Yesu Wutatamana Kutumamana

Mu mbwenu’aku, mpasi kutumamana matata maku?— Nkumbu ziǹkaka wulenda mona mpasi. Angi, zebi ti Yesu wutumamana Yave ayi matata mandi va ǹtoto?— Ǹtungulu wu Yesu wulenda kusadisa kutumamana matata nketi mu mambu ma mpasi. Twaḿbwela kulonguka matedi ǹtungulu beni.

Ava Yesu kabutuka va ǹtoto, nandi waba kalanga ku diyilu na tat’andi, Yave. Angi Yesu mvandi wuba matata va ǹtoto— Zozefi ayi Malia. Ngye zebi bwidi bayiza bela matata ma Yesu?—

Mo Yesu kiza va ǹtoto, Yave wubotula luzingu lwandi ku diyilu ayi wuḿfidisa va ǹtoto mwingi kabutukila mu mwana ndumba baǹtedilanga Malia. Mawu maba mangitukulu! Yesu wuyonzuka mu kivumu ki ngundi’andi dedi bana baǹkaka. Divwa di ngonda divyoka ava kabutuka. Buawu Malia ayi ǹnuni’andi bayiza bela matata ma Yesu va ǹtoto.

Yesu bo kadukisa kumi mimvu myodi (12), nandi wumonisa ti wuzola beni tat’andi, Yave. Mawu mamonika bo Yesu ayi dikanda dyandi bayenda ku Yelusalemi mu ǹkungi wu Pasika. Bo baba vutuka ku nzo, Zozefi ayi Malia basa mona ko Yesu mu bibwangu byoso. Ngye zebi kwidi kaba?

Zozefi ayi Malia bavutuka mu ntinu ku Yelusalemi mwingi kabila Yesu mu bibwangu byoso bavyokila. Miǹtima miawu misa ba ko mi kuluka kibila ba nkambu mona Yesu. Angi bilumbu bitatu bivyoka bayiza bakula ku kaba. Nandi wuba ku nzo yi Nzambi! Ngye zebi kibila Yesu kayendila ku nzo yi Nzambi?— Kibila kuawu kalenda longukila matedi Yave. Nandi waba zolanga Yave ayi waba tomba kuvanga luzolo lwandi. Nketi bo kaba nkulutu Yesu wutatamana kutumamana Yave. Yesu wutumamana nketi mu mambu maba mpasi ayi malenda kuǹtwadisa zimpasi. Mu mbwenu’aku, Yesu wutumamana Zozefi ayi Malia?— Kibibila kiǹtuba ti ngete.

Mbi ngye wulenda longuka mu kifwani ki Yesu?— Ngye wulenda tumamana matata maku nketi mu mambu ma mpasi. Wala tatamamana kutumamana?—