Mubongulu Malongi Madi mu Nzingulu ayi Kisalu Thuadusulu yi Lukutukunu
6-12 NGONDA YISAMBUADI
KIUKA KIDI MU DIAMBU DI NZAMBI | ESODU 6-7
“Buabu, Tala Mambu Yemvangila Falawo”
(Esodu 6:1) Diawu Yave kakambila Mose: “Buabu, tala mambu yemvangila Falawo. Mu koko ku lulendu yala kunkuika kamubika muenda, mu koko ku lulendu yala kunkuika ka mukukisa ku Ngipiti.”
(Esodu 6:6, 7) “Buabu kamba basi Isaeli: ‘Minu yidi Yave, yela mubotula mu ziphasi zingolo zi basi Ngipiti ayi yala kulukula va kivika, yala mukula mu koko kuama ku lulendu ayi yela fundisa basi Ngipiti. 7 Ayi yala kulutambula banga dikabu diama, ayi yala ba Nzamb’inu, beno muala zaba mu bukiedika ti minu yidi Yave Nzamb’inu wu mukula mu ziphasi zingolo basi Ngipiti ba mutuadisanga.
it-3 16 ¶ 7
Mose
Bana ba Isaeli bayiza baluka beni. Va thonono bawu bakikinina ti Nzambi nandi wufila Mose, vayi bo Falawo kabuela kuba tovula mu bisalu bingolo, bawu babalukila Mose ayi batona kukuana, ayi manyongi mawu matuka kuidi Yave. (Esodu 4:29-31; 5:19-23) Mu thangu yinani, Nkua Ngolo Zioso wukindisa Mose ti nandi wunkuiza dukisa mamoso kakanikisa kuidi Abalahami, Isaki ayi Yakobi mu kuzabikisa tsundu yi dizina diandi. Yave wuvukisa basi Isaeli ayi wuba kotisa mu ntoto nandi kaba kanikisa. (Esodu 6:1-8) Kheti bobo, basi Isaeli bamanga kukuwila Mose. Vayi bo tsingulu yivua yivioka, basi Isaeli babuela mioko Mose ayi basala yandi va kimueka. Bo tsingulu yikumi yivioka, Mose wununga kuba kutikisa ayi kuba tuadisa muingi babasika ku Ngipiti mu phila yisulama, banga ‘nkangu wu masodi.’—Esodu 13:18.
(Esodu 7:4, 5) Vayi Falawo kalasa mukuwila ko. Diawu yala monisina lulendu luama kuidi basi Ngipiti ayi yala kuba fundisa beni ayi mvandi yala botula nkangu’ama wu basi Isaeli ku Ngipiti. 5 Bo yala monisa lulendu luama kuidi basi Ngipiti ayi kubotula basi Isaeli va khati tsik’awu, bawu bala visa mu bukiedika ti minu yidi Yave.”
it-3 16 ¶5-6
Mose
Vantuala Falawo ku Ngipiti. Mose ayi Aloni bawu batu baba luta tala, kibila baba fiesana na zinzambi zi Ngipiti. Falawo wutumisa zimfumu zi zinganga zi minkisi mi basi Ngipiti baba tedilanga Yanesi ayi Yambelesi muingi bafiesana na Yave. (2 Timoteo 3:8) Mangitukulu matheti Aloni kavanga va ntuala Falawo mu thuadusulu yi Mose, mammonisa ti Yave nandi lutidi zangama kena zinzambi zi Ngipiti. Kheti bobo, Falawo wutatamana kuba khutu matu. (Esodu 7:8-13) Kuntuala bo tsingulu yintatu yitona, nati zinganga zi minkisi zi Ngipiti batuba: “Bukiedika luidi lulendu lu Nzambi!” Bawu mvawu batovuka mu tsingulu yi zitsulikini voti binkhusu, diawu bakhambu nungina kumonika va ntuala Falawo muingi kufiesana ayi Mose.—Esodu 8:16-19; 9:10-12.
Zitsingulu zituadisa luvovomu ayi lungundayi. Mose ayi Aloni bawu bayamikisa zitsingulu zioso. Zitsingulu zioso zimonikina mu phila bayamikisa ziawu ayi mawu mammonisa ti Yave nandi wufila Mose. Dizina di Yave diyiza zitusu ayi batu baba tubilanga beni diawu ku Ngipiti. Zitsingulu beni zituadisa beni luvovomu kuidi basi Isaeli ayi bankaka mu basi Ngipiti, vayi zibuela vanga Falawo ayi baboso baba ku khonzo’andi kubuela ba lungundayi. (Esodu 9:16; 11:10; 12:29-39) Basi Ngipiti basa yindula ko ti baba finganga zinzambi ziawu vayi bazaba ti Yave nandi waba fundisa zinzambi ziawu. Bo tsingulu yivua yivioka, buna “Mose mana ba mutu wu luvalu ku ntoto wu Ngipiti, va ntuala bisadi bi Falawo ayi va ntuala dikabu dioso.”—Esodu 11:3.
Bakula Kiuka Kisuama mu Diambu di Nzambi
(Esodu 6:3) Minu yaba monikanga kuidi Abalahami, Isaki, ayi Yakobi banga Nzambi yi Nkua Ngolo Zioso, vayi mu matedi dizina diama Yave, yisa yizabikisa ko kuidi bawu.
it-3 723 ¶6-7
Nkua Ngolo Zioso
Yave wuyitedila “Nkua Ngolo Zioso” (ʼEl Shad·daiʹ) bo kakanikisa Abalahami matedi mbutukulu yi muan’andi Isaki. Vaba tombolo Abalahami kumonisa beni kiminu mu mangolo Nzambi kadi ma kudukisa lukanu beni. Vawu batonina kutedila Yave mu phila ayoyi muingi kumonisa ti nandi wunkuiza sakumuna Isaki ayi Yakobi muingi batambula kiuka mu luwawanu nandi kavanga na Abalahami.—Ngenesi 17:1; 28:3; 35:11; 48:3.
