DILONGI 7

Longa Kyedika ayi Monisa Lufyatu

Luka 1:3

DILONGI: Bongila dilongi dyaku mu bivisa bi lufyatu bilenda sadisa batu ba kukuwa kutuka mu phisulu yisulama.

Sadila tho yi lufyatu. Sadila Dyambu di Nzambi mwingi wusudikisa mambu wunkoluka, boti kuba, vangila mawu mu kutanga Kibibila. Boti widi mu kutubila mambu ma kikola, zitsangu zimona, mambu mamonikini mutu, voti mankaka, fyongunina buboti mwingi wuzaba ti mambu beni madi makyedika ayi makhidi tsalulu bubu.
Sadila tho yi mambu mu phila yifweni. Sudikisa ngwizani matangu ma Kibibila wuntanga madi na mambu bawu basonika, sudikisa zitsangu zyoso zi Kibibila ayi bilongulu bi ‘nnanga wukwikama.’ (Matai 24:45) Sadila buboti bilongulu bikhambu bongulu mu Kibibila mu phila yifweni ayi bika balula tsundu yi mambu nsoniki kasonika.

Bika kusabisa zitsangu ayi thalu yi byuma. Ba keba keba mwingi wubika vingisa vama vasonama “batu bankaka” ayi kutula vawu “batu boso”, vo vasonama “mu khumbu zinkaka” wubika vingisa vawu buka “khumbu zyoso,” ayi vasonama “malenda ba” wubika vingisa buka “ḿba.”
Fyongunina buboti bivisa. Bo wuntanga matangu ma Kibibila, vanga byuvu mu lukinzu voti vana kifwani mwingi wusadisa batu ba kukuwa kuvisa baveka tsukulu yi dyambu.