Buidi Zikhutukunu zi Zimbangi zi Yave Zilenda Kusadisila?

Ngie wumana kuenda mu lukutukunu lu Zimbangi zi Yave? Boti ndamba, buna diyindu di kukuenda mu khumbu yitheti mu lukutukunu, dilenda kukuazula nkadu. Ngie wulenda kuyikuvusa: ‘Mbi bimmonikanga mu zikhutukunu zi Zimbangi zi Yave? Kibila mbi ziawu zididi nkinza? Kibila mbi minu yifueti kuendila kuna?’ Mu dilongi adidi, ngie wunkuiza longuka buidi zikhutukunu zilenda kusadisila kubuela fikama Yave ayi kutuadisa ndandu mu luzingu luaku.

1. Kibila mbi Zimbangi zi Yave bankuendilanga mu zikhutukunu?

Nsoniki wumueka wu Kibibila wutuba: “Mu lukutukunu lunneni, yela zitisa Yave.” (Minkunga 26:12) Mambu katuba mammonisa ti, bisadi bi Nzambi bankutakananga muingi kubuongimina Nzambi. Bobuawu mvandi, Zimbangi zi Yave mu nza yimvimba, bankutakananga kadika sabala muingi kuzitisa Yave, kukuimbila ayi kusambila. Khumbu zinkaka mu mvu, bawu bankutakananga muingi kuvanga zikhutukunu zinneni zi kubuongimina Nzambi. Zimbangi zi Yave banzolanga beni kukuenda mu zikhutukunu.

2. Mbi wala longuka mu zikhutukunu zitu?

Mu zikhutukunu zitu, befu tunluta sadilanga Kibibila. Tuntanganga Diambu di Nzambi ayi “bansadisanga batu kuvisa mambu bantanga.” (Tanga Nehemia 8:8.) Mu zikhutukunu ngie wala longuka matedi Yave ayi zikhadulu ziandi zimboti. Bo wumbuela longuka matedi luzolo lu Yave, mawu mala kusadisa muingi wubuela kumfikama. Mvandi wala longuka buidi Yave kalenda kusadisila kubaka luzingu lu mayangi.—Yesaya 48:17, 18.

3. Phila batu mbi wala dengana mu zikhutukunu ayi ndandu mbi bala kutuadisa?

Yave wutu dinda “tumonasananga nkinza befu na befu muingi tukikindasanaga mu luzolo ayi mu mavanga mamboti, mu khambu bikanga kukutakana.” (Ebeleo 10:24, 25) Mu zikhutukunu ngie wala dengana batu bakivuanga nkinza bawu na bawu, ngie wala kuwa batu bantuba mambu mamboti babe longuka mu Kibibila. Dedi ngie, bawu mvawu batidi kubuela longuka matedi Yave. (Tanga Loma 1:11, 12.) Ayi mvandi ngie wunkuiza zaba batu bawombo, dedi bakuela ayi bakhambu kuela, badi mayangi kheti mu mambu maphasi bamviokila mu luzingu. Bemona mambu mbi mamboti wala dengana mu zikhutukunu? Yave widi bibila bimboti muingi kutu dinda muingi tuyendanga mu zikhutukunu!

BUELA LONGUKA

4. Phila bumvangiminanga zikhutukunu zi Zimbangi zi Yave

Baklisto mu sekulu yitheti baba kutakananga muingi kubuongimina Yave va kimueka. (Loma 16:3-5) Tanga Kolosai 3:16, bosi tubilanu kiuvu kinlanda:

• Buidi baklisto mu sekulu yitheti baba buongiminanga Yave?

VIDEO: Mbi Bimmonikanga ku Nzo Kintinu? (2:12)

• Mambu mbi mammonikanga ku Nzo Kintinu, madi madedakana na mambu madi mu Kolosai 3:16?

• Mu video voti fikula ngie bemona, vadi diambu bezola matedi zikhutukunu?

Tanga 2 Kolinto 9:7, bosi tubilanu kiuvu kinlanda:

• Kibila mbi bakongudilanga ko makaba mu zikhutukunu zi Zimbangi zi Yave?

Va kimueka na mutu wuku longanga Kibibila, talanu thuadusulu yi lukutukunu lunkuiza.

• Kitini mbi ki lukutukunu wummuena ti kinkuiza luta kutuadisa ndandu?

Ngie Zebi?

Mu kusadila jw.org, ngie wulenda bakula kibuangu ayi thangu bamvangilanga zikhutukunu mu nza yimvimba.