Mu kibila akioki, Yave wukamba Mose: “Minu yaba monikanga kuidi Abalahami, Isaki ayi Yakobi banga Nzambi Nkua Ngolo Zioso vayi mu matedi dizina diama Yave yisa yizabikisa ko kuidi bawu.” (Esodu 6:3) Mawu masinsundula ko ti bawu babasa zabanga ko dizina di Yave, kibila bawu ayi bankaka baba sadilanga diawu khumbu ziwombo. (Ngenesi 4:1, 26; 14:22; 27:27; 28:16) Mu buku yi Ngenesi, kikuma “Nkua Ngolo Zioso kimmonika to khumbu 6 vayi dizina Yave disonama 172 di zikhumbu mu Masonoko ma Kiebeleo. Kheti bisadi bi Yave bazaba ti nandi widi nsua wu kutedulu “Nzambi Nkua Ngolo Zioso,” bawu basa baka ko luaku lu kuvisa mu bukiedika tsundu yi dizina Yave. Mu matedi mambu amomo, buku O Novo Dicionario Da Biblia (Vol. 1, p. 572) yintuba: “Nzambi wukizabikisa mu phila ayoyi kuidi bisadi biandi mu kibila ki mambu kakanikisa mala monika mu bilumbu binkuiza, ayi vaba tombulu kuba sadisa kuba lufiatu ti nandi Yahweh, widi Nzambi wulenda nunga kudukisa zikhanu ziandi zioso. Vayi phila Yave kayizabikisila kuidi Mose yiluta ba luvalu, kibila phila kamonisina lulendu luandi ayi mambu kavangila basi Isaeli maba kithuadi na tsundu yi dizina diandi Yahweh.”—Baludika yawu kuidi J. D. Douglas, 1980.
(Esodu 7:1) Diawu Yave kakambila Mose: “Tala, yikukitudi banga nzambi kuidi Falawo ayi AIoni khomb’aku wunkuiza ba mbikudi’aku.
it-3 16 ¶2
Mose
Yave wusola Mose kheti mu zitsonya kaba. Mose wuba zitsonya bo katuba ti kasa zaba ko kukoluka buboti. Mawu mammonisa ti Mose wubaluka, kibila 40 di mimvu kumbusa nandi waba tomba kuvukisa basi Isaeli mu mangolo mandi veka. Nandi wutatamana kukamba Yave kafila kuandi mutu wunkaka va mvingi’andi. Kheti mawu mafuemisa Nzambi, Nandi kasa manga ko Mose, vayi wumvana khomb’andi Aloni muingi kaba mvual’andi. Diawu, dedi bo Mose kabela mvuala wu Nzambi, nandi mvandi wuba buka nzambi kuidi Aloni waba kolukanga buka mvual’andi. Mu lukutukunu baba na bakhulutu basi Isaeli ayi bo baba dengananga na Falawo, ḿba Nzambi waba vananga minsiku ayi zithuadusulu kuidi Mose ayi nandi waba vananga ziawu kuidi Aloni ayi Aloni waba zabikisanga ziawu kuidi Falawo (Falawo awowo nandi wuvinginina Falawo waba tomba kuvonda Mose mu 40 di mimvu kumbusa). (Esodu 2:23; 4:10-17) Kuntuala, Yave wuyiza tedila Aloni “mbikudi” wu Mose kibila dedi bo nandi kaba tuadisilanga Mose ayi kayiza bela mbikudi’andi, buawu mvandi Aloni kafueti tuadusu kuidi Mose ayi kuba mbikudi’andi. Mvandi Yave wukamba Mose ti nandi wunkuiza ba banga “Nzambi kuidi Falawo,” mawu maba sundula ti Mose wuba lulendu luaba fumina kuidi Nzambi va ntuala Falawo, diawu vabasa tombulu ko nandi kumona boma ntinu wu Ngipiti.—Esodu 7:1, 2.
Matangu ma Kibibila
(Esodu 6:1-15) Diawu Yave kakambila Mose: “Buabu, tala mambu yemvangila Falawo. Mu koko ku lulendu yala kunkuika kamubika muenda, mu koko ku lulendu yala kunkuika ka mukukisa ku Ngipiti.”2 Bosi Nzambi wukamba Mose: “Minu yidi Yave. 3 Minu yaba monikanga kuidi Abalahami, Isaki, ayi Yakobi banga Nzambi yi Nkua Ngolo Zioso, vayi mu matedi dizina diama Yave, yisa yizabikisa ko kuidi bawu. 4 Mvandi yivanga yawu luwawanu muingi kuba vana ntoto wu Kanani, ntoto bawu bazingila banga zinzenza. 5 Buabu, miveka yiyuwidi basi Isaeli kunyonga mu kibila ki ziphasi basi Ngipiti ba kubatuadisanga ayi yitebukidi moyo luwawanu luama. 6 “Diawu kamba basi Isaeli: ‘Minu yidi Yave, yela mubotula mu ziphasi zingolo zi basi Ngipiti ayi yala kulukula va kivika, yala mukula mu koko kuama ku lulendu ayi yela fundisa basi Ngipiti. 7 Yala kulutambula banga dikabu diama ayi yala ba Nzamb’inu, beno muala zaba mu bukiedika ti minu yidi Yave Nzamb’inu wu mukula mu ziphasi zingolo basi Ngipiti ba mutuadisanga. 8 Yala kumunata ku ntoto yikanikisa kuidi Abalahami, Isaki, ayi Yakobi; ayi yala kuluvana ntoto beni banga kiuka. Minu yidi Yave.’” 9 Bosi Mose wuzabikisa tsangu ayoyo kuidi basi Isaeli, vayi bawu basa kuwila ko Mose mu kibila ki kiunda ayi buvika bungolo. 10 Diawu Yave kakambila Mose: 11 “Yenda kuidi Falawo ntinu wu Ngipiti ayi nkamba muingi kabika basi Isaeli babasika ku tsi’andi.” 12 Vayi Mose wukamba Yave: “Basi Isaeli basi kukhuwila ko; buidi Falawo kakukhuwila mu kuzaba ti minu yiyolukanga ko buboti?” 13 Vayi Yave wuvutukila kubue kamba Mose ayi Aloni mambu bafueti kamba bana ba Isaeli ayi kuidi Falawo ntinu wu Ngitipi muingi kabasisa bana ba Isaeli ku ntoto wu Ngipiti. 14 Ababa bawu bakulutu ba zinzo zi matata mawu: Bana ba Lubeni muana wutheti wu Isaeli, Hanoke, Palu, Hezeloni, ayi Kalami. Abobo bawu basi dikanda di Lubeni. 15 Bana ba Simewoni baba: Yemueli, Yamini, Ohadi, Yakini, Zohali, ayi Sawuli , muana kabuta na nkieto muisi Kanani. Abobo bawu basi dikanda di Simewoni.
