DILONGI 03
Kibila mbi fueti Fiatila Mambu Madi Mu Kibibila?
Kibibila kituvananga malongi mawombo. Ayi mvandi kintubila mambu mawombo mambote matedi bilumbu binkuiza. Ḿba ngiewu tidi kuzaba mambu kiawu kintuba, vayi yoyawu thangu, wulenda ba divuda mu mawu. Bukiedika kuandi ti ngiewu wulenda fiatila mu zikhanu ayi mu malongi madi mu buku ayoyi yikhulu? Bukiedika kuandi ti tulenda kikinina mu mambu Kibibila kintuba, matedi kubaka luzingu lu mayangi bubu ayi mu bilumbu binkuiza? Bawombo bantubanga ti ngete. Mawu mvaku wunkikininanga? Tukutumisa muingi wubakula mvutu.
1. Bukiedika ti binongu bi Kibibila bidi bikiedika?
Kibibila kintuba ti minsoniki mi Kibibila basonika “mambu masulama ayi makiedika.” (Mpovi 2:10) Mawu mammonisa ti, batu ayi binongu bantubila mu Kibibila bidi bikiedika. (Tanga Luka 1:3; 3:1, 2.) Batu bantanga binongo ayi banfioguninanga biuma bikhulu, bantubanga ti mambu Kibibila kintuba matedi thangu, batu, bibuangu ayi mambu mankaka madi makiedika.
2. Kibila mbi tulenda bela lufiatu mu mambu Kibibila kintuba?
Kibibila yidi buku yintubanga mambu tona muna tona mammonikanga kuntuala. Kiawu kintubilanga mua mambu, matedi nduenga yi kikola. Vayi mu thangu basonika kiawu, batu bawombu basa kikininanga ko mambu kiawu kintuba. Vayi bubu, nduenga yi kikola yimana tuba ti mambu Kibibila kintuba madi makiedika. Kheti Kibibila yidi buku yikhulu, mambu kiawu kintuba ‘madi ma lufiatu bubu ayi mu zithangu zioso.’—Minkunga 111:8.
3. Kibila mbi tulenda kikinina mambu Kibibila kintuba matedi bilumbu binkuiza?
Mu Kibibila muidi zimbikudulua zintubila matedi ‘mambu mo kama vangimini’abu ko.’ (Yesaya 46:10) Dedi, mambu mawombo mayiza monika kuntuala, Kibibila kitubila mawu tona thama. Kibibila mvandi kibikula buidi buala bela nza mu bilumbu bitu. Mu dilongi adidi tuenzaba mua zimbikudulu Kibibila kintubila. Kumona phila zimbikudulu beni zidi mu kusalimina buna buawu Kibibila kitubila, madi mambu ma kukuitukila!
BUELA LONGUKA
Tala buidi nduenga yi kikola yididi nguizani na Kibibila, ayi fiongunina mua zimbikudulu zidi muawu.
4. Nduenga yi kikola yidi nguizani na Kibibila
Mu thangu yikhulu batu bawombo babe kikininanga ti vadi kiuma kinsimba ntoto. Tala VIDEO.
Bakula mbi buku yi Yobi yituba 3.500 di mimvu kumbusa. Tanga Yobi 26:7, bosi tubilanu kiuvu kinlanda:
Kibila mbi didi diambu di kukuitukila kuzaba ti, Kibibila kituba mu thama ti vasi ko kiuma kinsimba ntoto?
Batu bayiza visa to buidi nlangu wuntatamananga va ntoto nduka 1800 di mimvu kumbusa. Tanga Yobi 36:27, 28, bosi tubilanu kiuvu kinlanda:
Kibila mbi didi diambu di kukuitukila kumona buidi lutangu alolo lunsudikisila mambu amomo?
Mambu betanga, mambuela lufiatu luaku mu Kibibila?
5. Kibibila kibikula mambu mayiza monika
Tanga Yesaya 44:27–45:2, bosi tubilanu kiuvu kinlanda:
Mambu mbi matedi mbungulu yi Babiloni Kibibila kabikula 200 di mimvu kumbusa ava mawu mamonika?
Binongu bimmonisa ti Kolesi ntinu wu Pelesia ayi nkangu’andi wu masodi batulula Babiloni mu mvu 539 A.T.K.b Bo bazibula nzila yinkaka muingi nlangu wu muila waba kakanga divula wudekuka, bawu bakota kuna kibila mielu miba mizibuka. Mu phila ayoyi bawu basa mona ko phasi mu kutulula divula beni. Bubu va mavioka 2.500 di mimvu, tulenda mona bivisa ti, divula di Babiloni dituluka. Tala mbi Kibibila kibikula.
Tanga Yesaya 13:19, 20, bosi tubilanu kiuvu kinlanda:
Buidi mbikudulu ayoyi yisalimina?
Thulukulu yi tsi yi Babiloni mu bilumbu bitu, ku tsi Iraque
6. Kibibila kibikula mambu tuidi mu kumona bubu
Kibibila kintuba ti tuidi mu kuzingila mu bilumbu bitsuka. (2 Timoteo 3:1) Tala mbi Kibibila kintuba matedi bilumbu beni.
Tanga Matai 24:6, 7, bosi tubilanu kiuvu kinlanda:
Mbi Kibibila kituba matedi buidi batu bankuiza bela mu bilumbu bitsuka?
Tanga 2 Timoteo 3:1-5, bosi tubilanu biuvu binlanda:
Mambu mbi Kibibila kibikula matedi buidi batu bala bela mu bilumbu bitsuka?
Mambu mbi bantubila mu lutangu alulu ngiewu wummonanga bubu?
BATU BANKAKA BANTUBANGA: “Kibibila yidi buku yi binongu bi luvunu.”
Mu mbuenu’aku bivisa mbi ngie widi bi kuvanga kufiatila mu Kibibila?
MBI NGIE BELONGUKA
Binongu, nduenga yi kikola ayi phila zimbikudulu zi Kibibila zinsalimina mammonisa ti ngie wulenda fiatila kuaku mu Kibibila.
Vutukila Mambu Mamfunu
Bukiedika ti binongu bantubila mu Kibibila, bimonika kuandi?
Bivisa mbi bimmonisa ti, nduenga yi kikola yidi nguizani na mambu Kibibila kintuba?
Ngiewu wunkikinina ti mambu Kibibila kintuba mala monika mu bilumbu binkuiza? Kibila mbi wunyindudilanga abobo?
TALA MAMBU MANKAKA
Bukiedika ti mambu moso Kibibila kantuba matedi nduenga yi kikola madi kuandi masulama?
“Bukiedika Kuandi ti Kibibila Kidi Nguizani na Nduenga yi Kikola?” (Dilongi didi mu jw.org)
Mambu mbi matuvana bivisa ti, tuidi mu kuzingila mu bilumbu bitsuka”?
“6 Profecias Bíblicas que Estão se Cumprindo Hoje” (A Sentinela, 1º de Maio de 2011)
Tala buidi zimbikudulu zidi mu Kibibila zintubila matedi kintinu ki Ngelesia zisalimina.
Tumbakanga Khindusulu mu “Zimbikudulu zidi mu Kibibila” (5:22)
Tala buidi zimbikudulu zidi mu Kibibila zibaludila phila dibakala dimueka kabe yindudilanga.
“Eu Não Acreditava que Deus Existia” (A Sentinela No. 5 2017)
a Zimbikudulu zidi zisangu zi Nzambi matedi bilumbu binkuiza
b A.T.K yinsundula ava thangu Klisto ayi T.K yinsundula, thangu Klisto.