Mubongulu Malongi Madi mu Nzingulu ayi Kisalu Thuadusulu yi Lukutukunu
© 2022 Christian Congregation of Jehovah’s Witnesses
2-8 NGONDA YITHETI
KIUKA KIDI MU DIAMBU DI NZAMBI | 2 MINTINU 22-23
“Kibila Mbi Tufueti Kukikuludilanga?”
w00 15/9 29-30
Yosia Waba Kukikululanga ayi Wuba Lunungu lu Yave
Bisadi biaba sala muingi kuludika Tempelo basala mu kifuza. Ayi Yosia waba vutulanga beni matondo mu kisalu bisadi biandi abiobio baba vanga muingi kuludika Tempelo yivava bakulu bandi. Bo baba ludika Tempelo, Safani wunata tsangu kuidi ntinu. Tsangu mbi? Nandi wunata buku! Safani wusudikisa ti Hilikia Mfumu Wu Zinganga Nzambi, wubakula “buku yi nsiku wu Yave Mose kasonika.” (2 Lusa. 34:12-18)
Bo Safani kaba tanga nsiku, Yosia wuba phuila yi kukuwa mambu moso maba mu buku. Kibila waba tomba kuzaba mbi biaba tombulu nandi ayi dikabu dioso bavanga. Nandi wuyituka beni kumona phila buka yaba tubila matedi mbuongimini yikiedika ayi ziphasi bala viokila ba kukota mu mbuongimini yi luvunu. Ayi Yosia wutomba kuvisa thuadusulu yi Yave kibila, Yave wuba fuemina mu kibila bakulu bawu bamanga kutumukina mambu maba mu buku ayoyi.’—2 Minti. 22:11-13; 2 Lusa. 34:19-21.
w00 15/9 30 ¶2
Yosia Waba Kukikululanga ayi Wuba Lunungu lu Yave
Yosia wufila zimvuala kuidi Huluda mbikudi wunkieto ku Yeluzalemi, muingi batuala zitsangu. Huluda wuzabikisa ti Yave wala tuala ziphasi kuidi batu boso mu dikabu bamanga kutumukina mambu masonama mu buku. Vayi bo Yosia kakikulula va ntuala Yave, nandi kasa viokila ko ziphasi aziozio ayi wala vunda mu ndembama.—2 Minti. 22:14-20; 2 Lusa. 34:22-28.
Kiuka Kisuama
w01 15/4 26 ¶3-4
Ngie Wulenda Sadila Yave Kheti mu Ndionzukulu’aku Yikhambu Fuana
Kheti mu ndionzukulu’andi yikhambu fuana, Yosia wuvanga mambu mamboti va mesu ma Yave. Ayi mu matedi luyalu luandi lumboti, Kibibila kintuba: “Ava nandi kutona kuyala vasa ba ko ntinu wusadila Yave mu ntima woso, mu muela woso ayi mu mangolo moso dedi bunonisina nsiku wu Mose; ayi bo kafua, vasa ba ko ntinu wundedakana.”—2 Minti. 23:19-25.
Kifuani ki Yosia kidi kifuani kimboti ki mutu wukindama mu ndionzukulu yikhambu fuana! Mbi tulenda longuka mu kifuani kiandi? Mbi bisadisa Yosia kusola kulandakana zithuadusulu zi Yave?
9-15 NGONDA YITHETI
KIUKA KIDI MU DIAMBU DI NZAMBI | 2 MINTINU 24-25
“Ba Wukotuka mu Kiphevi mu Bilumbu Abibi Bitsuka”
w01 15/2 12 ¶2
Kilumbu ki Lufundusu lu Yave Kima Fikama!
Mambu Sefania kabikula, makindisa Yosia kumanisa mbuongimini yi luvunu yiba ku Yuda. Vayi, kheti mu mangolo moso Ntinu kavanga ma kumanisa mbuongimini yi luvunu, mawu masa manisa ko mavanga mawu mambi. Dedi, mbuongimini yi luvunu ayi kutengula menga ma batu bakhambulu kibila khayandi Manase kawesa ku Yelusalemi” (2 Minti. 24:3, 4; 2 Lusa. 34:3) Diawu tulenda ba lufiatu ti, kilumbu ki lufundusu lu Yave kiala kuiza.