13-19 NGONDA YISAMBUADI
KIUKA KIDI MU DIAMBU DI NZAMBI | ESODU 8-9
“Falawo wuvanga Luzolo lu Yave mu Khambu Zaba”
(Esodu 8:15) Bo Falawo kamona ti Yave wulembika lusingu kaba tuadisa, nandi wukanga ntima ayi wumanga kuba kuwila dedi bo Yave kabikudila.
it-3 117¶2
Khutu Matu
Mu mvibudulu, Yave wumbikanga thangu muingi batu ayi mimvila bamvanganga mambu mambi bazinga kheti bafueti fua. (Ngenesi 15:16; 2 Petelo 3:9) Nandi wumvanganga mawu kibila bankaka bumviokila thangu bambalulanga mavanga muingi kutomba nlemvu’andi. (Yosua 2:8-14; 6:22, 23; 9:3-15; 6:22, 23; 9:3-15) Vayi bankaka bambanga khutu matu bo bambalukilanga Yave ayi dikabu diandi. (Deutelonomi 2:30-33; Yosua 11:19, 20) Bankaka bambuela kanganga mintima miawu kuidi Yave ayi kuidi dikabu diandi. Bo kambikanga batu bamonisa bukhutu matu, diawu khumbu zinkaka kibibila kintubanga ti Nandi ‘wumvanganga batu baba bukhutu matu’. Bo kammonisanga nganzi’andi kuidi batu, bawombo bankuiza vanganga mangolo muingi kuzitisa dizina diandi bo bammona lulendu luandi.—Dedikisa mawu na mambu madi mu Esodu 4:21; Yoane 12:40; Loma 9:14-18.
(Esodu 8:18, 19) Mu kusadila ziphandu ziawu, zinganga zi minkisi zi Ngipiti bayedika kuvanga mawu muingi kutuadisa zimbu, vayi bawu basa nunga ko. Ayi vayiza monika zimbu ziaba tebila batu ayi bibulu. 19 Diawu zinganga zi minkisi bakambila Falawo: ‘Bukiedika, luidi lulendu lu Nzambi.’ Vayi Falawo wutatamana kukanga ntim’andi ayi kasa bakuwila ko dedi bo Yave katubila.
(Esodu 9:15-17) Boti minu yibe tia, khanu yibe mubunga, ngiewu ayi dikabu diaku mu lusingu lungolo. Boti minu yibe tia, khanu yibe mutulula va mbata ntoto. 16 Vayi akiki kiawu kibila yikubikidi wumonyo: muingi yikumonisa lulendu luama ayi muingi batu boso bazitisa dizina diama va ntoto woso. 17 Bukiedika ti ngiewu wukhidi monisa ntu ngolo ayi wummanga kubika dikabu diama benda?
it-2 397¶1-3
Mambu Mambi
Mvandi, Yave wumbalulanga mambu muingi bankua mambi mu khambu zaba bavanga luzolo luandi. Kheti bambayisanga Nzambi, Yave kabikanga ko bawu bavangila bisadi biandi mambu malenda manisa lukuikumunu luawu. Ayi wumvanganga muingi mavanga ma bankua mambi, mazitisa busonga buandi. (Loma 3:3-5, 23-26; 8:35-39; Minkunga 76:10) Diyindu adiodi didi mu Zingana 16:4: ‘Mamoso Yave wuvangila mawu mu lukanu luandi, kheti bankua mambi mu kilumbu ki phasi’.
Tuentubila kifuani ki Falawo. Yave wusadila Mose ayi Aloni muingi kulubula Falawo kabika basi Isaeli baba mu buvika babasika ku Ngipiti. Kasi ko Nzambi wuvanga ntinu wu Ngipiti kuba mutu wumbi. Vayi nandi wubika Falawo kutatamana kuzinga ayi mvandi wutuadisa mambu mannata kumonisa mavanga mambi kaba ayi kutambula nzengolo yi lufua. Kibila Yave kavangila mawu kidi mu Esodu 9:16: ‘Vayi akiki kiawu kibila yikubikidi wumonyo: muingi yikumonisa lulendu luama ayi muingi batu boso bazitisa dizina diama va ntoto woso’.
Kumi di zitsingulu Yave kafila ku Ngipiti, kubunda mvandi mbungulu yi Falawo ayi masodi mandi, yiba phila kamonisina lulendu luandi. (Esodu 7:14–12:30; Minkunga 78:43-51; 136:15) Kheti vavioka mimvu miwombo, mimvila minkaka batatamana kutubila matedi mambu amomo. (Yosua 2:10, 11; 1 Samueli 4:8) Boti Yave wufika vonda Falawo, khanu nandi kasa nunga ko kumonisa lulendu luandi muingi kuzitisa dizina diandi ayi kukula dikabu diandi.
Bakula Kiuka Kisuama Mu Diambu Di Nzambi
(Esodu 8:21) Vayi, ngie khambu bika dikabu diama dienda, yinkuiza fila zinzinzi kuidi ngiewu, kuidi bisadi biaku, kuidi dikabu diaku ayi mu zinzo ziawu. Zinzinzi ziala tembakana va tsi bandiatila ayi ziela ba ziwombo mu zinzo zi basi Ngipiti.
it-3 33¶5-6
Zinzinzi Zinneni
Batu badi divula matedi ntindu zinzinzi mbi bantubila mu kikuma ki Ebeleo basadila muingi kutubila tsingulu yinna yibuila basi Ngipiti ayi yitheti yikhambu buila basi Isaeli ku Ngoseni. (Esodu 8:21, 22, 24, 29, 31; Minkunga 78:45; 105:31) Kikuma ʽA·rovʹ bakisekudila mu ziphila ziwombo dedi, “zinzinzi zinneni” (JB, NW, Ro), “kikoka tuvi” (Yg), “zinzinzi” (AS, KJ, RS), “zimbu” (AT), ayi “zinzinzi zimbanga mu bibuangu bansuekilanga zingombi” (LXX).
Kikuma zinzinzi zinneni, bakisadila mvandi muingi kutubila mintindu mioso mi maveku. Maveku voti biveku mantebilanga ayi mamfifanga menga ma bibulu ayi ma batu. Vadi zinzinzi zinkaka mu thangu bankonzuka banzolanga kukala mu zinyitu zi bibulu ayi zi batu. Diawu tulenda tubila ti tsingulu yi zinzinzi zinneni, yituadisa beni ziphasi kuidi basi Ngipiti ayi bibulu biawu, khumbu zinkaka nati ku lufua.
