Zozefi nandi mwana Yakobi kaba luta zolanga mu bana boso kaba. Zikhomba zyandi bo bamona ti tat’awu nandi kaba zolanga beni, batona kummona nsoki. Buvyokila thangu, Zozefi wulota ndosi nafeka ka khambu visa buboti. Diawu kazabikisila yawu kwidi tat’andi ayi zikhomba zyandi. Vayi zikhomba zyandi bamwena ti ndosi beni yaba sundula ti Zozefi, nandi wala kwiza ba mfumu’awu. Tona kilumbu beni, bawu babwela kimbeni mu nandi!

Kilumbu kinkaka zikhomba zi Zozefi baba sunga mameme mu ndeku divula di Sekemi, Yakobi wutuma Zozefi mwingi ketala zikhomba zyandi ti bawu baba buboti. Bo bamona Zozefi, wumweka mu bawu wutona kutuba: ‘Talanu nloti zindosi kemu kukwiza.’ Wunkaka wutuba: ‘Ndokwanu tumvonda!’ Bo Zozefi kavitila, bawu bambwila ayi bantibula mu dibulu diwonguka. Vayi Yuda mwana wunkaka wu Yakobi bo kamona basi Midiani baba kwizanga kukita byuma mwingi basumbisa ku Ngipiti, wukamba zikhomba zyandi: ‘Disi ko dyambu dimboti kuvonda khomb’itu. Ndokwanu tunsumbisa mwingi kaba mvika.’ Mu thangu beni bawu bansumbisa kwidi minkiti mi Midiani mu 20 ma bibenga bi palata.

Mwingi tat’awu kabika zaba mambu bavanga, bawu bavonda khombo yimbakala ayi bavinda menga mu kikhutu ki Zozefi. Bosi babonga kikhutu beni mwingi kumonisina tat’awu Yakobi. Bawu ba yuvula tat’awu: ‘Kikhutu akiki, kisi ko ki mwan’aku Zozefi?’ Yakobi wuba beni mu kyunda kibila kaba mwena ti kibulu ki tsisi kivonda mwan’andi.

Ku Ngipiti, Zozefi bansumbisa kwidi mfumu baba tanguninanga Potifali. Vayi Yave kasa zimbakana ko Zozefi. Potifali bo kamona zikhadulu zimboti zi Zozefi ayi phila yimboti kaba vangilanga kisalu kyandi, wunfyatila ayi wumvana kiyeku ki kutwadisa kyuka kyandi kyoso.

Nkazi Potifali waba tombanga beni Zozefi, kibila wuba ditoko dimboti. Diawu kadika kilumbu, nandi waba tatisanga Zozefi mwingi kabundana yandi nyitu. Vayi Zozefi waba manganga ayi waba tubanga: ‘Yilendi ko kuvanga mawu! Kibila Mfumu’ami, wukufyatilanga beni ayi ngyewu widi nkazi’andi. Minu kumavanga, muna disumu dinneni yamvanga va meso ma Yave Nzambi!’

Kilumbu kinkaka, nkazi wu Potifali waba kwika Zozefi mwingi kabundana yandi nyitu. Nandi wubwila Zozefi mu kikhutu, vayi Zozefi wumbikila kikhutu beni ayi wubasika mu thinu ku nganda. Bo Potifali kavitila ku nzo, nkazi’andi wumkamba: ‘Zozefi matomba kukhwika yibundana yandi nyitu.’ Vayi masa ba ko makyedika! Potifali wuba mu nganzi, diawu katudila Zozefi mu buloku. Angi Yave kasa zimbakana ko Zozefi.

Mu thangu Zozefi kaba mu buloku, Falawo ntinu wu basi Ngipiti wulota ndosi kakhambu zaba tsundu ayi vasa bakana ko mutu wu kunsudikisa nsundu yi ndosi beni. Vayi kisadi kimweka kikamba Falawo ti Zozefi kalenda kunsudikisa tsundu yi ndosi beni, nandi wutuma kisadi kinkaka mwingi kelanda Zozefi.