w07 15/3 11 ¶10
Mambu Mamfunu Madi mu Buku yi Yelemia
Ntinu Nabukadenesali wuzungidila Yelusalemi mu mvu wumueka ayi ndambu, bo Ntinu Zedekiasi kavanga 11 di mimvu mu luyalu luandi mu mvu 607 A.T.K. Mu kilumbu 7 ngonda yintanu bo Nebukadenesali kavanga 19 di mimvu mu luyalu luandi. Wawu mvu Nebuzaladani, mfumu masodi mandi kayenda ku Yelusalemi. (2 Minti. 25:8) Ḿba, bo baba ku nganda divula, Nebuzaladani mfumu masodi waba fiongunina buidi balenda kotila ku divula. Bo vavioka bilumbu bitatu mu yoyawu ngonda, kilumbu kumi, nandi wukota ku divula di Yelusalemi ayi wu divika.—Yele. 52:12, 13.
Kiuka Kisuama
w05 1/8 12 ¶1
Mambu Mamfunu Madi mu Buku Yimmuadi yi Mintinu
24:3, 4. Yave kasa lemvukila ko basi Yuda mu kibila ki menga Manase katengula. Kibila Yave wumvua nkinza menga ma batu batengula mu khambu kibila. Diawu, tulenda ba lufiatu ti Yave wela bunga batu bantengulanga menga ma batu mu khambulu kibila.—Minku. 37:9-11; 145:20.
16-22 NGONDA YITHETI
KIUKA KIDI MU DIAMBU DI NZAMBI | 1 LUSANSU 1-3
“Kibibila—Buku yi Binongu Bikiedika”
w09 1/9 14 ¶1
Bukiedika ti Adami ayi Eva—Bazinga va Ntoto?
Fiongunina mambu Kibibila kintuba matedi mazina ma bakulu ma basi Yuda, madi masonama mu buku yitheti yi Lusansu kapu 1 nati 9 ayi Luka kupu 3. Mazina moso amomo, malenda duka 48 ayi 75 di zimbandu. Ayi mu kapu yintatu yi Luka yintubibila matedi bakulu boso ba Yesu Klisto. Ayi mu 1 Lusansu yintubila zimfumu zi makanda ayi zinganga Nzambi zi dikabu di Isaeli. Ayi mazina madi mu zibuku zia ziwadi aziozio, zintubila matedi batu tuzebi buboti dedi, Salomo, Davidi, Yakobi, Isaki, Abalahami, Nowa ayi Adami. Mazina moso amomo madi mabatu bazinga va ntoto ayi bawu bayizila mu nkunu Adami.
w08 1/6 3 ¶4
Kiedika Matedi—Nowa ayi Khuka Minlangu
Binongo biodi bidi mu Kibibila bimmonisa bivisa ti Nowa wuzinga va ntoto. (1 Lusa. 1:4; Luka 3:36) Esala ayi Luka, bafiongunina ayi basonika mambu beni. Mu nkuna Yesu Klisto Luka kasonika, wuntubila mvandi ti Nowa widi wumueka mu nkuna beni.
w09 1/9 14-15
Bukiedika ti Adami ayi Eva—Bazinga va Ntoto?
Khudulu yidi wumueka mu malongi ma Kibibila batu ba binganga biwombo bamvuanga beni nkinza. Ayi dedi bo tuzabidi, khudulu yidi thalu wumfuta muingi kukula mutu voti kiuma kidi va kivika. Ayi malongi amomo mammonisa ti, Yesu Klisto wuvana luzingu luandi muingi kutukula mu masumu. (Matai 20:28; Yoa. 3:16) Diawu Kibibila kintubila ti Yesu “widi khudulu yifuana.” (1 Timo. 2:6) Ayi ḿba wulenda ku yikuvusa thalu yifuana mu mbi? Kibibila kimvana mvutu: “Batu boso bamfuilanga mu Adami, buawu mvandi mu Klisto baboso bala tambudila luzingu.” (1 Koli. 15:22) Luzingu lusonga Yesu kavana muingi kutukula, luidi ludedakana na luzingu lusonga Adami kazimbisa bo kasumuka ku lumbu lu Edeni. (Loma 5:12) Bukiedika, boti Adami kasa sumuka ko, khanu khudulu yi Yesu Klisto yisi ko tsundu.