(Esodu 8:25-27) Bosi Falawo wukamba Mose ayi Aloni: ‘Yendanu, vaninanu ku tsi ayiyi minkhayilu kuidi Nzamb’inu’. 26 Vayi Mose wutuba: ‘Busa fuana ko kuvangila mawu mu phila ayoyi. Kibila basi Ngipiti bammonanga khenene nkhayilu tutidi kuvana kuidi Nzamb’itu Yave. Befu kuvana minkhayilu mio basi Ngipiti bammonanga khenene va mesu mawu, bukiedika ti basinkuiza tuviva ko mamanya? 27 Tufueti diata bilumbu bitatu ku thandu ayi kuawu tumvanina minkhayilu kuidi Yave Nzamb’itu, dedi bo nandi katu kembi’.
w04 15/3 25 ¶9
Mambu Mankinza Madi mu Buku yi Esodu
Esodu 8:26, 27— Kibila mbi Mose katubila ti basi Ngipiti bankuiza ‘mona khenene’ minkhayilu basi Isaeli baba tomba kuvana. Kibila basi Ngipiti baba sambilanga mintindu miwombo mi bibulu. Mu phila ayoyi, mambu Mose katuma matedi kubasika muingi bevana minkhayilu, maluta ba tsundu.
Matangu ma Kibibila
(Esodu 8:1-19) Yave wukamba Mose: ‘Yenda vantuala Falawo ayi nkamba ‘buakabu buma tubila Yave: ‘Bika dikabu diama dienda muingi batsadila. 2 Ngie khambu babika benda, minu yinkuiza fila minyala voti biula, mu tsi’aku yoso.3 Minyala voti biula biala fumina ku muila wu Nilo, biala kota ku nzo’aku, ku kivinga kiaku, biala ba va kika kiaku, biala ba mu zinzo zi bisadi biaku, ayi biala ba mu dikabu diaku dioso. Biala ba mvandi mu zifulu ziaku zi mbasu ayi mu biuma banlambilanga mapha maku. 4 Minyala voti biula biala kukuizila , kuidi dikabu diaku ayi kuidi bisadi biaku bioso’’’ 5 Bosi Yave wukamba Mose: ‘Kamba Aloni, ‘nonuna koko kuaku ayi nkaw’aku mu mila, munkumbanga nlangu wu Nilo ayi mu bibuangu bidi mbodo muingi minyala voti biula biza ku ntoto wu Ngipiti.’’ 6 Diawu Aloni kanonunina koko kuandi mu minlangu mi Ngipiti ayi muawu mufumina minyala voti biula ayi biawu bitembakana mu ntoto woso wu Ngipiti. 7 Mu kusadila ziphandu ziawu, zinganga zi minkisi zi Ngipiti bavanga mvandi momawu mu kutuadisa minyala voti biula ku ntoto woso wu Ngipiti. 8 Diawu Falawo katedi Mose ayi Aloni ayi wuba kamba: ‘Lombanu kuidi Yave muingi kabotula minyala kuidi minu ayi kuidi dikabu diama, kibila yitidi kubika dikabu di Isaeli benda muingi besadila Yave’. 9 Bosi Mose wukamba Falawo: ‘Ngie fueti kutu kamba thangu mbi tunlombila, muingi minyala miku tatuka mitatuka bisadi biaku, dikabu diaku ayi zinzo ziawu. Miawu minkuiza ba to mu muila wu Nilo.’ 10 Falawo wutuba: ‘Bika to yono.’ Diawu Mose katubila: ‘Bika mavangimina dedi bo betubila muingi wuzaba ti vasiko Nzambi yidedakana na Yave Nzamb’itu.11 Minyala misinkuiza bue ba ko kuidi mfumu’ami, mu zinzo ziaku kuidi bisadi biaku ayi kuidi dikabu diaku vayi minkuiza ba to mu muila wu Nilo.’ 12 Bosi Mose ayi Aloni babotuka vantuala Falawo, ayi Mose wulomba kuidi Yave mu kibila ki minyala kafila kuidi Falawo. 13 Mu phila ayoyi, Yave wuvanga mambu Mose kalomba, ayi minyala mitona kufuila mu zinzo, mu khati tuphangu tu zinzo ayi mu zitsola.’ 14 Batona kukhupika biawu mu bikhuku binneni, ayi ntoto wutona kuba nnuku wumbi. 15 Bo Falawo kamona ti vasa bue bako minyala, nandi wukanga ntim’andi ayi wumanga kuba kuwila dedi bo Yave katubila. 16 Yave wukamba Mose: ‘Kamba Aloni ‘Nonuna nkaw’aku ayi bunda wawu mu mfundu mfundu wu ntoto, ayi wawu wunkuiza kituka zimbu zinkuiza tembakana mu ntoto woso wu Ngipiti.’’ 17 Ayi bawu bavanga mawu. Aloni wunonuna koko kuandi na nkaw’andi ayi wubunda wawu mu mfundu mfundu wu ntoto ayi vayiza monika zimbu ziaba tebila batu ayi bibulu. Mfundu mfundu wu ntoto woso wuyiza kituka zimbu ku ntoto woso wu Ngipiti. 18 Mu kusadila ziphandu ziawu, zinganga zi minkisi zi Ngipiti bayedika kuvanga mawu muingi kutuadisa zimbu vayi basa nunga ko. Ayi vayiza monika zimbu ziaba tebila batu ayi bibulu. 19 Diawu zinganga zi minkisi bakambila Falawo: ‘Bukiedika, luidi lulendu lu Nzambi.’ Vayi Falawo wutatamana kukanga ntim’andi ayi kasa bakuila ko dedi bo Yave katubila.
