Mu nza yimvimba, batu bawombo badi mayindu maviakana matedi malavu. Bankaka, banzolanga kunua bo badi na bakundi bawu. Bankaka bammanganga kunua malavu ayi bankaka bannuanga beni malavu ayi bankoluanga. Vayi mbi Kibibila kintuba matedi kunua malavu?

1. Didi disumu kunuanga malavu mankolusuanga?

Kibibila kisinkandimina ko kunua malavu, kibila mawu madi mu minkayilu miwombo Yave ka tuvana. Dedi, Kibibila kintuba: “Vinu yinkuangidikanga batu.” (Minkunga 104:14, 15) Kibibila kintubila mvandi babakala ayi bakieto baba kiminu banua malavu mankolusuanga.—1 Timoteo 5:23.

2. Malongi mbi Kibibila kimvana kuidi batu bannuanga malavu?

Yave wunkandiminanga kunua beni ayi kukolu malavu. (Ngalatia 5:21) Kibibila kintuba: “Bika kuba beni kikundi na batu bannuanga beni vinu.” (Zingana 23:20) Ngie kubaka makani ma kunua malavu—kheti bo widi va ngie veka—voti na bankaka, wulendi nuina ko nati mu kitesu ki mvunzula mayindu maku, kio wukhambu nunga kuyala mambu wunkoluka, wumvanga voti kuyala nyitu’aku. Boti tuisinnunga ko kunua malavu mu phila yinkuangidika Yave, buna tufueti lembu kunua.

3. Buidi tulenda kinzikila makani ma bankaka mu matedi kunua malavu?

Kadika mutu widi luaku lu kusola boti wunkuiza nua malavu voti ndamba. Diawu tulendi fundisa ko mutu wumbaka makani ma kunua malavu mu phila yifuana voti kukuika bankaka banua malavu. (Loma 14:10) Befu tumbakanga makani ma kubika kunua malavu boti mawu mantatisa kilunzi ki bankaka. (Tanga Loma 14:21.) Kibila “tutombanga ko mamboti [mitu veka], vayi ma batu bankaka.”—Tanga 1 Kolinto 10:23, 24.

BUELA LONGUKA

4. Baka makani boti wunkuiza nua malavu

Buidi Yesu kabe tadilanga malavu? Muingi wubaka mvutu tala mangitukulu matheti nandi kavanga. Tanga Yoane 2:1-11, bosi tubilanu biuvu binlanda:

• Dedi bummonisina mangitukulu amama, buidi Yesu kabe tadilanga malavu? Ayi buidi kabe tadilanga batu babaka makani ma kunua malavu?

• Mu kumona ti Yesu kasa kandimina ko kunua malavu, buidi tufueti tadilanga batu bambaka makani ma kunua malavu?

Kheti baklisto badi luaku lu kunua malavu, vayi mawu masinsundula ko ti bafueti nuanga kadika thangu. Tanga Zingana 22:3 ayi mona buidi mambu manlanda malenda kusadisila kuzaba boti wulenda nua malavu voti ndamba:

• Bo widi mu kudiatisa dikalu voti kusadila bisengu bilenda tula luzingu luaku va kingela.

• Bo widi mu buemba.

• Bo dotoli ka kukandimina wubika nua malavu.

• Boti wununganga ko kunua malavu mu phila yifuana.

• Boti vadi nsiku wunkandimina kunua malavu va kibuangu widi.

• Boti widi na mutu wubaka makani ma kukhambu nuanga malavu kibila kabasa nunganga ko kunua mu phila yifuana.

Mu nkungi wu dikuela diaku voti bo wumvanga minkungi minkaka, wufueti kabila malavu kuidi bankaka? Mona mbi bilenda kusadisa kubaka makani, tala VIDEO.

VIDEO: Yifueti Kabila Bankaka Malavu? (2:41)

Tanga Loma 13:13; ayi 1 Kolinto 10:31, 32. Mu kadika lutangu luntanga, tubilanu kiuvu kinlanda:

• Buidi kusadila mambu madi mu matangu amomo, malenda kusadisila kubaka makani mankuangidika Yave?

5. Baka makani nati kitesu mbi wunkuiza nuina malavu

Boti wumbaka makani ma kunua, tebuka moyo ti: Yave kakandiminanga ko kunua malavu, vayi nandi wunkandimina kunua beni ayi kukolu malavu. Kibila mbi? Tanga Hosea 4:11, 18, bosi tubilanu kiuvu kinlanda:

• Mambu mbi mutu widi kifu ki kunuanga beni malavu kalenda vanga?

