“Bika Kintinu Kyaku Kiza”

Yave wukanikisa: ‘Yela fyona maswela moso mu meso mawu ayi lufwa, bidilu, ziphasi ayi bimbevo byalasa bwe ba ko. Twalasa bwe tebukilanga ko moyo mambu moso ma phasi mavyoka.’

Yave wutula Adami ayi Eva ku lumbu lu Edeni mwingi bazingila mu mayangi. Makanu ma Yave maba, babuta bana mwingi bawesa ntoto ayi babwongimina Nzambi. Vayi bawu babayisa Yave. Kheti mu mambu beni ma monika, Yave wukhidi tomba ntoto wuba paladizu. Mu buku ayiyi, tuma longuka ti Nzambi wuvanga mamoso kakanikisa. Kintinu kyandi, kyawu kyala twala mambu mamboti va ntoto Yave ka kanikisa kwidi Abalami.

Satana, zimpheve zimbi, ayi baboso bavanganga mambi bala bungwa, baboso ku diyilu ayi va ntoto bela bwongimina Yave. Vasi ko mutu wala bwe bela ayi kufwa. Kibila kadika lumbu twala kotukanga mu mayangi ayi mu buvinya. Ntoto woso wala baluka Paladizu. Batu boso bala dyanga buboti, bala tunga zinzo ziawu ayi bala zingila mu nsika va ntoto. Bibulu byalasa bwe tina ko batu ayi batu balasa ba ko boma bu bibulu.

Wulembu yindula nyenzi yala ba thangu Yave kala vulubula batu? Befu twala zaba batu bazinga mu thangu yi khulu, buka Nowa, Abeli, Abalami, Sala, Mose, Luti, Esteli ayi Davidi. Bawu bala kutusadisa mu kubalula ntoto paladizu. Befu boso twala sadila va kimweka.

Yave wuntomba ngye mvaku wukota ku paladizu. Bukyedika, mawombo wala bwela longuka mu matedi Nzambi. Buawu, kadika kilumbu bwela kindisa kikundi na Yave, mwingi ngye wuba nkundi’andi wufikama bubu, nate mu thangu yika yimani.