bivevi na bivevi binlongo,” “bana ba Nzambi” ayi “zimbuetila zi meni.” (Deu. 33:2; Yob. 1:6; 38:7) Zimbasi basa vangulu ko muingi babuta zimbasi yawu, vayi ba bavanga wumueka wumueka. Vadi kuvioka khama di bivevi na bivevi bi zimbasi. (Dan. 7:10) Kibibila kimmonisa ti kadika mbasi, widi na dizina diandi ayi kimutu kiandi. Mu kuyikulula, bawu bakikininanga ko baba buongimina ayi bawombo mu bawu batianga ko kuzabikisa mazina mawu. (Nge. 32:29; Luk. 1:26; Nza. 22:8, 9) Bawu badi mu mintindu miviakana mi mangumba, ayi bantambulanga biyeku biviakana. Dedi: bankaka bansadilanga va ntuala kikundu kimfumu ki Yave, bankaka banzabikisanga zitsangu, bankaka bansadisanga bisadi bi Yave va ntoto, bankaka bansadisanga muingi zimfundusulu zi Nzambi zisalama, ayi bankaka bambuelanga mioko kisalu ki kusamuna. (2Mit. 19:35; Min. 34:7; Luk. 1:30, 31; Nza. 5:11; 14:6) Mu bilumbu binkuiza, va kimueka na Yesu, bawu bala nuana mu mvita wu Alimangedoni.— Nza. 19:14, 15; Mat. 2:1.

• Zimfumu.

  Mu kintinu ki Babiloni, zimfumu aziozio, baba dingumba di batu bapisuka mu minsiku, baba kimfumu, ayi baba kiyeku ki kufundisa. Mu thangu basi Loma, zimfumu aziozio, baba kiebanga bisalu bi kintinu. Bisalu biawu biba: kutuadisa nsika, kukieba zimbongo, kufundisa batu banlevula minsiku, ayi kuvana nsua muingi basemba batu beni.— Dan. 3:2; Mav. 16:20.

• Zinefilins.

  Bana bazangama ayi badi beni mangolo, bo zimbasi bavuata zinyitu zi kinsuni bayiza buta na bakietu va ntoto. Bana beni baba batu ba buphunya, ayi bazinga ava khuka minlangu kumonika mu bilumbu bi Nowa.— Nge. 6:4.

• Zinetineu.

  Batu bakhambu ba basi Isaeli, voti baba sadisanga ku tempelu. Kikuma ki kiebeleo, kinsundula “batu bavana,” kiawu kimmonisa ti bawu baba vana muingi kusala ku tempelu. Ḿba bawombo mu zinetineu babutukila mu nkuna wu basi ngibioni, batu Yosua kavana kiyeku ki ‘kuzenga bisuadi ayi kuteka nlangu muingi kusadisa dikabu ayi kusadila va kikumu ki Yave’.— Yos. 9:23, 27; 1Lu. 9:2; Esa. 8:17.

• Zingana.

  Madi mambu ma nduenga ayi binongo bikhufi, bimvana malongi mankinza. Zingana mu Kibibila, zilenda ba mambu matsisi voti madi phasi mu kuvisa. Batu bankaka bayiza tona kusadila zingana muingi kuvueza voti kulenza bankaka.— Mpo. 12:9; 2Pet. 2:22

• Ziphasi zingolo.

  Kikuma ki kingeleko “ziphasi,” kinsundula ziphasi zinkuizilanga mu zikhuamusu zimmonika mu thangu beni. Yesu wutubila matedi “ziphasi zingolo” ziala monika ku Yelusalemi, ayi bulutidi, wutubila matedi ziphasi zingolo ziala kuizila kuidi batu boso va ntoto mu thangu nandi ‘kala kuiza mu nkembu’andi.’ (Mat. 24:21, 29-31) Polo wutuba ti ziphasi aziozio, didi diambu disonga Nzambi kala vanga kuidi “batu bakhambu kunzaba ayi bammanga kutumukinanga zitsangu zimboti” matedi Yesu. Mu kapu 19 yi buku yi Nzaikusu, yintuba ti Yesu widi mu kutuadisa nkangu wu zimbasi muingi kunuanisa “kibulu ki nganzi, mintinu mi nza ayi mangumba mawu.” (2Te. 1:6-8; Nza. 19:11-21) “Nkangu wunneni wu batu” bala vuka mu ziphasi zingolo. (Nza. 7:9, 14)— Tala ALIMANGEDONI.

• Ziphevi zimbi.

  Bidi bivangu bi kiphevi bidi makhema ayi bidi mangolo. Mu buku yi Ngenesi 6:2 ba ku batedila “bana ba Nzambi yikiedika”ayi mu buku yi Yuda 6 ba ku batedila “zimbasi.” Nzambi kasa vanga ko zimbasi aziozio muingi baba bankua mambi. Vayi bawu bayiza kituka zimbeni zi Nzambi, kibila basa tumukina ko Nzambi mu bilumbu bi Nowa, ayi mu phila ayoyo bawu bayenda ku khonzu Satana ayi babalukila Yave.— Deu. 32:17; Luk. 8:30; Mav. 16:16; Tia. 2:19.

• Ziphoka zi kikumu.

  Tsongi yi kiuma kiba buka phoka, kiba mu zikhonzu zinna mu bikumu binkaka voti zialtar. (Lev. 8:15; 1Mit. 2:28)— Tala Ziapendice. B5 ayi B8.

• Ziserafins.

  Bivangu bi kiphevi badi bazungalala va kikundu ki kimfumu ki Yave ku diyilu. Kikuma ki Kiebeleo serafím kinsundula “mbazu yinlema.”— Yes. 6:2, 6.

• Zitoiko.

  Dingumba di basi Grécia balonguka filosofia. Bawu baba kikininanga ti mayangi makiedika mankuizilanga mu kuzingila mu yoso kua phila mutu katidi ayi mu kulandakana minyengu mi nza. Kuidi bawu mutu wulonguka beni voti widi nduenga kavuanga ko nkinza kumonisa kiadi voti kuyivana mu zinyenzi.— Mav. 17:18.

• Zitsangu zimboti.

  Mu Masonoko ma Kingeleko, kikuma akiokio kinsundula zitsangu zimboti matedi Kintinu ki Nzambi ayi phulusu yinkuizilanga mu kulekila kiminu mu Yesu Klistu.— Luk. 4:18, 43; Mav. 5:42; Nza. 14:6.

• Zive.

  Diba dizina di ngonda yimmuadi mu kalendario yi basi Yuda, ayi di ngonda yinana mu zikalendario zinkaka. Yawu yaba toninanga va khati tsika ngonda Abril nati va khati tsika ngonda Maio. Bo basi Yuda babasika ku buvika ku Babiloni, batona kutedila ngonda beni íiar. (1Mit. 6:37)— Tala Ap. B15.