Kiuka Kisuama
it-2 194 ¶5-6
Minkunu
Mazina ma Bakieto. Baba tubilanga to mazina beni voti baba kibila kimfunu muingi kutubila mawu. Ngenesi 11:29, 30, yintubila Salai (Sala), kibila mu nzil’andi muawu muyizila Nkunu bakanikisa, kubika kuandi mu nzila nkieto wunkaka wu Abalahami. Ayi ḿba bantubila dizina Milika mu matangu amomo kibila nandi wuba khaya yi Lebeka, nkazi Isaki muingi kumonisa ti nkunu wu Lebeka wuyizila mu nkunu wu Abalahami kibila Isaki kasa ba ko nsua wu kukuela nkieto wu mimvila minkaka. (Ngene. 22:20-23; 24:2-4) Ayi Ngenesi 25:1, yintubila Ketula nkieto wunkaka wu Abalahami. Mawu mammonisa ti Abalahami wuyiza bue kuela bo Sala kafua, ayi mabutu mandi mayiza bue vutuka mu 40 di mimvu tona Yave kavanga mangitukulu mu mbutukulu yi Isaki. (Loma 4:19; Ngene. 24:67; 25:20) Mvandi mammonisa ti basi Midiani ayi minkuna minkaka mi Alabe kubunda mvandi basi Isaeli bayizila mu nkunu wu Abalahami.
Mvandi bantubila Lea, Lakeli ayi bakieto bankaka ba Yakobi va kimueka na bana bawu. (Ngene. 35:21-26) Mawu matusadisa kuvisa luwawanu Nzambi kayiza vanga mu bana abobo. Mu kibila akiokio, diawu basonikina mazina ma bakieto abobo bo babe tubila matedi minkunu. Ayi baba tubilanga mazina mawu, bo vaba tombulu kuba bikila kiuka. (Zinta. 26:33) Mvandi batubila Tamali, Lahabi ayi Luti. Ayi bakieto abobo, badi mu nkunu Mesia kayizila.( Ngene. 38:1-30; Luti 1:3-5; 4:13-15; Matai 1:1-5) Ayi mazina ma bakieto bankaka madi masonama mu buku yi 1 Lusansu 2:35, 48, 49; 3:1-3, 5.
23-29 NGONDA YITHETI
KIUKA KIDI MU DIAMBU DI NZAMBI | 1 LUSANSU 4-6
“Mbi Minsambu Miama Mimmonisa Matedi Minu?”
w10 1/10 23 ¶3-7
“Ngie wunkuwanga minsambu”
Yabesi wuba kifu ki kusambilanga. Nandi wutona nsambu’andi mu kulomba muingi Yave kansakumuna, bosi wudinda mambu matatu mammonisa ti nandi wuba kiminu kingolo.
Ditheti, Yabesi wulomba Yave mu kutuba: “todisa kizunga kiami.” (lutangu 10) Dibakala adiodio baba kunkinzikanga beni, vayi nandi kasa ba ko nsoki bu kutomba mintoto mingana. Nsambu kavangila mu ntima woso wummonisa ti nandi kabasa tsikikanga ko thalu mu zitsatu ziandi veka vayi zi bankaka. Diawu kadindila muingi kizunga kiandi kiluta ba kitola mu phila yifuana muingi bisadi binkaka bi Nzambi babaka bu kue zingila kuna.
Dimmuadi, Yabesi wulomba muingi “koku” ku Nzambi kuba yandi. “Koku” ku Nzambi kunsundula, lusalusu nandi kamvananga kuidi bisadi biandi. (1 Lusa. 29:12) Muingi kutambula mvutu wunsambu nandi kavangila mu ntima woso, Yabesi wudinda kuidi Yave no khambu koku kukhufi no wundukisanga zitsatu zi bisadi biandi badi kiminu.—Yesa. 59:1.
Dintatu, Yabesi wusambila: “Phukisa mu mambu mambi muingi yibika kumona ziphasi.” Bo kasadila kikuma “muingi yibika kumona ziphasi ḿba Yabesi waba tomba kudinda, bakana ko muingi kubika kumonikina mambu mambi, vayi muingi kabika kuba mu kiunda kingolo mu kibila ki mambu mambi.