20-26 NGONDA YISAMBUADI
KIUKA KIDI MU DIAMBU DI NZAMBI | EXODU 10-11
“Mose ayi Aloni Bamonisa Kibakala”
(Esodu 10:3-6) Mu phila ayoyi, Mose ayi Aloni bamonika va ntuala Falawo ayi bankamba: “Buabu butubidi Yave, Nzambi yi basi Ebeleo: ‘Nati thangu mbi wala manga kukhuwila? Bika dikabu diama dibasika ku Ngipiti muingi batsadila. 4 Kibila ngie kutatamana kumanga bika dikabu diama dibasika, yono yala fila makhoko kukhati divula dinu. 5 Mawu mala tembakana mu ntoto woso, ayi mualasa nunga ko kumona vama mundiatila. Bala dia biabioso bisobila mu mvula yi mamanya ayi biabioso bimmena mu zitsola. 6 Makhoko beni mala wala mu zinzo ziaku, mu zinzo zioso zi bisadi biaku ayi mu zinzo zioso zi basi Ngipiti. Mawu mala monika mu phila matata maku ayi zikhaka ziaku bakhambu muena, tona mu kilumbu babutuka mu ntoto awuwu nati bubu.’” Mose wubaluka ayi wubotuka va ntuala Falawo.
w09 15/7 20 ¶6
Landakana Kifuani ki Yesu mu Kusamuna mu Kibakala
6 Yindula mvandi kibakala Mose kamonisa bo kayoluka na Falawo. Batu babasa tadilanga ko to Falawo banga mvuala wu zinzambi, vayi mvandi nzambi, muana wu nzambi yi muinya baba tedilanga Ra. Dedi zifalawo zinkaka, ḿba nandi waba buongiminanga kitumba kiba kizizi kiandi. Mu luyalu luandi, Falawo waba kuikanga batu bantumukina. Mu kibila ki lulendu ayi lunangu kaba, Falawo kabasa wilukilanga ko ni mutu. Vayi Mose wuba kuandi mutu wu buphombo ayi nsungi wu mamemi. Kheti babasa kuntumisanga ko, khumbu ziwombo nandi wumonika va ntuala Falawo. Phila mambu mbi Mose kabikula? Nandi wubikula zitsingulu ziala kuizila basi Ngipiti. Ayi mambu mbi kadinda? Nandi wudinda nsua kuidi Falawo muingi bivevi di bivevi di basi Isaeli baba ku buvika ku Ngipiti babasika ku tsi beni. Bukiedika ti vaba tombulu Mose kumonisa kibakala? Ngete, vaba tombulu!—Zintalu 12:3; Ebeleo 11:27.
(Esodu 10:24-26) Falawo wutela Mose ayi wunkamba: “Yendanu, sadilanu Yave. Bana binu balenda kuenda mvandi yinu. Vayi mamemi minu ayi bibulu binu binkuiza siala.” 25 Vayi Mose wunkamba: “Ngie wufueti tuvana mvandi bibulu muingi tuvana minkhayilu ayi makaba maviku kuidi Nzamb’itu, Yave. 26 Tufueti nata mvandi bibulu bitu. Tualasa bika ko ni kibulu kimueka, kibila tuala sadila binkaka muingi kubuongimina Nzamb’itu, Yave. Ayi nati tuntuka kuna, befu tusa zaba ko mbi tunkuiza vana mu mbuongimin’itu kuidi Yave.”
(Esodu 10:28) Falawo wunkamba: “Basika ku nzo’ama, khumbu wala buemonika va ntual’ama, ngie wala fua.”
(Esodu 11:4-8) Diawu Mose katubila: “Buabu butubidi Yave, ‘Yinkuiza viokila ku Ngipiti va khati tsika builu, 5 ayi bana boso batheti ku ntoto wu Ngipiti bankuiza fua, kutonina kuidi muana wutheti wu Falawo widi wukala va kikundu ki kimfumu nati kuidi muana wutheti wu mvika wunyikanga zitheti. Mvandi, bana batheti ba bibulu bala fua. 6 Batu bala nyonga beni ku ntoto woso wu Ngipiti mu phila bakhambu nyongina mu luzingu luawu, ayi mawu malasa buemonika ko khumbu yinkaka. 7 Ayi valasa ba ko mbua yala lola basi Isaeli ayi bibulu biawu, muingi beno muzaba ti Yave, kalenda nunga kusuasisa muisi Ngipiti ayi muisi Isaeli.’ 8 Bisadi biaku bioso bala kuiza fukama va ntual’ama ayi bala kukhamba, ‘Yenda, ngiewu ayi dikabu dioso di kulandakana. Bosi minu, yala kuenda.” Mose wudasuka beni ayi wubotuka va ntuala Falawo.
it-3 17 ¶1
Mose
Vaba tombulu kumonisa kibakala ayi kiminu muingi kumonika va ntuala Falawo. Mose ayi Aloni banunga kuvanga kiyeku batambula mu kibila ki mangolo ma Yave ayi lusalusu lu phevi’andi yinlongo. Yindul’abu lulendu Falawo kaba: mu thangu yinani, nandi wuba ntinu yiluta zangama va mbata ntoto. Falawo waba kukitadilanga buka nzambi, kibila wuba bisadi biwombo, masodi mawombo ayi mimvika miwombo. Kuba mvandi zimfumu zi binganga, zinganga zi minkisi baba zimbeni zi Mose. Kubotula kuandi naveka Falawo, babakala abobo baba mvandi lulendu luwombo ku tsi yi Ngipiti. Batu boso abobo, baba bakubama muingi kubuela mioko Falawo mu lusalusu lu zinzambi zi Ngipiti. Mose ayi Aloni bamonika va ntuala Falawo khumbu ziwombo. Vayi kheti bobo, Falawo wutatamana kukanga ntim’andi, kibila wumanga kubikila basi Ebeleo baba ku buvika kubasika ku tsi’andi. Mose ayi Aloni baba kukisa va ntuala Falawo bo bayamikisa tsingulu yinana, ayi bo tsingulu yivua yivioka, baba kamba muingi babika monika va ntuala Falawo, bila khanu bankuiza fua.—Esodu 10:11, 28.
Bakula Kiuka Kisuama mu Diambu di Nzambi
(Esodu 10:1, 2) Diawu Yave kakambila Mose: “Monika va ntuala Falawo, kibila yibikidi ntim’andi ayi mintima mi bisadi biandi mitatamana mikangama muingi yimonisa bimangu biama va ntual’awu, 2 ayi mvandi muingi wukamba kuidi bana baku ayi batekulu baku matedi mambu yivangila basi Ngipiti ayi bimangu yimonisa va ntual’awu; mu phila ayoyo, beno munkuiza zaba ti minu yidi Yave.”
w95 1/9 11 ¶11
Bawu Bavana Kimbangi ti Yave, Nandi to Nzambi Yikiedika
11 Bo basi Isaeli baba ku Ngipiti, Yave wufila Mose kuidi Falawo ayi wunkamba: “Monika va ntuala Falawo, kibila yibikidi ntim’andi ayi mintima mi bisadi biandi mitatamana mikangama muingi yimonisa bimangu biama va ntual’awu, ayi mvandi muingi wukamba kuidi bana baku ayi batekulu baku matedi mambu yivangila basi Ngipiti ayi bimangu yimonisa va ntual’awu; mu phila ayoyo, beno munkuiza zaba ti minu yidi Yave.” (Esodu 10:1, 2) Basi Isaeli bakuikama, baba kambanga bana bawu phila Yave kaba monisinanga lulendu luandi. Bana beni baba buezabikisanga mawu kuidi bana bawu ayi mawu maba banga mazabakana mu zimbandu zioso. Mu phila ayoyi, basi Isaeli baba tebukilanga moyo mambu Yave kaba kuba vangilanga. Matata bubu, badi mvandi kiyeku ki kulonga bana bawu.—Deutelenomi 6:4-7; Zingana 22:6.