Falawo wuyuvula Zozefi: ‘Ngye wulenda kutsudikisa tsundu yi ndosi ayiyi?’ Zozefi wukamba Falawo: ‘Tsi yi Ngipiti yala wala bidya mu sambwadi di mimvu, vayi mu sambwadi dinkaka di mimvu, kwala ba nzala. Diawu sola mutu widi ndwenga mwingi kasweka bidya, mu dyambu kuvukisa dikabu dyoso.’ Bosi Falawo wumvutudila: ‘Minu ngyewu yima sola mwingi wuba kilandi kyama mu luyalu!’ Ngye zebi nani wusadisa Zozefi kuzaba tsundu yi ndosi Falawo kalota? Bukyedika, Yave wunsadisa.

Mu sambwandi di mimvu, Zozefi kalundila bidya. Bosi mvu wulandakana nzala yitona mu nza yimvimba dedi bo Zozefi katubila. Batu mu nza yimvimba baba kwizanga kwidi Zozefi mwingi kusumba bidya. Bo tat’andi, Yakobi kazaba ti ku Ngipiti kuba bidya, wutuma kumi di bana bandi mwingi besumba bidya.

Bo bana ba Yakobi batula ku Ngipiti, khomb’awu Zozefi wuba zaba, vayi bawu basa bwe kunzaba ko. Bawu bafukama va ntwal’andi dedi bo Zozefi kalotila ndosi bo kaba mwana ditoko. Mwingi Zozefi kazaba ti bawu babalula mavanga mawu, nandi wuba thota ayi wubakamba: ‘Benu mwidi milenga-mambu! Benu mutidi kuzaba matedi tsi yitu ayi muntomba kutunwanisa!’ Zikhomba zyandi bamvutudila: ‘Ndamba! Befu twisi ko milenga-mambu, vayi ku Kanani tubedi. Tuba 12 di zikhomba, vayi wumweka wufwa, mwana wutsuka wusyedi ayi tat’itu.’ Zozefi wubakamba: ‘Benu kutwala khomb’inu wutsuka akuku, minu yala mukikinina.’ Bawu bavutuka ku tsi’awu.

Buvyokila thangu bo bidya bimana va dikanda, Yakobi wubwe fila bana bandi ku Ngipiti. Vayi ntulu awuwu, bawu banata Benzami mwana wutsuka dedi bo Zozefi kaba kambila. Mwingi kuthota zikhomba zyandi, Zozefi wutula mbungu’andi yi palata mu tsaku yi Benzami. Bo zikhomba zyandi batona kudyata, Zozefi wukamba bisadi byandi: ‘Bawu bama kwiba mbungu’ama yi palata! Tomb’anu yawu mu zitsaku zyawu! Bisadi byandi babakula yawu mu tsaku yi Benzami. Zikhomba zyandi bawala kyunda ayi batuba: ‘Mfumu lemvuka, bika Benzami kenda, vayi bika befu tutovuka va ntulu’andi.’

Zozefi wumona ti zikhomba zyandi babalula mavanga. Kyunda kinwala mu ntima, wutona kudila ayi wubakamba: ‘Khomba zyami, minu Zozefi khomb’inu. Khamb’anu theti, tat’ama wukidi zinga?’ Zikhomba zyandi bayituka beni. Vayi nandi wubakamba: ‘Bikanu kukivana foto mu mambu mu phangila. Kibila Nzambi wumfila mwingi kuvukisa myela minu. Diawu, yendanu mwelanda tat’ama ayi ntwal’anu akuku.’

Bawu bavutuka ku Kanani mwingi kuzabikisa tat’awu tsangu yimboti yifumina kwidi mwan’andi. Yindula mayangi Zozefi ayi tat’andi bamona mu thangu badengana!