Nsambu Yabesi kavanga, wummonisa ti nandi wuba kiminu, kuidi mutu wunkuwanga minsambu. Mvandi waba monisina ti nandi waba kuazukila matedi Mbuongimini yikiedika. Mbi Yave kavanga? Bikuma bitsuka bi kinongo akiokio bimmonisa ti: “Nzambi wuvanga buna buawu Yabesi kandindila.”
Kiuka Kisuama
w05 1/10 9 ¶7
Mambu Mamfunu Madi mu Buku Yitheti yi Lusansu
5:10, 18-22. Mu bilumbu bi Ntinu Sauli, mimvila miba ku khonzo leste yi Yolidani, kheti basa ba ko thalu yiwombo yi masodi vayi banunga kunuanisa basi Angaleni. Mawu mamonikina, kibila bawu bafiatila mu Yave ayi batomba lusalusu luandi. Diawu, tubanu lufiatu mu Yave bo zimbeni zitu ba tunuanisa.—Efe. 6:10-17.
30 NGONDA YITHETI– 5 NGONDA YIMMUADI
KIUKA KIDI MU DIAMBU DI NZAMBI| 1 LUSANSU 7-9
‘Mu Lusalusu lu Yave, Ngie Wulenda Nunga Biyeku Biphasi’
w05 1/10 9 ¶8
Malongi Mamfunu Madi mu Buku Yimmuadi yi Lusansu
9:26, 27. Kukengidila mielu, kiba kiyeku ki lufiatu basi Levi babe tambulanga. Bawu baba tambulanga zitsabi zi kukotila mu bibuangu binlongo ku Tempelo. Bawu baba monisanga ti baba batu ba lufiatu mu kuzibulanga mielu kadika kilumbu. Bubu mvandi, Yave wutuvana kiyeku kinkinza ki kulonga batu va kizunga kitu ayi kuba sadisa kumbuongimina. Diawu, befu mvitu tufueti monisa ti tuidi batu ba lufiatu dedi basi Levi babe kengidilanga mielu.
w11 15/9 32 ¶7
Landakana Kifuani ki Fineasi Ngie Kudengana Bikaku
Fineasi wuba kiyeku kimfunu beni ku Isaeli mu thangu yikhulu, vayi mu kibakala, nduenga ayi lufiatu mu Nzambi, nandi wununga bikaku kadengana. Ayi phila Fineasi kaba kiebilanga biyeku biandi, mansadisa kutambula lunungu lu Yave. 1.000 di mimvu kuntuala, mu thuadusulu yi phevi yinlongo, Esala wusonika: ‘Kumbusa, Fineasi muana Eliazali, nandi wuba ntuadisi’awu. Ayi Yave wuba yandi.’ (1 Lusa. 9:20) Mawu befu boso tufueti vanga, bulutidi bo bantuamanga ntuala mu kimvuka ki Yave.
Kiuka Kisuama
w10 15/12 21 ¶6
Yimbila Kuidi Yave!
Mu nzila mimbikudi miandi, Yave wutuba ti bisadi biandi bafueti kunzitisa mu kukuimbilanga minkunga. Basi Levi baba kiyeku ki kukuimbila, babasa kuba vananga ko biyeku binkaka muingi babaka thangu yiwombo yi kukubika minkunga ayi kuvanganga zi ensaio.—1 Lusa. 9:33.
6-12 NGONDA YIMMUADI
KIUKA KIDI MU DIAMBU DI NZAMBI | 1 LUSANSU 10-12
‘Kindisa Phuil’aku yi Kuvanga Luzolo lu Nzambi’
w12 15/11 6 ¶12-13
‘Ndongisa bu Kuvangila Luzolo Luaku’
Tufueti landakana kifuani ki Davidi matedi kuzola ayi kuzingila mu minsua mi Kibibila. Mona mambu mbi mamonika bo Davidi kaba tomba ‘kunua nlangu wu kisima kiba ku Betelemi.’ Masodi matatu ma Davidi, batula luzingu luawu va kingela mu kukota ku divula di Betelemi, kuba masodi ma basi Filistea muingi kelanda nlangu. Vayi Davidi wumanga kunua wawu. Kibila mbi? Nandi wutuba: ‘ Mu kibila ki lukinzu luama mu Nzambi, yilendi nua ko nlangu awowo. Buidi yilenda nuina menga ma batu babe tula luzingu luawu va kingela? Kibila bawu babe tula luzingu luawu va kingela muingi kutuala nlangu beni.—1 Lusa. 11:15-19.