(Esodu 11:7) Ayi valasa ba ko ḿbua yala lola basi Isaeli ayi bibulu biawu, muingi beno muzaba ti Yave, kalenda nunga kusuasisa muisi Ngipiti ayi muisi Isaeli.’
it-2 79 ¶2
Esodu
Mu lulendu lungolo Yave kamonisa, Nandi wuzitisa dizina diandi ayi wukula basi Isaeli. Bo Mose katuadisa bana ba Isaeli ku khonzo yi lesite yi Ḿbu Wubenga, bawu baba yola nkunga wumueka. Ayi Khomb’andi Miliami, wuba mbikudi, waba tuadisa dingumba di bakieto baba sika ayi baba kina minkunga mu kutambudila zimbembo zi babakala. (Esodu 15:1, 20, 21) Yave wuyiza suasisa basi Isaeli na zimbeni ziawu. Bo babasika ku Ngipiti, vasa ba ko ni mutu voti kibulu wuvangana phasi ayi vasa ba ko ni ḿbua yiba lola. (Esodu 11:7) Kheti kinongu kidi mu buku yi Esodu kisintuba ko ti Falawo wukota mu ḿbu wubenga na masodi mandi ayi wubungu, Minkunga 136:15 yintuba ti Yave ‘wulalumuna Falawo ayi masodi mandi mu Ḿbu Wubenga.’
Matangu ma Kibibila
(Exodus 10:1-15) Diawu Yave kakambila Mose: “Monika va ntuala Falawo, kibila yibikidi ntim’andi ayi mintima mi bisadi biandi mitatamana mikangama muingi yimonisa bimangu biama va ntual’awu, 2 ayi mvandi muingi wukamba kuidi bana baku ayi batekulu baku matedi mambu yivangila basi Ngipiti ayi bimangu yimonisa va ntual’awu; mu phila ayoyo, beno munkuiza zaba ti minu yidi Yave.” 3 Mu phila ayoyi, Mose ayi Aloni bamonika va ntuala Falawo ayi bankamba: “Buabu butubidi Yave, Nzambi yi basi Ebeleo, ‘Nati thangu mbi wala manga kukhuwila? Bika dikabu diama dibasika ku Ngipiti muingi batsadila. 4 Kibila ngie tatamana kumanga bika dikabu diama dibasika, yono yala fila makhoko kukhati divula dinu. 5 Mawu mala tembakana mu ntoto woso, ayi mualasa nunga ko kumona vama mundiatila. Bala dia biabioso bisobila mu mvula yi mamanya ayi biabioso bimmena mu zitsola. 6 Makhoko beni mala wala mu zinzo ziaku, mu zinzo zioso zi bisadi biaku ayi mu zinzo zioso zi basi Ngipiti. Mawu mala monika mu phila matata maku ayi zikhaka ziaku bakhambu muena, tona mu kilumbu babutuka mu ntoto awuwu nati bubu.’” Mose wubaluka ayi wubotuka va ntuala Falawo. 7 Bosi Falawo bankamba kuidi bisadi biandi: “Nati thangu mbi dibakala adiodi kala tatamana kutu tula boma? Bika bawu benda, muingi besadila Yave Nzambi’awu. Wisimmona ko ti ntoto wu Ngipiti widi mu kubungana?” 8 Diawu bavutudila Mose ayi Aloni kuidi Falawo, ayi nandi wuba kamba: “Yendanu, sadil’anu Yave Nzamb’inu. Vayi, banana bankuenda?” 9 Mose wumvutudila: “Tunkuiza nata matoko mitu, biboba bitu, bana bitu, mameme mitu ayi bibulu bitu binkaka kibila tunkuiza vanga nkungi kuidi Yave.” 10 Nandi wuba kamba: “Kilumbu yala mubika muingi muyenda na bana binu, buna Yave widi yinu! Bukiedika, mayindu mambi madi yinu. 11 Muisinkuenda ko beno boso! Babakala bawu to bafueti kuenda ayi kusadila Yave, kibila buawu beno mudindila.” Bosi, baba kukisa va ntuala Falawo. 12 Yave wukamba Mose: “Nonuna koko kuaku mu ntoto wu Ngipiti muingi wutuadisa makhoko, mawu mala kuiza mu ntoto woso wu Ngipiti ayi mala dia bivatu bioso bi tsi, biabioso bisobila mu mvula wu mamanya.” 13 Mose wunonuna mu nzaki nkawu’andi mu ntoto wu Ngipiti, ayi Yave wuvemuna phemu yifumina ku khonzo yi lesite yi tsi. Yawu yivevumuka mu kilumbu kioso ayi builu boso. Bo buisu bukia, phemu beni yituala makhoko mawombo. 14 Makhoko mayiza ayi mawala mu ntoto woso wu Ngipiti, tsingulu ayoyi yituadisa beni ziphasi. Vasa ba ko thangu mambu amomo mamonika, ayi mawu malasa buemonika ko. 15 Mawu matembakana mu tsi yoso, ayi tsi yoso yiyiza ba kitombi mu kibila kiawu. Badia bivatu bioso ayi mimbutu mi minti misobila mu mvula wu mamanya. Vasa sobila ko ni bivatu mu zitsola ku ntoto woso wu Ngipiti.