Buidi tulenda nungina kifu ki kunuanga beni malavu? Kunuanga mu phila yifuana. Tanga Zingana 11:2, bosi tubilanu kiuvu kinlanda:

• Kibila mbi didi diambu dimboti kusikika ndilu nati kitesu mbi wufueti nuina malavu?

6. Nunga kifu ki kunuanga beni malavu

VIDEO: Minu Yivongila Luzingu Luama (6:32)

• Mu video tuma mona, buidi kunuanga beni malavu kutuadisila ziphasi kuidi Dimitri?

• Bukiedika ti khumbu yitheti kabaka makani ma kubika kunua, nandi wununga kuvanga mawu?

• Mbi binsadisa kununga kifu ki kukoluanga malavu?

Tanga 1 Kolinto 6:10, 11, bosi tubilanu biuvu binlanda:

• Kibila mbi didi diambu dimbi kukoluanga malavu?

• Mbi bimmonisa ti mutu kalenda nunga kifu ki kukoluanga malavu?

Tanga Matai 5:30, bosi tubilanu kiuvu kinlanda:

• Bo Yesu kata kinongu ki kuzenga koko, nandi waba tomba kutuba ti tufueti vanga mangolo muingi tubika vanga mambu mayongisa Yave. Mbi fueti vanga muingi kununga kifu ki kunuanga beni malavu?a

Tanga 1 Kolinto 15:33, bosi tubilanu kiuvu kinlanda:

• Buidi bakundi baku balenda kuvukumunina kuviokisa kitesu ki kunuina malavu?

MBI NGIE BELONGUKA

Yave wuvanga malavu muingi kututuadisa mayangi, vayi nandi wunkandiminanga kunua beni ayi kukolu malavu.

Vutukila Mambu Mamfunu

• Mbi Kibibila kintuba matedi kunua malavu?

• Mambu mbi mutu widi kifu ki kunuanga beni malavu kalenda vanga?

• Buidi tulenda kinzikila makani ma bankaka matedi kunua malavu?

TALA MAMBU MANKAKA

Buidi matoko balenda bakila makani mamboti matedi kunua malavu?

Minu, Yifueti nua Malavu? (2:31)

Bakula mbi fueti vanga muingi wununga kifu ki kunuanga beni malavu.

“Manter a bebida no devido lugar” (A Sentinela, 1 de Janeiro de 2010)

Baklisto bafueti bundasananga zicopo?

“Perguntas dos Leitores” (A Sentinela, 15 de Fevereiro de 2007)

Mu kinongu “Minu Yiba Mvika wu Malavu” mona mbi bisadisa dibakala dimueka kununga kifu ki kukoluanga malavu.

“A Bíblia muda a vida das pessoas” (A Sentinela, 1 de Maio de 2012)

Befu boso tuidi luaku lu kusola ntindu bikhutu mbi tuntomba kuvuata. Befu kutumukina minsiku mi Kibibila mitedi mambu amomo, tunkuiza vuatila bika to mu phila yilenda kutu kuangidika vayi bulutidi mu phila yinkuangidika Yave. Tuemmona minsiku milenda ku tusadisa kuvanga mawu.

1. Minsiku mbi mi Kibibila mifueti ku tusadisa kusola bikhutu bitu?

Tufueti sola kuvuata “minledi mu phuatulu yimboti, mu lukinzu ayi mu khambu viokisa kitesu” ayi tufueti tatamana kuba badiodila banga batu “bansadilanga Nzambi.” (1 Timoteo 2:9, 10) Tuemmona minsiku minna: (1) Phuatulu’itu yifueti ba yimboti, dedi bo wummuenanga mu zikhutukunu, Zimbangi zi Yave bamvuatilanga mu ziphila ziviakana vayi phila tumvuatilanga yifueti monisa lukinzu kuidi Nzambi tumbuongiminanga. (2) Kuvuatila mu lukinzu, kunsundula kubika vuata bikhutu bifietakana, bikhufi ayi bimmonisa binama bi nyitu. (3) Befu tumvuatanga bikhutu bikhambu viokisanga kitesu mu kumanga kulandakana phila batu mu nza bamvuatilanga. (4) Phila befu tumvuatilanga yifueti monisa ti tuidi batu bansadilanga Nzambi muingi kumonisa kuidi bankaka ti tumbuongiminanga Nzambi yikiedika.—1 Kolinto 10:31.