Davidi wuzaba ti nsiku waba tuba ti didi diambu dimbi kunua menga, vayi bafueti dukula mawu va tsi muingi kukinzika Yave. Nandi mvandi wuzaba kibila bafueti vangila mawu. Davidi wuzaba ti ‘luzingu lu mutu luidi mu menga.’ Vayi wawu wuba nlangu kubika kuandi menga. Buabu, kibila mbi Davidi kamangina kunua wawu? Kibila Davidi wuvisa buboti nsua widi mu nsiku awowo. Kuidi Davidi, kunua nlangu beni, kuba buka nandi waba nua menga ma babakala beni. Diawu kabakila makani ma kudukudila wawu va tsi.—Levi. 17:11; Deute. 12:23, 24.
Bika Minsiku ayi Minsua mi Nzambi Mituadisa Kilunzi Kiaku
Boti tutidi minsiku mi Nzambi mi tusadisa, tubika to kuba kifu ki kutanga miawu voti kumi zaba. Vayi tufueti ku mizola ayi ku mikinzika. Kibibila kitukamba: ‘Lumona khenene mambu mambi ayi zolanu mamboti.’ (Amosi 5:15) Vayi buidi tulenda vangila mawu? Tufueti longuka kutadila mambu mu phila Yave kantadilanga. Yindula kifuani akiki. Yindul’abu ti wisinnunga ko kulala bumboti, ayi mfelimi wu kukembi ntindu bidia fueti dia, phila yi bisavu wufueti nyikunina binama bi nhitu ayi mambu mankaka wufueti balula mu luzingu luaku muingi wubaka tolo tumboti. Bo wuntona kuvanga mambu beni, ngie wummona ti madi mu kusadisa! Mayindu mbi wulenda ba mu mfelimi beni ayi zithuadusulu ziandi?
Dedi mfelimi awowo, Mvang’itu wu tuvananga minsiku mi tukiebanga mu mambu mambi ayi ma tusadisanga kubaka luzingu lumbote. Kibibila ki tulonga ti tufueti bika luvunu, buivi, kubika vanga butsuza, kubika ba buphunha voti kuvanga kioso kiuma kidi kithuadi na zipheve zimbi. (Tanga Zingana 6:16-19; Nzai. 21:8) Luzolo luitu mu Yave ayi mu minsiku miandi lumbuelamanga mu thangu tummona ndandu tumbaka mu kuntumukina.
Kiuka Kisuama
it-1 555 ¶6-7
Ntima
Kusadila Yave ‘mu ntima Woso’ Ntima wu mutu wufueti ba wuduka muingi wusala buboti. Vayi befu khambu ba keba keba, mayindu ayi mabanza mitu malenda ba makabuka. Bo Davidi katuba, ‘phana ntima wukhambulu wuvasuka muingi yikinzikanga dizina diaku’, mawu mansundula ti ntima wu mutu wulenda ba wukabuka mu mambu kanzolanga ayi kammona boma. (Minku. 86:11) Batu ba phila ayoyo, babanga ko kifuza mu mbuongimini yi Nzambi. (Minku. 119:113; Nzai. 3:16) Mvandi, mutu kalenda ba ntima wukabuka mu kusadila zimfumu wadi voti wuntuba mambu mankaka vayi mayindu mandi madi mankaka. (1 Lusa. 12:33; Minku. 12:2, nota) Mu kibakala Yesu wutumbudila batu badi mintima mikabuka.—Matai 15:7, 8.
Batu bantomba kukuangidika Nzambi, balendi ba ko ntima wuvasuka, vayi bafueti kunsadila mu ntima woso. (1 Lusa. 28:9) Vantombulu mangolo mawombo muingi kuvanga mawu, kibila ntima widi bukhita ayi wuntomba kutuvukumuna. (Yele. 17:9, 10; Ngene. 8:21) Muingi tuba ntima wuduka mu kiphevi, tufueti: sambilanga mu ntima woso (Minku. 119:145; Manio. 3:41), kubotulanga thangu muingi kulonguka Diambu di Nzambi, (Esala 7:10; Zinga. 15:28), kuba kifuza mu kisalu ki kusamuna (dedikisa mawu na Yelemia 20:9), ayi kuba bukundi na batu badi mintima miduka vantuala Yave.—dedikisa mawu na 2 Mintinu 10:15, 16.
