Buku Yitheti yi Samueli
28 Mu bilumbu beni, basi Filistea bakutikisa masodi mawu muingi kunuanisa basi Isaeli. Bosi ntinu Akis wukamba Davidi: “Ngie na babakala badi yaku, luenkuenda yama mu mvita.” 2 Davidi wukamba Akis: “Ngie zebi buboti mambu kisadi kiaku kankuiza vanga.” Akis wukamba Davidi: “Diawu minu yinkuiza kubiekila nsungi′ama.”
3 Samueli wufua ayi dikabu dioso di Isaeli badila lufua luandi ayi banzikila ku Ramá ku divula kabutukila. Ayi Sauli wukukisa ku kizunga ki Isaeli zinganga zi minkisi ayi batu boso baba tesanga.
4 Basi Filistea bakutakana ayi bayevundila ku Suném. Mu kibila akiokio, Sauli wukutikisa masodi moso ma Isaeli ayi bayevundila ku Gilboa. 5 Bo Sauli kamona nkangu wu masodi ma basi Filistea, nandi wuba beni boma ayi wutona kutitubuka. 6 Sauli wutomba kuzaba mayindu ma Yave, vayi Yave kasa kuntambudila ko ne mu zindosi, mu Urim ayi ne mu nzila miḿbikudi. 7 Bosi Sauli wukamba bisadi biandi: “Tombanu nkietu widi nganga nkisi muingi minu yindinda lusadusu.” Bisadi biandi bankamba: “Ku En-Dor kuidi nkietu widi nganga nkisi.”
8 Mu phila ayoyo, Sauli wuvuata bikhutu binkaka muingi babika kumbakula, ayi va builu nandi wuyenda na bisadi biandi biodi muingi kueyoluka na nkietu beni. Sauli wukamba nkietu beni: “Lemvuka, nzabikisa mambu mankuiza monika, ayi thedila mutu no minu yinkuiza kukamba.” 9 Vayi nkietu beni wunkamba: “Ngie zebi buboti mambu Sauli kavanga, nandi wukukisa ku kizunga ki Isaeli zinganga zioso zi minkisi ayi batu boso bantesanga. Buabu, kibila mbi mandekila ntambu awowo muingi baphonda?” 10 Sauli wuleva phesi mu dizina di Yave, mu kutuba: “Yinleva phesi mu dizina di Yave ti wisinkuiza ba ko fotu mu mambu amomo.” 11 Nkietu beni wunyuvula: “Nani ngie wuntomba minu yikutedila?” Nandi wumvutudila: “Thedila Samueli.” 12 Bo nkietu beni kamona mutu wuba buka Samueli, nandi wulosuka ayi wukamba Sauli: “Kibila mbi ngie bephunina? Ngie widi Sauli.” 13 Ntinu Sauli wunkamba: “Bika kumona boma, vayi khamba mbi widi mu kumona?” Nkietu beni wunkamba: “Yidi mu kumona mutu widi buka mbasi widi mu kutombuka.” 14 Muna thangu beni, Sauli wuyuvula nkietu beni: “Mutu beni buidi kadidi?” Nkietu beni wumvutudila: “Nandi widi kiboba ayi bevuata dizuela dikhambulu mioko.” Bo Sauli kavisa ti wuba “Samueli,” nandi wufukama ayi wuyinika kizizi kiandi va tsi.
15 Bosi Samueli wukamba Sauli: “Kibila mbi ngie widi mu kuthatisila ayi kibila mbi bethedila?” Sauli wumvutudila: “Yidi mu kuviokila mu mambu maphasi. Basi Filistea badi mu kukuiza muingi kunduanisa ayi Nzambi bembanda mbusa, nandi kasi bue kuphananga ko mvutu ne mu zindosi voti mu nzila miḿbikudi, diawu yibe kutedila muingi wukhamba mambu mbi yifueti vanga.”
16 Bosi Samueli wunkamba: “Kibila mbi ngie bethedila mu kuzaba ti Yave wu kubendi mbusa ayi weka mbeni′aku? 17 Yave wunkuiza vanga mambu moso kabikula mu nzil′ama: Yave wunkuiza kubotula va luyalu ayi wunkuiza bieka Davidi ntinu va mvingi′aku. 18 Yave kadi mu kuvangila mawu, kibila ngie wusa tumukina ko mambu Yave katuba ayi wusa vonda ko basi Amaleki boso. 19 Yave mvandi wunkuiza vanga muingi masodi ma basi Filistea banunga basi Isaeli, ayi yono ngie ayi bana baku luala ba yama. Yave wunkuiza bika mvandi muingi basi Filistea bavonda masodi ma basi Isaeli.”
20 Muna thangu beni, Sauli wubua va tsi ayi wuba beni boma mu kibila ki mambu “Samueli” katuba. Nandi kasa ba ko mangolo, kibila kasa dia ko ne kiuma mu kilumbu beni kutona va meni nate va builu. 21 Bo nkietu beni kafikama vaba Sauli ayi bo kamona ti nandi waba kuazuka beni, wunkamba: “Minu kisadi kiaku yibe tula luzingu luama va kingela mu kuvanga mambu bethuma. 22 Buabu, yuwa mambu kisadi kiaku ka kukamba. Bika kisadi kiaku ka kukubikila dipha muingi wudia ayi wubaka mangolo ma kukuendila.” 23 Vayi Sauli wumanga mu kutuba: “Yisindia ko ne kiuma.” Vayi bisadi biandi ayi nkietu beni batatamana kunkuika, bosi nandi wukikinina, wutelama ayi wukala va kika. 24 Mu thinu nkietu beni wuvonda muana ngombi yiba ku nzo′andi bosi wubonga falinya ayi wuvanga mapha makhambulu luvi. 25 Bosi nkietu beni wutudila Sauli ayi bisadi biandi bidia, ayi bawu badia. Bosi bo bamana kudia bawu bananguka ayi muna builu beni bawu bayenda ku nzo′awu.