1. Mu zikhutukunu zitu, befu tulenda kuwa malongi, kumona zimbonosono ayi zivideo. Ziawu zintoninanga ayi zimmaninanga mu nkunga ayi nsambu

2. Mu bitini binkaka bi lukutukunu, batu bantambulanga luaku lu kuvana mimvutu

3. Baboso balenda kota kuawu—bakuela, bakhambulu bakuela, biboba, ayi bana balezi

4. Mu zikhutukunu zi Zimbangi zi Yave bakongulanga ko makaba

5. Vantombulu mangolo muingi kukuendanga mu zikhutukunu

Tala kifuani ki dikanda di Yesu. Kadika mvu, bawu baba nangukanga ku Nazaleti muingi kukuenda ku Yelusalemi mu lukutukunu lunkinza beni. Diba diambu diphasi kuvanga mawu kibila baba diatanga 100 di zikilometro ayi zinzila beni, ziba beni miongo. Tanga Luka 2:39-42, bosi, tubilanu biuvu binlanda:

• Kibila mbi vaba tombuluanga kuvanga mangolo muingi bayenda ku Yelusalemi?

• Kibila mbi ngie fueti vangila mangolo muingi kukuendanga mu zikhutukunu?

• Mu mbuenu’aku, didi diambu dinkinza kuvanganga mawu? Kibila mbi wunyindudila abobo?

• Kibila mbi tufueti tatiminina kukuendanga mu zikhutukunu?

MBI NGIE BELONGUKA

Kukuendanga mu zikhutukunu kuela kusadisa kubuela longuka matedi Yave ayi kukindisa kikundi kiaku kuidi nandi. Ayi mvandi, zikhutukunu ziala kuvana luaku lu kubuongimina Yave va kimueka na bankaka.

Vutukila Mambu Mamfunu

• Kibila mbi befu tunkuendilanga mu zikhutukunu?

• Mambu mbi wala longuka mu zikhutukunu zi Zimbangi zi Yave?

• Mu ziphila mbi zinkaka zikhutukunu zilenda kusadisila?

TALA MAMBU MANKAKA

Ngie wunkuazukanga mu kuzaba ti wufueti kuenda mu lukutukunu? Mona buidi dibakala dimueka, wuba momawu mabanza katonina kuzola zikhutukunu.

Tualasa Zimbakana ko Phila Batuyambila (4:16)

Tala kibila mbi ditoko dimueka kayiza zodila kukuendanga mu zikhutukunu ayi mbi nandi kavanga muingi katatamana kukuendanga muawu.

Minu Yinzolanga Beni Zikhutukunu! (4:33)

Tala mayindu batu bankaka badi matedi kukuendanga mu zikhutukunu.

“Kibila Mbi Tufueti Kuendilanga mu Zikhutukunu zi Zimbangi zi Yave?” (Dilongi didi mu jw.org)

Tala kinongu ki dibakala dimueka wuba buphunya ayi waba diatanga na bankua matingu. Bakula buidi luzingu luandi lubalukila bo kayenda mu lukutukunu lu Zimbangi zi Yave.

“Eu nunca saía sem minha arma” (A Sentinela, 1.º Julho de 2014)

5. Nza yibaluka tona mu mvu 1914

Tala VIDEO.

VIDEO: Nza Yibaluka Tona mu Mvu 1914 (1:10)

Yesu wubikula mambu mala monika va nza mu thangu kala tona kuyala. Tanga Luka 21:9-11, bosi tubilanu kiuvu kinlanda:

• Mu mambu Yesu kabikula mbi ngie wumana kuwa voti kumona?

Mvuala Polo wutubila matedi zikhadulu batu bala ba mu bilumbu bitsuka. Tanga 2 Timoteo 3:1-5, bosi tubilanu kiuvu kinlanda:

• Mavanga mbi, wummonanga mu batu bubu bantubila mu matangu?

6. Kintinu ki Nzambi ki tukindisanga

Tanga Matai 24:3, 14, bosi tubilanu biuvu binlanda:

• Kisalu mbi kinkinza kimmonisa ti, Kintinu ki Nzambi kimana tona kuyala?

• Buidi ngie wulenda buedila mioko kisalu beni?

Kintinu ki Nzambi kitona kuyala ku diyilu ayi nkadu to wunkhambu kiala yala ntoto woso. Tanga Ebeleo 10:24, 25, bosi tubilanu kiuvu kinlanda:

• Mu kuzaba ti “kilumbu beni kidi mu kuefikamanga,” mbi kadika mutu mu befu kafueti vanga?