13-19 NGONDA YIMMUADI
KIUKA KIDI MU DIAMBU DI NZAMBI | 1 LUSANSU 13-16
‘Kulandakana Zithuadusulu Kuntuadisanga Ndandu’
w03 1/5 10-11
Ngie Wuntombanga Zithuadusulu zi Yave?
Bo bavutula kasu yi luwawanu ku Isaeli ayi yiviokisa thangu yiwombo ku Kileate-Yealimi, bosi ntinu Davidi wubaka makani ma kunata yawu ku Yelusalemi. Nandi wutomba kuzaba mayindu ma zimfumu zi dikabu ayi wuba kamba ti ‘ba kukikinina ayi boti luidi luzolo lu Yave’ wunkuiza vutula kasu yi luwawanu ku Yelusalemi.’ Vayi nandi kasa fiongunina ko buboti muingi kuzaba mayindu ma Yave matedi makani kabaka. Boti nandi wuvanga mawu, khanu basa natina ko kasu yi luwawanu mu makalu zingombi baba titika. Vayi, khanu basi Levi babutukila mu dikanda di basi Koati, banatina yawu mu mavangiti, dedi bo Nzambi katubila. Kheti Davidi waba tombanga zithuadusulu zi Yave, vayi khumbu ayoyo nandi kasa vanga ko mawu. Mawu matuadisa beni ziphasi. Kuntuala, Davidi wutuba: ‘Yave Nzamb’itu wutudasukila, kibila tusa tomba ko thuadusulu’andi matedi mambu amomo.’—1 Lusa. 13:1-3; 15:11-13; Zinta. 4:4-6, 15; 7:1-9.
w03 1/5 11 ¶13
Ngie Wuntombanga Zithuadusulu zi Yave?
Bo basi Levi babotula kasu yi luwawanu ku nzo yi Obedi-Edomi ayi banata yawu ku Yelusalemi, baboso bayimbila nkunga Davidi kasonika. Mu nkunga beni, waba tuba mvandi: ‘Tombanganu Yave ayi mangolo mandi, ntombanganu mu thangu zioso. Tebukanganu monho mambu moso ma kukuitukila kavanga, mangitukulu mandi ayi zimfundusulu zisonga zimbasikanga mu munu’andi.”—1 Lusa. 16:11, 12.
Kiuka Kisuama
w14 15/1 10 ¶14
Buongimina Yave, Ntinu wu Zithangu Zioso
Davidi wutuala kasu yi luwawanu ku Yelusalemi. Mu thangu beni, basi Levi bazitisa Yave mu kuyola nkunga. Ayi mu nkunga beni, muba bikuma tulenda mona mu 1 Lusansu 16:31: “Zabikisanu kuidi mimvila mioso: ‘Yave weka ntinu!’” Ḿba tulenda kuyikuvusa: ‘Boti Yave widi ntinu wu zithangu zioso, buidi kayiza bela ntinu mu thangu beni?’ Yave wumbanga ntinu bo kanhamikisanga luyalu luandi, voti bo kansolanga mutu kavanga luzolo luandi mu mua thangu ove muingi kudukisa luzolo luandi. Phila ayoyo Yave kanyadilanga yilenda ba zitsundu ziviakana. Ava Davidi kafua, Yave wunkanikisa ti kintinu kiandi kiala kadidila mu zithangu zioso: ‘Yala bonga wumueka mu nkunu’aku —muan’aku, ayi yala tsikika kintinu kiandi.’ (2 Samu. 7:12, 13) Bo vavioka 1.000 di mimvu, bosi mutu beni Yave kakanikisa, wuyiza butuka. Nani mutu beni ayi thangu mbi kayiza bela ntinu?