27 NGONDA YINSAMBUADI –2 NGONDAYINNANA
KIUKA KIDI MU DIAMBU DI NZAMBI | ESODU 12
“Tsundu Mbi Pasika Yidi mu Befu Bubu”
(Esodu 12:5-7) Kibulu beni kifueti ba kimbakala, kivedila ayi kidi mvu wumueka. Lulenda sola dimemi dimueka voti khombo. 6 Lufueti sueka kibulu beni nati kilumbu 14 mu ngonda ayiyi, ayi baboso mu basi Isaeli bala vonda kibulu beni va khotolo muinya nati va builu. 7 Lufueti bonga mua menga mandi ayi kuvinda mawu va yilu, ku khonzo yi lukhietu ayi yi lubakala wu mielo mi zinzo munkuiza dila kibulu beni.
w07 1/1 20-21¶4
“Lufueti ba Mayangi Mawombo”
4 Yesu wufua mu kilumbu 14, ngonda yi Nisa mvu 33 T.K. Ku Isaeli, kilumbu 14 ngonda Nisa kiba kilumbu ki mayangi baba kembanga Pasika. Mu mimvu mioso mu kilumbu beni, makanda maba banga va kimueka muingi kudia ayi baba dianga mvandi dimemi dimueka divedila. Mu phila ayoyo, bawu baba bambukilanga moyo phila menga ma muana dimemi mavukisila bana bawu bo mbasi yi Yave yivonda bana batheti ba basi Ngipiti mu kilumbu 14 ngonda yi Nisa mvu 1513 A.T.K. (Esodu 12:1-14) Muana dimemi waba sundula Yesu, mutu mvuala Polo katubila: “Bika Klisto dimemi ditu di Pasika ditambuku.” (1 Kolinto 5:7) Dedi menga ma muana dimemi di Pasika, menga ma Yesu mavukisa batu bawombo.—Yoane 3:16, 36.
(Esodu 12:12, 13) Mu builu beni, minu yela vioka ku ntoto wu Ngipiti ayi yela vonda bana batheti ba basi Ngipiti, kutonina mu batu nati mu bibulu ayi yela tuadisa lufundusu luami kuidi zinzambi zioso zi Ngipiti. Minu yidi Yave. 13 Menga mala ba kidimbu mu zinzo zinu; bo yala mona menga, yala vioka ku khonzo ayi bo yala singa basi Ngipiti tsingulu beni yalasa lubuila ko.
it-3 181 ¶5
Pasika
Vadi mambu baba vanganga mu Pasika mayiza sundukila mu Yesu. Dedi, menga basi Isaeli bavinda mu mielo maba vukisa bo mbasi yi Yave yivonda bana batheti ba basi Ngipiti. Polo wutedila baklisto basolo nkangu wu bana batheti (Ebeleo 12:23), ayi nandi wutedila Klisto mvulusi’awu mu nzila menga. (1Tesalonika 1:10; Efeso 1:7) Mvandi, basi Isaeli basa tambula ko nsua wu kukelula mimvesi mi dimemi di Pasika. Babikula ti balasa kelula ko ni mvesi wumueka wu Yesu ayi mawu masalama mu thangu kafua. (Minkunga 34:20; Yoane 19:36) Diawu tulenda tubila ti Pasika basi Yuda batona kukemba mu thama, yidi mbonosono yi mambu mankuiza ayi mayiza salama mu Yesu, “muana dimemi wu Nzambi.”—Ebeleo 10:1; Yoane 1:29.
(Esodu 12:24-27) “Kembang’anu nkungi awowo, wawu widi nsiku lufueti landakananga beno ayi bana binu. 25 Bo muala tuka ku ntoto Yave kala kuluvana dedi bo kakanikisa, beno lufueti kembanga nkungi awowo. 26 Ayi bo bana binu bala kulu kuvula, ‘Tsundu mbi nkungi awuwu widi mu beno?’ 27 Lufueti kuba kamba, ‘Widi nkhayilu wu Pasika kuidi Yave, wuvioka mu zinzo zitu bo kavonda bana batheti ba basi Ngipiti. Bosi dikabu dioso bafukama ayi bayinama”.
w13 15/12 20 ¶13-14
‘Fueti Bambukilanga Moyo Kilumbu Akiki’
13 Bo vaba kuemonikanga zimbandu zimona, matata baba kiyeku ki kulonga malongi mankinza kuidi bana bawu. Dedi, kuba longa ti Yave wunkiebanga bisadi biandi. Bana baba longukanga ti Nzambi widi ayi nandi wunsadisanga dikabu diandi. Yave wumonisa mawu “bo kavonda bana batheti ba basi Ngipiti.” Vayi wukieba bana batheti ba basi Isaeli.
14 Bubu matata basudikisanga ko kuidi bana bawu matedi Pasika. Vayi ngie wunlonganga bana baku ti Yave wunkiebanga dikabu diandi? Wuku bamonisanga mu zikhadulu ziaku ti widi lufiatu ti Yave wukhidi kiebanga dikabu diandi nati bubu? (Minkunga 27:11; Yesaya 12:2) Buidi wumvangilanga mawu? Wunkolukanga yawu mu luzolo voti wuba kadisanga muingi kuba semba? Sadila dilongi adiodio muingi wusadisa dikanda diaku bayonzuka mu kiphevi.
Bakula Kiuka Kisuama mu Diambu di Nzambi
(Esodu 12:12) Mu builu beni, minu yela vioka ku ntoto wu Ngipiti ayi yela vonda bana batheti ba basi Ngipiti, kutonina mu batu nati mu bibulu ayi yela tuadisa lufundusu luami kuidi zinzambi zioso zi Ngipiti. Minu yidi Yave.
it-3 180 ¶1
Pasika
Kumi di zitsingulu zibuila kuidi basi Ngipiti ziba lufundusu kuidi zinzambi ziawu, vayi tsingulu yikumi yawu yiluta kuba fundisa. (Esodu 12:12) Kuidi nzambi yi basi Ngipiti baba tedilanga Ra, muana dimemi kiba kibulu kinlongo. Diawu kuvinda menga ma muana dimemi mu mielo kiba kifingu va meso ma basi Ngipiti. Ngombi kiba mvandi kibulu kinlongo, ayi kuvonda bana batheti ba zingombi kiba kifingu kingolo kuidi nzambi yi basi Ngipiti baba tedilanga Osili. Nafeka Falawo mvandi baba kuntadilanga buka muana wu nzambi baba tedilanga Ra. Diawu lufua lu muana wutheti wu Falawo lumonisa ti nzambi Ra ayi nafeka Falawo basa ba ko lulendu luwombo.
