DILONGI 2

Natina Dilongi mu Phila Wunkolukilanga

2 Kolinto 2:17

DILONGI: Yoluka mu phila wunkolukilanga, mu phila yikyedika mwingi kuzabikisa mabanza widi mu mambu wunlonga ayi mu batu ba kukuwila.

Sambila ava kukubama ayi kubama buboti. Dinda lusalusu lu Yave mwingi wutsikika mayindu bika ti mu ngyewu vayi mu mambu wunlonga. Tsikika mayindu maku mu mambu malutidi nkinza mwingi kutuba. Bosi tubila mawu mu bikuma byaku; bika to kutanga kadika kikuma dedi bo kisonimina mu nkanda.

Boti wuntanga Kibibila voti kilongulu kinkaka, tomba kuzaba buboti mambu masonama vana mwingi wutanga mu phila yifwana. Boti vama bantubila batu, tangila vawu mu mabanza, vayi bika sabisa.
Monisa mabanza ma ntima. Yindula mu kibila mbi batu bafweti kuwila mambu wunlonga ayi tsikika mayindu maku mu bawu. Ayi phila wunkolukila, wunyikunina binama bi nyitu ayi kizizi kyaku, yela monisa mabanza maku ayi luzolo widi mu bawu.

Bika kumwena ti kukoluka mu phila wunkolukilanga kunsundula kukolukila boso kwa buma. Kinzika mambu wunlonga mu kukolukila mu phila batu balenda visa ayi sadila bikuma mu phila yifweni.
Talanga batu ba kukuwa. Talanga bizizi bi batu boti disi ko dyambu dimbi kuvanga mawu. Bo wumvanga dilongi, khumbu zinkaka talanga kadika mutu wu kukuwa, bika ti kutala baboso khumbu mweka.