20-26 NGONDA YIMMUADI
KIUKA KIDI MU DIAMBU DI NZAMBI | 1 LUSANSU 17–19
“Tatamana Kuba Mayangi Kheti bo Mambu Makhambu Vangimina bo Wuntombila”
w06 15/7 19 ¶1
Tsikika Mayindu mu Mamboti ma Kimvuka ki Yave
NTINU Davidi, widi wumueka mu batu bantubila beni mu Masonoko ma Kiebeleo. Kheti nandi wuba nsungi mamemi, nhimbidi, mbikudi ayi ntinu, vayi kheti bobo wuba lufiatu luwombo kuidi Yave. Luzolo luwombo kaba mu Yave, luawu lumvanga kubaka makani ma kutunga tempelo. Muingi kiawu kiba kibuangu ki kubuongimina Yave ku Isaeli. Ayi Davidi wuzaba ti mawu mankuiza tuadisa mayangi ayi lusakumunu kuidi dikabu di Nzambi. Diawu kayimbidila: “Mayangi kuidi batu [Yave] kasola ayi kuidi bo katumisa vantual’andi muingi bakala ku nzo’andi. Tunkuiza yangalala mu biuma bimboti wunkuiza tuvana ku nzo’aku, Kibuangu kiaku kinlongo.”—Minku. 65:4.
Yangalala mu Kiyeku Widi
Bo buawu mvandi befu, tulenda buela mayangi mitu mu kukivana mu kioso kua kiyeku baku tuvana muingi kuvanga mu kisalu ki Yave. Wu “kivana mu kisalu ki kusamuna” ayi mvandi mu bisalu binkaka bi kimvuka. (Mava. 18:5; Ebe. 10:24, 25) Bo wunkuenda mu zikhutukunu, kubamanga bumboti mu mambu wunkuiza longuka ayi vana mimvutu minkuiza kindisa bankaka. Kubamanga mvandi bumboti mu kioso kua kiyeku wunkuiza vanga mu lukutukunu lumvangamanga va khati sabala. Boti lusalusu babe kudinda mu kioso kua kiyeku mu kimvuka, vitila mu thangu ayi vangila kiawu mu phila yimboti. Bika kulenza kioso kua kiyeku ba kuvana mu kuyindula ti, thangu kuandi yibobo wunkuiza bungisa ayi tatamana kuvanga mamgolo muingi wubuela pisuka mu biyeku binkaka. (Zinga. 22:29) Bo wukivana mu bisalu bi kiphevi ayi biyeku wuntambula, buawu ngie wunkuiza fika yonzukila mu kiphevi ayi mayangi maku mvandi mankuiza buelama. (Ngala. 6:4) Mvandi mala kusadisa ku kuangalala mu thangu bankaka bantambula biyeku bio nige wuntomba kutambula.—Loma 12:15; Ngala. 5:26.
Kiuka Kisuama
w20.02 12, quadro
Befu Tunzolanga Beni Yave Tat’itu yi Luzolo
Bukiedika ti Yave Wuku Phuanga Nkinza?
Ngie wumana ku yikuvusa: ‘Mu bivevi bioso bi batu badi va ntoto, bibila mbi Yave kadi muingi kuphua nkinza?’ Boti ngete, buna wisi ko to ngie veka wunyindudilanga phila ayoyo. Ntinu Davidi wusonika: “A Yave, nani mutu muingi wuntebukila monho; muana mutu muingi wunyindulanga?” (Minku. 144:3) Davidi wuba lufiatu ti Yave wunzaba buboti. (1 Lusa. 17:16-18) Ayi mu nzila Diambu Diandi ayi kimvuka kiandi, Yave wutu zabikisanga ti nandi wummonanga luzolo tummonisanga mu nandi. Tala mua bivisa bidi mu Diambu di Nzambi bilenda tusadisa kukikinina mu mawu:
• Yave wu kuzaba ava wubutuka.—Minkunga 139:16.
• Yave zebi mambu madi mu ntim’aku, ayi mambu widi mu kuyindula.—1 Lusansu 28:9.
• Yave wunkuwanga minsambu mi kadika mutu mu befu.—Minkunga 65:2.
• Mavanga maku malenda kuangidika voti kunhongisa ntima wu Yave.—Zingana 27:11.
• Yave nandi veka wu kutumisa muingi wumfikama.—Yoane 6:44.
• Yave wu kuzebi buboti, diawu ngie kufua, nandi wala kuvulubusa. Nandi wala bue ludika nhitu’aku, wala vutula mayindu maku, ayi mambu mankaka ma kimutu kiaku.—Yoane 11:21-26, 39-44; Mavanga 24:15.