(Esodu 12:14-16) “‘Mufueti bambukilanga moyo kilumbu akiki, kembanganu kiawu mu zimbandu zinu zioso. Mufueiti kembanga kiawu kibila widi nsiku mufueti tatamana kulandakana zithangu zioso. 15 Mufueti dia mapha makambulu luvi mu sambuadi di bilumbu. Mu kilumbu kitheti, mufueti botula luvi mu zinzo zinu kibila tona mu kilumbu kitheti nati ki sambuadi, va kumonika mutu wundia kiuma batula luvi muna kafueti fua. 16 Mu kilumbu kitheti, lufueti vanga lukutukunu lunneni lunlongo. Ayi mu kilumbu ki sambuadi lufueti vanga mvandi lukutukunu lunkaka lunneni lu nlongo. Lulendi vanga ko ni kisalu kimueka mu bilumbu abiobio vayi mufueti kubika to bidia bintombulu muingi kadika mutu kadia.
it-1 504 ¶1
Zikhutukunu Zinneni
Mu thangu “zikhutukunu zinneni zinlongo”, basi Isaeli baba kandimina kuvanga bisalu bingolo. Buka, mu kilumbu kitheti ayi ki sambuadi ki Nkungi wu Mapha Makhambu Luvi biba bilumbu bi “zikhutukunu zinneni zinlongo,” ayi matedi bilumbu beni Yave wutuba: “Mufueti kubika to bidia bintombulu muingi kadika mutu kadia.” (Esodu 12:15, 16) Mu thangu “zikhutukunu zinneni zinlongo”, zinganga Nzambi babe salanga beni muingi kuvana minkhayilu kuidi Yave. (Levitiko 23:37, 38) Vayi kuvanga mawu kuabasa monisanga ko ti bawu babasa tumukinanga nsiku wu Yave wutedi kubika kusala. Yawu yisa ba ko thangu yi bubolo kuidi basi Isaeli vayi yiba thangu yi kubaka ndandu yiwombo mu kiphevi. Mu kisabala, baboso baba kutakananga muingi kubuongimina Nzambi ayi kukuwa malongi. Dedi bo bayiza vangila mu zinzo zi lukutukunu kuntuala, bawu baba tanganga Kibibila ayi kukuwa tsudukusu yi diambu di Nzambi. (Mavanga 15:21) Diawu, kheti dikabu babasa vanganga ko kisalu mu kilumbu ki kisabala voti mu thangu “zikhutukunu zinneni zinlongo,” bawu baba kukivananga mu minsambu, kuyindula mambu matedi Yave ayi zikhanu ziandi.—Tala Zikhutukunu Zinneni.
Matangu ma Kibibila
(Esodu12:1-20) Bosi Yave wukamba Mose ayi Aloni ku ntoto wu Ngipiti: 2 “Ngonda ayiyi yidi thonono yi zingonda. Kuidi beno, yawu yala ba ngonda yitheti mu mvu. 3 Kamba dikabu dioso di Isaeli: ‘Mu kilumbu kikumi ki ngonda ayiyi, kadika mutu mu beno kafueti sodila dikanda diandi muana dimemi ayi mu kadika nzo bafueti sola to dimueka. 4 Vayi boti dikanda dimueka didi diluelo ayi basinnunga ko kudia kibulu kioso, bawu bafueti dila kiawu va kimueka ayi mutu widi yawu wufikama. Ayi bo lunkaba kibulu beni, lufueti zaba kitini kadika mutu kankuiza dia. 5 Kibulu beni kifueti ba kimbakala, kivedila ayi kidi mvu wumueka. Lulenda sola dimemi dimueka voti khombo. 6 Lufueti sueka kibulu beni nati kilumbu 14 mu ngonda ayiyi, ayi baboso mu basi Isaeli bala vonda kibulu beni va khotolo muinya nati va builu. 7 Lufueti bonga mua menga mandi ayi kuvinda mawu va yilu, ku khonzo yi lukhietu ayi yi lubakala wu mielo mi zinzo munkuiza dila kibulu beni. 8 “‘Mu builu beni mufueti dia mbiziandi. Mufueti yoka kiawu ku mbazu ayi kukidila mu mapha makhambu luvi ayi mu bititi bidi ndudi. 9 Bikanu kudila kiawu kikhunzu voti kilambulu mu nlangu. Yokanu kibulu kioso ku mbazu kubunda mvandi ntu, malu ayi bifula biandi. 10 Bikanu kulunda ni kiuma muingi kudia mu kilumbu kinlanda; vayi bia kusobila, lufueti vika biawu ku mbazu. 11 Mufueti dila kiawu mu phila ayiyi: Phonda yikangama mu lukietu, mapapa mu malu, nkaw’inu mu mioko ayi lufueti dila kiawu mu nzaki. Yidi Pasika yi Yave. 12 Mu builu beni, minu yela vioka ku ntoto wu Ngipiti ayi yela vonda bana batheti ba basi Ngipiti, kutonina mu batu nati mu bibulu ayi yela tuadisa lufundusu luami kuidi zinzambi zioso zi Ngipiti. Minu yidi Yave. 13 Menga mala ba kidimbu mu zinzo zinu; bo yala mona menga, yala vioka ku khonzo ayi bo yala singa basi Ngipiti tsingulu beni yalasa lubuila ko. 14 “‘Mufueti bambukilanga moyo kilumbu akiki, kembanganu kiawu mu zimbandu zinu zioso. Mufueti kembanga kiawu kibila widi nsiku mufueti tatamana kulandakana zithangu zioso. 15 Mufueti dia mapha makhambulu luvi mu sambuadi di bilumbu. Mu kilumbu kitheti, mufueti botula luvi mu zinzo zinu kibila tona mu kilumbu kitheti nati ki sambuadi va kumonika mutu wundia kiuma batula luvi, muna kafueti fua. 16 Mu kilumbu kitheti, lufueti vanga lukutukunu lunneni lunlongo. Ayi mu kilumbu ki sambuadi lufueti vanga mvandi lukutukunu lunkaka lunneni lunlongo. Lulendi vanga ko ni kisalu kimueka mu bilumbu abiobio, vayi mufueti kubika to bidia bintombulu muingi kadika mutu kadia. 17 “‘Kembang’anu nkungi wu mapha makhambulu luvi, kibila mu kilumbu akiokio yela lubotula ku ntoto wu Ngipiti. Ayi kembang’anu kilumbu akiokio mu zimbandu zinu zioso. Widi nsiku lufueti tumukinanga mu zithangu zioso. 18 Mufueti dia mapha makhambulu luvi mu ngonda yitheti, tona mu builu bu kilumbu 14 nati va builu bu kilumbu 21. 19 Mu sambuadi di bilumbu valendi ba ko luvi mu zinzo zinu, kibila woso mutu wundia kiuma batula luvi kuba kuandi nzenza voti muisi Isaeli, kafueti vondo. 20 Lulendi dia ko ni kiuma batula luvi. Mu zinzo zinu mufueti dia to mapha makhambulu luvi.’”