2. Bo tunsola bikhutu bi kuvuata mbi tufueti yindulanga?

Bo tunsola bikhutu tunkuiza vuata, tufueti yindula theti buidi bankaka bankuiza tadila biawu. Tumvanganga mangolo muingi tubika nyongisanga bankaka, vayi muingi “kadika mutu mu befu kayangidika [wunkaka] muingi kunkindisa.”—Tanga Loma 15:1, 2.

3. Kibila mbi tufueti vuatilanga mu phila yimboti?

Befu tumvanganga mangolo muingi kuvuatila mu phila yimboti bo tunkuenda koso kua kuma. Vayi bulutidi bo tunkuenda mu zikhutukunu ayi mu kisalu ki kusamuna. Befu tuisintomba ko kuvanga bankaka ba tutadila mu phila yimbi, kibila phuatulu’itu yilenda sadisa bankaka bavua nkinza mambu tunlonga muingi “malongi ma Nzambi makinzuku va mesu ma batu boso.”—Tito 2:10..

BUELA LONGUKA

4. Phuatulu’itu yilenda zitisa Yave

Kibila mbi tufueti vuila nkinza ntindu bikhutu tumvuata? Tanga Minkunga 47:2, bosi tubilanu biuvu binlanda:

• Mu kuzaba ti tunnatanga dizina dinlongo di Yave, buidi mawu malenda tusadisila kusola buboti bikhutu tumvuata?

• Mu mbuenu’aku didi diambu dinkinza kuba keba keba mu ntindu bikhutu tumvuata bo tunkuenda mu zikhutukunu voti mu kisalu ki kusamuna? Kibila mbi?

5. Kibibila kilenda kusadisa kusola bikhutu bimboti

Tala VIDEO.

VIDEO: “Zitisa Nzambi mu Mamoso Wumvanga” (10:18)

Kheti bikhutu bitu bidi beni bukalu voti ndamba, vayi bifueti ba bidiodila ayi bifuana. Tanga 1 Kolinto 10:24 ayi 1 Timoteo 2:9, 10. Bosi tubilanu kibila mbi tufueti bika kuvuatanga bikhutu bidi beni . . .

• binneni voti bikhambulu bifuana.

• bifietakana, bimmonisa binama bi nyitu voti bikhutu bimvanganga mutu kuba mayindu ma kitsuza.

Kheti tuisi ko ku tsi nsiku wu Mose, vayi tulenda zaba mawombo matedi mayindu ma Yave. Tanga Deutelonomi 22:5, bosi tubilanu kiuvu kinlanda:

• Kibila mbi tufueti bikila kuvuatanga bikhutu bimvanganga babakala kuba buka bakieto ayi bakieto buka babakala?

Tanga 1 Kolinto 10:32, 33 ayi 1 Yoane 2:15, 16, bosi tubilanu biuvu binlanda:

• Kibila mbi tufueti vuatilanga mu phila yifuana muingi tubika nyongisa batu va kizunga kitu ayi mu kimvuka?

• Ntindu mbi phuatulu batu va kizunga kiaku banzolanga beni?

• Mu mbuenu’aku, bikhutu binkaka bamvuatanga bidi bifuana muingi Baklisto bavuata? Kibila mbi?

MBI NGIE BELONGUKA

Bo tumbaka makani mamboti mu kusola bikhutu tunkuiza vuata, tummonisanga lukinzu kuidi Yave ayi kuidi bankaka.

Vutukila Mambu Mamfunu

• Kibila mbi Yave kamvuilanga nkinza bikhutu bitu?

• Minsua mbi mi Kibibila milenda ku tusadisa kubaka makani mamboti matedi bikhutu tumvuata?

• Buidi bankaka balenda tadila kiedika mu kibila ki phuatulu’itu?

TALA MAMBU MANKAKA

Mona mbi batu balenda visa matedi bikhutu biaku.

“Mbi Batu Bankaka Balenda Visa Matedi Bikhutu Biaku?” (Dilongi didi mu jw.org)

Longuka kibila mbi didi diambu dinkinza kuyindula theti ava kuvanga zitatuagem.

“Mbi Kibibila Kintuba Matedi Kuvanga Zitatuagem?” (Dilongi didi mu jw.org)

Buela longuka matedi minsua milenda kusadisa kubaka makani mamboti.

“Sua roupa mostra que você serve a Deus?” (A Sentinela, Setembro de 2016)

Mona buidi nkieto waba tomba kuzaba kiedika kalongukila kukinzikanga mayindu ma bankaka matedi bikhutu.

“O modo de me vestir e arrumar era minha pedra de tropeço” (Despertai!, 22 de Dezembro 2003)