27 NGONDA YIMMUADI– 5 NGONDA YINTATU
KIUKA KIDI MU DIAMBU DI NZAMBI | 1 LUSANSU 20-22
“Sadisa Matoko Kubieba Biyeku Bantambula”
w17.01 29 ¶8
“Fiatila Mambu Amomo Kuidi Zikhomba Badi Bakuikama”
Tanga 1 Lusansu 22:5. Ḿba Davidi waba yindula ti Salamo kasa ba ko wukubama muingi kudukisa kiyeku akiokio kimfunu. Kibila Salomo wuba ‘ditoko ayi kasa ba ko nduenga yiwombo’, ayi vaba tombulu tempelo yiba kibuangu ki ‘kukuitukila’. Vayi Davidi wuzaba ti Yave wunkuiza nsadila. Diawu Davidi kavangila mamoso kanunga muingi muan’andi kanunga kutunga tempelo.
w17.01 29 ¶7
“Fiatila Mambu Amomo Kuidi Zikhomba Badi Bakuikama”
Davidi kanu wuyindula, boti minu yisinkuiza tunga ko tempelo buna mvandi yisinkuiza vanga ko ni diambu muingi kusadisa. Mvandi khanu wuyindula, minu yibaka diyindu vayi mutu wunkaka wunkuiza tambula nzitusu. Bukiedika, bo tempelo yimana, basa yitedilanga ko tempelo yi Davidi vayi yi Salomo. Davidi wunhonga mu kuzaba ti kasinkuiza baka ko luaku lu kutunga tempolo, vayi kheti bobo nandi wuvanga mamoso muingi kubuela mioko. Nandi wukubika bisadi ayi bisadulu bioso biaba tombulu dedi: bisengo, tsongo, palata, wola ayi mabaya mamboti. Mvandi nandi wukindisa Salomo mu kutuba: “Buabu muan’ami bika Yave kaba yaku ayi bika ngiewu wununga kutunga Nzo yi Yave Nzambi’aku dedi bo nandi kakanikisa.”—1 Lusa. 22:11, 14-16.
Matata, Muidi mu Kusadisa Muan’inu Kubaka Makani ma Kubotama?
Bakulutu ba kimvuka balenda sadisa matata mu mambu bamvanganga mu kukoluka mu phila yimbote matedi kubaka makani mu kisalu ki Yave. Khomba wumueka wunkieto wuntebuka monho mambu Ya Russell kankamba bo kaba mimvu minsambanu. Nandi wutuba, “Mu 15 di minutu, nandi wuyolukila yama matedi makani mami ma kipheve.” Mambu mbi mayiza monika? Kuntuala, khomba beni wuyiza ba ntuami ntuala, ayi wusadila kuvioka 70 di mimvu! Bukiedika, malongi mambote ayi khindusulu yilenda sadisa mutu mu luzingu luandi loso. (Zinga. 25:11) Bakulutu ba kimvuka balenda tumisa matata ayi bana muingi kusadisa mu kisalu ku Nzo yi Kintinu. Balenda kuba vana bisalu bifueni mu phung’awu ayi bio bazebi bavanga.
Buidi bankaka mu kimvuka balenda sadisila? Mu kumonisa ti bamvuanga nkinza kadika ditoko. Dedi, ngie wulenda tomba bivisa bimmonisa ti bawu badi mu kufikama Yave. Muana wumueka veni mvutu wumbote mu lukutukunu, voti kiyeku kavengi mu lukutukunu lumvangamanga va khati sabala? Nandi wumvananga kimbangi mu kikola, voti wuvanga diambu dimbote mu thangu banthota kavanga mambi? Ti buawu, buna bika kala kisina mu kunkamba ti diambu dimbote kavengi! Tulenda ba makani ma kukoluka na matoko ava lukutukunu luntona ayi bo lummana. Bo tumvanga mawu, bana bela mona ti bawu mvawu badi mu khati ‘kimvuka kinneni.’—Minku. 35:18.
Kiuka Kisuama
w05 1/10 11 ¶6
Mambu Mamfunu Madi mu Buku Yitheti yi Lusansu
21:13-15. Yave wukamba kuidi Mbasi kavana nsua wu kutulula Yelusalemi muingi kabika bue tulula, kibila kazolanga ko kumona dikabu diandi kutovuka. Bukiedika “nandi widi nkua nlevu.”